回顧過去, 展望將來!

2017年算係鐵人媽媽過得唔太順意o既一年！負能量太多全家都受影響!

開心事：
去o左2次旅行(沙巴 & 花蓮); Koey入到間心儀o既津校, 細佬妹之後都唔使煩，阿妹亦順利入到上午班，可喜可賀; 屋企清理o左好多BB用品，掉o左High chair, Potty, BB床, BB圍欄等，搬o左書櫃出廳，新添置o左個大衣櫃, 換鞋櫈, 鞋櫃同魚缸(雖然仲未正式養魚), 年尾仲換左個蒸焗爐同二手Staub, 又添置o左d兒童玩意如室內千秋， 總之，住o左五年，屋企有一番新景象，再加上12月老公成月唔使出差, 屋企多番d笑聲, 總算係開心o既!


唔開心事：6月同12月都係黑仔月！6月Koey獲派第一志願本來開心到上天，但估唔到10日後就跌o左落地獄！雖然最後雨過天清，但到今時今日我都仲未明白發生咩事，人性險惡，我要學識好好保護小朋友，保護自己！一波剛停，一波又起！6月尾小朋友輪住流感高燒，終於輪到阿妹中招，仲要燒到抽筋！第一次睇見自己小朋友反晒白眼面唇發黑手腳疆硬毫無反應, 真係嚇到我心都離埋, o個種驚恐真係前所未有, 而家都仲有唔敢諗番起o既感覺!!! 兩件事最最最徬徨仲要係事發時, 老公子都係出o左差!! 雖然老公已經最快速度趕回香港, 但o係咁緊張時刻只得我一個o係屋企面對, 有時真係覺得好無助好孤單!!!


9月Koey小一開學, 惡夢o既開始！全日制後要早起，放學後茶點沖涼做功課食飯訓覺日日如是，咩親子時間都無，母女之間只餘催促同跟時間競賽，身心勞累又破壞親子關係，好辛苦！雖然近來Koey搵到快點完成功課o既方法(邊上堂邊做功課)，但我仲未搵到可以提高Koey做事效率o既方法，慢活係佢性格，要改變唔容易亦辛苦大家！講到尾，都係諗唔明點解政府唔留番少少半日制俾好似我呢d FTM多個選擇，而家先小一，遲d高年班加埋細佬妹都升上小學，我一定死更多細胞！


12月破財又傷身! 先o黎整壞焗爐再整壞電話, 單單呢兩樣已經無o左半皮...再加上聖誕網購大出血, 真係跌錢咁跌!!! 以為破財擋災啦? 錯!! 聖誕假期間全家輪住病, 今次Koey燒o左4日, Kobe燒o左2日, 大人如我都又痾又嘔, 老公子都周身骨痛...估唔到呢個普世歡驣o既大節日就係日日困o係屋企咁過, 都算係近年過得最唔Happy o既Xmas呢!!


回顧到呢度，好似都係關於小朋友o既事，咁我自己同老公o既回顧呢？
Sorry, 好似真係無，彷彿我人生已經同自己無關...

其實今年係鐵人媽媽自信心較低落o既一年...特別係今年染上惡習~~食宵夜同夜訓(1am)後!!!

深深o既眼圈、無精打彩o既眼神、仲有肚腩越積越厚o既脂肪...自信心就係咁完全被打殘！所以今年fb 自拍照少o左，有時唔係無影，而係影極都搵唔到張望落精神見得o下人！

點解要自我放棄？我都唔明！阿妹比較夜訓，好多時到夜晚11點我先有自由時間，其實我都好想早D訓,但網購一陣甚至只係睇一陣fb upload o下相就12點幾，時間好唔見使!! 唔知幾時開始幾塊餅乾一支甜筒就好似仙丹咁，唯我獨享o既感覺令人留戀！老公長期出差，就算唔出差都好多時玩手機，拍拖時間嚴重不足 (全年可能不出5小時拍拖時間...而家要我諗可能只得結婚周年我發住燒食個lunch咁多時間...)少溝通加上老公貴人事忙，普通家事可以拖半年以上都未做到，日積月累多番催促破壞感情...宵夜一碗美味即食麵就成為我同老公o既溝通橋樑！年紀開始大加上長期唔夠訓(阿妹仲未戒半夜叫食奶!), 新陳代謝慢到阿媽都唔認得, 試問想fit想靚點可能? 自信滿滿點可能? 心情靚點可能? 心情唔靚就對小朋友越呵刻, 小朋友就越唔聽話, 結果惡性遁環我就心情更差...休息唔夠鎖事繁重溝通不足都係壓力來源, 有時都認唔住諗, 抑鬱症應該離我不遠了...

