遊旺角

乖豬出世後 ...應該話自大肚時開始, 出旺角已經變得唔容易, 今日我同老公子自乖豬出世後第四次 二人世界, 於是就去o左旺角行下!!!


去o左名寶石餐廳食lunch, 都幾貴, 但大件頭味道又OK!




肉眼扒, 薯菜份量少左D~


羊架有四件咁多, 正!!



食完o野去行街, 原來花園街變得闊落o左好多, 百老滙街原來有好多街頭文化節目, 仲留意到MK d女仔而家興著乜 (個人覺得著得好古怪...)!! 另外, o係出口店睇見淘寶想買件衫, 標價HKD259, 但淘寶只係RMB68, 原本都唔諗住淘, 而家睇見真係唔抵得, 原來HK通脹真係好勁, 睇o黎我都係繼續淘寶買衫算喇!!!


去o左食雞排, 我由大肚時已經成日叫老公要買俾我食, 結果而家先第一次食!!!


味道普通咋, 硬係覺得係台北士林夜巿食o既好味好多!!!

本來我同老公子都諗住買下衫, 但原來而家D有牌子o既衫褲真係郁D都要4-5百先買到, 真係誇, 所以我同老公子行足成日都買唔到衫...

行書局買o左呢本書, 老公子鍾意食飯, 呢本咁多款好似好吸引, 希望以後煮粉食唔使次次都係米粉烏冬啦...HAHA!!

懸案

屋企發生懸案...

尋日當我想開個新垃圾袋放落垃圾筒 (其實係水筒, 唔抹地時當垃圾筒用) 時, 嚇然發現垃圾筒唔見o左!!!!

我: "老公, 個垃圾筒呢? "
老公: "廚房無咩, 有無睇清楚呀?"
我: "咁大個筒收得去邊喎, 唔見呀!! 你尋日抹完地放o左去邊呀?"

老公子於是行晒全屋去搵, 但...都係唔見喎!!!!

咁大個筒可以去得邊呢?? 除o左係俾"人"掉左出垃圾房, 我真係諗唔到仲有咩可能呀!!!!!!

問老公子記唔記得自己抹完地放o左個筒去邊, 佢只係記得自己有倒D污漕水落toilet, 之後就諗唔起佢點處置個垃圾筒....而我呢段時間亦都無留意過個垃圾筒呀, 呢兩日掉垃圾出垃圾房o既都係老公, 問佢係咪連埋個筒掉o左佢又話應該無可能!!!!

....其實...我老公成日都會顧住諗o野而唔知周邊發生緊乜事o架啦, 佢'auto'咁抹完地掉埋個垃圾筒都唔奇呀, 可惜佢真係好似斷片咁諗唔起...

呢件懸案就係咁, 要一直'懸'落去, 睇怕都無乜可能知道真正答案喇...

踩單車

上星期日我同o左老公子去踩單車呀!!! 係乖豬出世以o黎第三次拍拖去呢, HAHA!!!

原來而家租單車要$90, 好貴, 加上o個日太陽好曬, 我差D就想放棄唔踩, 好彩最後都係去o左咋, 因為背住個太陽踩其實唔太曬, 加上天氣一流, 所以踩得好開心, 令我同老公子都覺得好似番番去拍拖o個陣時咁呢!!

大霧o左幾個星期, 今日難得風和日麗, 更難得係可以同老公子二人世界, 真係好開心!!

我打電話叫我妹係屋企zoom去水警機地, 白色塔仔下面個紅點就係我同老公子喇!!
(呢度好似睇唔到, 我係電腦睇相放大就見!)

科學園, 見到好多爸媽帶住1-2歲BB踩BB單車, 我同老公子都wonder佢o地係點樣入到o黎咁遠?

記得以前興用竹做o既BB椅掛係單車車頭載BB, 而家已經無得見, 應該係唔合安全規格...唔知除此之外, 仲有無方法可以帶BB踩單車呢??

o係大圍還車後老公子帶我去食o係openrice見到0劣評o既食肆食雞脾飯, OK啦!

