回顧過去, 展望將來!

2017年算係鐵人媽媽過得唔太順意o既一年！負能量太多全家都受影響!

開心事：
去o左2次旅行(沙巴 & 花蓮); Koey入到間心儀o既津校, 細佬妹之後都唔使煩，阿妹亦順利入到上午班，可喜可賀; 屋企清理o左好多BB用品，掉o左High chair, Potty, BB床, BB圍欄等，搬o左書櫃出廳，新添置o左個大衣櫃, 換鞋櫈, 鞋櫃同魚缸(雖然仲未正式養魚), 年尾仲換左個蒸焗爐同二手Staub, 又添置o左d兒童玩意如室內千秋， 總之，住o左五年，屋企有一番新景象，再加上12月老公成月唔使出差, 屋企多番d笑聲, 總算係開心o既!


唔開心事：6月同12月都係黑仔月！6月Koey獲派第一志願本來開心到上天，但估唔到10日後就跌o左落地獄！雖然最後雨過天清，但到今時今日我都仲未明白發生咩事，人性險惡，我要學識好好保護小朋友，保護自己！一波剛停，一波又起！6月尾小朋友輪住流感高燒，終於輪到阿妹中招，仲要燒到抽筋！第一次睇見自己小朋友反晒白眼面唇發黑手腳疆硬毫無反應, 真係嚇到我心都離埋, o個種驚恐真係前所未有, 而家都仲有唔敢諗番起o既感覺!!! 兩件事最最最徬徨仲要係事發時, 老公子都係出o左差!! 雖然老公已經最快速度趕回香港, 但o係咁緊張時刻只得我一個o係屋企面對, 有時真係覺得好無助好孤單!!!


9月Koey小一開學, 惡夢o既開始！全日制後要早起，放學後茶點沖涼做功課食飯訓覺日日如是，咩親子時間都無，母女之間只餘催促同跟時間競賽，身心勞累又破壞親子關係，好辛苦！雖然近來Koey搵到快點完成功課o既方法(邊上堂邊做功課)，但我仲未搵到可以提高Koey做事效率o既方法，慢活係佢性格，要改變唔容易亦辛苦大家！講到尾，都係諗唔明點解政府唔留番少少半日制俾好似我呢d FTM多個選擇，而家先小一，遲d高年班加埋細佬妹都升上小學，我一定死更多細胞！


12月破財又傷身! 先o黎整壞焗爐再整壞電話, 單單呢兩樣已經無o左半皮...再加上聖誕網購大出血, 真係跌錢咁跌!!! 以為破財擋災啦? 錯!! 聖誕假期間全家輪住病, 今次Koey燒o左4日, Kobe燒o左2日, 大人如我都又痾又嘔, 老公子都周身骨痛...估唔到呢個普世歡驣o既大節日就係日日困o係屋企咁過, 都算係近年過得最唔Happy o既Xmas呢!!


回顧到呢度，好似都係關於小朋友o既事，咁我自己同老公o既回顧呢？
Sorry, 好似真係無，彷彿我人生已經同自己無關...

其實今年係鐵人媽媽自信心較低落o既一年...特別係今年染上惡習~~食宵夜同夜訓(1am)後!!!

深深o既眼圈、無精打彩o既眼神、仲有肚腩越積越厚o既脂肪...自信心就係咁完全被打殘！所以今年fb 自拍照少o左，有時唔係無影，而係影極都搵唔到張望落精神見得o下人！

點解要自我放棄？我都唔明！阿妹比較夜訓，好多時到夜晚11點我先有自由時間，其實我都好想早D訓,但網購一陣甚至只係睇一陣fb upload o下相就12點幾，時間好唔見使!! 唔知幾時開始幾塊餅乾一支甜筒就好似仙丹咁，唯我獨享o既感覺令人留戀！老公長期出差，就算唔出差都好多時玩手機，拍拖時間嚴重不足 (全年可能不出5小時拍拖時間...而家要我諗可能只得結婚周年我發住燒食個lunch咁多時間...)少溝通加上老公貴人事忙，普通家事可以拖半年以上都未做到，日積月累多番催促破壞感情...宵夜一碗美味即食麵就成為我同老公o既溝通橋樑！年紀開始大加上長期唔夠訓(阿妹仲未戒半夜叫食奶!), 新陳代謝慢到阿媽都唔認得, 試問想fit想靚點可能? 自信滿滿點可能? 心情靚點可能? 心情唔靚就對小朋友越呵刻, 小朋友就越唔聽話, 結果惡性遁環我就心情更差...休息唔夠鎖事繁重溝通不足都係壓力來源, 有時都認唔住諗, 抑鬱症應該離我不遠了...