展望2018, 願望唔多, 希望暑假大旅行順利老公小朋友健健康康!!!! 亦希望老公飛少d, 對家人積極D, 鐵人媽媽有感力有不繼, 好多事要學識放手...希望Kobe今年有望轉上午班, 實現我期待7年之久可以重獲每天3小時自由時間o既願望, 等我有多點時間處理家人自身各樣大小事, 有時間做o下運動釋放多D多巴胺重拾自信同開心能量, 相信咁先有助屋企各人健康開心發展!

回顧過去, 展望將來

踏入2015年第一日, 又係時候回顧過去,展望將來!!

一年前o既"回顧過去,展望將來!", 2014年o既目標set得都幾求其...所以大至上都算完成到:

1. Kobe快D戒夜奶, 咁我就可以放佢兩姊弟同房, 我就可以一覺訓天光!!! 至於人奶, 繼續長餵長有, 唔好太早無貨!!! <<== 完成!!! 今年初雖然細佬未戒夜奶, 但應家姐要求終於搬o左床仔去家姐房, 細佬亦順利接受半夜唔食夜奶, 最後再用o左幾個月時間適應, 終於無再半夜醒幾次, 而家平均每晚雖然仲有喊醒搵我tum佢訓, 但比起之前一晚醒幾次, 對我算好o架喇!! 至於人奶, 至今早晚仲有餵緊, 自己都覺得自己好叻!

2. 兩姊弟相親相愛, 繼續健康快樂, 越o黎越多interaction, 最好唔好嗌交爭o野, 兩個一齊玩唔使我理! <<== 完成! 而家真係好多Interaction, 我朝早同傍晚煮飯時間都唔使點理佢o地, 佢o地自己搵o野玩, very good, 當然嗌交另計!!!
3. Koey番K1順利, 適應群體生活!!!最好當然係我心目中o既first choice幼稚園有位多出, 肯收Koey! <<== 完成! 最後first choice真係收o左Koey, 雖然係下午班, 但番o左幾個月佢真係進步不少, 無揀錯!!! 

4. Kobe仔識行識走識講o野, 唔好好似家姐咁黐身! <<== 完成! 但近來越大越識驚, 好似好細膽咁!!

5. 可以一家四口旅行!!! 其實老公子ZXmas抽到去澳門o既coupon, 去實去到, 但我心思思好想坐飛機去遠D!! <<== 超額完成!!! 唔止去o左澳門, 仲去埋新加坡, 好開心!!!

6. 老公子事業順利, 搵多D, 新環境新挑戰, 加油!! <<== 完成!! 對於我o黎講, 最開心係老公子可以再早15min番到屋企, 而家平均7點3至7點半開到飯, very good!!!

7. 我可以多d自己時間, 寫多d blog, 參與多d blogger活動, build up 番多d audiance!! <<== 未能完成!!! 個blog平均每個月得1-2篇blog出到咋, audiance亦無增多, 甚至減少....嗚...

8. 全家人身體健康! <<== 完成50%!! 家姐番學後成日傷風咳, 仲惹埋細佬, 9月仲全家中o左腸病毒又痾又嘔, 好慘!

睇番細佬年頭同年尾d相, 原來佢大個o左咁多喇, 真係好掛住佢細個o個BB樣呀!!!! 搵相時發現有d月份想搵張似樣d 兩個都笑o既相都無, 睇o黎出年要再努力d同佢o地影影影先得!!

今年一家四口戶外合照比想像中少, 而家細佬識跑識走, 希望來年可以同兩個小朋友去多d戶外地方玩玩玩!!!!

展望2015, 我希望:

1. Kobe戒人奶同戒tum訓覺!!! 其實而家人奶供應都唔多, 但佢仲係習慣清晨6點幾叫食奶, 食完就o係大人床訓, 長始落去都唔係太好, 要的起心肝同佢戒甩佢!!!

2. Koey可以幸運地升K2轉到上午班!! 不過呢個都係靠運, 我都做唔到d咩, 即管當係新年願望咁寫低先!!

3. 6月一家四口東京大阪之旅一切順利!!

4. 老公子升職加薪, 快d完成MBA課程, 多d時間放番o係屋企, 陪多d我同對仔囡!!

