健康院第5, 6及最後一次產檢 (36, 38 & 40W)

36周 (20130319):

今次有得做B鏈, 上胎o係大埔無做過, 希望唔好收到電話啦!
摸肚, 照舊細3wk, 醫生睇番私家超聲波只係話腳太短唔o係正常範圍, 肚同頭都正常!! 
最後就係問埋醫生關於我早排跌親尾龍骨, 到而家掂到仲會有瘀痛會唔會影響生產, 醫生摸過話位置算低, 應該影響不大, 希望真係無o野, 因為咁耐都仲痛, 我自己都有D擔心!


38周 (20130402):

本來唔使摸肚, 但姑娘見我之前細o左, 所以特登摸, 佢話又唔覺細喎, 希望係真啦, 事關我短短2星期重o左4磅呀, 而家135磅, 上次生Koey前都係140, 差幾磅就追到喇!!! 另外早幾日開始肚底有D痛, 姑娘話係肌肉痛, 個肚咁重好正常...但我佗Koey無試過o架, 唯有都係乖乖用番托腹帶啦!!! 
2星期後未生得先再產檢, 唔知今次係唔係最後一次??

另外, 搵o左鐘點姨姨幫手做家務喇!! 呢個姨姨係朋友o既朋友用開, 做o野都幾乾淨整潔, 不過係口水多o左少少....HAHA~~~


40周 (20130416):

一切正常, 仲係0腳腫...磅重134磅, 比2星期前輕o左0.4kg, 就係呢0.4kg搞到我要見埋醫生先走得, 足足o係健康院留o左2個鐘!!! 不過, 醫生同姑娘都話我個肚唔係細喎, 應該BB出世都會係中碼size, 係就good喇!!!

最後, 今次真係最後一次產檢喇, 因為今日係政府o既預產期, 下星期今日仲未有signal就要入院催生喇!!

20130412: 39周肚, 有40寸, 體重134磅!!! 肚圍同生Koey前一樣喇, 但體重就比生Koey前輕5磅左右~~~

健康院第3及4次產檢 (30 & 34W)

睇番先知上次產檢原來無blog...上次產檢係搬屋後番番大埔做o既, 時間當然耐啦, 所以最後都係決定轉健康院!!

34周第4次產檢, 第一次去瀝源健康院, D姑娘都OK, 仲見到一個之前都o係大埔o既姑娘添!! 至於等, 時間無想像中咁耐, 只係姑娘摸肚話我個肚細左幾周, 所以要見埋醫生先走得先要搞成2個鐘咁耐...

嗚...講番個肚, 4周前摸肚都無話細o架, 今次一摸仲要話細o左3周, 真係嚇一嚇, 雖然姑娘同醫生都話摸肚始終唔準, 同埋誤差加減2CM都係正常, 我呢個只係boundary case, 但要我完全唔worry又真係好難!!! 唔通我搬屋呢個月個人真係太操勞太夜訓??? (我又真係夜訓o左D o既, 有時執下野整下野成點幾兩點先訓!!加上又影studio又去disneyland, 睇o黎真係太忙碌??) 

產檢完之後一日, 約左私家去照, 因為都34周, 想sure佢調左頭同埋想睇下佢出世預計會有幾重!!! 最後照左話佢個頭好大(85%), 肚細 (22%), 同埋腳好短 (4%), 身形比例好似好怪...而家4磅15安士重, 預計出世唔夠Koey重, 唔夠7磅~!! 醫生話其實就算我休息多D養胎都唔會令BB腳長番, 最多都係肚腩大D咁解, 呢個size係少少偏細, 但唔使worry!!

haha, Koey o個陣都好似係頭大肚腩大腳短, 但就無Kobe仔大得咁誇/細得咁誇...希望我生呢名大頭仔時唔好太辛苦就好喇!!

大肚相~Kobe仔 is coming: 造型3

本來呢個團購package主力係影小朋友, 所以為o左影o下大肚皮, 就決定加錢影, 所以就多o左呢套紗同埋最後D相就一半小朋友, 一半以大肚為主題!!

