生產記 (完)

...bb抹乾淨o左, 助產士就抱o黎同我o地合照, 可惜我部相機連埋我d行李鎖住o左...所以咁珍貴o既相, 只能用我老公子部手機影, 好彩都有300萬像素, 唔太差o既...

之後老公子要離開產房, 助產士就問我想自己疴胎盤定佢o地幫我拉, 我當然叫佢o地幫我啦, 當刻真係咩力都無喇!!! 助產士邊檢查我胎盤邊教另一位助產士, 原來個胎盤都好大個o架! 同一時間, 另一個姑娘就同我講"好靚呀, 含氧量100%呀", 我無深究, 我估係講緊bb血液含氧量o卦, 總之佢話data靚就得喇!! 至於我, 由於無咩野做, 就望o下訓係不遠處箱中o既乖豬, 我見到佢喊都唔喊, 仲睜大對眼周圍望, 好得意!

終於聯針, 係男醫生, 佢話我傷口都算爆得勁...可能因為我生得太耐, 磨傷晒, 佢話我入面有一忽俾bb扯甩o左...由於要聯一段時間, 我就同醫生吹起水上o黎...極好傾咁, 聯針都唔痛, 聯好後醫生同助產士講我呢個產婦都幾得意幾好傾, 我就答佢話之前成晚陣痛o野都講唔到, 而家唔講幾時講...haha!!!

聯完針4點半, 我request姑娘抱乖豬俾我埋身餵, 餵得極成功, 一d都唔痛, 餵o左半個鐘我先連埋bb一齊送上產後房!!送上房其間聽到有人讚bb精靈得意, 可能因為佢一直眼仔碌碌, 唔似多數bb合埋眼啦, haha!!!出到lift大堂, 見到由十點幾一直係產房外等候o既爸媽同老公子, 我o地一齊坐lift去產後房, 我爸己經急不及待猛用手機影外孫, 仲不斷話佢眼仔碌碌呢!!

到產後房5點半, bb要沖涼被人拎走o左, 呢個時間剛好探病時間(d時間真係夾都無咁準!!!), 爸媽細佬妹老爺奶奶姑仔都有o黎, 但我剛生完, 心情仲好激動, 見人就講"生仔好恐怖", "下胎開刀算" 等等, 仲忍唔住眼濕濕...可能因為剛生完, 雖然好開心好多人探我, 但其實我覺得5點半到7點半呢2個鐘探病時間有d難捱, 因為我無得休息, 產後房冷氣又細, 我熱到成身汗媽咪又要迫我襯d飯熱時食, 真係熱到我人都癲呢...

anyway, 終於7點半完o左, 我終於可以躺係床休息o下, 雖然心情激動又熱都唔會訓到, 但都叫有少少時間養神!!

好似到8點幾9點吧, 乖豬終於推番俾我照顧, 我亦終於由懷胎10月o既女主角, 變為乖豬o既工人, 展開我無得訓o既生捱...

生產記 (三)

...好, 終於推落產房, 我係7號房, 間房都幾大o架, 唔知係咪剛騷動完一輪, 忽然宮縮疏o左少少, 我問姑娘仲有幾耐先生得, 佢話通常1個鐘開一度, 望o下鐘, 當時10點多d, 咁即係我要到2點幾先開晒10度...噢...時間變得好漫長呢!!

之後有人幫我放尿同穿水, 有好多暖水流出o黎, 但我唔知究竟係放緊尿定係羊水o黎...

之後姑娘又俾電話我, 我終於可以打俾老公子, 同佢講'我生得喇' , 叫佢快d由中環o黎, 收線後姑娘笑我唔應該咁講, 會嚇親我老公, 因為其實我仲有段時間先生得...

o係產房有笑氣聞(可能因為我己經開多過6度, 都無人問我打唔打止痛針lu...), 但聞住其實都好痛, 但我自問都幾self control, 每到痛楚去到peak時就會拎開唔聞, 一拎開個人真係wing wing o地無乜知覺, 都唔知係咪笑氣有效定係本來痛楚己經過o左peak本來就己經無咁痛...

11點半, 有人o黎check宮頸, 7度, 果然係一個hr一度呢...

7度之後o既陣痛真係唔講得笑, 亦開始有股向下o既力往下推...

12點幾, 我問可以幫我check嗎?但姑娘話唔得, 話我穿o左水唔可以check咁密, 會細菌感染, 噢...仲話我宮縮唔夠密, 其他人似我開到8度應該己經3-4分鐘痛1分鐘, 但我仲係5-6分鐘痛唔夠1分鐘, 咁落去我到生得時就要好好把握每次宮縮o個少少時間!! (諗番呢句, 我而家先明, 當刻掛住痛都唔多明點解佢咁講!) 姑娘亦唔知點解忽然對我講起道理o黎, 話我呢個年紀算後生, 仲唔知講o左d咩, 總之係好語重心腸咁安慰我吧...

點幾開到9度, 有人o黎檢查, 陣痛時開始有好大股力向下推, 呢股力一出現, 應該就係人o地講好想疴o既感覺, 但我又覺得唔似人o地講似想疴大便咁, anyway, 呢股力一出現我就忍唔住成個人chok到彈起, 俾姑娘叫我唔好chok...但我真係好難control呀, 而且己經忍唔住狂聞笑氣, 好鬼wing...

唔知係咪wing得滯, 最後呢個鐘雖然極痛, 但比想像中時間過得快, 2點半, 終於又有人check, 佢o地話我開晒喇, 可以用力生!!!

但...問題o黎喇, 等得老公子入產房同助產士setup好, 我開始feel唔到幾時宮縮幾時無宮縮, 無o左開9度時向下o個股力...總之助產士叫我用力我就出力疴, 但可能係我用力不當, 亦把握唔到宮縮時間, 我有時無宮縮都就去用力, 被助產士叫停, 叫我留番d力有宮縮先用力...但...我真係feel唔到呢...

用o左好多次好多次力, 成頭成身都係汗, 我硬係生唔到, 換氣又唔o岩, 成日一到換氣時就接唔住上一道力, 係個口到噴氣洩晒氣, 我亦開始覺得自己無力生喇, 心諗, 唔通我白捱呢10度陣痛, 到頭o黎無力生要開刀??

雖然我生到無力, 但助產士都好好, 講好多鼓勵說話, 成日話我知見到bb頭髮喇, d羊水好清好乾淨等等...終於唔知疴o左幾耐, 終於頭仔快出喇, 助產士幫我剪 (actually 我一直唔想剪, 但實際上都唔到我揀, 而且到o個刻你亦唔會介意佢剪唔剪, 因為當時只係想快d生到bb出o黎!!), 剪o既時候知道o架, 但唔痛, 剪完再出多幾下力bb頭仔終於出o左, 我成個人鬆晒, 助產士叫我用多一下力, 個身都出埋, o個下感覺暖暖咁, 好正...

就係咁, 乖豬出世喇!!!