展望2018, 願望唔多, 希望暑假大旅行順利老公小朋友健健康康!!!! 亦希望老公飛少d, 對家人積極D, 鐵人媽媽有感力有不繼, 好多事要學識放手...希望Kobe今年有望轉上午班, 實現我期待7年之久可以重獲每天3小時自由時間o既願望, 等我有多點時間處理家人自身各樣大小事, 有時間做o下運動釋放多D多巴胺重拾自信同開心能量, 相信咁先有助屋企各人健康開心發展!

Koey升小一後全家之改變

上篇講到Koey升小後小學雞與小學雞媽媽之苦, 雖然Koey做o野滋油的確係升小要面對o既後最大至命傷, 但其實Koey都有唔少值得我讚賞o既地方o既!!!

讚讚乖女

1. 唔賴床: Koey似我一樣, 一叫就醒!! 雖然都時不時會喊咁口嗌"好眼訓"或訓o係梳化唔郁一陣, 但so far咁早起身算合作o架喇!!! 6:50鬧鐘響7:15落樓, 都算快手!!
2. 會自理: 刷牙換衫著鞋番屋企沖涼等等Koey都係自己包辦, 我基本上只係預備早餐同預備佢番學用到o既毛巾餐盒水樽同幫佢紮頭髮!
3. 自己功課自己做, 自己功課自己執: 雖然做功課速度真係慢o左d同有時唔專心, 但自從開學以o黎我基本上都無對過佢功課亦無續本幫佢執書包, 只係佢做到唔明問我先答同埋開學初期從旁協助下執書包!!! 
4. 享受小學生活: 雖然又要早起又要番全日, 放學番o黎仲要做功課無晒玩樂親子時間, 但每次問Koey番小學開唔開心佢都會俾我正面回應, 每次聽到佢話開心我都安樂d, 至少只係我主觀覺得現今小朋友生活好苦而當時人不自知, 咁都算係好事o黎呢!!!

總之, Koey其實除o左慢, 基本上都唔使媽咪我太操心 (其實要我操心我都無時間去操心...😓), 有時催到我忟o既時候諗下佢其實已經算好乖女, 我火氣都真係會少D!!!

鐵人媽媽一湊三生活之改變

Koey升小要早起, 要番全日班呢d改變當然大啦, 但原來Koey升小, 對鐵人媽媽我都有唔少影響!!!

• 接送困難1: 7點15分一拖三送家姐上校車

老公出差我要7點幾1拖3落樓送家姐校車, 呢個挑戰係我事前一直都好擔心o既!! 雖然為此老公子已經同老細表示要飛疏d, 但隔個星期飛幾日點都走唔甩! 

結果呢, 開學幾日後我已經要一拖三7點15分落樓!!!! 

妹妹剛訓醒look~

又估唔到, 呢個事前最擔心o既task無我想像中咁難呢!!!

其實Kobe 暑假尾有o左個電子鐘後就日日6點幾自動波起身, 好似越早起身越叻, 成日同家姐鬥早, 可能因為咁, 我完全唔使叫Kobe起身, 只要臨出門口抱起阿妹就搞掂呢!

因為上校車地點o係屋苑樓下, 呢個task要比想像中無咁難!!!  

不過...好戲在後頭!!! 隨住近來Kobe再無6點幾自動起身, 加上就快冬天個天越o黎越遲天光, 天氣又慢慢會凍, 1拖3落樓應該難度會增加唔少, 又要叫醒小朋友又要同佢o地著外套, 諗起都驚驚, 希望入冬後繼續順利啦!!!

• 接送困難2: 分身接放學

由於細佬讀下午班, Koey平日有一日會上課外活動無校車,  結果1個5點o係火車站落校車, 1個5點15分o係巿區放學, 我一個人跟本分唔到身!!!

所以, 我每星期都要麻煩我媽咪(Grandma)幫手接細佬校車, 我就出去接Koey放學!!! 雖然我知媽咪絕對唔會托手掙, 但始終山長水遠出o黎只係為接一陣放學, 心理上我都會覺得唔好意思!!! 所以, 我真係超級希望Kobe可以轉到上午班, 咁我帶埋Kobe Kodi出去接Koey放學都可以, 唔使下下要麻煩到媽咪又無咩彈性呢!!

• 接送困難3: 浪費Koey做功課時間

無課外活動o既話, Koey 4點半o係屋苑落校車, Kobe就5點o係火車站落校車!!! 計埋行出火車站o既時間, Koey番到屋企基本上得5-10分鐘, 如果我帶埋佢出去接Kobe, 一個來回番o黎平均5點10-15分!! 計一計數, 即Koey每日會無o左40-45分鐘做功課時間!!!!!!

