新加坡親子遊@2014 ~ Day5: Bye Bye Singapore!

20140705 (SAT)

(去完旅行3個月有多喇, 終於的起心肝追番最後一日遊記!!!)

o黎到最後一日行程喇!!! 呢日4點上機, 所以朝早時間好鬆動, 我亦無安排任何行程, 輕輕鬆鬆同招呼o左我o地幾日o既May&信信一家游o下水食o下飯就夠開心喇!!!

一早起身, 咦, 下面呢兩個背影咁熟o既??

之前一晚行雷閃電又大雨, 呢朝起身天氣雖然都麻麻, 但無雷暴警告, 我o地食過早餐執拾一下就去游水喇!!!

細佬未習慣落水, 好驚!! 信信成日游水, 面口鬆容好多!! HAHA!!

兩位爸爸負責落水照顧小朋友!!! 我嘛...又好似上次去澳門咁, 唔方便落水呀, 嗚...

不過諗番轉頭我唔落水都好, 上水沖身執拾都快d, 無咁論盡!!!

May 仲帶埋抱抱搶落去玩, 好開心呀!!! 係香港d私家泳池一定唔俾玩呢d!!

扭計中!! 俾大健叔叔抱住喊得更加淒勵!!

爸爸抱番, 仲有水抱玩先笑番!!

家姐好鍾意玩水, 好開心!!!

成日扭計掙水泡玩!!!

信信就繼續做開心果, 好可愛呀!!!

最靚o既合照!!!

影影o下May拋o左隻青蛙仔落水, d小朋友目光好一致, HAHA!!!

靚靚家庭照!!!

靚靚家庭照!!!

上水喇!!!!

快手快腳沖身後, 我o地又要走喇!!! o係May 度住o左幾日, 打搞晒喇!!

等的士!

爸爸同細佬上的士先, 唔見o左爸爸家姐扁晒嘴!!!

May帶o左我o地去附近商場食叻沙!!! 正正正!!!

細佬訓左, 家姐就因為俾我夾到佢手指, 爆喊!!!

就係呢間喇!!! 地方細細, 但好光猛乾淨! (Koey仲扁緊嘴唔肯影相!!)

飲品到佢先收聲!!!

每碗份量唔多, 所以我o地都叫o左好多樣一 齊食!!! 左上角個炒麵唔辣, Koey可以食!!

食完, 爸爸就照顧小朋友, May就帶我去超巿買手信!!! 個超巿都幾大, 唔係佢帶我行, 我諗我有排行都搵唔到想買d咩!!!

掃完手信, 仲有時間去Shopping!!!! 呵呵呵, 成個trip最free應該就係呢個moment喇!!!

之後再買埋阿呻就番去搵老公喇!!!

由於要2點就到機場, 所以掃完手信, 買埋上機食o既漢堡包就要去的士站喇!!!

多謝May一家呢幾日o既款待呀!!!你o地真係好貼心, 期待你o地番香港探我o地呀!!!

呢幾日Kobe都好似怕怕o地大健叔叔, 臨走肯Give me 5, 好有破冰o既感覺!!! HAHA!!

可惜我o地要走喇, 真係想玩多幾日!!!

信信訓醒!!!

Timing so good!!! 趕得切臨走抱o下呢位小可愛!!!

haha, 臨走, 緊係要抽o下水!!! :p

走喇!!!

去到機場喇!!! 仲有1.5hr就起飛, 我o地d時間又係o岩o岩好!!!

好得意o既藝術品, 小朋友都好專心睇佢郁!!

又買手信!!!

排隊等過關~

過完要坐行李車!

去到登機閘口, 被海關scan到我o地行李放o左d 剛剛o係超巿買o既laksa同亞呻kaya 醬, 唉...認真失敗, 我同老公子都無買寄艙行李, 一時大意就唔記得唔可以帶太大罐液體上機...!!! 我同老公子試圖遊說, 但結果呢...當然唔成功啦!!! 的確係我o地錯先, 雖然擺明係手信, 但無奈都係要被充公, 嗚...

過完海關喇, 細佬睇飛機!!!

呢個樣超搞笑!!!

家姐介紹飛機俾細佬睇!!

帶住小朋友, 可以優先上機!

起飛後家姐急不及待食M記o既粟米!!

坐飛機好開心!!

