溫暖牌!!!

由2010年2月中開始買毛冷織, 斷斷續續咁織 (中間因為懶, 亦有一排因為欠一舊毛冷又買唔番而停織o左幾個月!!), 終於俾我o係今日聖誕節完成(唔計未買未釘o既2粒鈕!!)人生中第一件溫暖牌冷衫喇!!!

老公子, 聖誕快樂!!!!老公子試上身好似都幾鍾意呀, 唯一差d係貼身o左少少!!!

27/12補充: 今日買o左兩粒鈕釘埋上件冷衫, 2粒鈕好襯件衫呀, 好滿意, yeah!!

過兩日老公子要去得-20度o既瀋陽出2日trip, 雖然件溫暖牌未必幫到d咩, 但希望老公子都可以暖在心啦!!!

yeah, 老公子唔使出trip住喇!!

yeah, 老公子話瀋陽個會cancel o左呀,即係老公子唔使出trip, yeah!!!

亦即係話, o黎緊星期四我將會係婚後第一次放低老公子一個人係香港呀, 睇o黎我要寫低個清潔list俾佢, 費事我番到企屋企變o左個狗竇先得!!

珍惜當下!下星期要同老公子分隔兩岸三地!!

本來去旅行係開心事...都最後一日行程喇,點解會變o左個悲劇...

睇住電視台直播, 驚心動魄...媽媽首先哭了, 我只能眼紅紅輕拍媽媽手背...

成家人都睇到好心up, 完全食唔落飯...

傳媒, facebook...去到邊都睇到好多怪責菲律賓政府o既語論...老實講, 我真係唔想再聽, 其實怪責己經於是無補...

希望生還的快點擺脫事件陰影...早日康復...並...珍惜眼前人....

=====================================================

老公子今日同我講話佢31號至3號出business trip去沈陽, 至於我, 下星期2號到5號就約o左一班好姊妹去台南...咁即係我同我老公子由31號到5號都要分隔異地...

唔知係咪俾菲律賓件事影響心情, 本來我以為可以第一次留低老公子係香港作反, 點知而家唔好話旅行mood都無晒, 仲反而要擔心沈陽有無暴雨水災, 諗o下分隔兩岸我同老公子應該點聯絡好...硬係覺得心情怪怪, 唔知點咁...

STOPPPPPPPPPPP!!!!!!!!!!!!

噢...發生乜事...

乜幸福 = 發福???

近來影親相我都忍唔住對自己身型同面部打量一番...做乜我好似比起結婚肥o左幾個碼咁o架...

大日子時fit到漏...

而家...(照片攝於1月尾)

照片攝於上星期六, 過完年再肥左都未定, 而且無化妝, 又肥又醜...

唔制呀...兩星期後去長灘島旅行呀, 今次實影唔番下面咁正o既相...嗚...唔好話影相, 我懷疑我肥到泳衣都唔好意思著...點算呀?????嗚...

一個人睡

其實呢篇blog有點無聊...可能好多人婚後都試過...但我又好想記底...hahaha...

今日老公子一早7點就起身出發, 因為佢公司每年都會搞一次兩日一夜o既大陸旅行, 今年去'邵'關, 我之前仲滿心歡喜以為今年佢可以攜眷出席, 點知原來無我份...

所以今晚我將要一個人訓...婚後連續對足八個幾月, 終於被迫要無得見一晚添...可惡!!!

唔知今晚一個人霸晒張5尺床會唔會特別好訓呢??定係會訓唔著呢??

唔知老公子記唔記得買手信俾我呢??唔知老公子有無少少掛住我呢???hehehehehehe~~~

老公子係我剋星!!!!!!

老公子尋日成日都剋住我...

1. 一朝就整到我部電腦上唔到網,今朝要搵朋友幫手先整番好!!