要知道而家d小朋友繁忙到不得了, 呢40-45分鐘真係唔可以白白浪費去接送細佬身上!!! 好好彩, 我搵到個好鄰居佢肯俾我留Koey去佢屋企做功課, 直至我接埋細佬番屋企, 咁Koey d時間先得以更好地利用!!

不過, 都係同上面一樣, 要日日麻煩鄰居都真係會唔好意思, 如果Kobe轉到上午班就咩問題都無呢!!

• 缺乏睡眠, 鐵人媽媽變身"無記性"媽媽

坦白講, 鐵人媽媽每日'放工'後o既私人時間真係超級琴貴, 為o左享受更長"私人空間", 鐵人媽媽絕對唔係早睡之輩, 而家因為要照顧Koey番學, 本來睡眠時間已經唔長o既我就訓得更加少! 

可能因為唔夠訓, 鐵人媽媽由原本"記性唔錯"變為"極之無記性"...開學後, 因為我無細心幫Koey執書包或無記性而先後欠帶過幾次書/回條/視藝袋/功課, 最嚴重係明明Kobe可以著便服回校慶祝中秋節我都竟然搞錯, 完全無o左年事...搞到我都有d自責同急急諗方法改善自己記性!!!

Anyway, 阿Q d諗, 每次欠完我同Koey都有因此小心o左, 所以欠交唔太密o既話其實應該唔係咩壞事呢!!!😜 

• 煩燥媽媽

1湊3少d精力都唔掂, 鐵人媽媽本身EQ唔算高, 小朋友唔聽我講我就好易"燥", 而家...我o既"燥火"簡直就同Koey o既速度成反比!!!! Koey動作越慢, 我就越"催", 越"催"我就越"火"!!! 基本上, 我發火鬧人o既次數比之前真係多好多...

其實鬧完後我自己都好後悔, 但我發覺好多時自己都控制唔到自己...唉...真係苦了小朋友苦了自己!!!!

所以, 為免更進一步破壞大家感情, 我已經將同Koey 溫書o既責任交o左俾牌氣較好o既老公子身上, 相信咁樣對Koey對我都比較好, 亦係好好o既機會俾老公子同Koey更多時間相處!!!

Kobe Kodi生活之改變

唔好以為Koey升小唔關Kobe Kodi事呀!!

• Kobe Kodi 變睡寶寶

一早叫醒小朋友落樓...番上樓後仲未夠8點, 小朋友眼訓嗎??? 佢o地用行動話晒我知!!!

Kodi 9點幾10點開始扭計, 試過幾次攬住我訓番...

哥哥襯阿妹唔反抗抱佢, 冧到呢~~

Kobe其實一向早眼訓, 而家就更加唔使講...

食食o下飯唔願食走去sofa訓o左, 食完訓係sofa睇睇o下電視訓o左, 甚至未食飯就訓o左都試過...雖然有d陰公, 但睇見佢咁訓得我其實好安慰...HAHAHA!!!

• 時間多到唔知點用

如果呢句o野apply 落家姐度就好喇...家姐而家同我傾句閒計都無時間, 但Kobe Kodi就時間多到唔知用o黎做咩好!!!

由於太早起身, 朝早同Kobe Kodi睇完故事, 玩完積木, 甚至睇完一陣卡通落埋街玩後都仲有好充裕o既時間先到Kobe番學, 開學初期同我真係覺得有d浪費o左Kobe o既時間, 好想好想襯佢未升小做大忙人時幫佢報多d興趣班消磨朝早o既時間!!! 

可惜...不論跆拳單車游水定足球都無平日上午班!! 好彩...近來終於湊到幾位Kobe同班同學又夾到Roller教練自定平日朝早上堂, 可以好好利用下d時間, 心理上覺得好d咁呢!!!

• 3姐弟妹感情更進一步

無錯, Koey番o左全日後佢真係連同細佬妹玩o既時間都無, 但以我所見, 每到weekend Kobe同Koey又會一早起身不停吱吱喳喳一齊玩, 感覺就好似兩姊弟o係度把握時間相處玩樂, 補番平日玩少o左o既時間一樣!!!  



其實見少o左爭執都少o左, 感覺上都唔係太壞!!! 

相反, Kobe而家無o左家姐帶住, 佢就多o左追住個妹一齊玩, 兩兄妹相處多o左感情都有進步, 亦係好好機會叫Kobe學o下做大哥哥!!!

上面條片係咪好sweet呢~~~~

當然, 現實呢D場面出現並唔多, 兩兄妹大部份時間都係爭吵尖叫中...但可能呢個就係佢o地兩兄妹之間o既相處模式!!!

