昨晚勞累o左一晚, 3點訓7點我就醒o左訓唔番!!!
睇見呢三個寶貝訓得咁甜, 真係羡慕呀!!
不過, 最後因為唔想太遲開始行程, 我8點幾就叫醒佢o地喇!!!
收拾一輪又出法喇!!! 不過我好大頭蝦, 明明一早搵o左由機場出發到東京駅o既機場巴士時間表, 但自己就完全唔記得, 無預時間離開酒店, 結果去到預備買巴士票先發現剛剛開走o左一班車, 下一班要成個鐘後, 真係失策!!! 不過巴士賣票職員都好好人, 教我o地坐單軌火車出巿區仲快, 於是我o地就去買票喇!!
雖然係日文, 但買票都唔難!
初到貴境坐火車, 特別有新鮮感, 所以係唔係都影下相留念先!!
自拍下先~
呢d就係單軌列車, 睇落好似好易跌落去咁, HAHA!!
沿河一路見到唔少人玩水上電單車同衝浪!
坐o左半個鐘, 轉坐JR山手線!!!
到東京駅八重洲北口出站行5分鐘左右, 到達朋友推介我住o既龍名館飯店!
Lobby 係15樓! 都幾靚呢!!
小朋友們成個精神晒, 嘈喧巴閉搞搞震!
由於時間尚早(11點), 所以未有得拎房, 我o地寄放o左行李就再出發喇!!
去番東京駅, 我o地先去東海新幹線o既售票處買定後日去大阪o既新幹線車票, 由於職員表示平日下午唔算peak , 所以我o地就唔揀劃位 (即唔買指定席), 只買日子, 亦唔買指定時間o既車, 咁就可以flexible d, 到時候幾點去到車站就坐邊班車就可以喇, o係日本6歲以下小童唔使買飛, 2個大人合共要27xxx yen!!!
其實好多人都問過我, 8日又東京又大阪仲要坐新幹線成千蚊一個人價錢一d都唔平, 行程又緊迫, 點解會咁去?!! HAHA, 一句到尾, 咪就係自己大鄉里囉, 同老公子都係第一次自遊行去日本, 認識唔多, 成日聽'東京大阪東京大阪'嘛, 咁咪以為好多人都係兩個地方一齊去玩囉, 到我買晒$1東京去, $1大阪番機票後, 先知道咩係關東關西, 兩個地方其實話近唔近, 新幹線仲唔平, 咁先知自己大鄉里, 要好似而家咁安排行程囉!!! :p
好喇, 拎埋新幹線時間表, 我o地再o係車站買埋Suica (類似香港八達通卡), 咁就出發搵食喇!!
坐Metro 去新橋站食lunch!!!
搵唔到路問人, 問著對英文唔錯o既日本夫婦, 佢o地好好人帶埋我o地一齊搵, 閒聊間仲話我o地知佢o地3年前都去過HK公幹, 仲識問我o地住HK邊度, 感覺好nice好親切!!
到喇!!
餐牌得2款飯揀, 我o地就2樣都叫!
極上の親子丼(近鏡頭個碗) & 究極の親子丼
睇個名同價錢, 應該係究極o個碗d雞肉再靚d吧!!! 老公子話好似分到, 但我就唔太識分喇, 只知道兩碗都好好味, d雞有陣炭烤香味, 蛋又香滑, 唔錯唔錯, 連Koey & Kobe都食o左唔少!!
賣相已經好吸引!!
開餐喇!!!
餐牌上除上面提過o既兩個set外, 仲有2樣700yen o既o野, 我o地胡亂點o左一個, 原來係用比內雞蛋整o既Pudding, 雖然相對個飯好似有d貴, 但真係好滑好好味!
食完走, 見到附近大排長龍, 原來係當地人排隊幫襯一間壽司店, 睇o黎呢間都好好味呢!!
之後我o地就行去附近o既博品館, 途經賣燒魚型紅豆餅o既舖頭, 一於又試下先!!
290yen , 都唔太平o架!!
不過入面都幾多餡, 仲有粒粒栗子係入面, 小朋友實鍾意!!
行一陣就到博品館喇!!!
一入去小朋友就醒神晒, 周圍搞搞震喇!!!
我o地先上四樓再慢慢落續層睇! 去到四樓一開lift就見到呢堆砌圖, 真係超級靚, 但最細o個d都要3-4千yen, 即時忍手...加上老公子提我, 話再靚買o左番到屋企都唔會有時間砌呢個事實...好, 我忍!!!!!!
四驅車!
迷你踼波機械人!
老公子發現呢副'暗黑地獄'!!! 一千塊全黑色砌圖, 塊塊唔同, 勁!!! 老公子話仲有副全白2000塊, 不過無影低!
4樓唔太o岩行, 落去3樓!! 一出去就女仔一邊男仔一邊, HAHA!!
Thomas 永遠都係最吸引!!
到博品館前, 我事先已經同Koey & Kobe講明, 每人只限揀一份玩具帶番香港, 太大太貴太重都唔可以買, 去到Thomas呢度, 小朋友們開始周圍揀禮物喇!!
呢個有d似我o地細個玩企鵝行樓梯個玩意, 我試圖引小朋友揀買佢, 但最後失敗o左!!! 而家諗番有d後悔無帶呢個番香港呢!!!
麵包超人Area, 不過我o地唔係fans, 所以一件都無詳細留意!!