5. 繼續盡我所能抽時間寫多d blog, 分享一下我對'Less is More' o既育兒理念!!

6. 全家人身體健康, 平平安安!

7. 過去一年世界各地好多天災人禍, 希望來年世界和平, 少d唔開心o既消息!

8. 最後一個願望, 係希望盡我努力, 約多d朋友見面!! 唔知點解, 過去一年感受特別深, 科技越發達, 人o既距離就越遠, 感覺甚至開始變得陌生, 呢種感覺好討厭!!! 希望來年我約大家, 大家開心賞面就夠了!

祝大家2015開開心心, 多點和諧, 少點戾氣!!

馬年到~~恭喜發財!!!

恭喜發財!!! 今日已經係年初八, 老公子放大假日日都出街, 所以超唔得閒, 搞到而家先出blog同大家拜年添...係就係遲o左d, 但遲到好過無到嘛, HAHA!!!

今年係我第一年一家四口過o既年...

年廿九晚, 自己屋企團年:

三餸一湯, 老公子買餸我做大廚!! 煮o左:

花菇白蘿蔔炆鵝掌海參: 落調味輕手o左, 味道淡o左少少, 有d對唔住炆到咁林o既花菇同鵝掌呢!

豆腐卜炆龍躉: 雖然真係好貴, 但啖啖肉好正!!

露荀蘿蔔炒帶子

年三十:

同Koey係屋企親子料理, 整湯丸!! Koey幫手搓o左d長條型, 但啡色太核突...

我最後幫佢改良做心心等型狀~

食得喇, 原來煮起d色會出好多o架, 不過我唔識包, 所以好厚皮同好少南瓜蓉...不過都食到少少朱古力同綠茶味~~

Koey有甜食就最開心, 食晒d迷你湯丸~

年初一: 

Koey & kobe恭祝大家新年進步, 健康快樂!!

講老實話, 其實我覺得著呢d賀年衫仔好娘好老套, 所以Koey細個無著過o架!!! 今年本來都無諗住買俾細佬著, 但上網見到呢件個款同色又真係幾靚唔娘, 終於買o左!!!

好like呢張合照!!! 多得Grandpa幫手引小朋友先影得咁靚!!!

之後去o左我婆婆屋企團拜~~

豬嘴Kobe~~~

去到5點先回程, 呢兩位攰到訓o左~~

年初二:

番娘家食開年飯~~

當日除o左我同Koey外, 全部人都著紫色, 使唔使咁夾??? HAHHA!!

o係Grandpa & Grandma屋企Bathing~~

之後傍晚就去爺爺麻麻度食開年飯lu~~~

之後年初三至初七我o地差唔多都有日日出街, 好耐無試過去咁多街, 我仲買o左5件新衫俾自己, 大大話話都有好幾年無買咁多衫喇, 真係滿足晒呢!!!

初三look~~~

 

初六look~~

haha, 兩母女一齊扮model影相, 好開心!!

Koey而家影相成日古靈精怪!!

最後, 再一次祝各位馬年行大運, 好似我o地食buffet咁, 豐富滿足!!

回顧過去,展望將來

又到o左一年一次回顧過去,展望將來!!

睇番一年前o既post"回顧過去,展望將來!", 2013係充滿挑戰o既一年, 目標set o左好多, 好彩大至上都完成得到:

1. 順利生番個肥肥白白健健康康o既蛇仔仔, 最好當然係產程快D, 唔使痛咁耐!!!

WELL DONE!! 仲記得生得入院後睇住老公子走仲驚到喊晒, 但估唔到第二胎真係產程快到唔係好痛, 真係有'執番身彩' o既感覺!! 原本以為Kobe仔會輕過家姐, 結果出世7磅半, 重過家姐, 健健康康!!

2. 成功餵人奶!!! 不過期望唔敢太大, 始終仲要湊Koey, Koey會唔會因為呷醋而成日黐身黐世都係一個關鍵!!!WELL DONE!! 因為有經驗, 加上Kobe真係好合作, 所以仲順利過Koey o個陣, Kobe仔到而家一滴奶粉都無補過, 我亦全埋身, pump都唔使!! 至於Koey亦好乖好合作, 係有少少情緒反應, 但唔算呷醋, 讚!

3. 希望Koey鍚細佬, 兩姊弟相親相愛!!!

DONE!! Koey無呷醋, 但話相親相愛又未至於, 因為Koey大部份時間當細佬透明, 係近年尾細佬大個D, Koey先開始明白自己有tum細佬大笑o既能力, 接觸好似多番少少!!