總結

總之, Koey升小後, 除o左爸爸繼續努力工作出差外 (其實仲變o左"補習老師", 不過老公子o既改變比起家中其他人都算少了!!), 基本上家中各人都面對緊天翻地覆o既變化!!! 

雖然而家已經開o左學2個幾月, 但坦白講, 大家都仲係處於適應階段, 每日都身心俱疲呢!!! 希望全家人都快快適應, 盡快搵到一個比較舒服, 唔使成日"催促"o既方式渡過只會越o黎越忙碌o既學習生涯!!!

最後, 再次多謝開學後每星期特地出o黎幫手接細佬放學o既Grandma同俾我放低個女大半個鐘做功課o既好鄰居, 唔係你o地, 鐵人媽媽o既1湊3生涯一定更加辛苦, 多謝你o地呢!!!

親, 以後不用再洗碗了!!

o係2016年年尾, 我終於擁有一部洗碗機!!!

開箱後, 只見盒上面寫住: 

親, 再也不用洗碗了!!! 

Wow, 呢個願望簡直係我做FTM以o黎朝思暮想、夢寐以求呢!!!

咁誇? 真係一D都唔誇, 作為FTM, 雖然係全日都o係小朋友身邊, 但基本上大部份時間都忙於家事, 真正"陪伴"小朋友o既時間比想像中絕對要少!!! 有o左洗碗機, 那怕每餐慳到o既時間只係10-15min, 但呢少少時間放o係小朋友身上就算只夠睇多2本故事書, 都係值得o既!!!! (FTM一定明!!!)

話說回頭, 其實我已經留意o左洗碗機超過1年, 其間花過唔少時間上網搵資料, 好似洗碗機好壞處呀, 香港邊款牌子最經濟實惠等等...不過, 始終礙於安裝問題同洗衣機體積頗大呢兩大主要煩惱, 遲遲都唔敢添置!!!!

終於, 2016年年尾Xmas期間, 朋友竟然帶俾我一個振奮o既好消息: TB有免安裝座枱式洗碗機!!!!!

免安裝?? 當真????

知道有呢樣產品後我簡直雙眼發光, 即晚就上網search!!!

就係佢喇:九陽MINI洗碗機 X5!!!!

價錢: 大約只係香港搵到最平款式o既一半 (香港最平大約$3K頭!)

免安裝: 水箱式設計, 只需要駁好去水喉去sink盆就可以去水!

Wow, 只係呢2大原因已經解決晒我o既concern, 再加上九陽呢個品牌本身都幾有名(香港百貨都有賣佢o既豆漿機!! 我都係佢豆漿機o既用家!!!), 都有d信心保證, 真係無理由唔買!!!

結果, 我第二日就落o左Order, 注明發香港可要求改香港插頭、送洗碗粉、免運費直送順豐站、仲全國聯保, 連香港都有保養, 服務又幾細心周到呢!!!

落order後第二日, 我已經收到SMS通知取貨, 不過老公出差, 最後都要隔多兩日先真係取件!!!!

開箱!!!!

雖然機身體積 (38 x 42.2 x 40.8 cm) 比香港買到最細部o既要細, 但見到實物依然覺得好大部!!!!

放上廚房枱面, 電熱水煲等等都要讓路, 成個枱面無晒位!!!! HAHA...

連接好去水喉再放去sink盆, 插好電掣, 幫水箱入水 (容量5L), 先空機行一轉洗機兼試機!!!

行完一轉, 由於最後係熱水洗同烘乾, 開機一刻聞到少量膠味, 雖然都有少少擔心, 但味道唔太嚴重, 即管再觀察!!! (用多幾次膠味越o黎越少, 而家基本上都無味喇!!!)

打開機門吹o左1日, 終於正式試機!!!

可放5套碗碟!! 比香港最細機種放到6套要少!

其實5套碗碟我都應該夠用, 但偏偏我D碗碟大小形狀不一, 所以擺位上有D困難, 加上原來最大可入機o既碟唔可以大過8寸, 一般中式大碟都放唔入!!! 呢樣真係買之前無留意, 用o既時候我都打o左個突呢!!!

Anyway...

試機!!!!

機身下方顯示按鈕, 有烘乾及三種洗碗模式!!! 強力洗要2小時, 標準洗1.5小時, 快速洗35分鐘!!! 無論咩模式都係用5L水就搞掂!!!

慳電慳能源至上o既我當然選用快速洗睇睇效果先啦!!!

打開機蓋將洗碗粉倒在機門上再關蓋, 選用洗碗模式就可以開始喇~

去片~~

開機聲音唔太大, 同洗衣機d 聲幾相似!!!

