親, 以後不用再洗碗了!!

o係2016年年尾, 我終於擁有一部洗碗機!!!

開箱後, 只見盒上面寫住: 

親, 再也不用洗碗了!!! 

Wow, 呢個願望簡直係我做FTM以o黎朝思暮想、夢寐以求呢!!!

咁誇? 真係一D都唔誇, 作為FTM, 雖然係全日都o係小朋友身邊, 但基本上大部份時間都忙於家事, 真正"陪伴"小朋友o既時間比想像中絕對要少!!! 有o左洗碗機, 那怕每餐慳到o既時間只係10-15min, 但呢少少時間放o係小朋友身上就算只夠睇多2本故事書, 都係值得o既!!!! (FTM一定明!!!)

話說回頭, 其實我已經留意o左洗碗機超過1年, 其間花過唔少時間上網搵資料, 好似洗碗機好壞處呀, 香港邊款牌子最經濟實惠等等...不過, 始終礙於安裝問題同洗衣機體積頗大呢兩大主要煩惱, 遲遲都唔敢添置!!!!

終於, 2016年年尾Xmas期間, 朋友竟然帶俾我一個振奮o既好消息: TB有免安裝座枱式洗碗機!!!!!

免安裝?? 當真????

知道有呢樣產品後我簡直雙眼發光, 即晚就上網search!!!

就係佢喇:九陽MINI洗碗機 X5!!!!

價錢: 大約只係香港搵到最平款式o既一半 (香港最平大約$3K頭!)

免安裝: 水箱式設計, 只需要駁好去水喉去sink盆就可以去水!

Wow, 只係呢2大原因已經解決晒我o既concern, 再加上九陽呢個品牌本身都幾有名(香港百貨都有賣佢o既豆漿機!! 我都係佢豆漿機o既用家!!!), 都有d信心保證, 真係無理由唔買!!!

結果, 我第二日就落o左Order, 注明發香港可要求改香港插頭、送洗碗粉、免運費直送順豐站、仲全國聯保, 連香港都有保養, 服務又幾細心周到呢!!!

落order後第二日, 我已經收到SMS通知取貨, 不過老公出差, 最後都要隔多兩日先真係取件!!!!

開箱!!!!

雖然機身體積 (38 x 42.2 x 40.8 cm) 比香港買到最細部o既要細, 但見到實物依然覺得好大部!!!!

放上廚房枱面, 電熱水煲等等都要讓路, 成個枱面無晒位!!!! HAHA...

連接好去水喉再放去sink盆, 插好電掣, 幫水箱入水 (容量5L), 先空機行一轉洗機兼試機!!!

行完一轉, 由於最後係熱水洗同烘乾, 開機一刻聞到少量膠味, 雖然都有少少擔心, 但味道唔太嚴重, 即管再觀察!!! (用多幾次膠味越o黎越少, 而家基本上都無味喇!!!)

打開機門吹o左1日, 終於正式試機!!!

可放5套碗碟!! 比香港最細機種放到6套要少!

其實5套碗碟我都應該夠用, 但偏偏我D碗碟大小形狀不一, 所以擺位上有D困難, 加上原來最大可入機o既碟唔可以大過8寸, 一般中式大碟都放唔入!!! 呢樣真係買之前無留意, 用o既時候我都打o左個突呢!!!

Anyway...

試機!!!!

機身下方顯示按鈕, 有烘乾及三種洗碗模式!!! 強力洗要2小時, 標準洗1.5小時, 快速洗35分鐘!!! 無論咩模式都係用5L水就搞掂!!!

慳電慳能源至上o既我當然選用快速洗睇睇效果先啦!!!

打開機蓋將洗碗粉倒在機門上再關蓋, 選用洗碗模式就可以開始喇~

去片~~

開機聲音唔太大, 同洗衣機d 聲幾相似!!!

開機後, 機身會顯示洗到咩程序 (一, 二, 三洗, 類似過幾次水吧!)!!

第一機洗碗, 唔知係咪烘乾o既關係, d碗碟一模上手超級乾爽, 正!!!! 

再檢查碗碟乾淨程度, Perfect!!!!

較難清洗有漬o既碗碟 (蒸魚碟或烘焙碟之類)效果又如何??

洗完碗碟仲有明顯污漬

不過呢類漬其實手洗都要頗用力先去除到, 所以我又唔會強求洗碗機可以靠水力就洗得去污漬!! 其實我可以依說明書指示, 加多D洗碗粉同用強力模式洗, 但礙於化學劑還是少用為妙同慳電原則, 所以我到今日都未試過用強力模式, 個人認為, 除非成機碗碟都好難洗, 否則為一隻多漬碟用強力模式點都唔化算, 我寧願用快速模式後將仲有漬o既碗碟再手洗捽多兩捽好過!!

究竟洗碗機幫我慳到幾多時間呢?  

而家, 基本上我餐餐飯都會用洗碗機 (老公幫手洗碗除外, 因為佢本身洗碗都好快手!!!), 平均慳到o既洗碗時間大約8-10分鐘吧!!!! 

老公o係屋企食飯餸多, 用o既用具亦多, 入得機o既佔量只有一半左右!! 以洗碗速度超慢o既我o黎講, 如果平時要洗30-45min, 咁入機洗o既可能只慳到8-10分鐘, 相對上好似唔太化算, 不過基於慳水原則, 我相信照開機依然慳水過手洗o既!

如果老公出差或平日午飯只有我加三位小朋友, 飯餸少之餘碗碟亦細件D, 平日手洗15-20慳到8-10分鐘, 真係化算好多, 有時真係只需手洗5分鐘就可以搞掂呢!!!

洗碗機優缺

而家, 已經用o左洗碗機2個多月喇, 雖然仲未的起心肝換o左D碗碟 (舊o既未爛為換新o既掉棄好似好浪費...過唔到自己o個關!!!), 但已經開始同部洗碗機做到好朋友!!

Overall, 九陽洗碗機俾我o既感覺如下: 

優:

1. 慳時間!! (當然, 慳出o既時間多寡同本身手洗速度快慢有關, 我洗碗慢老公洗快我一倍就當然慳唔到多少, 但洗少幾隻碗, 真係FTM都無咁易有主婦手呢!!!)

2. 慳水 (網上好多資料都顯示洗碗機比手洗慳水, 慳幾多我就唔肯定, 大家不防google下!)

3. 慳清潔劑 (每機洗碗機要用o既洗碗機粉都唔多, 計埋用少o左o既洗潔精, 的確環保D!! 上網見有唔少外國人用Baking Soda溝Borax自製洗碗粉, 又平又環保仲唔怕食o左落肚, 有機會我都想試試DIY呢!!)

4. 慳電 (唔使企咁耐o係廚房洗碗, 燈都唔使開嘛!!! :p)

5. 慳位 (而家D碗碟放晒入洗碗機, 乾碟架由以前成日要玩層層疊變為好多'吉'位呢!!! :p)

6. 平  (唔使2千解決洗碗煩惱, 絕對超值!!!)

7. 免安裝  (雖然要每次人手入水, 但免卻鑽廚房枱面同加水龍頭分流器, 安裝工程費都慳埋!!!)

缺: 

1. 碗碟放入洗碗機前要先去除大舊o既食物殘渣!! (老公話咁樣不如順手捽兩捽洗埋算!!!)