3點21分 (原來我疴o左成個鐘, 佢o地話我算生得耐!!!...唉, 我自問都算好力o既女仔, 可能我真係用錯晒力生...), bb重3.165kg (~7磅), 助產士叫我望o下男仔女仔, 我當時望住佢臍帶, 係度諗, 點睇男定女...個腦好似function唔到咁, 但口就照答女仔...hahaha!!!

望多一陣乖豬...忽然好鬼感動, 忍唔住流眼淚, 呢個就係我陀住10個月, 陣痛o左咁耐咁辛苦生出o黎o既女喇...

p.s. 成個生仔過程我一聲都無哼過, 我老公子雖然有入產房陪產, 但佢原來由頭到尾都以為我 '唔係好痛', 因為我無出過聲...(!!!)...講真, 咁痛真係要好專心去抗痛嘛, 邊得閒出聲喎, 掉轉當時我o係產房內聽到外面另一個產婦正好同我相反, 不斷極有中氣咁大吵大鬧, 猛咁俾姑娘鬧, 我當時心諗佢係咪唔多痛就真, 仲咁好中氣呢...

再p.s. 老公子入到產房只係拍下我手以作安慰, 我覺得佢做得好好, 因為我當時根本完全無心情去理佢, 要專心抗痛同專心出力, 如果佢當時出聲嘈我同我講o野, 我一定會仲心煩, 所以真係要讚o下老公子!!!

生產記 (二)

...半夜3點幾??對面個大陸產婦開始發出呻吟怪叫, 好嘈,  姑娘鬧佢叫佢唔好嘈, 話嘈都無用, 至於我, 因為開始要好專心咁對抗陣痛, 我哼都無哼, 心諗, 死啦, 己經好痛喇喎, 但仲未痛到好似對面床咁忍唔住叫出聲, 唔通我宮頸仲未開, 仲有排先痛到對面床咁o既程度?

4點幾5點, 大陸產婦痛到嘔o左出o黎, 我襯陣痛停o左行去toilet時通知姑娘, 去完toilet順道又同姑娘講我見紅多o左好多, 亦痛o左好多, 但姑娘話我5-6分鐘痛得30秒仲未得, 要5分鐘痛夠1分鐘先得喎...

噢...無可奈何, 我繼續戴住眼罩專心抗痛...

天光喇, 6點幾吧?終於有姑娘check大陸產婦宮頸, 之後就送o左落產房, 我問隔離床聽唔聽到佢開o左幾多度, 因為我好想知佢痛成咁開幾多, 我係咪仲有排先痛到佢咁...隔離床話聽得唔多清楚, 但好似係5度...

ic...唉, 我而家己經極痛喇, 但似乎仲有排...

8點幾, 醫生巡房, 求其問我而家宮縮咩程況, 我話5-6分鐘痛30秒, 之後佢o地就走o左, 完全無意欲要幫我檢查...老公子呢個時間打俾我, 我同佢講我痛o左好多, 出唔到院o架喇, 但唔知幾時先落得產房, 可能仲要等...

無奈, 襯宮縮停去刷牙, 襯宮縮停快口狂送醫院早餐入口(無錯, 間直就係倒入口咁滯, 因怕好快又痛過食唔到...另外, 早餐係火腿通, 雖然無心情食, 但印像中係幾好味!!)!! 唔痛時仲同隔離床傾到幾句, 其餘時間就繼續帶住眼罩唔出聲專心抗痛...

9點幾, 頂唔順, 真係己經痛o左好耐, 而家o既痛仲間中好似有少少力向下推咁, 總之痛得又唔同o左少少, 就算未落得產房, 都好應該幫我檢查啦, 好歹都俾我知開o左幾多, 仲要痛幾耐嘛...於是襯姑娘經過request要檢查, 可惜, 等o左15min都無人o黎show我, 我唯有叫隔離床幫手叫姑娘...

10點, 終於有2位姑娘o黎幫我check...

一check...

姑娘: 嘩, 你都犀利喇...

我: 點呀, 開o左幾多呀?

姑娘: 6度!!

大家想像到我當刻有幾興奮嗎?? 6度呀!!!!!!!!!!!!!!!!!!!!!

真係鬆一口氣, 原來我唔係仲有排先宮口開, 原來我己經終點在望!!!

可能宮口開得大, 產前房一輪騷動好快有人拎床o黎, 我要襯唔痛時自己過床自己除衫著袍, 呢個時候我仲聽到有人問我執好袋未...大佬呀, 自己過床己經好辛苦, 而且我都唔知自己開到咁大落得產房, 又點會執好o野喎...於是我好唔奈煩咁答"我而家點執呀!!"...

過o左床, 我諗起我要通知我老公, 但手機要鎖落袋喇, 隔離床好好人, 問我老公子電話幾號, 幫我通知老公...(後尾先知, 我老公子以為呢個係姑娘...自我落o左產防後就見唔番吹水吹o左大半日o既隔離床2位產婦, 佢o地應該都唔知我最後咩情況...能夠識到佢o地都幾開心, 可惜無法再聯絡喇!!)

離開產前房之前, 病床泊o左係路中心, 之後好多姑娘走過o黎讚我, 話我好犀利, 叫都無叫, 見我帶住眼罩仲以為我唔多痛係度訓緊 (咁專心抗痛嘛, 邊有閒情叫出聲!), 又有人讚我後生所以捱得痛, 又有人話我唔聲唔聲呢d通常先開得快...可能知道終點在望啦, 我心情都好好, 仲有心機多謝佢o地讚我呢!!...

生產記 (一)

自足月後, 雖然明知生仔好痛, 但一直好期待陣痛早日來臨, 因為咁代表我就快可以同肚入面o既乖豬見面!!

踏入39周, 我曾經問過老公子有無話想乖豬幾號出世, 雖然大家都無所謂(因為知道唔係自己控制), 但都不約而同覺得'520'呢日幾好, 而家諗番轉頭都覺得幾得意, 唔通呢d就係爸媽對自己小朋友出世o既直覺??

講番18號(39W1D)凌晨訓覺開始, 我就出現10分鐘一次o既宮縮, 比m痛痛少少, 行得走得活動自如, 到朝早7點幾去toilet, 發現小許見紅!! 10分鐘一次宮縮一直去到19號(39W2D)中午都無變密同加強o既跡像, 紅亦都係好少, 但奶奶同我媽都覺得我好應該去醫院檢查安全d, 所以當日下午我就同我屋企食個lunch就到威院喇!!

到威院7F, 當時門外有幾位產婦等緊, 媽咪先幫我去做入院手續, 我就等做檢查!等o左15分鐘左右終於到我喇, 磅重(63.2kg, 139磅, 估唔到最後體重都唔到140, 肚圍亦無過40寸呢!!)量血壓, 最後就係check宮頸喇!!

一check...

姑娘: 嘩, 你宮頸好厚, 有排都未開呀!!