開機後, 機身會顯示洗到咩程序 (一, 二, 三洗, 類似過幾次水吧!)!!

第一機洗碗, 唔知係咪烘乾o既關係, d碗碟一模上手超級乾爽, 正!!!! 

再檢查碗碟乾淨程度, Perfect!!!!

較難清洗有漬o既碗碟 (蒸魚碟或烘焙碟之類)效果又如何??

洗完碗碟仲有明顯污漬

不過呢類漬其實手洗都要頗用力先去除到, 所以我又唔會強求洗碗機可以靠水力就洗得去污漬!! 其實我可以依說明書指示, 加多D洗碗粉同用強力模式洗, 但礙於化學劑還是少用為妙同慳電原則, 所以我到今日都未試過用強力模式, 個人認為, 除非成機碗碟都好難洗, 否則為一隻多漬碟用強力模式點都唔化算, 我寧願用快速模式後將仲有漬o既碗碟再手洗捽多兩捽好過!!

究竟洗碗機幫我慳到幾多時間呢?  

而家, 基本上我餐餐飯都會用洗碗機 (老公幫手洗碗除外, 因為佢本身洗碗都好快手!!!), 平均慳到o既洗碗時間大約8-10分鐘吧!!!! 

老公o係屋企食飯餸多, 用o既用具亦多, 入得機o既佔量只有一半左右!! 以洗碗速度超慢o既我o黎講, 如果平時要洗30-45min, 咁入機洗o既可能只慳到8-10分鐘, 相對上好似唔太化算, 不過基於慳水原則, 我相信照開機依然慳水過手洗o既!

如果老公出差或平日午飯只有我加三位小朋友, 飯餸少之餘碗碟亦細件D, 平日手洗15-20慳到8-10分鐘, 真係化算好多, 有時真係只需手洗5分鐘就可以搞掂呢!!!

洗碗機優缺

而家, 已經用o左洗碗機2個多月喇, 雖然仲未的起心肝換o左D碗碟 (舊o既未爛為換新o既掉棄好似好浪費...過唔到自己o個關!!!), 但已經開始同部洗碗機做到好朋友!!

Overall, 九陽洗碗機俾我o既感覺如下: 

優:

1. 慳時間!! (當然, 慳出o既時間多寡同本身手洗速度快慢有關, 我洗碗慢老公洗快我一倍就當然慳唔到多少, 但洗少幾隻碗, 真係FTM都無咁易有主婦手呢!!!)

2. 慳水 (網上好多資料都顯示洗碗機比手洗慳水, 慳幾多我就唔肯定, 大家不防google下!)

3. 慳清潔劑 (每機洗碗機要用o既洗碗機粉都唔多, 計埋用少o左o既洗潔精, 的確環保D!! 上網見有唔少外國人用Baking Soda溝Borax自製洗碗粉, 又平又環保仲唔怕食o左落肚, 有機會我都想試試DIY呢!!)

4. 慳電 (唔使企咁耐o係廚房洗碗, 燈都唔使開嘛!!! :p)

5. 慳位 (而家D碗碟放晒入洗碗機, 乾碟架由以前成日要玩層層疊變為好多'吉'位呢!!! :p)

6. 平  (唔使2千解決洗碗煩惱, 絕對超值!!!)

7. 免安裝  (雖然要每次人手入水, 但免卻鑽廚房枱面同加水龍頭分流器, 安裝工程費都慳埋!!!)

缺: 

1. 碗碟放入洗碗機前要先去除大舊o既食物殘渣!! (老公話咁樣不如順手捽兩捽洗埋算!!!)

2. 最難清潔, 最time-consuming o既煲煲鑊鑊多數入唔到機, 要手洗!! (入得機o既都係易洗o既碗碟, 本身要洗o既難度同時間都唔多, 所以洗碗機overall 慳到o既時間只係好少!!)

3. 可入洗碗碟機o既碗碟有所恨制!! (除碗碟大小受機體大少所限外, 上網睇話膠製、木製餐具, 易碎玻璃或'tong'瓷碗碟亦不宜放入洗碗機!! 我d碗碟大小不一亦不容易排好入機!!)

4. 多漬碗碟要用強力洗模式洗2小時!! (再慳電心理上都覺得洗咁耐唔太好!!)

5. 大部阻位  (廚房枱面本來已唔多夠用, 而家就更難放o野喇!!)

Anyway, 除非裝修時就買部嵌入式特大洗碗機, 否則以上優缺基本上大部份洗碗機都會有呢!!!!

慳家小技巧 

用洗碗機已經慳o左, 仲要再慳?? 當然, 環保一向係鐵人媽媽祟尚o既生活模式嘛, 所以, 盡可能我都只會用快速洗呢個模式洗碗, 35min搞掂快靚正嘛!!

