day26: 乖豬發聲大笑

第二周 (27/5 - 2/6): 心情極差

乖豬食完訓訓完食, 我自覺都叫適應o左, 仲同老公子講其實佢請一星期我都ok, 因為朝朝我媽咪會上o黎幫bb沖涼同拎飯我食, 夜晚老公子去完奶奶度又會拎飯我食, 咁我其實要做都係照顧個女換片同食奶, 點知湊b原來唔係咁間單...

第8日: 乖豬好enjoy沖涼!!雖然我知我媽咪日日上o黎同佢沖涼都幾辛苦, 但我知佢都好enjoy同個外孫沖涼...另外, 由於初生o既乖豬的確幾似初生o既我, 我媽話的確有d似湊緊我咁呢!!

睇o下乖豬幾enjoy!!!

第9日: 臍帶終於甩o左喇!!

第10日: 今日係我黑仔o既一日...

首先, 我沖涼時成個浴缸都係血...!!!其實第七日沖涼時無好直接淋生水, 主要用薑水抹沐浴露再係咁二淋生水沖一沖, 估唔到今日沖涼諗住就咁用生水, 花灑照頭淋到腳就出事...我睇住兩腳內側都係血, 一直流到缸中搞到成個缸都係血, 好得人驚, 沖完涼我坐o左係toilet抹o左好耐先止血咁...本來都唔夠膽講俾老公子知, 但後尾見止止o地血都係講o左...

自今次疑似流血不止後, 奶奶煲o既木耳湯(去瘀血, 佢連煲3日叫我食晒d木耳)我唔敢再食d渣, 之後惡露真係明顯少d, 似番m到第一日咁o既量...

第二件黑仔事係今日奶奶上o黎又煮飯, 我借d二話泵奶就入房諗住唔使煩, 點知泵出o黎o既奶水竟然係血紅色, 好horrible, 唔怪得姑娘話頭一個月唔好泵, 似乎我真係扯傷o左乳腺...之後我改用手擠奶, 因為點都要confirm擠奶無血先可以俾乖豬埋身...好彩擠出o黎o既無血, 所以我照埋身, 但至今我都唔敢再用泵, 或者满月後都未必敢用住喇...

最後一件黑仔事就係bb噴奶!!!一直都知應該換完片先餵小朋友食奶, 但bb有時就鍾意食食o下奶去大大, 有時真係唔忍心佢'up'住個pat pat咁耐, 於是呢晚佢食完奶, 我就幫佢換片, 點知我可能舉得佢pat pat太高, 佢即刻嘔奶, 仲要係口同鼻一齊噴奶柱出o黎, 我即刻嚇到好驚, 邊大叫老公邊快手扶起bb坐直掃風...bb一聲都無喊, 好似乜事都無發生咁, 但我就嚇到忍唔住大喊, 因為第一次見bb噴奶, 好驚佢會'濁'親, 所以我好內疚, 覺得係我幫佢換片先搞到佢嘔奶, 成手同成張床墊都係奶o既同時我只識喊, 好彩老公子清理現場同安撫我咋...自此之後, 我真係寧願bb被便便up住個pat pat都唔敢o係佢食完奶時幫佢換片喇...

第11日: 今朝一早再去健康院磅重, 由於自覺個肚都叫扁番d, 我好自然咁係櫃拎條褲出o黎著, 點知...仲差好幾寸先拉得埋...o個刻都幾hurt, 因為我事先完全無諗過會著唔落呢...

另外, 乖豬呢日有3.36kg, 進展良好, 今日姑娘教多次餵人奶, 下星期一磅多次就滿月先再去健康院打針, 好橋今日係我中學同學教, 雖然係識, 但我又唔覺太尷尬...

去完健康院老公子自己出去沙田辦出世紙!!

再另外, 今日換片時乖豬噴便便, 仲要噴到好遠, 網床唔拆得出o黎洗o既地方都污漕埋...抹死我同我老公...

笑得咁奸, 成個男仔咁!!

我有出世紙喇!!

第12日: 奶奶不嬲愛曬命, 所以剛到12朝佢就急不及待叫佢d親友o黎探bb, 其間我拎我剛出世o既bb相俾親友們睇, 佢o地都話乖豬似我, 點知奶奶似乎呷醋, 猛唱反調, 話bb唔似我, 似我老公...奶奶仲襯我唔為意成塊面貼落bb塊面...我都係睇番d相先知...今次到我呷醋喇...我咁多日都無試過哄bb呢, 奶奶成日懶係合衛生講到自己差d要戴口罩先上o黎探bb, 點知自己轉頭又唔洗手又用面哄bb, 太過份!!! :(

乖豬第一次睜大眼大笑被拍到, 不過抱住佢o既唔係我...