我: o下, 咁我可唔可以唔入院住...

姑娘: 你而家咩手續都辦晒喇, 無得唔入院喎...

我心諗: o下, 咁你o地procedure上就唔好要我辦o左入院手續先幫我檢查啦...

就係咁, 我就入o左院, 睇見爸媽要走都有少少唔捨得, 因為我好怕訓唔到覺, 亦怕有排未生得唔知要住院幾耐...

入到產前房, 我係34號床, 先駁機check bb心跳同宮縮情況, 人o地check半個鐘, 唔知d姑娘係遺忘o左我定點, 我check o左最少45min...!!! 我訓呢邊8張病床都訓滿人, 有2個同我一齊入院o既, 但佢o地過o左幾個鐘見未陣痛只見紅都要求出院, 另外2個產婦就己經住o左一日, 但周數都係37左右, 未生得亦要求出院...um...正當我都疑惑緊係咪要求出院時, 我留意到我d宮縮好似終於密d喇, 有時8分鐘, 有時5-6分鐘, 雖然都係唔多痛, 但似乎有d'進步', 算啦, 都係住一晚院睇下點啦!!

是晚, 出院o既都出晒, 我呢邊病床得番連我在內5個大肚婆, 除我同另一個大陸產婦係生得外, 其他都係因其他事(check糖尿之類)入院, 估唔到大家幾o岩傾, 就係咁吹水吹到12點, 時間都唔太難過, 不過佢o地都覺得我行得走得笑得, 認為我可能到第二朝都係要出院, haha!!!

深夜來臨, 我訓唔著, 開頭係因為陌生床, 亦因為緊張mon住自己宮縮時間, 後來開始有睡意喇, 但己經再訓唔到喇, 因為宮縮開始加強, 開始痛喇, 點幾兩點落床去toilet, 開始要扶住o野先慢慢行到, 甚至要等唔痛先郁動到...

39W

17/5/2011 (39W)

肚圍: 39寸, 體重: 後補

======================================================

乖豬究竟幾時出o黎呢?我呢兩日訓覺盤骨越o黎越yuen痛, 要猛咁轉身先訓到呢!!!仲有一星期就到預產期喇, 要捱埋去, 加油!!!

======================================================

18/5/2011 (39W1D)

尋日先o係facebook倒數最後一星期, 朋友們都研究起乖豬個星座, 話21號之後係雙子, 之前就係金牛!有人話雙子座靚d, 又會同我老公子獅子座夾d, 但亦有人鐘意金牛座多d...點都好, 其實我對星座一d認識都無, 只知我爸媽都係金牛座, 乖豬係金牛座我諗我都同佢相處到o卦...haha!!!

...anyway, 我估乖豬佢等唔到做雙子座喇, 話說尋晚12點幾開始又試出現10分鐘一次宮縮, 我又試好緊張計時, 到2點半先訓得著...之後到5點又痛醒, 由於怕好似上次流料咁唔痛, 我又緊張到計時訓唔番, 到朝早7點幾差唔多訓得番時老公子又起身番工...咁我當然即刻話佢知我好似出現o左有規律o既宮縮啦!!!

老公子問我咁係咪快生得, 我話唔知呀, 都未見紅, 點知呢頭講完去toilet一抹, 見到好淡粉紅色呢...

我: 見紅喇喎 (語調輕鬆同帶點開心, 因為等o左呢刻好耐!)

老公子: o下!!!!!!!!!!!!!! (語調充滿驚嚇同緊張, 明顯俾我嚇到有d措手不及!)

老公子: 咁我仲番唔番工??

我: 番啦, 而家都唔多痛, 10分鐘先一次, 5分鐘先叫密要入院, 而且都係見好少紅咋, 我諗仲等得, 我想訓o下先...

就係咁, 老公子番o左工, 而我, 當然訓唔著啦, 而家諗住舖o下床單, 做埋想做o既o野, 再留意住宮縮情況...

加油, 似乎真係終點在望喇!!!

乖豬, 期待跟你見面呀!!! 

今日天氣晴朗, 心情都特別愉快!!hehe, 不過尋晚訓得太少, 好大個黑眼圈呀!!

39w1d, 應該係最後一張大肚相喇!!

======================================================

下午4點喇, 煮完lunch舖好乖豬張床沖涼洗頭同洗埋衫...由尋晚12點到而家都仲係10min contract一次, 無密到亦唔見得痛o左, 紅亦得好少, 抹先見到...um...咁落去, 其實今晚都未必需要入院吧????

======================================================

19/5/2011 (39W2D)

真係...唉...我諗大家都估唔到我仲會update blog...

事緣我直到而家訓醒近10點喇, 即由出現10min 宮縮一次到而家己經近34個hr, 宮縮都仲係10min一次, 無密過, 痛o既intensity只可以話多過尋日少少, 我依然行動自如, 最慘連紅都唔係成日見, 有都只係間中去完toilet抹先見到分泌帶丁點啡紅...

尋晚好彩無入院, 仲訓得鬼咁好, 只係間中痛醒或去toilet...

如果唔係媽咪同奶奶都出聲叫我入院check, 我相信以我呢個狀態, 我諗我都費事入院呢...

似乎我產程都應該幾慢, 我懷疑痛o左咁耐, 一度都未開囉...等我尋日見紅仲以為bb一定係金牛座, 睇怕...唉...咁落去, 真係無乜信心呢2日生得...

點解會咁o架...

而家, 我打算再沖個涼, 之後就同媽咪爸爸(佢開始放大假)食個lunch就去威院喇, 唔知check完係乜景況呢...希望未生得就pang番我出o黎啦, 度數開o左生得就幫我催快d...

第七次健康院檢查 (38W)

10/5/2011 (38W)

肚圍: 39寸, 體重: 139磅 (咦, 個肚無再脹大喇喎, 生得前唔知過唔過40寸呢!!)

======================================================

尋日傍晚下腹好低好低位置有d怪痛, 種痛之前未試過o架, 似係乖豬己經移得好低好低然後郁到我痛咁呢!! 由於之前未試過咁痛, 所以我都有諗係咪生得, haha, 不過種怪痛只係一下一下咁, 同埋個肚皮無硬晒, 所以只係流料...

唔知真正o既陣痛會係點o既呢...希望我withstand到啦!!!

======================================================

11/5/2011 (38W1D)

老公子忽然問我放一個星期假係咪都夠, 我梗係覺得唔夠啦, 原來老公子話好難handover喎...但老公子又唔係無假, 又一早同老細講o左嘛, 所以我唔會讓步o架, 老公子一定要最少放2星期...乖豬大晒o架嘛!!!

======================================================

12/5/2011 (38W2D)

考慮o左一排, 最終都係決定買部高清dv機拍乖豬, 因為手頭上部相機唔可以拍高清呢!!!