2. 最難清潔, 最time-consuming o既煲煲鑊鑊多數入唔到機, 要手洗!! (入得機o既都係易洗o既碗碟, 本身要洗o既難度同時間都唔多, 所以洗碗機overall 慳到o既時間只係好少!!)

3. 可入洗碗碟機o既碗碟有所恨制!! (除碗碟大小受機體大少所限外, 上網睇話膠製、木製餐具, 易碎玻璃或'tong'瓷碗碟亦不宜放入洗碗機!! 我d碗碟大小不一亦不容易排好入機!!)

4. 多漬碗碟要用強力洗模式洗2小時!! (再慳電心理上都覺得洗咁耐唔太好!!)

5. 大部阻位  (廚房枱面本來已唔多夠用, 而家就更難放o野喇!!)

Anyway, 除非裝修時就買部嵌入式特大洗碗機, 否則以上優缺基本上大部份洗碗機都會有呢!!!!

慳家小技巧 

用洗碗機已經慳o左, 仲要再慳?? 當然, 環保一向係鐵人媽媽祟尚o既生活模式嘛, 所以, 盡可能我都只會用快速洗呢個模式洗碗, 35min搞掂快靚正嘛!!

小技巧1. 先將入到洗碗機o既碗碟疊好放在sink盆水龍頭出水位對落, 再手洗煲煲鑊鑊!!!(洗煲鑊所用o既水已經足夠浸滿甚至沖走入機碗碟上o既食物殘渣!! 咁就利用o左缺點2解決缺點1啦!! 其實如果想再環保D, 可以手洗一半較易洗又唔入得機o既碗碟, 所用o既水其實都足夠沖刷入機碗碟, 之後, 將比較難洗又唔入得機o既鑊或煲放置在洗碗機去水口處, 待洗碗機排出o既熱水作為浸鑊水, 由於呢D水有洗碗粉成份亦易加熱, 清潔難洗o既煲鑊就變成易事, 到時就真係又慳水又慳力喇!!!)

小技巧2: 盡量用細小碗碟 (我本身有個12cm直徑細煲, 基本上老公出差我煮o既份量唔多都會用佢, 貪佢放得入機嘛!!! 另外就係上網睇到o既, 就係就算多人開飯菜d餸大碟都照將餸菜一開二分兩碟, 咁就手洗少一隻, 機洗多兩隻啦, HAHA!!)

小技巧3: 到烘碟模式時就關機 (基本上到第3洗時已經係用熱水過水, 熄機後o既餘溫應該都足以消毒同烘乾碗碟, 就算烘唔乾都可以直接打開機門拉出碗碟當乾碟架自然風乾, 咁又可以慳番少少電喇!!!)

最後, 俾多個使用小技巧: 放個漏斗o係水箱入水口, 咁加水到水箱就唔使成日怕整濕周圍喇!!!!!

總結

九陽呢部洗碗機小巧又抵玩, 洗得乾淨又免安裝, CP值的確幾高!!! 不過, 無可否認, 慳8-10分鐘聽落好少 (仲要係以我個龜速洗碗速度估計!!), 但只要每次聽到小朋友同我講: 乜你咁快洗完碗同我玩o既?  我就覺得買洗碗機呢個決定係明智o既!!! 因為唔止我洗少o左碗而開心, 小朋友亦因為媽咪多o左時間陪玩而開心得不得了呢!!!

HAHA, 而家飯後竟然仲有時間全家人一齊做o下運動, 真係好難得o既親子時光呢!!!

參考資料

呢篇九陽洗碗機開箱文, 有晒手洗機洗於慳水慳電方面o既對決, 好詳盡: 九陽MINI台式免安裝洗碗機之體驗

展開人生新一頁: Koey開學了!!

期待已久o既日子----- 9月1日開學日, 終於都o黎臨喇!!

期待已久? haha, 我估Koey未必期待喇, 因為o係佢心目中, 番學=離開媽咪, 所以佢一定好唔想呢日來臨!!

無錯, 等呢日等得好耐o既, 係我!!! 雖則我係好享受一拖二帶住Koey & Kobe周圍去街, 但有時真係想透下氣, 特別係Koey近呢兩個月開始拒絕午睡, 我由朝到晚真係想休息一陣都唔得, 所以我真係好期待Koey番學o個幾個鐘開檔, 到時再配合埋Kobe仔午睡時間, 咁我就每日最少有個半至兩個鐘休息時間!!! (雖然o個d所謂'休息時間' 其實都係做家務或自己去梳洗下咁, 但精神上點都係可以休息o下嘛!)

終於...

9月1日:

先同Koey執書包, 我o係佢面前介紹好放落書包o既物品, 再同佢一齊放入書包!!! 雖然佢都未必太上心, 但至少等佢知道下番學有咩用品要帶同放咩位置!

換好衫喇, 未出門口時好興奮咁!!! 上到小巴好似有小小緊張!!

早o左到學校門口, 好乖咁笑笑口影相!!!

9月1同2日小朋友都係番1個鐘, 仲要有媽咪陪伴認識學校新環境, 所以Koey都尚算OK, 係第一日老師臨放學, 忽然叫媽咪走出課室問外扮接放學o個下佢無心理準備, 爆喊收場, 但第二日佢已經OK!! 

9月3日:

真正挑戰係呢日, 呢日Koey都係番1個鐘, 但今次媽咪無得陪喇, 要o係學校門口同我say bye!!

不出所料!!! 亦正如佢自己開學前不斷同人預告: 我番學會喊o架!!! (所以我個相機已經一早standby!!haha!!)

呢日放學, 老師話俾我知佢成個鐘都無咩心機, 茶點無食, Sir滑梯都無玩!!!

接放學喇, Koey一開課室門口見到我就激動到想喊同即刻攬實我對腳...噢, 好可憐咁呀, 但又覺得好搞笑, 傻妹妹!! 自呢日開始, 問親佢番學最開心係咩事, 佢就答: 放學開門見到媽咪!!

9月4日:

放學拎住紙巾, 話係喊時老師叫佢拎住抹眼淚o既!!

9月5日:

帶埋細佬送家姐番學, 點知家姐入學校時喊o既唔係家姐, 而係細佬!!! 佢緊係擔心緊家姐唔知去o左邊!!! HAHA, 好可愛!!!

放學, Grandpa俾o左個Surprise我同Koey...

仲幫我影o左d親子相, 好開心!!!

估唔到第一個星期番學就有功課: 連兩條線!!

如是者...

第一星期: 適應2日有媽咪陪番學1小時、適應3日無媽咪陪番學1小時

第二星期: 適應番學2小時

第三星期: 適應番學3.5小時、適應坐校車番學

未開學前, 我對呢個遁序漸進o既適應時間表好有期望, 希望咁Koey就可以慢慢適應番學生活, 但點知我錯喇!!! 原來對住對番學充滿焦慮o既小朋友, 呢種遁序漸進並唔係好事, 反而係一種折磨!!! 因為Koey o係呢3個星期要不斷面對新變化, 擔心完一樣又要擔心第二樣, 好似坐校車咁, 佢不止一次喊住問點解要坐校車, 點解唔係媽咪送到學校門口...

唔知係咪Koey實在太擔心, 佢開學後由平時7點幾8點起身變為6點幾起身, 咁早起身夜晚黑食緊飯已經眼dup dup大叫眼訓, 黑眼圈超大, 成個人無厘精神咁, 睇見都肉赤...但無法子, 適應學校生活呢樣o野, 就算我再努力去形容到番學有幾好玩, 老師有幾好人, 同學仔有幾友善都好, 最終都係要靠佢自己去克服無媽咪o係身邊呢個挑戰!!!