2. 夜晚約o左老爺奶奶打邊爐,臨出門口時打爛o左結婚時o既水晶名座,仲一氣撞崩埋我廿幾年o黎無穿無爛o既寶貝鋼琴!!!呢下真係傷心死我,搞到我當場痛哭...最慘係...佢係無心,我又唔可以怪佢,除o左喊,我都唔知可以做咩...

水晶座爛o左原來唔係最心痛,最心痛其實係我部寶貝琴爛o左...

3. 打邊爐時又老公打瀉我碟醬油搞到我成台都係,好彩無整污漕我個人咋!!

4. 老公好心夾o左一舊水餃我食,點知入面仲好生,d肉紅卜卜!!

唉...話老公尋日唔係剋住我都唔信...受傷o既我決定要將佢尋日d惡行寫上blog!!可惡!!

Happy Halloween!!

早兩日一班同事一行18人齊齊去食飯,席間女同事送o左每人一隻南瓜冷公仔俾大家,隻隻唔同樣o架,我呢隻個樣好'BB',好cutie呀,好鍾意女同事o既心思!!

哈哈,帶o左南瓜頭番屋企,屋企終於有番少少Halloween氣氛喇!!!

係咪好奇怪南瓜頭側邊唔係南瓜,而係青蘋果呢...haha!!!事緣星期一我同老公子去街巿買o左5個青蘋果,點知一食酸到死,食到我個胃'la'住...

於是,我特登上網搵青蘋果甜品食譜,希望可以令青蘋果易d入口...

登登~~青蘋果Muffin~~

不過唔知係咩出錯,我覺得食落唔係太似Muffin...個質感怪怪,而且味道亦唔太好!!!老公子仲投訴話個muffin好漏,食幾啖唔想食添...嗚...

Anyway!!!三個muffin只係消滅o左一個青蘋果,希望下一個青蘋果甜品會好味d啦!!!

最後,祝大家Happy Halloween!!

我倆的數字遊戲

婚後三個月有多喇,終於終於砌好我一直好想整理好o既支出表,唔係誇張,我終於有一種'大功告成' o既感覺!!

由買樓、裝修、結婚、蜜月以及婚前婚後o既日常開支,我同老公子都係不規則地俾錢,雖然一直有用excel keep低d數,但有時真係唔係樣樣有單有據,一唔記得mark條數就好亂...

幾經辛苦,可以recall或有單據o既數目而家都分別入晒excel,結婚及蜜月excel更加可以close file,感覺認真良好,哈哈!!

Wedding Project(唔計酒席)	~$80,500
Home Project	~$97,400
Honeymoon Project	~$52,000

Home Project應該仲有幾千要洗(仲有傢私未添置),另外兩個project已經close file喇!!

睇番個Actual Expense,原來短短年半我o地就洗o左廿幾萬!!不過,幾個project 都o係budget以內完成,甚至係比預期expense少o左,其實都幾有成功感!!

今個月,我同老公子終於可以Balance番支出,清清楚楚無拖無欠(其實...做人老婆係咪要有'家用'o既呢?有無邊個做人太太好似我咁'均真'買個蘋果都入excel同老公計清每毫子呢???haha...),o黎緊我o地要努力計下還錢同日常支出條數喇!!

努力呀!!

住家飯!!

前晚終於拎o左信用卡送o既電飯煲,襯今日星期六有時間,終於'正式'煮番餐住家飯喇!!!

幾經辛苦,終於炮製出三食送一湯!!!

中間碟炸蛋 (蛋+豆腐+蝦肉) 係我拿手好戲...嘻...以前讀U住Hall都有煮過俾老公子食!

煮完後我披頭散髮...唔得,唔可以咁快做黃面婆!!!

由於U Grad無煮宿舍後已經幾年未煮過'住家飯',我由prepare到煮完足足搞o左三個鐘,手腳好慢呢!!不過老公子食得好開心,感覺又幾值得o既...希望之後keep到每星期最少煮一餐呢d'住家飯'啦!!!