大家都知我老公子一向唔鍾意影/被影相, 所以之前其中一個好大考慮, 就係怕買o左老公子唔幫我同乖豬拍片!!! 雖然老公子之後用唔用仲係未知之數, 不過, 睇番我爸當年係我一歲幾時就用自己幾倍人工買部攝錄機, 等我而家都可以睇番我歲幾時o既片段, 我同老公子都覺得呢樣投資應該係值得o既, 更何況而家買部dv機根本就唔使幾個月人工, 可以拍得清d靚d等阿女大個睇番, 相信大家都開心o既!!!

仲未拆盒, 我想迫老公子試機, 唔想佢又依賴我去試, 變o左又係得我識用佢唔識用...

乖豬仲未有聲氣...雖然都真係想佢早d同我o地見面, 不過我都開始意識到乖豬o係我肚入面o既日子買少見少喇, 要好好記住乖豬係我肚入面同我心連心o既感覺!!!
乖豬, 你出o左世就係一個獨立個體喇, 我再唔可能去到邊都同你一齊o架喇!!!

肚皮大特寫, 好彩個肚臍都無突到出o黎, hehe, 仲見得o下人o架!!

======================================================

今日又約o左cindy同rebec lunch, hehe, 好開心, 唔知今次係咪生B前最後一次同佢o地食lunch呢???

lunch後去健康院, 第7次健康院檢查喇, 如果好彩, 應該係最後一次 (下次仲要去o既話己經40w2d o架喇!!!), 其實佢cut o左資源36周後都係2wk檢查一次都未嘗唔係好事, 因為無事無幹, 下下都成個鐘例排check o個幾樣, 的確有少少麻煩!!

今日都一樣, 驗尿血壓磅重正常, 腳只係少少腫, 摸肚時姑娘話bb己經落o左好多, 我問係咪即係唔使等到40周就生得, 佢無正面答呀, 亦好似上兩次咁, 問我仲有無去私家照, 我話無喇, 但32周時係掉o左頭, 我問佢係咪好難摸佢個頭, 佢話都係, 唔多明顯!! 不過依佢所摸, 似係落o左好多, 只差在宮口幾時開咁解呢!!! 係就好喇, 我唔想等到40周呢!!! 最後見埋姑娘, 今次我無o野想問(其實都真係無咩好問喇), 結果1個鐘左右終於走得!!!

希望下次去健康院唔係產檢, 而係抱住乖豬去啦!!!

======================================================

13/5/2011 (38W3D)

今日落雨, 媽咪叫我唔好出街...嗚...被困在家, 好悶呢!!!好彩今日天氣唔太熱咋...

講番尋晚, 約凌晨5點我都唔肯定係急尿定肚痛醒o左, 於是去toilet, 忽然一下好似攪肚痛o既感覺出現, 持續2妙左右啦, 係咪陣痛o黎o架???由於太緊張, 之後我就訓唔著喇...之後好穩約有d攪肚痛感覺, 但都無之前o個下咁強, 後尾仲無埋添, 結果我7點幾再訓到9點幾先起身...

之後都係少少肚痛, 其實可能係我尋晚食o左龜靈膏, 所以清腸胃吧???...anyway, 總之又係流料, 成日自己嚇自己添...似乎我唔應該咁緊張呢...hahahhaa!!

======================================================

14/5/2011 (38W4D)

蔡少芬生o左個9磅幾巨b女, 好勁呀!!! 唔知我乖豬出世又會幾重呢??? 話晒我32周之後都無再照過乖豬喇, 唔知佢係咪仲係中碼size呢??

另外, 呢幾日等到好悶呢, 有d似等運到咁, 究竟乖豬幾時會出世呢???

======================================================

15/5/2011 (38W5D)

繼續疑神疑鬼...話說尋晚5點肚痛醒o左, 同假宮縮o既感覺差唔多, 但係就似m痛, 心諗, 仲唔係??但去toilet又唔見紅喎, 番上床囉囉戀係度check時間, 發現差唔多10分鐘假宮縮一次, keep住個半鐘都係咁, 仲差d想叫醒老公子叫佢今日唔好踼波...正打算唔再訓, 去toilet坐o下, 點知d宮縮就咁就停晒, 之後番上床由朝早7點幾醒到10點都無再痛醒...嗚...點解又係流料???

雖然又係流料, 但o個種有m痛感覺o既假宮縮都頗痛, 如果感覺再強烈d相信都真係幾痛苦...真係要有心理準備先得!!

======================================================

16/5/2011 (38W6D)

似乎乖豬想住到第39周喇...hahaha!!

母親節快樂 (37W5D)

母親節快樂呀!!! <== 呢句祝福除o左同媽咪講外, 仲包括好多朋友同blog友仔呀, 唔知點解好似越o黎越多朋友做o左母親, 感覺好似好熱鬧咁呢!!!

雖然肚入面o既乖豬就快出世, 今日同親友lunch慶祝時親友話我都算係'母親', 但老實講, 我仲係無咩特別感覺呀, 可能因為我仲未真係感受到為自己小朋友日夜擔心, 做母親o個種甜酸苦辣啦!!!

Anyway, 乖豬雖然未趕及同我慶祝今個母親節, 但唔緊要, 出年母親節乖豬快一歲, 到時我o既感受一定同而家好唔同, 唔知到時會係點o既呢?? 

講番今個母親節, 同以往一樣, 我同一大班親友lunch出去食飯同婆婆慶祝!!

呢度係'會所', 因為舅父同呢度大廚由細識到大, 所以過時過節我o地都好多時o黎呢度食飯!!!
叫到成台都係, 好豐富!!

因為識人, 所以可以特地order一大盆芒果布甸!!!真係超大盆o架, 仲好好味, 雖然明知自己己經夠熱, 食芒果唔多好, 但都忍唔住食o左兩碗!!

另外, 舅父舅母們都知我就快生, 買o左d禮物俾我, 有探熱器, 肛探, 換片墊, 整手/腳印o既o野同蜜糖皂!好多謝大家呢!!

下午番到屋企我同老公子都好忙!!!因為老公子尋晚飲拎o左個乳豬頭番屋企今晚煲粥, 佢忙於預備煲粥d材料, 本來我都唔想自己落手落腳砌床, 但睇見老公子咁忙, 我就幫手砌網床啦, 應該唔太難o卦!!!

Babytrend網床!!

砌好喇!!最難係set起張網床企好, 其他都好易整!!

原來都幾大張o架, 砌完個廳無乜位, 茶几都要放去sofa另一邊, 用電腦同放搖控都忽然好唔方便, 要好好習慣o下先得喇...

網床砌好後, 老公子都預備好煲粥d o野, 開始砌木床喇!!

原來木床都幾易砌!!我o地呢張26寸闊, 開頭好驚砌完無位行, 好彩泊晒埋窗都仲有條走廊, 比想像中好, 至少唔使打橫行攝入房, 我仲可以免強坐係梳妝台吹頭...

我同老公子都好鍾意張床, 因為張床係可以搖o架, 到時夜晚乖豬扭計, 唔知搖o下張床'暗'佢訓有無用呢??