就o係Koey 番o左近1個月學左右, 佢放學開始話我知佢無o係學校喊, 同一時間, 老公子forward o左佢唔知o係邊度睇番o黎(佢應該無咁神心, 我估係佢d同事send俾佢!!), 幾有意思o既一個小方法, 俾未能適應學校生活o既小朋友一個小安慰:

放張相入書包, 話俾小朋友知'爸媽'會陪伴小朋友上學!!!

呢個方法聽落簡單, 但對小朋友弱小o既心靈, 似乎真係好有效用!!!

我放o左相落Koey書包後, 亦寫手冊之會老師, 等佢見到Koey又因掛住媽咪而情緒不穩時提醒佢, 等佢望o下張相!!! Koey之後某日放學回家, 話我知老師有叫佢掛住媽咪時拎張相出o黎鍚下, 佢會開心番!!!

自此之後, Koey開始enjoy番學, 成日提人主學校d同學仔o既名, 同學校發生o既事, 開心番好多, 亦無再因為心理壓力而6點幾起身, 成個人精神生猛番晒喇!!

番學個半月, 老師o係手冊俾我o既留言都好正面, 睇到Koey正努力適應同進步中, 加油呀!!!

而家, Koey番學真係無再喊喇, 直到而家開o左學近2個月, 佢都仲有話我知, 食茶點去書包拎用具時, 都會望下張相, 我就知道呢個方法真係work喇!!!! 真係好開心我終於可以盡一點愛盡一點力去幫助Koey適應學校生活, 希望佢未來10幾20年o既讀書生捱可以順順利利, 媽咪一定會繼續支持你o既, 加油!!

對近來政局混亂有感

平日1湊2已經夠忙, 政治嘛, 坦白講, 我一向好少理! 但尋日整日被fb洗版, 又睇見電視直播, 心入面就係覺得好沉重, 這是我認識的地方嗎?

睇見示威/集會人士大部份克制自律, 我感到驕傲, 睇見警察使用比預期中要大o既武力, 我感到害怕!

警察錯嗎? 我不認為! 警察總需要維持社會秩序, 集會人士雖然手無寸鐵, 但要區散他們相信不易, 點點裝備總有需要, 只要大前提不傷害集會人士便是了...所以胡椒噴霧又好, 催淚彈又好, 我認為還可接受! 但睇見威脅要'開槍', 要用橡膠子單, 那便太過份了!

集會人士錯嗎? 我同樣不認為! 香港就係一個有集會自由o既地方, 昨天場面混亂中有秩序, 大部份集會人士似乎都係自發!! 但新聞中不是有人大大聲說要啟動'佔中'嗎? 點解昨日所見, 全日都好似無人出o黎控制場面, 領導集會人士'和平'佔中?? 大大聲說話的人在哪裡維持'和平'?? 可幸, 昨日所見, 大部份集會人士都能保持克制, 否則只要當中有人乘機倒亂, 後果便不堪設想了!

昨天所見, 網上搖言滿天飛, 要煽風點火何其容易, 唯恐天下不亂o既大有人在!! 越睇得多, 我心就越慌, 網上所看到的, 都是'真'的嗎?

如果被'廣傳'o既媒體主要得某日報, 而該報政治立場如何早就大家心照, 那我被報章'頭條'所牽動的情緒, 是'理性客觀'的嗎? 我不知道, 只係覺得處於混亂o既時勢時, 我覺得互聯網就係催化劑, 將成件事極速化大, 將社會上大家o既情緒極速被牽動, 實在十分恐怖!

學生/集會人士中沒有唯恐天下不亂的人嗎? 我不相信! 警察中沒有為口奔馳的好爸爸、沒有有良心的香港人嗎? 我亦不相信! 話我無立場又好, 騎牆又好, 集會人士與警察我都支持, 但我兩邊都唔會幫!

好了, 到普選這項了, 問我立場如何? 其實只要唔影響我日常生活, 我有無普選都可以! 此話何解? 以前港英政府港督都係被任命, 新加坡夠繁榮吧? 但總統竟然係世襲, 所以只要我日常生活不受影響, 普選與否我不關心!

但現況所見, 自由行已嚴重影響港人日常生活秩序, 大家成見甚深, 文化衝突時而發生, 生活既已被搞亂, 若而家連普選權都沒有, 實在連我C9一名都覺欺人太甚!!

不過, 我明白世界無免費午餐, 如果示威集會就可以換普選, 那我不如叫我老公煽動同事罷工示威, 希望爭取普選'老細'權, 選個必會升老公職o既老細好了!!

至於教協發聲明叫老師罷課, 呢樣係暫時令我覺得最幼稚o既一幕, 同'佔中'騎劫'學生罷課'差唔多! 學生選擇罷課, 係佢o地自己o既個人選擇, 自己負責, 但老師罷教, 影響o既唔只自己, 而係千千萬萬o既學生!!! 老公提醒我, 原來教協有政黨背景, 但有又如何? 阿媽絕食我就唔理對錯照跟, 仲要罷煮唔俾飯d仔仔女女食? 咁唔專業同對立黨派唔理好醜乜都大讚阿爸極權有理有咩分別??!!

教師謹守崗位固然應該, 如果真係想支持學生, 我覺得可以有更多方法, 好似教學生咩係是非黑白、咩係對錯、咩係民主、咩係和平等等等等, 總之就唔係罷課咁不負責任, 咁唔經大腦!!

阿爸要管個仔本來係理所當然, 政局再亂我都不會激動到否定香港係中國一部份這事實!! 所以俾我揀, 我會選擇用普選換'暫停'自由行, 總之我照常可以同我家人開心快活咁生活就可以了......唔好意思, 越講越顯示我o既C9無知了...

以上言論, 同意與否, 都無所謂, 香港就係有言論自由o既地方, 我慶幸我仲有能力享用我o既言論自由就是了!

可怕o既腸病毒

過去一個星期可以話係我做媽媽以來最辛苦、最恐怖、最徬徨無助o既一星期...

10/9 (WED): 喉嚨痛, 夜晚我發燒(38.6度)
11/9 (THU): 我繼續微燒(37.X度), 喉嚨痛; Kobe食完早餐嘔, 嘔o左4-5次, 去睇醫生, 話我係扁桃線發炎, 細佬就係腸胃炎! 下午Kobe仔全日無精神, 一定要抱住, 訓下驚醒又嘔, 嘔完又訓...直到下午4點終於止嘔, 但痾o左2次水, 好陰公!!

夜晚, 小朋友訓覺時間遇著大停電, 停o左1.5hr, 熱到飛起!

12/9 (FRI): 我同Kobe仔食o左一日藥都好似精神番晒, 不過Kobe仔就繼續痾水，同埋佢一聽到'嘔'呢個字就會變樣，好似好擔心好驚咁指住個口講'嘔嘔嘔嘔'!

13/9 (SAT): 清晨餵Kobe仔食奶時覺得佢好熱, 一度, 有成39.3度, 嚇親我, 由於之前佢又痾又嘔, 我不敢掉以輕心, 叫老公子抱Kobe去睇急症, 但Kobe仔出到街後就回復正常, 燒都退埋!