細佬就扭眼訓, 又試好嘈!!!

好彩老公子好快抱o左佢訓!!!

Koey繼續好精神, 玩完圖畫又開手信俾佢食!!!

芝士餡o既斑蘭瑞士卷!!! 我同Koey都覺得味道唔錯, 老公子就唔多鍾意!!!!

睇o下Koey食得幾開心!!!

自拍!!!

影相自拍, 影影o下Koey好似上o左電咁, 笑唔停, 係咁要求玩自拍, 仲交足表情!!!

同HK一樣, 玩緊馴龍記公仔!!

兩父子大覺訓!! Koey同我就照舊唔訓!! 叫Koey試o下訓, 佢笑住扮訓, 但睇o黎真係未眼訓, 訓唔到!!!

六點幾, 又開餐!!! 食包包當晚飯!!!

之後Koey終於開始無電, 開始不斷問我'點解咁耐都未到?', '幾時先落機?'... 不斷repeat repeat又repeat, 問到落機!!!

好靚o既夜景!!! 影o左好幾張, 但就係認唔到邊度打邊度!!!!

8點落機喇, 細佬訓醒晒, 仲肯落地行一陣添!!!

呢晚我同老公子都無食飯, 但為o左d小朋友快d訓, 飯都無買就打的番屋企! 搞o左一大輪11點終於安頓好晒d小朋友喇, 我都唔多記得我同老公子食o左d乜做晚餐lu!!!

襯小朋友訓o左, 當然係手信大曬冷啦!!

呢兩對就係我同May Shopping時買o既鞋!!! 款式靚價錢又唔貴, 真係抵!! (呢兩對夾埋HKD$400左右!!)

Koey 係Legoland 買o既Lego人仔!!! 佢係跟據佢所知爸媽自己喜歡o既顏色揀o架!!! 細佬就當佢鍾意紅色先喎!!

係Little Big Club快手買o既八達通套, 都好靚, 一次過有晒咁多人物嘛!!!

第二朝, 小朋友們都忙住玩新玩具lu!!! Koey仲自己對住圖砌晒d 小包Lego, 又進步了!!!

5日4夜新加坡之類眨o下眼就完結喇!!! 第一次一家四口坐飛機去旅行, 全程總算順利!!! 唔順利o既都只係d小損失, 好似唔見hip-seat、唔見黑超、手信被沒收...最嚴重應該係傻o左無帶新相機去沙灘, 搞到Snap少好多花絮相!!! 其餘時間大家都玩得好開心, 大人細路最鍾意o既景點當然係Legoland啦!!! 

最後, 當然要再次多謝俾我o地打搞o左幾日o既May一家啦, 有阿May細心o既安排, 我o地全程先可以咁順利咋, Thank you so much!!! 

對近來政局混亂有感

平日1湊2已經夠忙, 政治嘛, 坦白講, 我一向好少理! 但尋日整日被fb洗版, 又睇見電視直播, 心入面就係覺得好沉重, 這是我認識的地方嗎?

睇見示威/集會人士大部份克制自律, 我感到驕傲, 睇見警察使用比預期中要大o既武力, 我感到害怕!

警察錯嗎? 我不認為! 警察總需要維持社會秩序, 集會人士雖然手無寸鐵, 但要區散他們相信不易, 點點裝備總有需要, 只要大前提不傷害集會人士便是了...所以胡椒噴霧又好, 催淚彈又好, 我認為還可接受! 但睇見威脅要'開槍', 要用橡膠子單, 那便太過份了!

集會人士錯嗎? 我同樣不認為! 香港就係一個有集會自由o既地方, 昨天場面混亂中有秩序, 大部份集會人士似乎都係自發!! 但新聞中不是有人大大聲說要啟動'佔中'嗎? 點解昨日所見, 全日都好似無人出o黎控制場面, 領導集會人士'和平'佔中?? 大大聲說話的人在哪裡維持'和平'?? 可幸, 昨日所見, 大部份集會人士都能保持克制, 否則只要當中有人乘機倒亂, 後果便不堪設想了!

昨天所見, 網上搖言滿天飛, 要煽風點火何其容易, 唯恐天下不亂o既大有人在!! 越睇得多, 我心就越慌, 網上所看到的, 都是'真'的嗎?