小技巧1. 先將入到洗碗機o既碗碟疊好放在sink盆水龍頭出水位對落, 再手洗煲煲鑊鑊!!!(洗煲鑊所用o既水已經足夠浸滿甚至沖走入機碗碟上o既食物殘渣!! 咁就利用o左缺點2解決缺點1啦!! 其實如果想再環保D, 可以手洗一半較易洗又唔入得機o既碗碟, 所用o既水其實都足夠沖刷入機碗碟, 之後, 將比較難洗又唔入得機o既鑊或煲放置在洗碗機去水口處, 待洗碗機排出o既熱水作為浸鑊水, 由於呢D水有洗碗粉成份亦易加熱, 清潔難洗o既煲鑊就變成易事, 到時就真係又慳水又慳力喇!!!)

小技巧2: 盡量用細小碗碟 (我本身有個12cm直徑細煲, 基本上老公出差我煮o既份量唔多都會用佢, 貪佢放得入機嘛!!! 另外就係上網睇到o既, 就係就算多人開飯菜d餸大碟都照將餸菜一開二分兩碟, 咁就手洗少一隻, 機洗多兩隻啦, HAHA!!)

小技巧3: 到烘碟模式時就關機 (基本上到第3洗時已經係用熱水過水, 熄機後o既餘溫應該都足以消毒同烘乾碗碟, 就算烘唔乾都可以直接打開機門拉出碗碟當乾碟架自然風乾, 咁又可以慳番少少電喇!!!)

最後, 俾多個使用小技巧: 放個漏斗o係水箱入水口, 咁加水到水箱就唔使成日怕整濕周圍喇!!!!!

總結

九陽呢部洗碗機小巧又抵玩, 洗得乾淨又免安裝, CP值的確幾高!!! 不過, 無可否認, 慳8-10分鐘聽落好少 (仲要係以我個龜速洗碗速度估計!!), 但只要每次聽到小朋友同我講: 乜你咁快洗完碗同我玩o既?  我就覺得買洗碗機呢個決定係明智o既!!! 因為唔止我洗少o左碗而開心, 小朋友亦因為媽咪多o左時間陪玩而開心得不得了呢!!!

HAHA, 而家飯後竟然仲有時間全家人一齊做o下運動, 真係好難得o既親子時光呢!!!

參考資料

呢篇九陽洗碗機開箱文, 有晒手洗機洗於慳水慳電方面o既對決, 好詳盡: 九陽MINI台式免安裝洗碗機之體驗

FTM拋夫棄子可能嗎?

有句說話: 呢個世界無話邊個無o左邊個唔得!!!

咁無o左FTM又得唔得呢?

FTM拋夫棄子可能嗎?

作為FTM o既我真係連諗o下都未試過 (我連去個旅行都要1家5口出動, 唔捨得放低小朋友!), 但原來FTM真係有可能拋夫棄子, 仲要7日咁多呢!!

話說, 呢2日媽媽界瘋傳某免費電視台搵FTM拍真人show << FTM放大假>>, 大家都議論紛紛, 真係未開拍已經大收宣傳之效, 有關公關係有料到呢!!!

對於電視台開出o既條件, 坦白講, 真係睇見都心動o架!!! 諗o下, 唔計有人出錢請去旅行嘆世界同接拍o既收入, 拍完之後, 不論媽咪定小朋友, 都可能仲會帶o黎更多工作機會...真係想像o下都開心!!!

不過可惜呢 (利申: 其實都唔係話可惜o既, 因為報o左名人o地都唔一定揀你, 但難得有少少信心自己都算合合o地條件吧, 而且3個B o既FTM, 相信電視台都會大興趣吧???!!!!... :p ), 妹妹仲細仲要餵人奶 (供應又唔穩定, 泵又唔多, 唔餵一星期應該可以收檔!!!), 仲要難得連老公都認同電視台條件認真吸引...總之timing唔o岩條件不足, 唯有自己葡萄o下算啦, HAHA!!!

雖然得個諗字, 但FTM拋夫棄子去旅行嘆世界呢個idea真係好good!!! 想像o下如果我真係自己去旅行, 老公同小朋友日常生活會點呢?

老公? 應該忙到唔再得閒再襟手機, 唔得閒再睇新聞?? 定會照睇搞到睇唔實小朋友整親呢度o個度? 洗碗洗衫未必有難度, 但摺衫搵家中物品應該會好頭痕!!! 我唔o係屋企7日, 屋企應該會亂到好似堆填區, 地o下無抹好污漕(唯一好o左應該係無晒我d頭髮), 不同類型物品亂咁放埋一堆當執好吧!!! 仲有仲有, 可以想像家姐細佬番學d衫會著到錯晒, 毛巾盒飲水杯放錯書包, 家姐頭髮紮到肉肉酸酸, 仲有日日只係食外賣, 菜都無條, 好快便秘....HAHAHA!!!