Kobe仔睇完急症番到屋企, 我就嘔吐大作, 嘔番尋晚食o既o野出o黎, 度一度自己, 微燒, 個胃好似打晒結咁扭住好唔舒服, 嘔o左4-5次手腳軟弱無力在家休息, 叫老公子帶Koey出街玩, 順便避o下細菌!

Koey陪老公子食完早餐, 買完生果番o黎食lunch, 食完Koey開始作悶, 之後真係嘔喇...成條水柱咁噴番晒lunch o既o野出o黎, 成地都係, Kobe仔呢個時候又無晒精神, 貼住老公子放唔低, 場面混亂, 我亦極為驚慌, 因為我意識到今次唔係'腸胃炎', 而係有種可怕病菌係屋企, 事態比相像中嚴重!!

打電話俾我爸媽, 點知原來連我媽都肚痾, 爸爸亦作悶!!! 最後, 我o地決定一齊出發去睇急症! 打的去急症期間, 細佬, Koey都嘔吐大作(我o地有帶膠袋, 無整污漕地方), 我就落車先嘔, 唔知有無嚇壞個司機!!!

急症室唔算多人, 等o左大半個鐘有得睇!! 醫生都幾細心詳細, 檢查完後解釋俾我o地聽, 似乎係兩種比較勁o既腸病毒之中其中一種, 所以先會惹到咁多人有事! 好彩大家面色都唔差, 情況還可以, 如果唔係就要入院抽樣本化驗!! 醫生話呢d腸病毒食藥殺唔死(抗生素例外), 嚴重o既可能真係痾足9日先清得晒...而家最緊要係先止嘔, 等大家可以飲番水食番o野, 咁就無咁頭暈無力!

打完止嘔針番屋企, 我個胃仲係好唔舒服, 連Koey都開始無晒精神, Kobe仔就一時精神一時眼訓咁, 但都係繼續做樹熊, 要抱實我!! 於是三個人就咁攤o係sofa上面望住個電視發呆, 唯一仲未受細菌感染o既老公子就忙於為屋企大掃除, 用1:49漂白水清潔清潔清潔!!

傍晚我o地試下食果皮白粥, 我同Kobe仔食o左少少都無事, 但Koey就一直止唔到嘔, 到夜晚臨訓前仲係嘔番晒所有o野出o黎...點解d止嘔針對Koey無用o架???好擔心!

14/9: 夜晚我簡直係大昏迷咁, 訓醒後個胃終於無再唔舒服喇, 但全日仲係手軟腳軟, 起身坐低頭暈暈, 無時無刻都好想訓覺, 仲有少少微燒!! 至於Koey, 朝早食o左少少米糊後仲係極無精神咁, 我真係好怕佢仲會嘔, 好彩過o左陣佢又精神番, 只係比較眼訓, 好難得咁訓o左個午睡, 亦全日無再嘔, 老公子亦繼續無事!! Kobe仔比較反覆, 朝早好似精神番晒, 但傍晚又開始無精神貼實人, 原來又發燒 (38.4度), 加上由早到晚繼續痾水痾o左3次, 似乎佢真係'中毒'最嚴重, 病情最反覆, 有可能如醫生所講要痾多幾日先清晒d病毒呢!!

Koey精神番, 用我電話玩自拍~~

樹熊Kobe~~

15/9: 今日我成個人已經回復力氣, Koey同Kobe一早亦扎扎跳, 係Koey全日痾o左兩次水, 本來仲諗住俾佢番學, 好彩下午三號風唔使番, 見到佢肚痾, 似乎唔好番好過呢!

似乎大家都開始好番喇!!! 屋企所有o野可以洗可以浸o既都洗晒抹晒, 總算可以放心!!!

雖然呢個星期真係好難捱, 但我還是要慶幸:

- 慶幸我同Koey嘔呢一日係星期六, 老公子o係度, 如果唔係得我一個人真係唔知點算!
- 慶幸老公子無中病毒, 如果唔係全屋污物都唔知邊個'有力'去處理!
- 慶幸如醫生所講, 雖然又痾又嘔, 但大家精神還可以, 無一個需要入院!
- 慶幸Koey睇醫生打針好合作, 嗌都無嗌, 無扭計!
- 慶幸仲有個星期日俾大家留o係屋企休養生息!

最後, 仲要多謝大家o既問候同關心, 經過今次, 真係覺得健康好重要, 特別係做人媽咪, 真係寧願自己病都唔想睇住自己小朋友又痾又嘔咁辛苦, 希望以後唔會再有咁可怕o既病毒再出現o係我屋企啦 !!

世上最常見又最鮮為人知的畸形: 耳前瘻管

最近有網友o係fb post o左佢仔仔耳前瘻管發炎o既事, 於是開o左個group叫有相似情況o既人 "正視" "這個病", 有"患者/同路人"一齊"分擔"擔憂"...

um...

點講好呢???

我擁有呢個耳前瘻管超過30年, 我婆婆有、媽咪有、舅父有、姨姨有、Koey有、Kobe有...可以話係家族遺傳咁滯...而家無啦啦俾人話"有病", 仲叫我"正視" 佢...我心入面硬係覺得好唔自在!!!

基本上, 我係明白呢位網友係出於好意, 想開個group等同樣有呢個瘻管o既朋友傾下交流下!! 不過睇o左幾句佢o既留言, 我覺得佢實在有點危言慫聽了...

或者...網友自身無呢個瘻管, 見到自己小朋友咁細個就要受發炎同做手術之苦, 所以'放大'o左成件事吧...

由於我見到有兩位認識o既媽媽朋友都o係group度留言, 表現'緊張', 我真係忍唔住pm佢o地解釋一番, 以下係我o既見解:

- 首先, 醫學上定議我唔識, 但以日常理解, 我個人覺得呢個絕對唔係病!!!!! 我寧願認自己係'畸型', 就好似有d人會多o左d手指腳指一樣, 只係我多o左個瘻管!!! 

- 只要注意日常衛生, 基本上唔使理呢個lone! 平時, 我唔會主動去接觸佢, 唔使掂佢理佢, 佢間中會有d淡黃/綠色有(或有時無)味o既, 好似濃咁o既o野自動流出o黎, 唔痕唔痛, 用乾紙巾印走佢就OK, 完全唔需要特登去唧佢!

- 不需要因為有瘻管而避免游泳!! 當然, 我唔係醫生, 唔敢百份百否定游水會增加發炎機會呢個說法, 但歸根到底發炎唔多唔少都係因為唔夠衛生/有細菌引起, 個人覺得都係注意衛生就可以!!! 好似我媽咪唔游水, 一樣會發炎, 根本避無可避亦無得預計! 

- 有瘻管唔一定會發炎!!! 環顧身邊人, 就算有注意衛生都有可能發炎, 簡單講, 發唔發炎係無得預計!! 好似我同我婆, touchwood未發過, 我媽咪就1X, 2X同4X歲都試過發炎, 最後o個次終於割o左一了百了!

- Touchwood真係發炎, 唔好自己處理, 要睇醫生! 我問過我媽咪, 做手術割o左個囊並唔係最痛, 最痛係發緊炎去診所'放濃', 因為成隻耳發炎腫痛, 但又要夾硬唧d濃出o黎, 如果唔係消唔到炎就無得做手術, 呢度先係最麻煩!! 不過都係o個句, 成個過程搵醫生處理, 唔好自己亂o黎!

其實我都有留言問網友發炎點算 (我見佢開得個group, 諗住有d咩心得...), 但對方都係話千萬唔好自己處理, 有事要睇醫生之類...