影相時32周o架喇, 肚皮37-38寸, 托賴無肚紋, 仲係好白滑o架, hehe!!!

大肚相~Kobe仔 is coming: 造型2

好鍾意Koey呢身夏日look!!!

大肚相~Kobe仔 is coming: 造型1

32周時一家'4'口去o左Studio影相, 加o左錢影埋大肚相, 開頭都怕影足2個鐘會有好多相想要, 怕要加好多錢, 但出o黎有好多相都好類似, 結果out相out得都好順利, 最後只係加o左1張相錢o者!!!

成輯相最靚都係D家庭照, 真係唔錯, 好滿意!!!

去相:

呢張乖豬雖然走光, 但成家笑得好靚好自然, 所以都係照揀做相架!!

呢張好romantic!!! hehe!!

Koey: 話俾大家知呀, 我就快做家姐喇!!

Koey: 唔知Kobe仔係點o既呢??

健康院第二次產檢 (23-26W)

快27周喇, 而家我體重係122磅, 仲差2磅就番到'家鄉喇!!!

上胎我嘔到6個月, 即24周左右, 今次都就多少少, 到第26周先真係連出街都'未必'嘔 (無錯, 係未必!!), 不過嘔o既程度已經少左好多, 所以體重都有回升, 只係仲係慢D!!!

不過到o左呢個stage, 見Kobe仔中等size又成日踼我, 我都唔係太在意體重喇, 阿Q D諗, 其實扣番我生完阿囡多o左o個10磅, 我而家d 'weight gain'其實都幾適中呀, 至少生完唔使袋多10磅嘛!!!

今個星期終於又番健康院, 無錯呢, 我隔o左都有3個月無番健康院呢, 因為之前又去左威院同照結構, 兩次都有驗小便量血壓, 所以我就懶懶閒無再番健康院喇!!! 今次檢查比上次多人, 但又唔係等得太耐, good!!

基本檢查全部正常, 不過姑娘見我無重過, 叫我磅多次...haha, 再磅都係一樣啦, 我真係仲有嘔緊嘛, 唔重都無法!!!

到見姑娘, 我問o左佢早幾日我左邊盆骨痛到我成日都要就住行o既問題, 但由於我第二日訓醒都已經無咩事, 姑娘都只係話'正常'現像, 所以都無深究喇!!! 

另外, 就係問改地址, 其實上次已經想改, 今次我連form都拎埋, 但姑娘又嚇我話沙田瀝源間健康院好多人, 搞到我最後都無改!! 番到屋企問住沙田o既朋友, 佢話如果一朝同lunch後頭一兩個就等一個鐘左右, 所以好睇安排到幾號酬見, 唔一定等好耐, 而且諗深一層, 由新屋打的去瀝源健康院點都化算過我入番大埔嘛...anyway, 我搬後仲要番多次大埔健康院, 到時access 下係咪真係咁遠先都可以o既, 下次再算!!!

結構性超聲波檢查 (22W)

13/12

老公子特登放假陪我出TST照結構, 11點去到量血壓同留小便, 之後問下原來要等3個, 預計要個半鐘, 於是我同老公子就先去食o野先!! 

我o地去o左老趙, 味道唔錯!!

食完就番去診所再等, 差唔多1點終於入得, 呢個醫生一路照一路唔停口咁講, 不過講o黎講去都係o個幾句, 只係repeat照Kobe仔重要部位都repeat o左有廿次...可能佢覺得大眾最關心呢點啦, 所以不斷重複...我反而覺得上次阿女時去威爾斯個姑娘續part介紹o黎得專業同詳細!!!

照o左15min 左右, Kobe仔一時做yoga, 一時食手指, 一時又捉腳仔, 總之無時停, 係個健康BB, 不過可能照得太快, 我同老公子都覺得咁就盛惠$2050, 真係肉都赤, 仲係覺得威院俾唔到結構期我好唔抵!!!

(Kobe 仔D 超聲波相後補)

點半走得, 行o下美麗華, 原來basement 間Todai close o左後開左少少家品舖, 其中一間專賣好似變型金剛咁o既傢俱, 都幾得意, 價錢雖然唔係想像中咁貴, 而且樣樣都可以接合又好似真係好慳位, 但我真係好懷疑買o左番屋企o既人係咪真係會日日咁又開又關!!