由於已經2年無踩過單車, 是晚我雙腳超痛呢, HAHA!!

遲來的生日禮物

老公子拖o左我近一年, 終於送上上年o既生日禮物俾我喇!!!

新櫃送到!!

今日年三十, o係ikea 買o既櫃送到喇, yeah!!! 隨住屋企越o黎越多o野, 真係要買番d櫃先得!!!

飾櫃!!係就係比預計買得貴d, 不過鋼琴面真係靚d!!

窄身櫃, 主要用o黎做飾櫃, 所以我o地會裝燈入去!!

因為今日我唔使番工, 所以有時間襯年三十執好呢兩個櫃!! yeah!!我d靚靚結婚物資終於唔使屈係書房個書櫃, 可以靚靚咁display出o黎喇!!!

hehe, 自己都覺得擺得靚, 好鍾意好鍾意, yeah!!!

祝大家兔年萬事勝意, 心想事成呀!!!

MERRY XMAS!!!!!

祝大家聖誕快樂!!!

尋日平安夜, 公司放假, 所以中午約o左媽咪去新開o既一田行o下同你lunch!!!

一田新開張, 都好多人, 不過似乎買o野o既人少, 多數o既人都似我同媽咪咁, 純粹八卦一田有乜新舖頭, 可惜呀同沙田o個間一田都分別唔大, 一d驚喜都無!!!

最後, 我o地去一田超巿買食送, 一田真係貴過以前吉之島好多, 最嚇人係金寶湯平日超巿唔減價都係$7.9, 但一田竟然賣$13.6...真係好唔慣呢!!!不過, 今日我都好捨得, 買o左塊近$120 o既牛扒同珍寶腸今晚煮愛心聖誕餐俾老公子食!!!

平安夜聖誕大餐!!有牛扒, 珍寶腸, 煙肉, 西芹三色豆同煙肉薯蓉!!!

d飯其實唔係我煮o既...只係lunch打包o既飯!!

塊牛扒同珍寶腸老公子都話好正!!牛扒就煮到五成熟剛剛好, 夠晒juicy,不過我硬係怕太生唔多好...所以我只敢食邊邊比較熟o既!!!

聖誕節o既今日, 諗完一大輪怕多人, 最後決定去黃埔行吉之島, 因為諗住無咁多人同埋吉之島做緊八折, 所以去睇下有咩o野可以買!!!

老公子出發前特登搵黃埔有乜好o野食, 帶o左我去食'lo'水o野, 都ok啦!!!

之後shopping, 都買到o野, 行完再去旺角新世紀, 最後6點番到屋企!!而我就繼續努力為溫暖牌埋尾...yeah, 終於趕及聖誕節完成(唔計仲差兩粒鈕未買未釘上去!!), 老公子試上身,除o左貼身o左少少外,老公子都好滿意, 嘻, 希望老公子真係鍾意啦!!!!

過兩日老公子要去得-20度o既瀋陽出Trip, 我呢件溫暖牌係100%羊毛o架, 希望都俾到少少暖意我老公子啦!!!

老公子, 聖誕快樂!!!!

感謝沿途有你!!

轉眼間, 路已走過了三分之一!!

回望過去三分一的旅程, 老實說, 一切都比想像中辛苦與漫長...而我, 亦比以前更加依賴及需要老公子!!

老公子, 真的很感謝你這段時間對我的體諒與照顧, 辛苦你了!!

餘下的旅程, 希望我能以更輕鬆愉快的身心, 與老公子你一同享受這奇妙旅程,
願一切繼續平安順利!!

婚後八個月 + 拍拖10年零8個月

呢晚煮o左舅母送o既墨魚麵同埋磨菇醬做晚餐,再加埋媽咪俾o既年榚, haha,中西合璧o既晚餐賣相唔錯,影番張相留個念先!!

