八個月大成績: 重17磅(近50%, 食粥兩個月終於追番D, 但其實仲係得塊面, D手腳仲係比較瘦!!), 身高大約70cm (75%, 但乖豬會郁, 好難度得準!!)! 剛八個月我正式再減多餐奶, 而家3奶2粥, 粥仔越食越多, 而家大約3/4嘜2餐, 水果就一 餐可以食得晒成個蘋果咁o既份量, 算幾多, 最愛o既木瓜大大個食成4分1都唔夠, 次次食完都喊, 可能太甜太潤太美味!!! 便便方面, 平均近每日一次, 出街就多數唔去, 除非太急!!而且都算成功去potty, 而家一星期都未必會有一次痾落片片, very good!!!
發展方面, 今個星期繼續進步, 已經可以自己爬高扶住地櫃企(但我仲未買到好用o既防撞膠邊, 所以屋企仲係好危險!)!!又越o黎越多o野講同'奸', 唔滿意就會EE呀呀大叫或即喊, 但一'得逞'就會'奸笑', 好似覺得自己好'威'咁, d動靜真係令人唔知好嬲定好笑!!!
23/1: 今年乖豬第一年過年, 我同老公子第一年派利是俾乖豬...其實無乜特別感覺, 因為佢又未明, 封利是都係俾佢當玩具拎到巢晒, HAHA!! 大約12點幾, 去到舅父屋企團拜, 因為有好多人幫我湊B, 我今日可以落去會所同親友們玩, 對我o黎講真係難得o既假期呢!!
第一年逗利是!!
大紅大金, 出發拜年去!!!
隻Monchichi仲大過乖豬呢!!!
至於乖豬, 其實咁多親友佢都驚, 成日望住D'熟人'喊o黎'求救, 而我呢個'熟人'緊係避得就避, 費事佢見到我扭要我!!!
最後, 臨走時發生o左d'意外', 就係舅父屋企門外地上發現有'朱古力漬', 原來係乖豬舅公之前俾o左粒朱古力俾乖豬玩, 乖豬一直拎住無放低, 結果拎到溶o左, 成身都係, 好彩發現得算早, 仲可以入番屋洗手抺身, 但原來幾位舅公同舅婆, 同埋我爸媽都搞到成身朱古力, haha, 個個掙住抱, 偏偏就係今日可以'唔使抱'乖豬o既我同老公子無中招呢!!!!
P.S. 一踏入龍年好友就宣布陀第二個b, 真係令人開心O既消息呀, HAHA, 希望我都可以係今年生個龍B啦!!!
再P.S. , 乖豬雖然過年前識得'請請', 但過年咁多陌生人, 根本都唔會'請'俾人睇, 結果佢o係年初三唔使出街拜年時, 係屋企玩心情靚先o黎'請請'呢!!!
24/1: 今日年初二開年, 朝早去o左我媽度食年榚, 有我屋企人湊B, 我今日可以同細佬妹同佢o地o既另一半仲有我爸玩Card Games, 嘩, 我好耐無試過玩呢D'娛樂節目'喇...果然做o左媽咪真係'全年無休'...真係要好好珍惜呢兩日o既'開心時光'呢!!!!
行去我媽屋企途中, 乖豬個樣好搞鬼!!
夜晚就去99度食開年飯, 唔知係咪出o左兩日街攰, 乖豬呢晚除我以外完全唔俾人抱, 放係sofa玩好地地, 一俾人抱起就望住我喊, 拒絕其他人呢!!!!
今周其他精選相片:
心情勁靚, d 表情好鬼馬!!
haha, 剛訓醒就俾人用閃光燈閃, 出現呢個怪樣!!! 我諗呢張係乖豬出世以o黎隻眼影到最大o既一張相呢!!!
兔年過o左先o黎扮兔仔!!! (中間o個張相我覺得好似我, 同埋影得乖豬好大個呢!!)
快過年喇!!!
會所放o左棵大桃花!!
去會所玩騎馬仔個樣好神氣咁!!!