如果被'廣傳'o既媒體主要得某日報, 而該報政治立場如何早就大家心照, 那我被報章'頭條'所牽動的情緒, 是'理性客觀'的嗎? 我不知道, 只係覺得處於混亂o既時勢時, 我覺得互聯網就係催化劑, 將成件事極速化大, 將社會上大家o既情緒極速被牽動, 實在十分恐怖!

學生/集會人士中沒有唯恐天下不亂的人嗎? 我不相信! 警察中沒有為口奔馳的好爸爸、沒有有良心的香港人嗎? 我亦不相信! 話我無立場又好, 騎牆又好, 集會人士與警察我都支持, 但我兩邊都唔會幫!

好了, 到普選這項了, 問我立場如何? 其實只要唔影響我日常生活, 我有無普選都可以! 此話何解? 以前港英政府港督都係被任命, 新加坡夠繁榮吧? 但總統竟然係世襲, 所以只要我日常生活不受影響, 普選與否我不關心!

但現況所見, 自由行已嚴重影響港人日常生活秩序, 大家成見甚深, 文化衝突時而發生, 生活既已被搞亂, 若而家連普選權都沒有, 實在連我C9一名都覺欺人太甚!!

不過, 我明白世界無免費午餐, 如果示威集會就可以換普選, 那我不如叫我老公煽動同事罷工示威, 希望爭取普選'老細'權, 選個必會升老公職o既老細好了!!

至於教協發聲明叫老師罷課, 呢樣係暫時令我覺得最幼稚o既一幕, 同'佔中'騎劫'學生罷課'差唔多! 學生選擇罷課, 係佢o地自己o既個人選擇, 自己負責, 但老師罷教, 影響o既唔只自己, 而係千千萬萬o既學生!!! 老公提醒我, 原來教協有政黨背景, 但有又如何? 阿媽絕食我就唔理對錯照跟, 仲要罷煮唔俾飯d仔仔女女食? 咁唔專業同對立黨派唔理好醜乜都大讚阿爸極權有理有咩分別??!!

教師謹守崗位固然應該, 如果真係想支持學生, 我覺得可以有更多方法, 好似教學生咩係是非黑白、咩係對錯、咩係民主、咩係和平等等等等, 總之就唔係罷課咁不負責任, 咁唔經大腦!!

阿爸要管個仔本來係理所當然, 政局再亂我都不會激動到否定香港係中國一部份這事實!! 所以俾我揀, 我會選擇用普選換'暫停'自由行, 總之我照常可以同我家人開心快活咁生活就可以了......唔好意思, 越講越顯示我o既C9無知了...

以上言論, 同意與否, 都無所謂, 香港就係有言論自由o既地方, 我慶幸我仲有能力享用我o既言論自由就是了!

可怕o既腸病毒

過去一個星期可以話係我做媽媽以來最辛苦、最恐怖、最徬徨無助o既一星期...

10/9 (WED): 喉嚨痛, 夜晚我發燒(38.6度)
11/9 (THU): 我繼續微燒(37.X度), 喉嚨痛; Kobe食完早餐嘔, 嘔o左4-5次, 去睇醫生, 話我係扁桃線發炎, 細佬就係腸胃炎! 下午Kobe仔全日無精神, 一定要抱住, 訓下驚醒又嘔, 嘔完又訓...直到下午4點終於止嘔, 但痾o左2次水, 好陰公!!

夜晚, 小朋友訓覺時間遇著大停電, 停o左1.5hr, 熱到飛起!

12/9 (FRI): 我同Kobe仔食o左一日藥都好似精神番晒, 不過Kobe仔就繼續痾水，同埋佢一聽到'嘔'呢個字就會變樣，好似好擔心好驚咁指住個口講'嘔嘔嘔嘔'!

13/9 (SAT): 清晨餵Kobe仔食奶時覺得佢好熱, 一度, 有成39.3度, 嚇親我, 由於之前佢又痾又嘔, 我不敢掉以輕心, 叫老公子抱Kobe去睇急症, 但Kobe仔出到街後就回復正常, 燒都退埋!

Kobe仔睇完急症番到屋企, 我就嘔吐大作, 嘔番尋晚食o既o野出o黎, 度一度自己, 微燒, 個胃好似打晒結咁扭住好唔舒服, 嘔o左4-5次手腳軟弱無力在家休息, 叫老公子帶Koey出街玩, 順便避o下細菌!