4. Koey搵K1順利, 最好當然係入到新屋附近o個間啦!!!

DONE!! 新屋附近o個間真係入o左, 但結果我發現最想入唔係呢間, 唯有期望來年有人放位啦~~~不過, 樓下呢間收am, 地點近而且係呢區老牌幼稚園, 其實都已經滿足了!! (其實我一路都想blog番幼稚園面試個詳細結果, 等我~~)

5. 搬屋順利, 換新屋有新環境新變化, 離開physically and mentally 被困o既困局, 我要積極D帶多D Koey出街見多D人, Koey適應新居順利!!!

WELL DONE!! Koey第一日就適應新居, 反而係大人要多D時間!! 諗番轉頭, 我大住肚抹屋執屋爬高爬低都真係幾勁...雖然辛苦, 但間屋大o左, 又唔使再'爬山落山'先出到街, 老公子又可以早半個鐘番到屋企食晚飯, 我真係成個人都開心晒!!!

6. 老公子升職加薪!!

WELL DONE!! 職無升, 但上年年頭加幅唔錯, 配合晒細屋搬大屋o既額外開支!!

7. 我生完身體早日回復狀態, 當然唔想好似上次咁坐月先o黎肥10磅減唔番啦!!!

WELL DONE!! 今胎生得快, 個人無上次生完咁虛!! 連我自己都覺得自己好似生完幾日就復完咁!!! 另外, 因為嘔得勁, 到生得時都係135磅左右, 生完輕過生完Koey5磅, 即只係差5磅就做番做女o個陣, 我好滿意o架喇!!

8. 希望全家人身體健康!

WELL DONE!! 全家無大病大痛, Koey只係因為整親手去過急症一次, 最後都係少少扭親, 小事!!

9. 希望自己一湊二成功, 唔好人都癲啦!!!

WELL DONE!! 因為Kobe算易湊, 一切比想像中易handle, 細佬頭兩三個月仲有時間襯佢訓同Koey整餅整蛋榚添!!

另外, 計劃以外o既事仲有:

10. 重拾寫blog!! 因為yahoo blog摺o左, 搬o左o黎Blogger, 以前無add過fb o既blog友一下唔見晒, 加上自己一湊二已經極少blog, 簡直一切從零開始!! 不過可幸都參與過一d blogger event, 叫做迫自己勤力d寫blog, 令個blog多番少少人氣, 仲因此得到做全職媽咪後第一份收入 (都有幾千蚊o架!)!!! 雖然, 而家同以前yahoo寫結婚o既全盛時期差一大截, 但都已經滿足了!!

11. 生完Kobe仔之後, 老公子讚我煮飯好味o左, 變化多o左, 好似忽然開o左hiu咁...haha, 我諗實情係因為坐月多o左好多乾貨o係屋企, 所以煮飯咪多o左花款囉, HAHA!!

托賴, 今年除o左因為細佬出細Koey有段時間好少出街外, 兩個小朋友今年都算過得開心, 快高長大, 亦無大病大痛!! 

本來以為Kobe出世後D一家合照都係o係屋企影, 但搵相又俾我搵到每月都有戶外全家幅, 呢個2013都算係咁lu!!

展望2014, 我希望:

1. Kobe快D戒夜奶, 咁我就可以放佢兩姊弟同房, 我就可以一覺訓天光!!! 至於人奶, 繼續長餵長有, 唔好太早無貨!!!

2. 兩姊弟相親相愛, 繼續健康快樂, 越o黎越多interaction, 最好唔好嗌交爭o野, 兩個一齊玩唔使我理!

3. Koey番K1順利, 適應群體生活!!!最好當然係我心目中o既first choice幼稚園有位多出, 肯收Koey!

4. Kobe仔識行識走識講o野, 唔好好似家姐咁黐身!

5. 可以一家四口旅行!!! 其實老公子ZXmas抽到去澳門o既coupon, 去實去到, 但我心思思好想坐飛機去遠D!!

6. 老公子事業順利, 搵多D, 新環境新挑戰, 加油!!

7. 我可以多d自己時間, 寫多d blog, 參與多d blogger活動, build up 番多d audiance!!

8. 全家人身體健康!

睇番上面, 原來2012年尾已經計劃好晒2013點過, o黎緊2014, 目標好似有d模糊, 不過唔緊要, 作為C9一名, 只要一家平平安安健健康康已經要知足喇!! 2014加油!!