美麗華

行完我o地就番出去旺角, 因為要去砵蘭街睇趟門同玻璃!!

先去朗豪坊

因為想用coupon食雪杯, 開頭以為咁好有得坐, 點知堂食原來貴D仲要計加一, 不過都坐低左, 無理由走...

之後就行砵蘭街, 唔知係咪今次無上次行咁耐, 定係我狀態真係好左, 今次無行到腰斷咁辛苦, 亦睇中o左一D簡單款o既趟門, 總算完成任務!!!

胎動 (18-21W)

21W磅重番番去120磅喇, 不過我覺得呢日著件冬天衫重D, 所以實際可能唔夠120, anyway, 跌8磅升番4磅, 都OK啦, 話晒我出街都仲係嘔得幾勁, 所以暫時體重升得慢D都好正常!!!

講番胎動, 其實踏入16周已經好似feel到少少, 但由於Kobe弟弟實在仲細, 所以每次我'feel'到後都好唔肯定!!! 踏入17周, 胎動開始比較'實在', 我亦比較肯定, 不過上胎我都係17周就feel到胎動, 所以今次都係差唔多, 唔算早過上次!!

唔知係咪我已經忘記乖豬o個陣o既胎動係點, 硬係覺得Kobe弟弟D胎動好似勁D, o係19-20周開始, 我已經係無時無刻都feel到弟弟踼我, 連企o係度都feel到, 到20-21周, 直頭多o左feel到佢好似打司egg 咁有規律地踼, 我印像中Koey應該無咁早打司egg吧??同埋o個陣好似企o係度就無乜feel到踼?? 


由於胎動都幾明顯, 有時仲踼到近肚臍位, 所以呢排都有試o下叫Koey摸下弟弟, 上面條片仲拍到佢俾弟弟踼到'噢'一聲叫, 好肯定佢摸到!!! 雖然同Koey講過弟弟係Baby, 叫佢鍚佢, 佢亦都好似好明白咁, 但唔知o係Koey腦仔入面, 會覺得我肚入面郁o既係乜東東呢??? 真係世上只有BB Koey先會知喇, 到佢大個, 睇怕佢睇番片都唔會明, HAHAH!!

第一次威院產檢 & 第三次私家產檢 (15-17W)

29/10: 

第一次威院產檢, 磅重52.9KG, 即都係116磅左右...

今次唔算等太耐, 見醫生我只係俾第一次ultrasound d 相佢, 希望有機會令佢跟呢個時間改我EDD 而俾structure個期我...點知都係白費心機, 因為佢地有我照oscar o既record, 話BB size跟到last M個EDD o既生長線, 所以唔改EDD, 結果structure都係 話我知無期俾唔到我, 真係失望!!!

所以而家我政府EDD 係 4月16, 而私家照o個兩次EDD就4月19同4月22, 其實我M一向唔準, 4月16一定無可能, 我自己就選擇跟4月19個日子當EDD啦, 因為上網睇D人話8-10W度o既size應該比較可靠!!!

到聽心跳, 原來唔係心跳, 而係照超聲波, 不過醫生一照到心跳叫我望完就無再照, 我只係望到BB心跳同好似見到佢隻腳板仔, 想望多眼都無...之後醫生亦無問我細左o既o野, 咁就睇完, 好求其!!

======================================================================

10/11:

踏入第17周, 仲記得上次陀乖豬時呢個周數去照性別, 結果照o左3次都睇唔到, 當時覺得個checking好似好無謂嘥o左D錢咁, 仲同老公子講, 早知唔check!!! 點知到今胎, 又係為o左只係知個性別, 我都係忍唔住呢個周數走去檢查, HAHA!!!

今日診所唔算多人, 加上有老公子陪我等, 再加上對面開o左間影碟舖播緊"喜愛夜莆2", 睇o下傾o下好快就叫我名喇!!! 