砌完床我就去沖涼, 老公子就做大廚!!

老公子除公仔麵外就只識煲粥喇!!!仲記得第一次食老公子煲o既粥真係感動到眼濕濕o架!!!自此之後, 我就成日同老公子講, 我係唔會學煲粥o架, 因為要留番俾老公子煲, hehe!!

炒麵係外賣o既~~我問老公子今餐煲粥唔使我煮飯同母親節有無關係, 佢話無...haha, 其實我都知係無關係o架, 只係咁o岩老公子尋日去飲拎o左個豬頭番o黎咁解咋...anyway, 我心入面"當"係同母親節有關係都一樣o者, hehe!!!

真係辛苦晒老公子今個母親節煲粥砌床搞到身水身汗呀!!多謝你!!
祝大家母親節快樂!! 

p.s. 等我講o下點解我會買網床啦!!!

其實主因係因為我對'high chair'有偏見!!! 老實講, 我係大o左肚後先知而家d high chair原來唔止係'high chair', 仲係"變形金剛", 可以做迷你搖床俾初生bb訓, 但一張呢d變形金剛平d o既都要近2千, 同我心目中對high chair o既概念~ 只係for食飯 ~ 起o左太大衝突, 所以我覺得用咁貴買張變形金剛實在太唔抵!!!

但木床放o左房, 的確唔可以搬o黎搬去, 所以廳點都要搵d o野俾bb訓, 方便照顧, 於是我就留意到網床!! 上網見babytrend呢款網床有兩層, 又有換片架同雜物袋, 仲要音樂盒同吊鈴, 好實用, 大個又可以做小朋友遊戲area, 我又識好朋友都係用緊同一款, 最重要係hkd900咋, 到乖豬識坐要食飯, 買張純high chair都係幾百, 加埋抵過一張唔知可以俾bb訓到幾時細到飛起o既high chair搖床多多聲呀!!!(師奶斤斤計較毛病發作...)

另外仲有一個重要原因, 就係我打算唔會隔太耐生第二個(!! haha, 有朋友話我agressive!!), 如果得一張變形金剛, 到時一個b要食飯一個b要訓廳咁點算?唔通要2張變形金剛咩???所以係廳訓o既床同high chair都係分開係兩件獨立個體好d呢!!!

(hehe, 我知好多人都買o左'變形金剛', 以上言論純個人意見咋, 絕無得罪意思, 請見諒!!!)

足月 (37W)

3/5/2011 (37W)

肚圍: 39寸, 體重: 138磅

======================================================

yeah, 乖豬足月喇!!

己經放o左好幾日假, 暫時都算充實, 想k.o. o既task一個個做好, 剩低o既task都唔算太多!!不過呢幾日假依然都係訓得唔好, 一晚3次toilet係基本, 仲要加埋中間轉身、膊頭同盤骨唔舒服而醒...總之而家由朝到晚都真係keep住眼訓mode啦, haha!!!

本來尋日諗住叫老公子砌木床, 點知有人懶, 踼完波太支力唔願郁, 俾我話佢唔好咁老定, 之後夜晚臨訓, 佢無啦啦問我如果入院係點去, 我話call的士, 之後佢就成個彈起即刻出廳去搵call的士張紙...又會無啦啦咁上心, 都唔知係咪要讚, haha!!!

======================================================

4/5/2011 (37W1D)

尋晚番奶奶度食飯, 佢己經將番大陸買o既十幾斤薑刨晒, 仲掠乾埋d薑皮俾我添!!

上網搵o左少少煲薑水驅風o既資料, 參考下:

產後護理 - 薑水

薑水驅風論

今日係媽咪生日, 爸爸放假, 所以我11點幾就跟佢o地出o左mega box shopping, 行ikea同jusco, 不知不覺行o左好耐, 3點媽咪係都要我去坐低休息, 其實我都唔係太支力, 不過o係麥記坐低一刻, 原來條腰都真係幾支力呢, haha!!!

======================================================

5/5/2011 (37W2D)

今日約o左rebec同cindy飲茶, 好多謝佢o地o黎探我呀, hehe!!! cindy由1點坐到2點半, 之後我同rebec繼續傾到差唔多4點先走呢!!!

今日係爸爸生日, 所以夜晚番o左我媽咪度食生日大餐!!

今年細佬同佢女友都係去帝苑買蛋榚, 上年個朱古力蛋榚真係好正, 今年就試芒果林明頓, 清d無咁漏, d cream仲好好味, 忍唔住食晒!!!

另外, 佢o地仲買o左3件細cake試, 不過我覺得呢3件味道普通d!!!

之後就食伍仔記+東江雞外賣, 好豐富!!!

當然仲有我媽整o既美味沙律啦(不過無影相!!), 食到好飽好飽呢!!!

祝爸媽生日快樂呀!!!唔知乖豬會唔會同爸媽同一個星座呢?

======================================================

6/5/2011 (37W3D)

今日煲o左腐竹蛋糖水, 跟住網上d食譜, 我煲到d腐竹溶晒呢...早知留番少少遲d放啦, 咁先有d咬口嘛!!!

另外, 今日天氣好熱呀, 我無出街成日坐係度對住風扇都熱到出晒汗...真係好熱呀!!!!

希望乖豬d皮膚都係咁白滑啦!!

======================================================

7/5/2011 (37W4D)

早幾日先同friend講我只係抽o左兩次筋, 仲要係個人醒o左, 一抽就自己拉得番唔多痛...唉...呢d o野都係唔好認叻, 因為今朝我仲未訓醒, 只係轉身咋, 點知就抽喇, 仲要自己拉都拉唔番,痛到要叫出o黎嚇到老公子彈起問咩事, 由老公子幫我拉o左陣先無事咋...

不過今次真係抽得好勁呀, 我而家行路都仲feel到舊肌肉好痛囉...嗚...

下午有人上o黎做家居清潔示範, 其實我己經試過n次俾人refer, 我每次都怕麻煩拒絕, 但今次諗住襯乖豬未出世, 諗住有人免費清潔喎, 咁咪應承囉, haha!!

其實個示範都唔算同你清潔得好detail, 主要都係睇下佢部機點樣吸走d塵螨, 其實我同老公子都有d impress o既, 但都知d吸塵機同空氣清新機唔會平, 所以都係聽完就算喇!!

夜晚老公子去飲, 我又煲白蓮鬚飲, 第二次飲, 好似無想像中咁難飲呢!!

放假 + 第6次健康院檢查 + 剪髮 + 清胎毒!! (36W)

26/4/2011 (36W)

肚圍: 39寸, 體重: 136磅

======================================================

9個月肚喇!!!!

過去幾日繼續都係訓得唔好, 都唔明點解4-5點去toilet o個轉硬係就訓唔番, 太可惡, 搞到我而家個樣好殘...好彩, 番埋聽日我就放假, 到時真係要訓多D先得!!