...um...咁即係成件事同我原本理解完全一樣: 

唔需要特別'護理'耳前瘻管, 注意日常個人衛生就足夠, 發唔發炎根本無得預計無得預防, touchwood發炎搵相關專業醫生處理!!!!

咁...強調係'有病', 要'正視', 找'患者'之類, 係咪有少許誇張, 少許危言慫聽了??!!

或者我講個比喻, 好似大家都有手有腳一樣, touchwood你整親自行處理傷口時衛生唔好, 都會有機會發炎, 咁我無理由話你'有機會發炎'而話你'有病'嘛!!! 同樣道理, 我亦唔會因為自己有手有腳, 而無啦啦日日擔心自己手腳'有機會發炎' 一樣!!!! 就算發炎, 割o左佢就唔會有事, 呢個瘻管唔係cancer唔係咩魔怪, 比起好多疾病痛症, 相信只係好小毛見大毛!!

大家明白嗎? 

希望大家睇完我呢篇後個心會無咁驚無咁醫張!!! 其實真係好小事, 擔心都擔心唔o黎嘛, 放鬆d, 唔需要將未出現o既問題放大!

最後, 分享我2008年一篇blog, 內容正正關於'耳前瘻管', 可惜內文o既news link已經失效, 只係得番個header : 原來我係“世上最常見又最鮮為人知的畸形”!!

Wikipedia解釋簡而精, 有時d o野唔使諗得太複雜, 係咪? 耳前瘻管 wikipedia

Look@ME 媽咪大變身!

母親節又到喇! 眨o下眼, 今年係我同Koey同Kobe過o既第3同第2個母親節喇!!

雖然話照顧小朋友係我o既'天職', 再辛苦都無得怨無得賴, 但有時候, 真係唔可以只係掛住d小朋友, 有時候都真係要顧下自己, 所以襯母親節將至, 我決定要對自己好d, 獎勵一下自己, 送自己一個新look!!!

掂唔掂?

掂唔掂?

早前我見到朋友share o左STENPHENMAKEUP o既Look@ME 女主角大變身活動, 覺得好似好好玩, 最緊要可以變靚d嘛, 於是我就膽粗粗參加o左!! haha, 平時幫Koey參加呢樣o個樣小model活動就多, 自己參加真係算第一次!

o係4月20日, 我就去o左同Stephen見面, 一去到先知, 原來佢o地o既製作係咁認真!! 現場唔止有星級化妝師Stephen, 仲有造型師、髮型師, 連埋攝影師同錄影師, 成個團隊有成9人之多, 好利害呢, 今次真係無join錯!! :p  而另一個驚喜, 就係我遇番Sarona呢, 佢係我結婚影pre-wedding時認識o既婚紗設計師o黎, 負責今次活動o既Styling, 幫我設計造型呢!

等o左一段時間, 終於輪到我喇!! Sarona先同我去換衫, 佢預備o左幾套衫俾我試, 其實幾款衫我都幾鍾意, 因為顏色夠sharp夠醒神, 不過最後我都係揀o左條青綠色Pattern褲, haha, 因為平時o既我絕少會著有pattern o既衫褲, 今次話明要'大變身', 我自己都好想突破一下框框, 作d新嘗試!!

換好衫, 要化妝喇!! 坐定定俾人化妝唔係第一次, 但俾射燈照住, 邊化邊望實鏡頭保持微笑真係第一次, 感覺好得意, 真係好似做緊平時o係電視度見到d化妝品牌model咁!!!

成個化妝過程其實好快, 唔講咁多, 去片~

段video好正哩? 我自己都忍唔住睇o左好幾次, 仲上網搵方法download o左留個記念!! hehe!!

自從做o左媽咪, 特別係我呢d真正o既全職媽咪之後, 一對手做N樣家務同應付兩隻小馬騮, 真係忙到日日無時停, 所以出街都係以快同方便照顧小朋友為主, 真係莫講話搵時間執靚自己, 化番個靚妝先出街見人!!!

不過今次大變身後, 我對於要自己變得靚d sharp d有唔同睇法!! 因為今次無論化妝、造型定髮型都完全照顧到我係'媽媽'呢個身份, 做到又快又簡單, 但效果就已經好突出!!

髮型: 直髮俾人fresh d o既感覺, 襯番夏日feel, 仲感覺yound d! 完全唔使梳唔使紮, 一個字: 快!

妝:  雖然Video唔多唔少都經過剪輯, 但實際上成個妝容真係最多10分鐘就搞掂! 唔識化妝o既我睇住個video都覺得個妝似乎唔難化, 跟住一步步好似教學咁做, 似乎我要pick up都唔會太難呢!!! 

造型: 白色雪紡上衣+青綠Pattern長褲 + 金色粗踭涼鞋 + 簡單民族飾物! 簡單得o黎好fresh!! 上身可以遮住我湊B後出現o既粗手臂同大肚腩, 粗踭涼鞋又可以拉高個人, 但又企得穩唔影響我彎腰湊細路! 亮點當然係條褲啦!! 相信識我o既朋友都一定未見過我著咁花碌碌o既衫褲, 今次真係眼前一亮, 連我自己都估唔到自己都carry 到呢類Pattern衫褲呢, 睇o黎我以後買衫褲可以多個選擇, 今次新嘗試真係無揀錯!!

原來, 做o左媽咪之後都可以又型又靚!! 雖然小朋友未識欣賞, 但只係花少少時間執執自己, 換個sharp醒look同靚心情, 對自己好d真係幾值!!! 淨係睇我今次大變身後, 開心o左成晚就知啦!!!

總之, 真係好多謝STEPHENMAKEUP o既團隊幫我大變身, 幫我做個又型又靚o既潮媽咪!!!

好喇, 拍攝近尾聲, 老公子帶埋Koey 同Kobe o黎影合照!

我: 媽咪靚唔靚呀?

Koey點點頭!

我: 咁媽咪化妝定唔化妝靚d?

Koey: 媽咪都係唔化妝靚d~~

拍攝完畢, 因為時間已經好夜, 我又無街去, 所以好可惜地, 我無得帶住呢個新look去街, 而要番屋企用呢個靚妝幫小朋友沖涼餵小朋友食飯!! HAHA!!! 無法, 再型再靚我都依然係'媽咪'嘛, 呢個身份無得走! 

食飯其間, Koey不斷問: 媽咪幾時先變番普通媽咪?

HAHA, 睇o黎佢真係好唔習慣見到我化妝呢!! 最後, o係Koey問o左至少3次之後, 我就帶住依依不捨o既心情乖乖去落妝沖涼, 還番個'普通媽咪'俾Koey喇!!

臨落妝前忍唔住再自戀一下!!!

化o左妝, 真係笑容都充滿自信!!!

睇o黎Koey未識欣賞我個新look呢!! 唔怕, 等我試下勤力d, 出街慢慢化番多少少妝等佢習慣下咪得囉, HAHA!!! 不過要化番妝, 睇o黎我要出一出血, 利一利其器, 送番d母親節禮物俾自己先得喇 ...唔怕話俾大家知 (...講出o黎真係有d唔好意思!!), 我個化妝袋入面用得最多o既唇膏, 應該都用o左超過3年 (...過晒期用都唔知有無問題!), 睇o黎我要跟住段片買番d化妝品旁身先得!! 