祝大家2014都開開心心, 順順利利!!

揭曉情人節禮物!!

大家仲記得我同honey今年情人節互相玩神秘件事嗎?而家要開估喇!!!

登登登登....honey送俾我o既,就係草蜢忘我演唱會飛!!!哈哈,唔怪得honey滿有信心我一定鍾意啦,因為佢知我係草蜢fans呢!!!!

咁大個女俾錢睇過三次演唱會,而今次...亦係我第三次睇草蜢演唱會,哈哈!!!

裝修後o既紅館,當時仲表演緊幻彩詠香江,好靚!!!

其實場館裝修完同之前分別唔大,只係D座位改晒色同埋舒服o左!!

開show前!!好神秘,我開頭仲以為係打雷台!!

快開場,開始多明星到喇!!!仲記得上次見到o係紅館熄o左燈下仲可以戴住黑超o既四哥,而今次就見到剪咀所指,日日o係東張西望都見到o既陳總!!!佢後面右排近右方仲有'林氏宗親',林海峰彭玲林曉峰康子妮仲有林珊珊,不過望唔到佢o地有無帶埋小朋友!!!

仲有坐o係control前面o既一班明星,有蘇永康梁漢文同佢老婆,仲有張偉健吳國勁!!

就快好始喇,全場一齊打bom bom棒,大家都預備high番晚!!

睇我個樣就知我幾開心!!

開show喇,好靚呀個台!!

原來係Circus呀,感覺好華麗!!

同樣係$400飛,但今次坐o係台正前面,草蜢三子成日企o係我坐呢邊,好正呀,未試過可以近到可以睇得咁清楚o架!!!正!!

阿細同阿智爬到好高呀!!

演唱會正直清明,中段有一part草蜢唱o左一串梅姐o既名曲!!傑仔仲學哥哥一樣,著對白色高跟鞋(至少4寸,仲要係幼踭!)跳舞!!

另外,草蜢今次仲唱o左一首好特別o既冠軍歌,就係...伙頭仔昆布!!!!!哈哈,我記得我細個都好鍾意聽呢首歌o架,佢o地今晚竟然會唱喎,仲跳d好生鬼o既舞,好好笑!!!

今次個show慢歌較少,不過都有最正o既失樂園同情歌!!!聽親傑仔solo我就會有種好感動o既感覺!!!

以前未興bom bom捧時好多營光捧o架,而家d'星光'無以前咁靚!!

今次草蜢唱o左首慢歌,意思係叫大家互相表達愛心,共度時間互相扶持,仲叫全場觀眾手拉手,場面好壯觀o架,但honey無影到全場個wide shot!!!

因為佢掛住影佢送俾我隻戒子!!哈...

尾聲喇,快歌下真係全場都企o架!!!我聽人講話識人o係紅館做,d職員都大讚係得草蜢先可以做到呢個人人投入o既高漲氣氛!!

大家睇o下我幾high!!(我honey唔識high,所以只係掛住影呢個high到傻o既我!!)

同樣係$400飛,今次比上次坐前五行左右,但感覺真係差好遠好遠!!!因為上次坐o係通道對上第一排,坐高o左,d人真係無咁熱情,身邊唔太多人好似我咁投入,但今次就唔同喇,我終於可以坐o係通道下面o既位置,身邊全部係草蜢fans,同我一樣咁high,大家一齊跳一齊叫,感覺係三次中最正!!!不過老實講,今次run down無上次咁正,氣氛亦應該唔及上次,因為上次我係睇尾場!!!!

今次好驚喜,因為我第一次見阿智咁大隻,佢一向o係三子入面身形無咁靚,但今次真係好驚喜,六舊腹肌好正,可見佢下o左幾大努力練好副身型!!!!(honey,你要學喇!!)

第一次encore,阿細都除埋!!

最後傑仔都除埋!!!

完show,今次同上次一樣,成場歌迷唔肯走,留足十幾分鏡,要紅館職員續個叫走,不過今次無好似上次咁dump地,上次我都好驚紅館會lum,哈哈!!!

我當然好滿意呢份禮物啦!!!其實今次我知佢o地開show,我都有諗睇唔睇,但最後因為覺得不如慳番d錢搞wedding所以放棄o左,今次真係好多謝honey帶我去癲番晚,'忘我'一番,暫時放底煩人o既wedding事,嗌完一晚,心情真係好暢快!!!

P.S.至於我送俾honey份禮物仲未ready,遲d先分享!!