UM...煮呢餐實際原因其實係無買食送,屋企有乜所以煮乜(蝦當然係叫老公子放工買!)...不過...既然煮完賣相咁正,就安番個原因俾呢餐...um...就當係補番慶祝情人節/拍拖10年8個月/結婚8個月啦...hahahahaha~~~

辦年貨 & 大掃除

婚後第一次過年,明知要辦年貨, 但遲遲都的唔起心肝去買,就連利是封都係早兩日朋友俾我先到手...

o黎緊星期日就係大年初一,把握最後一個weekend尋日終於去o左辦年貨!!由於老公子話佢之前一日係旺角超多人,加上今日成日都落雨,結果都係去o左沙田算喇!!

由沙田廣場到好運中心,再到沙田中心, 行o左好耐迫o左好耐,終於都買到合心水o既賀年禮物,不過可能太衝忙啦,番到屋企先醒起無包到d禮物喎...真失敗!!

下午番到屋企同老公子分工合作大掃除(讚下老公子乖先!!）,雖然新屋只係住o左半年多D,但原來平日好少抹o既住置,好似雪櫃頂,書櫃頂,衣櫃頂仲有放滿廚房用品o既雲石面都好污漕下,洗洗洗抹抹抹,搞到七點先開始煮飯,到夜晚休息時已經9點lu...好支力...

休息時諗起sofa底同床下底,仲有水晶燈同埋廚房櫃未抹未執,唯有等下星期年三十o個朝先再努力啦!!!加油!!!

最後,我仲未唱錢入利是,正確D講,今日都仲未計要唱幾多...要快手d先得喇!!

P.S. 今年我終於明白我媽以前過年點解會咁忙喇!!!

結婚半周年!!

yeah!!眨o下眼結婚半周年喇,又有excuse大食一餐!!!

 

搵得好辛苦先買到o既靚靚聖誕樹!!!間日本城無display出o黎,但我多口問句,有個好心職員幫我左搵右搵先至搵到,仲要係全新,so good!!!

結婚半周年其實我o地係零慶祝活動咁滯,老公子照常去踼波,我就陪媽咪去吉之島!!不過尋日我o地出o左tst行街,去citysuper買o左今晚打邊爐o既美食,包活海鮮火鍋湯包同埋價值不菲(係我地心目中!)o既老虎蝦兩大隻,仲有肥牛同肥羊添,呵呵!!

我手上就係香煎大老虎蝦,好味!!
呢餐好貴,不過真係好滿足,食到我o地兩個差d反肚呢,hahaha!!

萬聖南瓜生日大餐!

哈哈,尋日萬聖節,我同老公子為應節,去o左超巿買o左個南瓜著萬聖節大餐!!由於今晚會去我娘家食蛋樣,後晚正日去食自助餐,所以今晚決定食著豪少少,o黎個海鮮焗飯,作為三天慶祝活動o既第一炮!!哈哈!!!

南瓜公仔同真南瓜合照!!

下午老公子出o左去(其實我知佢去o左買禮物俾我!),我就o係屋企再接再勵,整多次青蘋果Muffin!!

今次個muffin爆得勁過上次,feel到今次應該係成功喇!!

Yeah!!!

老公子大約六點幾先番到,為表佢o既誠意,婚後四個幾月之後,佢終於第一次'下廚'同我一齊玩著飯仔!!

由於第一次兩個人煮,動作好慢,餐飯看似簡單,但都煮o左近兩個鐘...成8點幾先開餐!!我o地仲飲埋結婚時o既紅酒添,嘻!!

呢張相好失敗!!!失敗一: 唔記得放d大蝦上個焗飯度先影合照!!!失敗二: 入電腦時先知張想好暗(我可能用o左最少暴光去影),影得唔靚呀...嗚...(上面係我執左相光D o架喇...但都唔靚...)

萬聖節生日大餐,好豐富呀,呵呵!!

個南瓜焗飯賣相唔錯o架!!味道OK,但如果再多d汁就更好!!

最後,老公子想襯機會靜靜雞掛份禮物入廚房,點知俾我捉到佢o係書房行出o黎時無熄房燈,由於心虛,佢即時拎o左份禮物呈上...hahahaha...好搞笑!!