入到去量血壓磅重, 重量比上次去健康院升番1磅多D呀, 睇o黎嘔少o左體重終於止跌回升啦, good呀, 不過由於出街嘔吐問題依然嚴重, 醫生都會繼續開維他命同鈣片俾我o既!!!

到照超聲波喇!!! 先睇到眼窩鼻同嘴仔, 再睇心跳同D手仔腳仔!!! 不過當佢睇緊手仔腳仔時我已經忍唔住狂睇BB脾LAR, 好似見到D o野喎... (後尾先知老公子原來同我一樣都留意緊脾lar!!)

好喇好喇, 醫生終於睇脾lar喇, 佢話'明顯有d o野喎', '肯定係喇, 咁都仲唔o係?'

原來真係'仔'呀!!!! 而且仔真係好易睇, 易睇過女好多好多呀, 唔係馬後炮, 但我同老公子真係醫生未講前都已經睇到係仔, 只係無醫生肯定而唔敢確定咋!!! 

好喇, 之後就照size喇!!!

肚圍: 63%, 少少大肚腩!


頭圍: 82.5%, 大頭仔呀!!! 而且一照個頭時, 醫生同我都不約而同一樣反應, 就係覺得個頭好圓好圓, 唔似普通頭形咁窄D扁D!! 之後醫生都話個頭形可能似我老公子圓D, HAHA, 我都覺我老公子係大頭仔o架喇, 只係佢高唔太覺, 估唔到醫生會係我知音, 總之我個頭一向唔大仲偏細, 呢個頭仔點都唔係似我呢, HAHA!!!

haha, 搵番乖豬17周照o既超聲波, 細佬個頭真係明顯地圓好多呢!!!




大脾骨: 13.9%, 噢, 咁短o既, 似我老公子無理由咁短腳喎, 老公子呢方面就話係似我, 但我點都唔認, 女仔o黎講我對腳都唔算短o卦...

就係咁, 開開心心照完同俾o左8舊幾水, 雖然都係好貴好貴, 但今次知道性別好似已經係一大收獲咁, 老公子見我咁開心仲問我係咪貴D都會照, HAHA!!



講番知道係仔o既心情, 其實知道係仔後我又試好似上次知道係女咁開心到有D眼濕濕同忍唔住猛笑!!! 等我仲以為一向鍾意女o既我今胎真係無咩要求, 但原來知道係仔o個刻都會咁開心, 真係自己都估自己唔到!!! 反而上胎已經想要仔o既老公子話佢都開心但感覺唔大喎, 無咩特別...男人真係男人, 估唔到可以冷靜到咁都無反應...都唔知係咪唔肯去表達o者, HAHA!!

BTW, 上胎諗英文名時已經改好o左仔o既名, 以後就叫蛇細佬做Kobe仔啦, 請大家多多指教!!

P.S. 今胎嘔咁勁, 睇o黎都可以入埋係陀仔數喇!!

害喜改善了一點, 但體重還是...(13-14W)

自12周後害喜好似真係改善o左少少...

無錯, 只係少少...至少, 精神好番D, 肚餓時亦唔會好似之前咁辛苦, 食o野o既份量亦無之前咁少, 之前可能食幾啖都嘔, 而家應該食到半碗先嘔吧...

anyway, 出街食o野真係可免則免喇, 基本上食少少都必嘔, 反而係屋企坐定定就可以食多D, 好間中都可以食到正常份量而唔嘔, 所以而家約親朋友見面, 甚至同屋企出街lunch, 我都真係寧願坐係度唔食好過, 最多打包番屋企先再開餐...

而家個肚又再大o左, 好似至少有5個月肚咁, 但其實4個月都未夠...有時都希望時間可以過得快D, 上胎6個月止嘔, 希望今胎唔好破紀錄吧!!!

至於體重...以為嘔少o左DD體重應該可以止跌吧, 點知14周尾再磅, 得116磅多少少, 比做oscar時跌多1磅喇...噢, 差3磅就回復我未有Koey前o既體重喇, 估唔到生完乖豬一直跟身呢10磅肥豬肉會o係大肚時自動走左先得o架...真係令人又愛又恨呢!!!

乖豬要做家姐喇!

終於夠3個月講得喇!!