Koey? 有2個可能, 一係日日喊掛住媽咪, 一係就好生性, 做小媽咪幫手照顧Kobe Kodi!!! 仲會提點爸爸咩物件放o既位置, 提點爸爸平時媽咪係點做...

Kobe? 佢其實比家姐仲嗲我, 加上其實佢仲係3歲幾, 觀乎佢近日開口埋口'唔想番學' (因為學校無媽咪
), 我估佢都會成日喊搵我, 特別夜晚佢自己開始眼訓o既時候!!!

Kodi? 仲細唔會識掛住我, 但肯定1星期唔見會無人奶食!!!

至於我呢? 連平時去個旅行都唔捨得掉低小朋友, 寧願辛苦d 1家5口一齊去o既我會唔會第一日已經掛住小朋友掛到喊晒? 定係會係另一個極端, 難得做o左媽咪5年以o黎真正放假嘆世界而大呼好爽?

HAHA, 或者報復心態都有少少吧, 如果我唔o係度佢o地先意識到我o既重要, 換o黎老公小朋友一句多謝都好吧!!!!

真係好好奇, 老公小朋友無o左我得唔得呢? 無o左我都得o既話我係咪要檢討o下? 無o左我完全唔得咁又係咪好事?

可惜呀可惜呀, 我諗只有接拍呢個節目先有機會知道以上想像o岩唔o岩呢!!!

呢個節目有日拍成播出, 真係唔可以錯過, 至少我呢個FTM一定會叫埋老公小朋友一齊睇, 就算唔係自己, 叫佢o地想像o下都係好事呢!!!

就等家人老套d去感覺一下, FTM, 仲要係3個B o既FTM, 真係唔易做o架!!!!

Nothing's better than a hug! Huggies Platinum鉑金級助防疹紙尿片!

大家睇到黃色包裝上d韓文, 會唔會以為我用緊韓國片呢?

無錯, Huggies呢隻Platinum鉑金級助防疹紙尿片係韓國製造o架!!!

剛過去o既星期二打完風, 我成個星期都同我3隻馬騮仔困獸鬥, 呢日終於有得抽幾個鐘頭自由下, 去o左BB展 Huggies o既"Platinum鉑金級助防疹紙尿片"介紹會!!!

Nothing's better than a hug!!! 

句Slogan唔錯, BB最需要就係媽媽o既擁抱!!

介紹會開始, 測試o下條"Platinum鉑金級助防疹紙尿片"當然係指定動作啦!!!

去片!!

邊條吸濕力強而快顯而易見啦!!!

摸o下先~~ 只有少少濕氣, 而且質料都幾滑呢!!!

要pat pat 乾爽防尿疹, 瞬吸引力導管、納米級透氣、3D呼吸層唔少得!!! 仲有埋醫學實證o架！

再加埋Platinum鉑金級助防疹紙尿片特有o既立體防漏背小袋同環抱式彈性腰圍設計, 咁就唔怕BB周身郁四圍漏啦!!!

為o左表達片片可以俾到BB有如媽媽擁抱o既感覺, Huggies仲安排o左個"DIY擁抱小熊"工作坊添!

材料

YEAH!!!! 估唔到毛巾都可以摺到咁可愛!!!

仲可以企添o架!!!

入盒, Perfect!!!!

同各blogger 合照~~~ 

最後大會送上貼心小禮物俾Kodi妹妹!!! 多謝呀!!!

大合照!!!

短短一個鐘介紹會完喇, 第一次去BB展感覺都幾新鮮, 奈何趕時間、無coupon book係手再加上周圍都排晒隊, 最後都決定唔再流連, 都係快手番去買飯湊番我3隻馬騮啦!!! 

雖然無換任何贈品, 但都滿載而歸o架!!! HAHA!!!

番到屋企~~~~

妹妹見到片片都好happy 喎!!!

放心, 一定幫你著!!! 以後pat pat 唔怕有疹紅卜卜喇!!!!

戒晒片十世o既八卦家姐哥哥又話要影埋一份!!!!

Chok晒同bear bear 熊合照, HAHA!!!

家姐雖然唔需要片, 但都好開心, 因為我教o左佢摺毛巾小熊, 呢隻係佢親自整o架, 係好好o既親子活動呢!!!

想了解更多有關Platinum鉑金級助防疹紙尿片點有效防尿疹? 

去HUGGIES睇睇啦!!!!