第13日: 剛剛先話乖豬食完訓訓完食, 我最多訓少d咁解, 都唔難照顧, 呢頭見完健康院姑娘以為餵人奶己經無乜問題, 點知今日個女食奶d pattern亂晒, 埋身30min好似訓啦, 放低落床5-10min就醒晒, 再幾min後又喊又扭食, 如是者30min埋身, rest 20-30min 再埋身30min...可以連食我2-3hr先真係訓著...唉...坐係度又呵又tum都唔訓, 成日要食, 就算我夠奶都無咁快recover到, 兩邊都清晒個人又支力, 搞到我成身散晒, 亦好懷疑係咪我唔夠奶, 所以佢食極唔飽???

另, 上星期到衛生署個甲狀腺驗血報告正常!!

第14日: 乖豬繼續大食積上身, 夜晚12點食到我3點, 真係搞到我人都癲, 同一時間, 奶奶又自把自為話要上我屋企煮飯, 我好有禮貌咁表示自己要休息, 所以唔想佢上o黎煮煮晚飯, 就咁下午探bb就ok, 點知奶奶同姑仔發神經, 又話我命令佢, 講到我好似永世唔俾佢上o黎煮飯唔俾佢見個孫咁, 搞到我身心都好難受, 身體上己經無得休息, 精神就更加受折磨, 最後我第二日又要認低威扮乖打番俾奶奶, 講到我喊到崩潰咁滯, 我媽咪上o黎見到都喊埋一份, 我每次諗番起媽咪為我喊我更加忍唔住喊, 係呀, 你個女做人新袍真係好受屈呢...

從今次件事我真係更加憎奶奶, 特別憎姑仔, 點解我唔可以襯今次直頭同佢o地反面一了百了???點解最後又要捱我奶奶成個鐘長氣, 仲要佢以為佢o岩晒我錯晒!!!!

乖豬真係成個仔咁...

掃風 (3/6, day15)

第一周 (20/5 - 26/5): 有如打仗

生完第一個星期真係有如打仗...

第一晚: 醫院己經交番乖豬俾我照顧, 由於產後心情仲好亢奮, 一向容易因緊張而訓唔著o既我本來就訓唔著, 再加上唔識照顧bb, 乖豬輕輕哼一聲我都忍唔住要望o下, 緊張+緊張, 再加埋隔離床咁多bb o既喊聲, 呢一晚我又失眠...

第二日: 由於己經失眠超過48小時, 我真係頂唔順, 所以主動要求出院, 就算我再訓唔著, 行動再不便, o係屋企點都好過o係醫院!!!由於傷口痛, 所以gut o下gut o下行得超慢, 但好彩爸爸放大假, 可以車我番屋企!!番到屋企我同老公子先手忙腳亂拆蒸奶煲, 暖奶器, 測溫器, 奶樽出o黎, 成屋變o左垃圾崗, 我o地又唔識用d o野, 臨急先睇說明書, 真係頭都大...點解我o地唔係bb出世前做好d準備??

另外, 出院呢日我仲未上人奶, 左邊俾乖豬咬損晒, 好痛...番到屋企連右邊都損埋, 痛死, 夜晚決定放棄餵奶粉, 但心情其實好down, 怕餵人奶計劃就咁失敗!!

第三日: 我出院後真係好支力, 但奶奶唔理我幾支力, 堅持要上o黎煮飯, 又話乜都煮好只係o係我屋企煮番熱d o野炒個菜我乜都唔使做可以休息, 但實質上佢o地7點幾上o黎只係煮都搞o左成個鐘, 食埋己經9點幾, 再坐o下己經10點, 真係阻住我休息, 最慘係我就算乜都唔使做, 精神上根本仲要應籌, 邊休息到...我連拎筷子都無力, 但老爺奶奶姑仔根本就唔care...自私到爆, 我亦有苦自己知...!!!

另外, 今日開始上奶, 晚飯同夜晚訓覺個胸好谷, 谷到好痛, 但乳頭仲係好損, 忍痛餵多幾次乖豬好似食得好o左d, 無再整損我!!

個個都話乖豬似我, 呢張相連我自己都覺得好似望住自己咁...