======================================================

27/4/2011 (36W1D)

今日係我last working day, 阿姐咁橋今日放大假放到5月9先番工...雖然唔係只放今日, 但有時真係好難唔令我覺得佢揀今日放假係'有d o野'...anyway, 尋日俾佢追o野追到氣咳 (平時5點半放工, 尋日6點幾先走得!!), 以為今日都會好忙, 點知佢放假, 變相我last day又可以好得閒, 真有趣!!!

本來真係諗住低調咁走, 西餅同farewell email都唔預備, 不過見我走o既消息都開始多人知, 連farewell飯都食o左人o地3餐, 所以我今日都有做足farewell程序!!!

好開心收到幾個同事reply我farewell email, 主要都係祝福我將要成為媽咪, 進入人生另一階段, 真係好warm!!其實係呢度雖然做得唔太耐, 但同一班admin阿姐都幾好傾 (我諗我真係幾有潛質做師奶!!), 佢o地知我走都o黎同我吹水, 好替我開心咁, 仲問我係咪好細個, 係咪未夠30, 知道我係80後好似好興奮咁, 覺得真係好細個, 好搞笑, HAHAHA!!!遲d啦, 等我遲d真係settle好, 我覺得我真係會抱BB番公司探下大家o架!!!等我呀!!

另外, 今晚老公子出trip, 聽晚先番, 唔知係咪呢兩日覺得乖豬好墜, 搞到本來一d都未緊張o既我尋晚忽然好緊張, 胡思亂想好怕乖豬偏偏會o係老公子唔係度o個晚出o黎呢...

======================================================

28/4/2011 (36W2D)

放假第一日o既task係去剪頭髮同去健康院檢查!!

今日同媽咪lunch後2點去到健康院...嘩, 做乜今日咁多人o架, 登記都排長龍...見咁多人, 咁o岩今日又有個入院準備o既講座, 咁唯有登記完聽下講座先啦!!個講座開頭講o左d餵人奶o既注意事項, 之後就講入院準備, 其實呢d我大約都聽過同知知o地, 所以都幾悶, 於是扮去toilet先去o左驗尿量血壓先, 費事講座完o左多人!!

驗尿同血壓(120/83)正常, 不過睇番record, 我今次上下壓比之前咁多次都高o左少少(之前in general都係110/66), 唔知咁有無咩特別indication呢??anyway, 都係正常範圍, 姑娘話我都無腳腫, 血壓好靚就算喇!!

之後都唔係等o左好耐就有得見醫生, 醫生睇番我一路d record都話我陀得幾好, 之後就幫我摸肚, 摸肚時不斷問我覺得急尿多d 定個胃頂住多d, 摸完仲問我仲有無打算去私家照!!

原來, 醫生話我個肚真係有d 難摸, 話下面唔算太明顯有舊硬o既物體 (即頭仔!), 不過依醫生'感覺'同聽心跳o既位置都屬偏低, 醫生都'有信心'佢係轉o左頭仔o既, 只係佢亦都話, 去私家照多次知道佢係咪真係調轉頭都唔係壞事咁解~~~~

UM...既然醫生都話佢係'有信心'覺得無摸錯, 而我身為媽咪亦憑胎動'有信心'覺得乖豬係轉o左頭, 我諗我都係唔會再去私家照o架喇!!!

醫生最後叫我2星期後番去...o下??唔係36周開始每星期番去o既咩? 醫生話而家改o左喇喎, 就算36周後都係2周先番去一次...唔通真係政府資源不足, 連檢查都要cut呢!!

3點9終於走得, 今次要拎番張檢查記錄, 原來我要隨身帶住份o野o架, 以防萬一喎!!

之後我就去剪頭髮喇!!!由於之前剪o個間執o左, 今次求其搵o左間去剪, 我講明要剪到膊頭長少少, 一定要束到辮同盡量偷薄, 點知個師傅掉轉仲有要求過我, 話到膊頭會令頭髮'HIU'起, 叫我唔好剪太短, OK, 其實我都唔介意長d o既...

好喇, 剪完師傅叫我摸下夠唔夠薄, 我話好似唔夠短, 叫佢剪多兩寸, 不過佢就話再剪就無o左層次無咁好睇...我insist要短多少少, 佢先再幫我剪短2寸, 至於厚薄, 我都話唔夠, 但佢都係話太薄唔好睇, 仲叫我望下地上面堆頭髮, 話其實佢都幫我剪o左好多, 偷薄o左好多...雖然最後佢都有再幫我剪薄d, 但我個人覺得真係唔夠薄呢, 印像中以前再剪薄d都試過...anyway, 唯有寄望生完甩緊d頭髮, 咁就自然再薄d算數...

左: 剪前; 右: 剪後
um...睇相更加覺得師傅剪得唔夠短囉...希望我忍受到呢個厚度o既頭髮, 坐月捱得幾耐唔洗頭就唔洗啦!!!

P.S. 其實我又唔係重o左好多, 但隨住孕期到尾聲, 連我自己都覺得自己塊面圓o左脹卜卜o左, 比起32周影大肚相, 個樣不知不覺多o左種'媽媽相'呢!!!

再P.S. 今日我o係超巿俾錢時跌o左一個銀仔落地, 超巿職員好好心叫我唔好執, 話幫我執, 但我唔想麻煩職員特登走出收銀台幫我執, 於是一句 '唔使喇, 唔該', 之後就一o野'mau'低執錢...結果我就因為呢個動作俾我媽'鵝'喇...佢叫我唔好成日咁粗魯咁大動作呢, 話一下扯到唔知邊度咁點算...但我自問除坐低起身同訓覺轉身困難d後, 仲算身手靈活o架嘛...所以一下大動作o左少少o者, 唔好咁緊張啦!!!HAHA!!

======================================================

30/4/2011 (36W4D)

今日又完成o左一個一直想完成o既task, 就係去cut信用卡!!!其實大半年前都cut o左好幾張, 今日再cut多5張, 終於將結婚時猛咁申請, 而家無再用o既信用卡cut晒, 真係一身爽, haha!!

尋日番奶奶度食飯, 佢俾o左兩包白蓮鬚我, 叫我而家開始每星期飲一包!!我剛剛煲完, 原來都幾難飲o下, 所以都落多o左少少冰糖...

隻蛋太熟~~~

另外, 今日我媽就介紹我去買呢個手磨杏仁蛋白茶, 佢話好好味, 飲o左應該可以令乖豬皮膚靚d, haha!!!

復活節假期 (35W)

19/4/2011 (35W)

肚圍: 38.5寸, 體重: 136,磅

======================================================

最近尿頻得緊要, 一晚最少3次toilet, 明明都醒o左, 諗住忍到鬧鐘響先落床, 點知乖豬郁郁郁, 急多幾錢重, 都係要去個toilet...一晚醒幾次, 雖然無好似之前咁醒o左訓唔番, 但依然都係極眼訓...