同酒精消毒劑講’拜拜’~~~

大家都知我呢個鐵人媽媽老公成日出差, 基本上Weekday日日都係得我一個對住3隻馬騮仔, 有時只係處理一家人日常起居飲食都已經忙到七彩, 有時有d日常以外o既事發生, 都咪話唔le hea~~~

就好似上星期咁, 好地地套廁道門就忽然玩自爆!!!!

無錯, 係自爆!!!

我聽到怪聲後入房一望都忍唔住嚇一跳!!! 

好彩當時無人o係toilet, 如果唔係整到小朋友都真係唔知點算!!

企缸地o下唔少碎玻璃粉, 掃o左好幾次都仲覺得地下閃閃下~~~

到第2、3日, toilet地下都仲有幾粒唔知係邊無啦啦走出o黎o既大塊碎片, 一塊半塊貪快無戴手套就執, 咁就損o左!!!!

損o左咁少有時都懶得處理, 不過近排屋企有支好用又方便o既多用途消毒噴霧, 噴一噴就可以消毒殺菌, 方便又安心!!!

左: 安速癒紅腫舒護啫喱

右: 安速癒多用途消毒噴霧

安速癒呢支多用途消毒噴霧有效o係30秒內消滅99.99%細菌和病毒 (包括流感病毒, H1N1, H7N9, 抗藥性金黃葡萄球菌, 腸病毒等等), 好似我今次呢D家居割傷/擦損就最o岩用, 既消毒殺菌又抗炎, 仲有加快癒合的功效!!! 當然, 我今次只係好輕微割損, 唔噴都好快好番, 但噴o左當然安心D啦!!!

另外, 我仲鍾意呢支噴霧不含酒精成份, 用o黎清潔BB玩具就o岩晒!!!

呢度噴o下~~~

o個度又噴o下~~

食玩具係BB指定動作, 用安速癒消毒完唔止唔怕Kodi食到菌, 仲唔怕Kodi食到酒精落肚呢!!!因為安速癒係全新萬用純天然消毒產品, 複製人體免疫系統抵抗病菌的成份(次氯酸, HOCI), 減少對抗生素及類固醇的依賴, 有o左佢, 就真係可以同酒精消毒劑講’拜拜’喇~~~

睇o下我, 只係用幾秒時間噴兩噴, 就可以幫玩具消毒, 慳番o既清潔時間, 絕對夠我同Koey Kobe Kodi講多幾個故事呢, 真係我呢個鐵人媽媽o既家居好幫手!! 

至於支安速癒紅腫舒護啫喱, 佢針對舒緩蚊, 蠓及其他昆蟲叮咬的紅腫, 減退皮膚上的紅腫, 包括蚊叮蟲咬及暗瘡發炎-消滅患處上的細菌病毒, 防止發炎-舒緩因發炎引致的痕癢及刺痛感!!!

本來諗住俾小朋友蚊叮蟲咬時用, 因為5-6月初夏時D蠓患真係好勁, 但呢排唔知係咪天氣熱到連D蚊同蠓都頂唔順, 呢排好似真係少o左好多蚊叮蟲咬呢!!! 雖然未用得著, 但放o係度看門口都幾好!!!

近排主婦手又發作, 間中痕癢難擋, 忍唔住搽o左少少紅腫舒護啫喱, 涼浸浸都幾舒服!!! 

睇o黎我都係要快手買埋安速速癒支濕疹護理啫喱試o下先得!!!

從此, 我可以同酒精消毒劑講’拜拜’喇~~

安速癒產品介紹: 

全新萬用純天然消毒產品 : 

複製人體免疫系統抵抗病菌的成份(次氯酸, HOCI)。

擁有超過20個CE (歐盟安全)及FDA (美國食物及藥物管理局)的安全認可。

適合幼童及老年人使用。

減少對抗生素及類固醇的依賴。

有助任何傷口加快癒合,對人體不會構成任何傷害, 絕無酒精及化學物, 可以直接進入眼, 耳, 口及鼻。

有效30秒內殺掉99.99% 流感病毒 (H5N1, H7N9), 抗藥性金黃葡萄球菌, 腸病毒, 肺炎鏈球菌。

安速癒銷售點:

安速癒銷售攤位

地點: 將軍澳尚德商場日期: 7月11日至14日時間: 上午11:00 – 下午9:00
地點: 藍田麗港城廣場日期: 7月14日至21日時間: 上午10:30 – 下午9:00
地點: Sportsoho Expo 運動博覽 (九龍灣國際展貿中心)日期: 8月11日至15日時間: 上午12:00 – 下午9:00
網上Facebook 銷售:www.facebook.com/dermodacynhk/shop
訂購熱線: 31753302