報幼稚園有感 (後續篇)

真慶幸上篇 報幼稚園有感 (大結局篇) 原來未真係大結局!!! 其實...而家好多家長都一手keep幾個offer (我好乖o架, 我本來有2個offer交o左留位費, 上個月書面通知o左其中一間唔要offer喇!!), 有時真係未到8月開學都未知番邊間!!!

上一篇提到...

" o黎緊3月尾4月, 有好多幼稚園都會開始收學費, 到時手握幾個學位o既家長應該會放番唔少學額出o黎, 到時waiting list 可能有變動, 而我亦都會到時試試向心儀o既學校扣門作最後努力!!! 不過呢, 其實隨o左我本人之外, 基本上身邊所有人都覺得我屋企樓下o個間收o左Koey上午校已經係超理想, haha, 所以人人都滿意下, 就算扣門唔成功, 我都唔會強求, 無謂再自尋煩惱, 接受現實罷了!!! " 

兩間幼稚園比較如下:

KG A: 無offer + 英普 +校車 (同區, 但1拖2應該要行20min以上) + 有學券
KG B: AM offer + 區內傳統老牌名幼 + 屋企樓下 + 無NET + 有學券

KG A話扣門就算有位都係得PM, 所以主要考慮係PM vs 英普...

由12月考慮到而家, 我始終都係buy英普, PM AM都好, 我真係唔想錯過學language o既critical period, 所以由12月到而家, 身邊朋友或家人問到我讀邊間幼稚園, 我都一直有所保留, 無確實回答, 因為我始終期待KG A收Koey, 決定3-4月要扣門一試!!!

今日我再打去KG A, 佢o地表示已經寄o左取錄通知信俾我, wow, 真o既??? 太好喇, 咁即係話, 我成功向心儀o既學校扣門成功喇, YEAH!!!!

KG A話我可以o係登記時交埋轉AM o既申請信, 雖然明知轉AM機會不大(因為學校本身AM位得好少), 但既然8月未開學都仲有變數, 即管寫埋啦, 唔得都無壞!!!!

希望...希望呢篇'後續'之後仲有'後續'啦, 無都唔緊要, 我已經好滿意而家個結果喇!!! 希望Koey會鍾意呢間幼稚園啦!!

我來保護你!

今日去公園有個男仔 (唔太識睇幾大, 可能10歲左右~)係都唔俾Koey爬梯上去Sir滑梯, 之後仲追住Koey伸手唔知想打、捉定摸Koey!!

當時Koey o係地面, 我就一手抱住Kobe一手拎住相機 o係滑梯o個層, 開頭我都只係以為個男仔唔禮讓o架咋, 但o係Koey附近o既一對夫婦似乎都覺得個男仔行為有異, 於是幫手保護Koey, 擋住個男仔唔俾佢接近Koey!!!

呢個時候我開始心急喇, 急步跑番去滑梯另一邊落番地面, 再快步番去拖住Koey, 但個男仔仲係不斷跟住我o地, 叫佢唔好再跟 (廣東話同普通話都講晒!) 佢都唔理, 仲係追住, 一有機會就伸手掂Koey, 好似聽唔明咁, 問佢o野又唔答, 答o既時候又好似外星話咁唔知佢講咩!!

於是我o地行去疑似佢媽咪o個度話佢知個男仔追住我o地, 個阿媽(帶口音)只係問我o地個男仔有無打人 (又好似係話個男仔唔會打人), 之後佢係咁二阻止個男仔再跟, 之後又唔多理咁繼續不斷襟電話, 完全唔當個仔騷擾到人係一回事!!

Koey呢個時候開始因為我o地拖走o左佢無得Sir滑梯開始喊, 為方便保護Koey, 我要放番Kobe落車仔, 但Kobe又因為我放低佢而大喊, 當時真係好手忙腳亂, 不過好彩幫手保護Koey o個對夫婦一直陪住我同幫手擋住個男仔, 唔係我一個女人仔要應付咁o既突發事真係幾驚!!

之後我同幫手保護Koey o個對夫婦一齊行去公園另一邊繼續玩, 個男仔o係遠處仲係不斷望住Koey, 都咪話唔得人驚!! 之後我寸步都唔敢離開Koey, 個男仔一行近我o地就拉Koey去另一邊玩!!

同o個對夫婦分別後, 我都要帶Koey & Kobe番屋企, 離開公園時, 我望到個男仔仲係望實Koey, 之後我就o係公園門外停低拎水俾Koey飲同整理行裝, 點知呢個時候o個對母子又走近, 個男仔一度o係我一米附近, 而佢媽咪就o係3-4米外繼續襟電話!! 我當然提高警覺啦, 好彩個男仔都無再進一步走近或作任何騷擾行為, 之後離開公園先真正擺脫佢o地喇!

事發前影o既~

左上角就係o個對古怪母子, 右邊位大肚媽咪就係幫我o個對夫婦之一~

第一次遇到呢d事, 都真係都幾驚!! 我第一次感受到為o左保護自己仔女, 勇氣真係會忽然注滿全身o既感覺!!!我覺得自己真係好似玩麻鷹捉雞仔o既母雞咁, 麻鷹再可怕都會勇字當頭保護小雞咁...好彩, 今日個男仔年紀仲細, 都唔係咩麻鷹, 如果只得我一個, 就算個男仔郁手郁腳上o黎攻擊性應該都有限吧!!

今次件事, 真係好感激一直陪住我o個對夫婦, 佢o地真係好好人, 有佢o地幫手Koey先無俾個男仔嚇親, 我亦可以定d無咁驚!! 無可否認, 有起急事上o黎有個男士o係度真係安全好多!!

事後, 我當然有同Koey解釋番件事, 不過佢仲細根本上唔識驚, 只係覺得奇怪做乜拉走佢唔俾佢Sir滑梯, 亦未識睇個男仔係咪古怪, 做乜事追住佢! 不過好認真, 原來我要開始教Koey保護自己了!! 我同Koey講, 頭先個男仔猛咁追住你, 媽咪同頭先d叔叔姨姨都覺得佢好奇怪, 所以先會拉開你唔俾你Sir滑梯, 亦唔俾個男仔行近你, 怕佢唔知會唔會打到或撞到你, 下次你再遇到人覺得奇怪記得一定要同人講'NO', 同埋要即刻搵爸爸媽媽, 咁先可以保護自己!!

Koey似明似唔明咁...唔緊要, o係你未識分辨好人壞人之前, 就等我同爸爸一齊保護你先啦!!

事發後完全唔知咩事o既Koey繼續開心笑~~

算吧, 人世險惡都係遲d明白o既好, o係你未識保護自己前萬大事有我同爸爸保護你!! 

奢侈o既二人世界

o係自己個'二人世界'post相先知, 原來對上一次二人世界, 已經係20130728, 剛剛足半年...

唔係想話自己好可憐, 但今日呢短短5個鐘拍拖時間對我o黎講真係好奢侈!!!

今日呢5個鐘, 我o地...

1. 手拖手
2. 企o係度迫地鐵 (唔使人讓座)
3. 上落MTR坐電樓梯 (唔使去唔知邊度轉角位lei埋等好似永遠都唔會到o既lift)
4. 行維園年宵 (至少4-5年無去踏足過呢片土地...)