======================================================

20/4/2011 (35W1D)

一朝起身狂包雲吞同打乞嗤, 似乎有少少作傷風, 不過應該唔太嚴重, 放心!!!

尋日同事們(食開飯o既飯腳們)送o左個蒸奶煲俾我, 真係好多謝佢o地呀, 其實一直都有d唔好意思, 因為我都resign, 但佢地仲送o野俾我呢~~好彩我都住得近公司, 遲D等我真係settle好, 真係有諗過抱乖豬番o黎探o下同事呢!!

另外, 呢排d同事開始約我食farewell lunch, 本來自己team就定o左今日o既, 點知阿姐sick leave, 唔知係咪我敏感啦, 其實自我resign後, 我同阿姐溝通上好似有d問題, 我唔係太能夠明確咁講咩問題, 總之就好似有少少面阻阻, 可能係我resign的確令佢幾失望吧???所以我有少少覺得佢呢個sick leave係特登...anyway, team head應該會reschedule farewell lunch, 所以, 可能都係我自己諗多o左o者!!

======================================================

21/4/2011 (35W2D)

平訓已經係妄想喇, 估唔到側訓訓得唔o岩pose都開始出現壓住盆骨o既情況lu!!!話說而家我只能兩邊側訓, 點知尋晚向右側訓訓下時覺得盆骨被人壓實晒唔多舒服(唔痛o既!!)咁醒o左喎, 都真係第一次咋, 之後左轉轉右轉轉, 發現要兩邊大脾好平衡咁打側訓盆骨先唔會被壓住, 估唔到打側訓都要咁高難度...hahaha~~~

======================================================

22/4/2011 (35W3D)

第一日復活節假, 今日同爸媽出o左沙田, 我爸知我同老公子打算買部dv, 所以幫我o地去電器舖同d sales了解, 最後得出2強, 分別係sony cx130同埋cannon o既m300, cannon好似貴少少, 但就係光學變焦同光學防手震, 比sony o既數碼變焦同數碼防手震好, 不過老公子又好鍾意sony 部機有golf mode, 可以拍低打golf o既動作...喂喂, 但而家好似為拍個女唔係為拍老公子打golf喎...老公子唔可以成日掛住自己d玩樂o架!!!

======================================================

23/4/2011 (35W4D)

第二日復活節假期!!雖然睡眠質素麻麻, 不過今朝都好早起身, 因為要陪老公子去打golf!!!

去打波前先去新街巿食早餐, 呵呵, 有牛脷蘇呀, 好味!!呢樣係其中一樣我大肚後好想食o既o野呀, 其實我唔係特別鍾意食, 但我諗有幾年以上無食過, 所以好想食呢!! (另外仲有幾樣我大肚後好想食但仲未食到o既o野, 就係麥記早晨全餐, 一哥糯米雞...唔知點解全部都係早餐...可能平日實在太少機會食到呢, haha!!唔知放產假後生b前可唔可以k.o.埋呢2樣美食呢!!)

乖豬, 你爸爸話第二時要帶你學打golf喎~~~

======================================================

25/4/2011 (35W6D)

呢兩日辛苦老公子喇, 因為佢又忙於做家務!!!而家d抽氣扇同冷氣機都洗得好乾淨喇, 加上老公子又成功整好早幾日忽然漏水o既浴室水喉, 實在太好喇!!呢排太陽伯伯開始西斜入屋, 曬被曬衫認真一流, 感覺屋企好似乾淨o左好多, 希望乖豬鍾意呢個家啦!!

第五次健康院檢查 (34W)

12/4/2011 (34W)

肚圍: 38寸, 體重: 136磅

======================================================

好多謝大家讚賞我o既DIY孕照, 而家諗番, 覺得32周拍真係剛剛好, 因為...雖然只係同而家相隔2周, 但我狀態已經'大不如前'喇!!!!

個肚明顯地重o左大o左: 乖豬已經大隻到'Young'住我肋骨, 好似我成個肚都fill up by乖豬咁喇!! 我亦開始'mau'低o左之後極難先企得番起身, 真係連開個電掣(個插蘇總掣o係地下)著電視都唔多想去做...

面同手都有輕微腫脹: 雖然我問o左幾次老公子佢都話唔覺, 但我自己就覺得個樣好似比2周前o既大肚相多o左少少福相, 多o左d'媽媽feel'...手指就更明顯, 因為一早戴戒子已經feel到有少少緊, 唔似之前可能出完成日街先會有少少緊咁呢, 所以我今日開始決定唔戴戒子住喇...

留意無名指, 戒子邊o既肉都'必'o左出o黎, 真係有少少腫呀!!

恥骨同盆骨有d感覺: 感覺有d難形容, 好似有d墜咁, 訓覺時就覺得盆骨好似好鬆, 就好似做完成日運動後成身散o左咁o既感覺...係咪乖豬已經落o左盆骨??

假宮縮密o左: 其實假宮縮自20周開始都偶有出現, 但呢幾日開始好似frequency高o左, 有時都令我有d胡思亂想, 佢會唔會失驚無神早出o黎o架...因為咁, 我尋日催我老公子快d同佢老細講定要請2個星期假 (老公子大安旨意, 一直都未知會老細, 於是我尋日嚇佢話如果我今晚生得, 聽日你就要請2星期假, 你仲唔去講!!!!)...

...仲有個半月, 似乎而家先係真正挑戰呢!!

======================================================

14/4/2011 (34W2D)

戰友一早send SMS話我知佢生o左喇, BB重2.81kg!! haha, 一朝收到呢個msg真係令人太興奮喇, 真係好開心好開心!!!!其實戰友佢尋晚7點幾都仲email緊d坐月湯水資料俾我, 估唔到咁快生o左, 似乎佢生產都頗順利, 唔使痛太耐吧!!!

祝佢BB肥肥白白, 健健康康康, 同埋餵人奶要順順利利!!!

=========================================================

呢幾日陸續收到公司Admin / Personnel o既email 通知我 return staff card, uninstall 公司o既software, email將會expire, 仲有生o左要交證明等等notification, 其實我正式7月中先last day, 估唔到email 會係我last working day (27 Apr)度expire, 又會急成咁o既?? 其實呢排我阿姐都狂叫我清task, 我覺得我走之前應該做唔晒, 仲諗住咁早放產假都唔介意remote番公司幫下手添, 估唔到連呢個機會都無呢!! Anyway, expire o左仲好, 咁即係我番多個幾星期就唔使再理公司d o野, 一了百了!!

=========================================================

第五次健康院檢查, 半個鐘多少少搞掂, 一切正常, 特別問姑娘我覺得自己開始有少少腫, 佢幫我望, 話我只係好輕微, 開始有少少腫好正常, 話因為身體會儲多d水份for遲d餵人奶!!!