第四日: 今日係星期一, 終於可以去健康院, 磅重3.13kg, 比出世輕o左少少, 應該係收水!!照黃個指數19x, 係boundary case, 再高少少就要入院照燈, 醫生要我o地第二朝再check黃!! 下午好朋友jenny探我, 即刻向佢請教點湊bb, 間直遇到救聲咁, 而我亦因為上o左人奶, 乳頭又無咁痛, 心情比之前好好多, 不過我仲係未洗頭沖涼, 希望jenny唔會覺得我好污漕啦, haha!!!

另外, 乖豬出世我捐o左臍帶血, 驗血報告話乖豬甲狀腺個指數有d問題, 要我o地過幾日抱乖豬去衛生處抽血再驗!! 

左: 我暈lu!!

第五日: 經過一晚努力餵奶再加乖豬便便暢通, 今日check黃指數明顯降o左, 唔使照燈, 體重亦升上3.24kg, good!!!另, 經健康院姑娘指導, 餵人奶進展娘好, 開始唔使補奶粉喇!!

醜怪樣!!

熟睡中!!

第六日: 經過幾日適應, 加上上o左奶, 而家日程開始有點規律, 我自覺開始習慣, 係眼訓d o者...

我爸爸捕捉到乖豬發夢大笑!!

左上角o個張最衰out focus o左!!

第七日: 我終於頂唔順去沖涼, 其實之前唔沖並唔係我特登忍, 而係傷口痛行動不便加上忙於湊女, 我根本無時間理會自己儀容, 襯呢幾日開始習慣, 天氣亦無早幾日咁涼, 係時候要打理下自己喇!!

沖完涼媽咪終於乾淨晒, 影番張一家三口相先!!!(呢張相影得我瘦o左, 其實我生完一個星期咋, 己經俾媽咪奶奶谷肥o左, 而家塊面好脹, 肥過生o個陣!!)

生產記 (完)

...bb抹乾淨o左, 助產士就抱o黎同我o地合照, 可惜我部相機連埋我d行李鎖住o左...所以咁珍貴o既相, 只能用我老公子部手機影, 好彩都有300萬像素, 唔太差o既...

之後老公子要離開產房, 助產士就問我想自己疴胎盤定佢o地幫我拉, 我當然叫佢o地幫我啦, 當刻真係咩力都無喇!!! 助產士邊檢查我胎盤邊教另一位助產士, 原來個胎盤都好大個o架! 同一時間, 另一個姑娘就同我講"好靚呀, 含氧量100%呀", 我無深究, 我估係講緊bb血液含氧量o卦, 總之佢話data靚就得喇!! 至於我, 由於無咩野做, 就望o下訓係不遠處箱中o既乖豬, 我見到佢喊都唔喊, 仲睜大對眼周圍望, 好得意!

終於聯針, 係男醫生, 佢話我傷口都算爆得勁...可能因為我生得太耐, 磨傷晒, 佢話我入面有一忽俾bb扯甩o左...由於要聯一段時間, 我就同醫生吹起水上o黎...極好傾咁, 聯針都唔痛, 聯好後醫生同助產士講我呢個產婦都幾得意幾好傾, 我就答佢話之前成晚陣痛o野都講唔到, 而家唔講幾時講...haha!!!

聯完針4點半, 我request姑娘抱乖豬俾我埋身餵, 餵得極成功, 一d都唔痛, 餵o左半個鐘我先連埋bb一齊送上產後房!!送上房其間聽到有人讚bb精靈得意, 可能因為佢一直眼仔碌碌, 唔似多數bb合埋眼啦, haha!!!出到lift大堂, 見到由十點幾一直係產房外等候o既爸媽同老公子, 我o地一齊坐lift去產後房, 我爸己經急不及待猛用手機影外孫, 仲不斷話佢眼仔碌碌呢!!

到產後房5點半, bb要沖涼被人拎走o左, 呢個時間剛好探病時間(d時間真係夾都無咁準!!!), 爸媽細佬妹老爺奶奶姑仔都有o黎, 但我剛生完, 心情仲好激動, 見人就講"生仔好恐怖", "下胎開刀算" 等等, 仲忍唔住眼濕濕...可能因為剛生完, 雖然好開心好多人探我, 但其實我覺得5點半到7點半呢2個鐘探病時間有d難捱, 因為我無得休息, 產後房冷氣又細, 我熱到成身汗媽咪又要迫我襯d飯熱時食, 真係熱到我人都癲呢...

anyway, 終於7點半完o左, 我終於可以躺係床休息o下, 雖然心情激動又熱都唔會訓到, 但都叫有少少時間養神!!

好似到8點幾9點吧, 乖豬終於推番俾我照顧, 我亦終於由懷胎10月o既女主角, 變為乖豬o既工人, 展開我無得訓o既生捱...