5. 食大牌檔 (唔使揀有BB椅或放得落BB車o既地方, 亦唔怕食得慢好似阻住等位o既下一台客)

6. Shopping (買o左3件衫, 唔係淘, 係o係HK行街買!!!!!!!!)
7. 上行人天橋行樓梯 (有lift都偏偏唔搭)
8. 坐巴士上層 (仲要未停定就起身同剎車o既衝力抗衡!)

9. 全程不停傾計 (老公子無掛住睇手機, 又唔使傾計時不斷有人大聲叫'媽咪'打斷對話!)
10. 靜靜咁揀o左上兩星期去studio影o既相

上面o個d聽落都係d芝麻綠豆小事, 但我真係為o左以上o既事樂翻天...係咪好白癡? 雖然...行年宵實際上係趕到似係路過多D, shopping實際上係為難得過海, 想順便用o左張sogo coupon為買而買多D, 但呢5個鐘我同老公子(其實...我o既感覺應該大過佢好多!)都已經好滿足好開心了!!!

辛苦晒爸媽幫我o地湊住兩位小朋友, 等我o地可以過一下二人世界!!

報幼稚園有感 (大結局篇)

成為初級"怪獸家長" o既我o係"報幼稚園有感" 中提到我為Koey 報o左11間幼稚園, 唔計1間撞時間in唔到, 2間因已有更好offer而放棄無去in後, Koey實際去o左8間幼稚園面試, 而結果亦全部有喇!!

有'反怪獸家長論'提過, 小朋友咁細個就要面對密集式面試實在無陰公!! 其實, 我都有擔心過會唔會辛苦Koey又辛苦自己!! 但之前都提過, 作為當局者, o係無時間續間研究之下, 大包圍真係無辦法之中o既辦法!!

幸運地, Koey唔單止唔抗拒面試, 仲好鍾意去學校同老師傾計, 而且我揀o既都係唔太遠o既學校, 所以帶住Koey行去interview都唔算太辛苦!! 而且, 我發覺邊間好邊間唔好, 咩類型學校先適合Koey等等, 真係要親自去學校先會了解到, 所以報11間真係唔算多喇!!

其實辛唔辛苦小朋友, 基本上係同家長o既態度有關, 如果家長為o左幼稚園面試而又報面試班, 又日日強迫小朋友練習作答問題, 答錯仲要鬧, 咁真係報1間都嫌多呢!!

=======================================================

好, 講番Koey o既成績: 3間收, 5間waiting!

開頭真係開心到我飄飄然, 因為頭3間出結果竟然都係收Koey上午班, 搞到我心都雄埋, 一心諗住及後o既'名校' 都有d機會收Koey!!!!

等呀等, 等待o既過程真係既心急又緊張, 雖然明知所報o既九龍塘區名幼都係超級熱門, 競爭激烈, 但Koey表現唔太差, 入o既機會比六合彩應該高d吧!!! 就係咁, 我就日日留意住fb 2014-15 K1 個group, 一有風吹草動就去check信箱, HAHA!!

結果呢, 及後5間全waiting, 當中4間係九龍塘區熱門幼稚園, 包括我o既1st choice, 1間就係大圍區性價比頗高o既邨校!!

坦白講, 每次拆信都真係有dd失望, 不過心情都尚算平靜得好快!!

o黎緊3月尾4月, 有好多幼稚園都會開始收學費, 到時手握幾個學位o既家長應該會放番唔少學額出o黎, 到時waiting list 可能有變動, 而我亦都會到時試試向心儀o既學校扣門作最後努力!!! 不過呢, 其實隨o左我本人之外, 基本上身邊所有人都覺得我屋企樓下o個間收o左Koey上午校已經係超理想, haha, 所以人人都滿意下, 就算扣門唔成功, 我都唔會強求, 無謂再自尋煩惱, 接受現實罷了!!!

======================================================

無論結果仲會唔會改變, 有樣o野一定唔會變, 就係我同老公子對Koey面試表現o既滿意同肯定!  Koey一向怕陌生人, 但佢in咁多間都有問有答, 表現尚算淡定, 至少老師應該睇唔出佢平時係超級怕生保!! 答題目方面, 佢平均8成以上都識, 係間中答得細聲d或者有主見地拒絕老師要求!!

 

其實Koey 有咁o既表現, 除o左係佢本身努力外, 我覺得同我全職湊佢亦不無關係!!出去in得多, 不難遇到interview時坐唔定、勁喊勁扭計、搶人玩具等等o既野蠻小朋友, 對比起上o黎, Koey 雖然一定係少數無讀nursery, 甚至連playgroup都無上過o既小朋友, 比較怕生保, 但佢絕對唔會因為被姐姐或長輩寵壞而壞脾氣、嬌生慣養, 亦唔會因為過份被迫練習面試, 或者已經習慣番學, 對幼稚園已經無新鮮感覺而抗拒面試!!

或者, Koey咁淡定、甚至算得上係中上o既表現, 就係對我選擇放棄工作, 全職照顧佢o既一種肯定, 亦係我全職媽咪生涯入面第一張小小成績表, 睇見Koey漸漸成長, 真係好難唔令我暗自歡喜、為自己, 亦為佢驕傲!!!!!!!!!!!!

近來有唔少報導提及現今怪獸家長為'贏在起跑線'而走火入魔, 早教越o黎越早o既現像:

幼園生忙補習-誰偷走快樂童年
令人感到震驚的德國教育 就讓孩子輸在起跑線上吧
幼稚園課程遭質疑過於艱深
媽 我六個月大就「起跑」是否早了點？

其實, 我不太讚同家長以 '怕小朋友將來適應小學更深課程時會覺得辛苦' 做藉口, 為小朋友選擇課程出名艱深o既幼稚園!! 那為了小朋友更易適應艱深課程o既幼稚園, 係咪要揀艱深o既學前班、進而提早上課程深o既playgroup、再因為怕上playgroup辛苦, BB一出世就教佢ABC?

有時我真係覺得呢個藉口唔係太make sense!! 為o左適應未來更深課程去補習, 走去幼稚園讀小學課本、小學讀中學課本...結果, 犧牲小朋友去hea、去玩、去大笑去歡樂o既時光!! 小小個子每日生活就只剩下番學同學呢樣o個樣, 有時唔好話去玩, 跟本就連發揮想像力o既空間、學習應有o既待人接物態度、學習'適應辛苦'、接受挑戰、面對挫折 o既機會都無, 真係好可憐!!

o係人人都讀nursery、半歲開始番playgroup、甚至幼稚園已經要番全日, 或一日番兩間幼稚園o既年代, 其實我都曾經質疑過, 我同老公子對於小朋友學業呢方面, 態度係咪過於寬鬆同唔上心, 但經過今次報幼稚園o既所觀所感, 再加上Koey o既表現, 我覺得我o既疑慮其實有點多餘!!

無錯, 我應該對Koey (或Kobe)、對自己有信心!! 就算將來小朋友未必事業有成、出類拔萃, 但至少做個待人有禮、有責任心、肯承擔同面對挑戰/挫折o既人, 我就覺得已經好足夠, 就算要我而家再辛苦d都好值得!!

真正o既輸贏從來都在終點, 起跑線起得早又好遲又好, 只要中間盡了全力, 跑得精彩, 甚至懂得享受當中過程, 我深信就算輸在終點, 也是「贏」!

希望Koey & Kobe將來有日回首, 能夠為自己有個全職媽咪而開心, 能夠為自己「贏」了一個充滿快樂回憶o既愉快童年而感到自豪!!