老實講, 雖然係好開心可以為Koey添個弟/妹, 但呢三個月對我o黎講真係好痛苦, 因為我o既害喜情況比上胎仲要嚴重, 精神差仲要食唔到o野, 體重已經下降o左6-7磅...希望過o左3個月情況會好D啦!! 

關於之前o既blog, 大家可以睇番下面呢幾篇:


Bingo!! 我等到你了!!(4-5W)

第一次Ultrasound & 去醫院登記 (6W)

嘔嘔嘔, 體重不斷下跌!!! (7-9W)

第二次Ultrasound (10W)

健康院第一次產檢 & 威院Oscar Test (11-12W)

健康院第一次產檢 & 威院Oscar Test (11-12W)

3/10:

11周多d喇, 今日第一次去健康院檢查, 一切procedure都好熟悉, 唯一有D出奇係今日o既新症好少, 我眼見得10數人咋, 唔通蛇年出生率真係低D?

驗尿: 正常

體重: 53.4kg (117.7磅, 比未有B時輕o左6磅多D)

身高: 161cm

血壓: 正常

見完姑娘就見醫生, 仲記得上胎第一次健康院周數細o左聽唔到心跳, 今次周數夠, 所以就順利聽到, 好開心!!

醫生見我嘔得勁輕o左, 開o左Materna俾我, 但我估我唔會食喇, 上胎食完去唔到toilet呀...另外, 醫生話有D人肝功能有事都會嘔得勁, 所以我要抽多支血extra驗肝功能呢!!

見完醫生抽血, 終於見到我中學同學喇, 佢幫我抽血, 佢恭喜我之餘我又恭喜佢, 因為佢月尾就生得喇!!

===================================================================

10/10:

今日去威院做Oscar, 一早就叫我老公子請假陪我, 因為明知要等好耐嘛, 有個人陪下我傾計都好!! 我檢查o既時間係2點, 仲諗住耐極5點鐘都番到屋企啦, 所以今日我媽就直接上我屋企湊乖豬, 唔使將乖豬運番娘家咁麻煩!!!

本來以為好快, 因為2點幾我就被叫入房, 應該係lunch 後section第一個, 點知BB唔合作, 坐o左係度照唔到, 於是就先去抽血, 老公子就去食lunch!!! 番到去3點幾再叫我入房, 今次BB係就係訓係度, 但就成日面向鏡頭, 好難先就到一下打側度到一次頸皮, 結果我又要出番去再等!!! 

同老公子食完TEA (呢度大家樂有炸雞脾, 老公子話超正, 因為出面無得叫, 不過就貴D!!)再等, 結果到5點幾先再叫我名, 真係等到我同老公子傻!!! 結果入到去BB仲係唔多合作, 又係成日正面望鏡頭唔打側, 好難先再度到多一次頸皮, 最後姑娘再叫我行多陣, 一出到房見到所有候症o既人都走晒, 得番我同我老公子, 唉, 點解人人都咁快照得到, 我就照極都唔得...(我o既照聲波圖係好唔清o架, 我話上次10周照私家都話照唔清, 可能係我肚皮脂肪厚o左, 姑娘都話唔出奇, 但我個人唔算肥呀, 真係唔知係咩原因我照極都唔清楚, 令照o既難度高o左!!!)

最後再入去照, BB仲係面向鏡頭(雖然一路都面向鏡頭, 但BB其實好活躍, 周身郁!!!), 姑娘最後都放棄喇, 話就算take3 個readings都係拎一個出o黎check, 所以而家o個2個readings出o黎差唔多, 結果都唔太大影響!!! 另外, 度到o既頭同身長都係中等size, match到13周條線, 噢??? 乜唔係12周咋咩??? 姑娘話係以我last M計, 而家照o既size吻合, 睇唔到我有咩理由要改預產期, 同埋因為我已經過13周, 所以結構已經full o左, 要自己出去私家照!!!

OMG, 結構出去照要幾千呀, 如果真係因為我last計o既周數係13周而無得照, 咁真係超唔抵, 因為我好sure我M期唔準, BB一定未夠13周o架...唉...