細佬行兩行已經手執兩架火車頭唔放喇!!! HAHA!!!
Koey就暫時未睇中目標, 反而有興趣扭蛋, 揀o左陪扭貼紙o既機扭!! d貼紙都幾靚呢!!
老公子睇緊d貴價Lego!!! 細佬又揀o左第二盒Thomas 喇!
睇住d小朋友圍住Thomas唔願走開始有d悶, 自己一個兜兩圈, 見到小忌廉!
仲有Sailormoon, 不過唔算極鍾意, 最後都無買!
行多一陣, Koey開始有戰利品喇!!! 一盒係串珠仔, 只準買一樣o既話Koey本來係唔要青蛙公仔o既!!! 但左邊o個隻眼大大雙眼仲閃閃咁, 最緊要只係75Xyen, 最後係我唔捨得唔買俾佢!!
呢隻都好靚, 但貴一倍, 所以無買喇!!
用o左2個鐘行完博品館, 落到樓下見到呢堆上鏈公仔, 都好得意, 但老公子話好有鴨記feel!
走喇, 坐1個站車搵食去!!!
就係圖中藍色舖面呢間, 事前上網話呢間食炸豬排定食好好味, 但無開, 好失望, 因為我o地係特登坐車去嘛!! (不過我搵資料個舖名有d唔同, 但聯絡電話一樣, 所以我都唔敢百分百肯定係呢一間!!)
之後我o地就周街亂行, 行行o下細佬就訓o左喇!!! (佢呢日全日要攬實個背包唔肯放低, HAHA!!)
誤打誤撞行番去銀座名店大街!!
不過呢d名店我o地興趣不大, 反而見到一座上樓食肆有炸豬排食, 於是就去試下喇!!
因為4點幾, 所以全完無人, 開始有d擔心唔係太好味!!
細佬訓醒喇, 但好明顯未訓夠!!!
正想同老公合照, 但遇著扭計中o既細佬, 唯有抱埋佢影啦!!
見到豬排, 細佬開始清醒喇!!
豬排大大件, 賣相都唔錯!!
起動喇!!!
賣單4980yen, 但質素普通o者, 亂打亂撞有時都要睇彩數呢!!!
落番樓, 見附近有間麵包店好多人, 我又八卦入去睇o下!!
麵包好多款但都唔平, 一個普通有餡包要300yen, 比香港大百貨麵包部d包仲要貴, 所以最後我只係求其拎o左包五色酒種麵包做第二日早餐算喇!! 唔知係咪我第二朝先食, 味道我覺得正常啦, 唔算好特別, OK啦!!
坐Metro番酒店喇!!
龍名館東京飯店
拎到房喇!!
廁所光猛乾淨!
房間都比我想像中大!!
酒店免費upgrade o左張king size床俾我o地!
小朋友做乜笑到咁開心??!!!
因為酒店好細心預備o左2對小朋友拖鞋同牙刷俾佢o地!!!
佢o地就狂玩踼拖鞋!!!! 所以咪咁hyper囉!!
等我都訓下, 扮下休息先!!
之後呢兩個小朋友係咁跳床跳sofa停唔到!!!
好喇, 休息o左一陣, 6點左右再出發!!
往日本橋附近行去~~
到喇!!! 金子半之助 江戸前天丼!!!
嘩, 咁多人o既!!!!!!
睇o黎晚飯都係泡湯喇...
無可奈何, 我o地唯有又行一大輪番番去東京駅地下拉麵街食拉麵!!!
運o左唔知幾多個吉 (保守估計, 只係搵路都用o左成個鐘, 真係又餓又激氣!!!), 終於搵到之前上網睇資料介紹話好味o既'斑鳩啦麵'!!!! 當時已經8點, 但仲有好多人排隊呢!!
等o左15-20min, 到我o地買喇, 可惜我o地好stupid, 第一次襟呢d機唔太識襟, 阻o左後面好耐!!!
點好3個麵後好快入得座喇!!!
撈麵!
呢兩碗拉麵係唔同味o既, 但分別係邊已經唔多記得....
食喇!!!雖然我同老公子都又攰又肚餓, 但老老實實, 呢餐係失望o既!!! 雖然d麵好彈牙, 但我同老公子都認為一d都唔o岩口味, 連好食都稱唔上, 唉...運大吉, 又餓又攰心情已經唔好, 滿懷期望等位諗住好好味, 點知完全同相像唔同, 你話係咪真係失望呢!!!! 我諗呢一間都算係全程最唔o岩口味, 覺得最唔值得推介o既一間食肆呢!!
食完番酒店喇!!! Koey都無晒電猛叫攰, 爸爸俾佢騎膊馬tum佢笑番!!
番到酒店樓下Family Mart買o左條蕉同糖俾小朋友聽日叉電用!!!
番到去太夜, 當然打仗咁即刻幫小朋友沖涼刷牙訓覺, 但可能係陌生地方, 細佬一入浴缸就勁喊話要起身, 家姐就相反, 成日話要浸浴缸游水唔捨得起身, 所以沖涼都唔係易事呢!!!
終於, 家姐10點訓o左, Kobe10點9都訓埋, Goodnight!!
雖然呢日運吉佔多, 但買o左各自o既心頭好, 希望小朋友都開心啦!!
.JPG)
.JPG)
.JPG)