呢兩塊就係我o既生日禮物喇!!!係洗碗布同抹碗布一條...

其實以前我年年都要求老公子送神秘禮物o架,但今年我就指定要上面塊布,可能嫁o左實際d啦,做煮飯婆有塊功能強勁o既布點都方便d!!(其實洗碗多數係老公子,有呢兩塊布佢都有得益!!!

至於呢兩塊布有咩咁巴閉??其實我都係睇完飲食男女介紹後先識佢地,話佢地纖維特多,吸水力特強,而且唔使洗潔精一抹就可以去污,保養得好,可以用到三至五年...我見我d洗碗布好快污漕有時洗得唔好又成陣味,所以就決定貴少少買d靚o野用囉...不過真係好貴...有關塊布o既詳細資料,大家可以去Enjo布官網了解: http://www.enjo.net/data_set1/window_klein.asp?n_id=96&s_id=2

最後,多謝老公子陪我過o左個咁開心o既萬聖節!!

同honey去團拜

星期日Honey踼完波後就一齊出去poly同honey o既親友們去飲茶團拜!!因為honey一年先見d親友一次,所以我都係第三/四次見佢d親友咋,有部份親友我都仲未認得,哈哈...

結果我逗到成19封利是呀,收獲好豐富呢,哈哈!!

情人節吃吃吃

情人節快樂!!!今年難得情人節o係星期六,所以我可以見足我honey成日,好開心呀!!!

中午,我o地先食o左個麥記麻辣雞包,再去深水埗食豬潤麵!!

夜晚就去o左又一城Dan Ryan度食晚飯(我原先以為係去outback,但原來full o左無位!),要五點半就去食喇,因為我o地太遲book嘛...哈哈!!!

呢個佈置幾特別!!

本來想叫拼盤+Ribs+心太軟,點知侍應話今日情人節得limited menu,無心太軟,好失望呀,唯有叫多個意粉,點知兩個人食呢d美式食物實在太滯,有d後悔,早知應該叫salad或湯應該無咁滯胃!!

夜晚一齊睇o左葉問,都幾好睇,估唔到有d位都幾搞笑!!!睇完戲一齊食外賣o既彩虹糖水,有我好鍾意o既'糖癡豆',仲有楊枝甘露,好味,夠晒甜蜜,哈哈!!!

祝各位情人節快樂!!

與honey一家遊深圳

今日好熱鬧,因為一家六口(honey一家四口+我同埋honey妹男友,呢排見得多,真係有d一家六口感覺!)上o左深圳一日遊!!

大約十二點我o地就過關,先o係羅湖商業城飲茶!!!飲完茶差唔多兩點,之後就行商業城!!因為honey係深圳番工,所以之前我都會間中行商業城,不過,只從搞結婚d o野後真係未行過,估唔到而家o既商業城會咁冷清,想搵多幾個香港人都難咁樣!!

可能係生意難做,我o地入o左幾間舖頭,由於無心幫襯,走o既時候d舖頭職員竟然追住我o地追足成條街咁不斷自動減價希望我o地買,由原先開價百六七蚊一減減到八十,我o地繼續行佢又繼續減,直到減到五十...認真誇張,呢個情景相信自香港人流行北上消費,人民幣升值後應該好耐無出現過!!!咁o既價錢我都覺得好抵呢,結果,未來99成功買得心頭好,相信佢一定好開心!!

行完羅湖城我o地再去行萬象城,呢度係一個好大形o既商場,就好似香港o既又一城咁,不過全部都係大舖,所以唔係行o左好耐...(不過其實當時大家都已經行到好支力!),到大約夜晚6點半大家就去等位食小肥羊!!

萬象城o既商場裝飾!

一等就等o左成個鐘,不過都值o既,難得六個人一齊食,叫o左好多唔同o既o野食,食飽飽都係每人約55RMB,抵過我同Honey平時兩個人食好多呢!!!

是晚番到香港屋企已經十一點,真係行到好支力呢,但難得d後生o既齊齊陪兩位老人家,相信佢o地兩個今日一定係好開心o既o者!!!