最後, 我同老公子終於o係6點鐘走得, 估唔到要由2點搞到6點咁耐, 真係攰到我飛起, 亦辛苦晒我媽咪留係我屋企咁耐湊乖豬呢!!

第二次Ultrasound (10W)

終於可以再同小B見面喇!!!

照出o黎係10W3D, 同上次照o既EDD差3日!! 

小B d手腳仲係好似個波咁, 好得意, 仲見到佢郁添呢!! 一睇見佢郁真係莫明咁開心, 就算嘔得幾辛苦, 腰再痛都好似抵番晒咁!!!

另外, 體重持續下跌, 而家得番118磅, 無o左6磅喇, 差5磅就番番去我未陀乖豬前o既體重喇!!! 醫生見我輕o左, 開o左D維他命同鈣片叫我13周後食!!

嘔嘔嘔, 體重不斷下跌!!! (7-9W)

6/9: 

今次嘔得仲勁過上次, 上之嘔極都食到正常份量o既食物, 但今次每餐食得少少就頂住, 由有左到而家, 已經輕o左3-4磅, 磅數終於回落到120以下, 係就係恨o左好耐, 但都不免有D擔心再咁落去會唔會營養唔夠...

而家我每餐都要當2餐食, 作嘔情況好似真係減少o左, 但人總係有D犯賤, 害喜輕微o左係無咁辛苦, 但我就硬係因此有D擔心, 因為而家只有害喜感覺先令我feel到BB o既存在呢, 所以害喜少左, 難免令我有D胡思亂想, 真係矛盾!!

================================================================

11/9:

終於8周幾喇, 個肚好似大o左少少, 比較實, 有少少唔似之前胃氣脹咁, 不過依然係一朝早個肚會平D扁D!! 另外, 體重依然下降中, 得番119磅, 懷孕後輕o左4-5磅了!!

================================================================

21/9: 

上星期放低個女俾屋企人再瞞住佢o地兩公婆去o左大圍睇樓, 可惜我o地太失策, 就咁walk-in同高估o左心水屋苑o既放盤情況, 由於地產舖無匙係手, 搞到用o左4個鐘都只係睇左3個單位, 加上之前一日又去o左長洲玩o左成日, 真係攰到我飛起, 條腰好似就斷咁, 好辛苦!!

呢幾日害喜好似減輕o左, 我每餐食到o既份量好似多番, 亦無咁易嘔, 但我亦因為咁又胡思亂想...好彩, 我一出街食飯依然嘔吐大作, 咁先無咁驚!!! 下星期一終於可以再同小B見面喇, 好期待呀, 我好掛住你呀!!

第一次Ultrasound & 去醫院登記 (6W)

嘔到傻, 仲好似嘔得勁過上次!!! 辛苦到上網搵止嘔方法, 就係按壓巨闕、期門、內關、太沖穴

Ref: http://myblog.marbo.com.tw/poan/Post/3186

http://www.homebackpainacupressure.com/acupressure-for-sea-sickness.html

頭一次試好似真係幾有用, 有D滿心歡喜...但係, 出街食飯原來都係無用, 依然食乜嘔乜, 唉...

====================================================================

30/8: 

一check 到bingo我就打去睇開o個間診所約時間照閃閃, 點知booking太full, 要成個月後先有得睇, 到時都8周幾囉, 由於唔想太遲去威院登記 (你知啦, 而家生仔都要鬥快咁!!), 所以上網搵資料睇下邊度有得照!! 結果, 我就襯我爸放假呢日, 我可以放低個囡就去上水睇, 呢間診所walk-in就OK, 我未夠10點去到, 等左近一個鐘, 個醫生都幾OK, 照得都算詳細!!!

佢照到一個胎囊 (我心入面又禁不住有少少失望喇!!! 睇o黎我真係好想好想生三個呢!!), BB而家得7mm大, 大約6周2-3日, 見到閃閃!! 

雖然呢一切我都經歷過, 但見到閃閃o個陣依然有好開心好欣慰o既感覺, BB呀BB, 雖然你令我嘔到七彩, 但可以見到你o既心跳, 一切都值得, 我再一次可以感受一個人兩個心跳o既奇妙感覺, 真係好感動!!!