摸肚時, 姑娘摸o左好耐, 摸得又大力又認真, 又叫我屈起膝頭又放平咁摸摸摸, 我都估到應該係有d唔妥...原來姑娘話佢摸到有舊硬o既係肚上方, 似係頭, 至於下腹恥骨對上, 佢就摸到d好平滑o既o野 (我估佢係指似pat pat), 於是我就話佢知我2周前先照過頭仔明明向下, 加上之後胎動我都覺得似係bb pat pat鍾意突向左, 腳仔就係右上腹了了下...姑娘就話都有可能係摸錯, 超聲波點都準d, 但我2周前照, bb轉番上o黎都真係唔出奇...

之後我就問, 咁而家都34周幾, 如果真係頭向上, 仲有無機會轉番落去, 佢就話如果係細隻bb應該可以, 不過而家都唔可以做到d咩, 話2周後產檢我會見醫生, 到時醫生摸肚會準d (我心諗: 噢, 都係人手o者, 點準d??), 如果仲係頭向上, 就會安排我去威院照, 真係向上喇, 就可能做人工轉頭...

其實我都睇blog見過有d人做人工調頭, 好似要打麻醉針又有風險咁o架, 我當然唔想啦...不過而家都真係無辨法, 唯有番去再留意下乖豬d胎動同之前係咪真係又唔同o左, 如果都係差唔多, 我又唔多擔心...不過真係要呢兩星期勤力d'輔導'o下乖豬, 多d同佢傾計叫佢一定一定一定要頭仔向下呢!!!

======================================================

15/4/2011 (34W3D)

留意o左成晚, 乖豬d胎動都係同之前差唔多之嘛~~特別係打C Egg, 叫老公子都摸埋一份, 分明就係肚臍對落個位佢chok得最勁, 肚臍對上(即姑娘話疑似頭部位置)分明無乜點chok...打C Egg正常都係chok個頭唔係chok個pat pat啦,係咪??所以我諗都係姑娘摸錯多d...希望作為媽咪o既我感覺無錯啦!!

==============================================================

我將要離職o既消息終於傳篇office喇, 都好o既, 咁我唔使周圍'通知'人嘛, 而且, 好似大部份熟或唔熟o既同事反應都比想像中'正面', 感覺上都係替我開心多, 反而無乜人覺得我放棄份工好可惜, HAHA~~或者表面上的確幾令人羡慕o既, 唔使做o野喎, 表面多風光~~(haha, 得少數有經驗o既先知道, 全職湊小朋友可能仲辛苦!!)

======================================================

17/4/2011 (34W5D)

尋晚10點就上床訓, 點知成晚唔係急醒就係手痺痺醒...我諗最少都去o左5次toilet呀...亦即係每個幾2個鐘就醒, 好辛苦呀!!!我真係好想好想打平訓呀, 打側膊頭會屈住, 好支力, 又會手痺...但一打平訓就會壓住盆骨, 好重好唔舒服...

唉...今日明明星期日呢, 但真係極無精神呢, 嗚...!!

探bb & 木床送到 (33W)

5/4/2011 (33W)

肚圍: 37.5寸, 體重: 135磅 (我發覺我呢幾星期磅數增長都幾平穩, 一星期一磅...um...照咁估, 我諗我到生時一定會衝破140磅大關同腰圍突破40寸呢!!!)

=========================================================

6/4/2011 (33W1D)

今朝起身番到工, 發覺行路左邊pat pat位怪怪(尾龍骨左邊位置, 唔多識形容!), 唔係痛, 而係好似卡唔o岩位o既感覺...就好似啪手指咁, 未啪到之前會有好想快d啪到, 啪番o岩o既感覺...總之我今日成日就係好想啪番o岩個pat pat骨咁, 但啪唔到...好怪呀個感覺...

夜晚, 又俾奶奶姑仔激親, 詳情唔講喇, 總之為令自己calm down, 我夜晚彈o左陣琴...我發現我每次彈錯乖豬都好似會踼咁, 唔通佢識聽我彈錯??

另, 大肚戰友今日開始放產假喇, 38周幾, 好替佢緊張呀~~~

=========================================================

8/4/2011 (33W3D)

尋日Pat Pat位無感覺咁怪喇, 但我發覺我訓覺轉身時只要壓到呢個位就會有少少痛, 之後要夾硬先轉到向左邊訓呢, 似乎真係因為個肚大左重左壓到呢個位痛呀, 好彩行路未至於痛o者, 希望情況唔好繼續變差啦!!!~~

另外, 呢兩晚天氣熱o左d, 我開始feel到咩係大肚婆體溫上升, 因為我竟然可以兩晚都訓到出晒汗, 要咩被都唔冚先得, 以前我無論幾熱都可以冚被包實個人o架, 而家竟然唔得呢, 都幾得意!!

=========================================================

9/4/2011 (33W4D)

活潑o既乖豬!!!

=========================================================

今日下午同老公子入o左屯門探好姊妹o既囡囡康晴!!

康晴bb雖然出o左世半年, 不過發展只係得3個月, 因為佢係早產bb, 26.5周就出o左世, 睇住佢由1磅多少少到而家超過10磅, 當中完全感受到佢爸爸媽媽對佢o既悉心照料同愛, 佢而家己經精靈可愛喇, 真係好得意呢!!!

同康晴玩o左陣我o地一班大姐就玩card games, 好好玩呢!!!

其實我覺得呢個星期開始我有好輕微手腳面腫, 好彩己經影o左大肚相o者!!!

康晴: 乖豬妹妹, 我等緊你出o黎同我一齊玩呀!!!

探完康晴, 我o地落o左去食附近有名o既即撞豆花, 真係好滑呢, 讚!!

祝康晴快高長大, 健康活潑!!!

=========================================================

10/4/2011 (33W5D)

bb展時買o既木床, 遊戲墊同埋床圍今日送到喇, yeah!!! 不過木床應該等我放產假先砌, 期待呀!!!

DIY大肚相2 (32W)

繼續大肚相part2, 影相呢兩日係32W4D同5D, 呢兩日天公造美, 陽光入屋, 影d相效果唔錯!!

===============================================================

老公子登場喇!!!

===============================================================

拍o左N張, 得呢張個位就得靚D咋, 雖然係咁, 但我真係好鍾意呢張相呢!!!

呢張超sexy, 我諗o左好耐post唔post, 但難得影到d曲線咁靚, 加埋陽光下膚色變得古銅色, 性感得o黎都算健康吧...照post, 唔係無乜機會show身型o架喇, haha~~~~

老公子幫手試位, hehe~~~

===============================================================

最後影o左2張室外相, 本來想室外相影多d o架, 但無帶腳架, 呢日又的確幾曬幾熱, 我老公子唔多耐煩, 所以得呢2張, 希望未來呢幾wk我可以再同老公子影番d室外合照啦!!!

我家樓下o既斜岥, 呢棵樹我成日覺得好靚!!!

老公子話我好似去o左效外咁~~~

大肚相分享暫時係咁多喇, 多謝!!!