Koey陪老公子食完早餐, 買完生果番o黎食lunch, 食完Koey開始作悶, 之後真係嘔喇...成條水柱咁噴番晒lunch o既o野出o黎, 成地都係, Kobe仔呢個時候又無晒精神, 貼住老公子放唔低, 場面混亂, 我亦極為驚慌, 因為我意識到今次唔係'腸胃炎', 而係有種可怕病菌係屋企, 事態比相像中嚴重!!

打電話俾我爸媽, 點知原來連我媽都肚痾, 爸爸亦作悶!!! 最後, 我o地決定一齊出發去睇急症! 打的去急症期間, 細佬, Koey都嘔吐大作(我o地有帶膠袋, 無整污漕地方), 我就落車先嘔, 唔知有無嚇壞個司機!!!

急症室唔算多人, 等o左大半個鐘有得睇!! 醫生都幾細心詳細, 檢查完後解釋俾我o地聽, 似乎係兩種比較勁o既腸病毒之中其中一種, 所以先會惹到咁多人有事! 好彩大家面色都唔差, 情況還可以, 如果唔係就要入院抽樣本化驗!! 醫生話呢d腸病毒食藥殺唔死(抗生素例外), 嚴重o既可能真係痾足9日先清得晒...而家最緊要係先止嘔, 等大家可以飲番水食番o野, 咁就無咁頭暈無力!

打完止嘔針番屋企, 我個胃仲係好唔舒服, 連Koey都開始無晒精神, Kobe仔就一時精神一時眼訓咁, 但都係繼續做樹熊, 要抱實我!! 於是三個人就咁攤o係sofa上面望住個電視發呆, 唯一仲未受細菌感染o既老公子就忙於為屋企大掃除, 用1:49漂白水清潔清潔清潔!!

傍晚我o地試下食果皮白粥, 我同Kobe仔食o左少少都無事, 但Koey就一直止唔到嘔, 到夜晚臨訓前仲係嘔番晒所有o野出o黎...點解d止嘔針對Koey無用o架???好擔心!

14/9: 夜晚我簡直係大昏迷咁, 訓醒後個胃終於無再唔舒服喇, 但全日仲係手軟腳軟, 起身坐低頭暈暈, 無時無刻都好想訓覺, 仲有少少微燒!! 至於Koey, 朝早食o左少少米糊後仲係極無精神咁, 我真係好怕佢仲會嘔, 好彩過o左陣佢又精神番, 只係比較眼訓, 好難得咁訓o左個午睡, 亦全日無再嘔, 老公子亦繼續無事!! Kobe仔比較反覆, 朝早好似精神番晒, 但傍晚又開始無精神貼實人, 原來又發燒 (38.4度), 加上由早到晚繼續痾水痾o左3次, 似乎佢真係'中毒'最嚴重, 病情最反覆, 有可能如醫生所講要痾多幾日先清晒d病毒呢!!

Koey精神番, 用我電話玩自拍~~

樹熊Kobe~~

15/9: 今日我成個人已經回復力氣, Koey同Kobe一早亦扎扎跳, 係Koey全日痾o左兩次水, 本來仲諗住俾佢番學, 好彩下午三號風唔使番, 見到佢肚痾, 似乎唔好番好過呢!

似乎大家都開始好番喇!!! 屋企所有o野可以洗可以浸o既都洗晒抹晒, 總算可以放心!!!

雖然呢個星期真係好難捱, 但我還是要慶幸:

- 慶幸我同Koey嘔呢一日係星期六, 老公子o係度, 如果唔係得我一個人真係唔知點算!
- 慶幸老公子無中病毒, 如果唔係全屋污物都唔知邊個'有力'去處理!
- 慶幸如醫生所講, 雖然又痾又嘔, 但大家精神還可以, 無一個需要入院!
- 慶幸Koey睇醫生打針好合作, 嗌都無嗌, 無扭計!
- 慶幸仲有個星期日俾大家留o係屋企休養生息!

最後, 仲要多謝大家o既問候同關心, 經過今次, 真係覺得健康好重要, 特別係做人媽咪, 真係寧願自己病都唔想睇住自己小朋友又痾又嘔咁辛苦, 希望以後唔會再有咁可怕o既病毒再出現o係我屋企啦 !!