除BB外, 醫生仲照到我右邊卵巢有個水囊, 大約2cm大, 佢話算好細, 入面D水都清, 應該算正常, 多數到個BB三個月大左右個水囊就會無左, 佢會寫係醫生紙, 睇下威院到時會唔會安排我照下, 如果仲係度或變大, 先至要做手術切左佢喎!!

UM...既然醫生話正常, 咁我都唔太worry, 總之BB健康就OK, 其他都唔重要喇!!

中午, 難得放低個女, 我今日去左剪頭髮, 上次剪已經係九個月前, 我實在越o黎越頂唔順把厚頭髮, 剪完雖然唔係太夠簿, 但都爽好多, 希望屋企個地唔好再成日見到我D頭髮啦!!!

====================================================================

31/8:

今日我媽上o黎睇住乖豬, 我就一早跟我爸車出威院登記新證, 點知原來登記排期都要等到我11點幾先走得, 真係等到我傻!!!

Bingo!! 我等到你了!! (4-5W)

試o左大半年, 終於成功喇!!! 我終於可以趕及乖豬2歲前為佢添個細佬/妹喇!!!

大半年喇, 話長唔長,  話短都唔短o架!!! 可能上胎實在太順利啦, 所以今次頭兩個cycle唔得之後真係開始好緊張同心急...一直到7月, 我用綠D驗到bingo, 真係好開心, 但由大約4-5周呢段時間綠D一直無加深, 加上身體完全無感覺, 好唔實在, 結果M竟然o係5W時o黎o左, 仲嚇到我即刻睇醫生, 結果原來係詐糊, BB著唔到床, 但因為hormone有變化所以驗孕棒有反應o者, 呢D叫化學性懷孕...

食完詐糊後我猛咁search化學性懷孕o既資料, 似乎好多人之後個cycle都易D bingo, 於是我又有番D信心, 至少呢次詐糊都證明到我係function到, 只係BB唔健康著床唔到o者!!! 

結果, 可能信心大o左, 加上紅綠D又剛用完, 呢個cycle無好似神經質咁猛check, 心情輕鬆D真係成功o左, 真係好開心!!! 不過, 由於怕係詐糊, 所以我都唔敢太快咁老定, 由4-5W呢段時間已經買左4支棒棒驗, 睇住佢越o黎越深色, 連5W都過埋M都未o黎, 再加上我已經狂嘔 (雖然我都好奇怪咁早就作嘔, 但有嘔好過唔嘔喇, 至少證明我身體變化緊嘛!!), 我先敢肯定我今次真係成功!!!

經過呢大半年努力, 我終於明白我上胎係幾咁順利同幸運, 我真係唔敢好似上次咁乜都唔識驚, 一日未夠6W去照BB睇閃閃, 一日都唔敢咁開心住, 睇o黎我呢胎真係會緊張過以前呢...

龍B無望了!

自有o左乖豬後, 便一直計劃要生龍B, 因為成日覺得兩個B相隔年半至兩年係最好, 而我又覺得蛇年唔好聽, 所以就一直想要龍B!!!!

可惜呢, 今日再一次M o黎, 都唔知係第一胎太順利定今次太遲'計劃'(對自己太有信心, 無提早了解period長短, 又無提早幾個cycle try下先...), 實在有點失望...

由年頭'開始'到而家4月中喇, 我只係經歷左兩個cycle 咋, 都唔知點解生完第一胎後半年o黎番M, D cycle長到45-50日, 人o地兩個cycle我先一個cycle...變相少人o地好多機會, 而剛剛呢轉我已經用埋試紙幫手, 但都係失敗, 不禁令我懷疑係咪我身體出o左問題所以唔成功...

anyway, 而家只係叫做試左兩轉, 唯有繼續努力啦, 如果過多幾個cycle都仲唔得先再check自己係咪有問題吧...

自我安慰一下, 其實龍B同我同乖豬生肖係相沖o既, 蛇B競爭又少D, 所以都係唔好失望喇, 下個月再努力啦, 蛇B, 我等你呀!!!