8/12
一早番工見到poster話高浩正o黎公司有個lunch talk, 於是抱住'睇明星'心態去聽,連佢講咩都無為意,點知就中招...
個talk開頭還可以,但後尾'佈道'o既成份越o黎越多,我既沒有宗教信仰,亦唔覺得高o既說話內容感動到我...得罪講句(如果你係此宗教的信眾,請見諒,但這的確係我個人感受!),我越聽越毛管'動',感覺高好似想洗人腦咁,好驚,本來想聽到完場,但後尾都係頂唔順臨完場前鬆人!!
下次真係要睇清楚人講咩先好去聽,再有呢d形式o既talk都唔好預我!!聽一次已經怕怕!!
手機影得太差!!其實現場都見到高浩正個樣o既~!
==============================================
11/12
屋企有盒雪榚遲遲都未食完(太甜,所以兩個都唔願食!),結果俾我諗到呢個方法消滅佢!!
第一次整pancakes,不過可能落少o左奶,d料唔夠稀,好難先推得開,搞到個餅好厚!
放上雪榚球同兩片菠蘿,美味!!!
==============================================
13/12
老公子呢幾個星期公事繁忙,已經兩星期唔得閒番兩邊屋企食飯,夜晚我又要自己訓先,今日星期六仲要番足全日工...嗚...希望老公子快d忙完多d陪我啦!!
雖然大半場香港對日本o既東亞足球決賽都係得我一個人睇,但好彩老公子最後射12碼前趕到番屋企,一齊睇住香港創出傳奇一刻,勁呀!!
夜晚做東華,我妹尋日一早send sms俾我話我知佢有份同哈林同陳法拉表演,仲話今次佢有對白添o架,於是成晚我就同老公子捕位東華唔敢行開,結果真係見到我妹出鏡呀,比起之前咁多次出鏡,今次真係好清楚見到我妹呢,勁呀!!
另外,是日唔少心打爛o左隻雞蛋,雖然接得住,但今日變o左被迫要整甜品, haha,結果臨急買左盒奶,整o左鮮奶dun蛋,簡單易整,好味!!
上網search食譜話蒸10分鐘,結果我蒸足20分鐘都仲未完全凝固到!!食o既時候d蛋仲有少少係流質o架!!
===================================================
13/12
難得星期日老公子唔使番工又唔使踼波,我o地終於的起心肝去尋找光纖聖誔樹!!
唉,其實講番起o黎,三星期前我o地已經開始睇樹,點知行過吉之島,日本城,一田,商務同大眾都不得要領,唯一睇得上眼o既係log-on o既光纖聖誔樹,不過所費不菲呀,無咁靚o個款90cm要$380, 靚d o個款更加不得了,要$880 120cm...
結果貴又嫌貴,平又嫌人唔靚,我o地都係無買!!!
尋日媽咪話我知,話細佬行過火車站商場間日本城有一棵幾靚,於是尋晚去睇,又真係唔太差呢,價錢又平,點知好衰唔衰,得番一棵,買唔成真係好失望!!
於是今日我就帶老公子先去太子花墟,再去又一城Franc Franc,最後再去沙田..結果...
太子花墟呢間大型花店好有聖誕氣氛呀,我o地一入去已經覺得好開心!!!
左睇右睇始終對呢一棵細細o既黑色光纖樹情有獨鍾,點知...
...點知棵樹著o左後一d都唔光,而且更重要係,又係得番一千零一棵!!!!!
唉,又失望多一次o既我只能o係呢間舖度帶走佢...
呢件小飾物$5咋,不過買到番屋企又無樹可以俾佢掛起,暫時無處容身!!
接住去又一城,點知Franc franc原來無光纖樹...唔想運吉於是行埋log-on,樹係有o既,但細棵已經賣晒,唔想去到沙田白行,於是問佢沙田仲有無貨,點知佢話唔多清楚,似乎2間log-on係獨立咁...
結果兜兜轉轉又去番沙田,點知一問之下,$380 o既已經賣晒, $880 o個款做緊節賣$704, 不過都賣晒,唉,失望失望再失望o既我忍唔住咀都扁埋!!!
睇o黎買聖誕樹裝飾屋企呢個活動,要出年聖誕先完成到喇!!
最後,是日為填補內心對買唔到聖誕樹o既失落,我o地好豪咁o係一田買o左d貴價美食,炮製o左我同老公子婚後第一頓西餐!!!
芝士焗蕃茄配雜豆,雜菜薯餅,珍寶腸(超貴!),Ikea肉丸,仲有美味牛扒同無影相o既周打魚湯!!
無煮開西餐o既我o地仲特地去買刀叉!!再開埋紅酒,呢餐雖然好多'肉',不過間中一次真係幾好味,哈哈!!