Koey的勇氣大考驗之二 ~~ 做個靚靚小Model

之前一晚做完花女 (詳見"Koey的勇氣大考驗之一 ~~ 做花女@Betty & Vince's Wedding"

), 第二朝一早9點幾又出發喇, 今次係去扮靚靚, 為Yes-Parents x Smart Family做小model, 因為我同Koey有幸入圍《呢個冬天我型晒》親子組呢, 真係好開心呀!!

做小Model影相之嘛, Koey又唔係第一次影, 點解係'勇氣大考驗'呀?

 

做小Model@14個月                   做小Model@18個月

哈哈, 因為一切都好突如其來囉!! 做花女係點我都有一早預告俾Koey知, 幫佢做心理準備, 但今次考驗就連我都無預計會發生, 所以對於Koey o黎講, 真係比做花女o既考驗來得更大, 更有挑戰性, 大家睇埋落去就知!!

呢日天氣唔好, 又凍又落雨, 幾經轉折, 終於用o左個半鐘頭去到位於西環o既Smart Family度影相!!

一去到Smart Family, 職員就話要幫Koey化妝, 噢? 原來小朋友都要化妝, 咁為免Koey唔鍾意, 於是我化妝先, 等佢望下了解下!! 不過未等到我化完, 職員就問Koey可唔可以幫佢換衫!! 其實d職員姐姐已經好nice, 不斷'了'Koey傾計講o野, 等佢無咁怕生保, 不過真係無諗到咁快捉佢去換衫!

職員姐姐叫Koey問我: 可唔可以俾姨姨幫我換衫呀?
我: 當然可以啦!

就係咁, 2位職員姐姐就帶Koey去離我十數尺遠o既更衣室換衫!! 其實我都睇得出Koey被抱入去時唔係太願意, 我仲好驚佢會喊, 但估唔到拉埋布簾後, 佢睇唔到我、爸爸同細佬都無喊, 或者佢聽到我o地講, 話我o地係度, 佢會聽到我o地把聲, 所以仲接受到吧?

好, Koey換好衫喇, 但我當時仲未化完喎, 於是職員姐姐就'通知'我, 話抱Koey上2樓set頭, 同一時間話俾Koey知媽咪化完妝就會上去搵佢!! 一切都發生得好快呢, 我都未o黎得切反應Koey已經上o左2樓, 我完全睇唔到佢咩表情, 我同老公子只係識得互望, 大家應該都係o係度諗緊Koey一個人上o左去有無驚, 會唔會爆喊!!

大約5分鐘後, 我終於化完喇, 之後仲要換衫, 我諗到我上去2樓搵Koey時已經係7-10min後!! 當我上到去, 就見到Koey乖乖咁坐係度俾姐姐set頭化妝, 佢見到我即刻想嘴扁扁, 我讚佢化o左妝好靚, 又問佢化妝整頭好唔好玩、D衫靚唔靚, 但佢全部都嘴扁扁想喊咁樣, 完全答唔出, 只係頭擰擰, 真係我見猶憐, 但同一時間我又覺得佢好叻, 因為佢真係無喊到!!

好喇, 到我set頭喇, 由於我當時拎住好多o野, 所以就行出Set頭間房, 拎個袋俾我老公子看管, 其實我只係消失o左2-3秒時間, 所以我無同Koey講聲就轉o左出去, 點知甫見媽咪o既Koey眼見媽咪轉眼又離佢而去, 就再也忍不住了, 結果當場爆喊!!!

由於當時已經化好晒妝, 為免佢喊花晒個妝, 同埋喊得太勁影響陣間影相o既情緒, 我真係出盡法寶咁tum佢!!!

 

陰公囉, 係咪我見猶憐?

(左邊面入面係我tum佢俾佢食o既糖!!)

諗番轉頭, 我又真係大意d o既, 剛剛先見番我, 轉頭又唔見o左, 又難怪佢會喊...

最後, 又tum又搞笑下, Koey終於破涕為笑喇, 真係鬆一口氣!!

轉戾點就係呢刻!!

我話: 你睇媽咪同你係咪著到一樣? 你而家得個喊樣, 咁媽咪係咪都要整個喊樣同你一樣?

Koey就係望到鏡內我同佢喊到一樣樣而笑番!!!HAHA!!

之後我就繼續同佢玩照鏡, 佢心情亦慢慢好起來喇!!

不過, 由於佢喊, 我o地搞o左好耐先可以settle down去影相!!! 當時Studio已經迫滿其他上o黎影相o既小朋友lu!!

呢日我o地有兩個親子裝造型!

造型1: 烈艷紅唇o既Koey, 大家覺得如何?

造型2: Koey已經心情靚番晒喇!!

講真, 當日o既攝影師唔知係咪比較少幫小朋友影相, 我覺得佢一D都唔pro, 完全唔識指導點擺pose同埋無做任何o野引小朋友望鏡頭, 仲掉轉成日出聲'話'Koey唔望鏡頭!! 或者佢係想考我o地自己擺pose, 自由發揮吧, 結果拍攝過程我要不斷引Koey, 又要不斷同佢講, 要望住攝影師叔叔個相機, 唔好望其他人!! 由於引佢笑係我, 爸爸又係側邊想影D花絮相, Koey唔望鏡頭真係一D都唔奇!! 所以影完相, 我都唔敢太期望D相好靚, 只係希望影咁多張, 總有幾張影得好D!!

 

睇住我o地影相, 唔知Kobe仔有無悶親?                      Koey襯空擋玩千秋!!

影完喇!!! 最後, 大會頒o左張嘉許狀俾我o地!!

仲有價值$300 o既禮物pack送番俾我o地!!

離開Smart Family時已經係1點喇, 足足搞o左2個鐘!!之後我o地o係附近搵到間價錢唔貴, 又坐得舒服o既餐廳食o野!!!

 

生猛番o既Koey!!

haha, Kobe咁o既樣, 係咪唔慣媽咪化o左妝?

食完o野都2點幾喇, 本來難得去西環, 我同老公子真係好想番HKU行o下, 但可惜呢日實在太大雨喇, 時間又已經咁晏, 我o地只好踏上歸途, 又要長征番屋企喇!!!

原來Koey都好高喇喎!!

今日o既收獲!! 估唔到個禮物pack咁豐富, 我同Koey都有背包, 仲有文具, 髮夾等!! 至於最頂件衫, 係我o係舖頭即場以6折價錢買o既!!

呢幾隻髮夾好靚呀!!!

相信Koey對於呢日o既經歷一定好難忘!! 難忘o既唔係做小model影相, 而係o係豪無心理準備下, 經歷佢人生第一次離開爸媽, 同完全唔相熟o既陌生人接觸!! 

唔知Koey大個o左, 對今日發生o既事仲有無印像呢? 無都唔緊要, 因為今日o既經歷我同老公子都會記得, 因為我o地發現Koey比想像中懂事, 至少離開我o地都無爆喊, 控制到自己情緒, 明白呢日影相係要見陌生人, 唔可以黐實爸媽!! 雖然最後都係爆喊收場, 但我同老公子已經覺得Koey算係咁, 希望佢記得今次經歷, 之後再有離開爸媽同陌生人接觸o既機會會更加勇敢!!!

加油呀Koey!!! 恭喜你通過今次unexpected o既勇氣大考驗!!!

========================================================

最後, 大會出o左相喇, 容我o係度拉下票, 請大家多多支持我同Koey, click下面張相投我o地一票啦!! 多謝!!!