P.S. 呢餐飯真係要多謝我媽咪做我軍師,因為佢今朝又帶我去街巿買食送,又教我點煮,所以我先煮到呢餐唔算難食o既飯咋,哈哈!!

再P.S. 大家見到我o地身後個巨形玻璃裝飾嗎??呢個就係我之前裝修時成日提起o既'神秘東東'喇!!!係我o地個wedding logo o既圓形version,正唔正呢???

同九號風球作戰!

難得weekend,終於有機會去超巿掃貨,為乜都無o既屋企買番d柴米油鹽!!

去百佳掃掃掃,買滿500送貨!之後去搞寬頻上網,promotor話颱風影響,會比平常遲一兩日先裝到,OK,唔緊要,橫掂都無上網成個星期,唔差在多多幾日!!不過,我同honey就諗起另一個問題,就係百佳打風唔送貨,咁我o地買晒糧都無得食!!於是我o地又去吉之島買買買!!

夜晚,兩個人終於第一次乖乖o係屋企無食外賣,一齊打邊爐,哈哈,無法啦,飯煲都未有,最簡單o既美食,當然係打邊爐啦!!

兩個人食食食,食足兩個鐘,周滿腸肥好滿足,睇完無線獨家試愛再睇Harry Potter,今晚,應該係我第一次定定咁坐o係自己屋企張SOFA吧,終於有點'家'feel!!

一點鐘訓,八號風球下風大雨大,我訓唔著!!忽然間,嘩,屋企有滴水聲!!

九秒九嘈醒老公子,即刻開燈查看,當時接近深夜2點!!原來d雨沿住書房窗漏入屋,同事送俾我部Printer外邊已經濕o左,嚇死我,即刻移開抹乾,原來窗台邊已經輕微水浸喇!!手忙腳亂即刻搵毛巾索水扭水,書房都未搞掂,老公子發現睡房原來都已經浸o左一邊,'洪水'正向床下底進發!!大廳亦唔好得幾多,梳化底已經輕微濕o左,只係漏水情況未及兩房嚴重,老公子即時移開梳化免梳化被整濕!!

新屋毛巾短缺,一陣荒亂下,搵晒所有毛巾同唔要o既舊衫攝o係窗邊吸水,可惜九號風球實在太勁,仲要打正向西北o既我o地,毛巾一攝就已經濕透,我同老公子扭都扭唔切,扭到手都痛都未能控制災情,真係好驚!!之後我o地又拎晒d洗面盤,抹地水筒,甚至屋企人俾我o地o既所有微波爐盒出o黎接水!!

無奈加無助下,都有d搞笑o野!!就係,我同老公子發現,我o地並唔係孤軍作戰!!

因為窗口望出去,隔離單位樓上樓下,至少四五個單位o既屋主,都正好似我o地咁,手忙腳亂咁o係窗邊抹抹抹!!!(如果唔係怕影人o地屋企唔多好,我真係好想影張相post係度同大家share,因為個情景真係好搞笑!)

原來,受災o既唔止我呢度,咁即係唔係我o地屋企有滲水問題,只係九號風球太強勁!!(其實上年買樓試過幾次打風都無事o架,間屋一d濕都無!!)

同風雨搏鬥至少一個鐘,毛巾都set好位將雨水導向各個兜兜,外面風勢又好似無咁勁,終於上床訓!!可惜,緊張o既我仲係未訓得著,一點水聲就令我好擔心,相隔一陣就忍唔住起身開燈查看!!

書房係唯一仲有出現水浸,原來雨水從窗台邊滲入,D水已經令牆身起晒水泡...用毛巾整整整,上床半個鐘後又拎住電筒去睇,水浸依然,但已經無咁勁,外邊風勢亦明顯減弱,應該可以訓喇!!望向隔離單位,其他人都開始關燈,有一兩間仲好似我o地咁用電筒照,好搞笑!!

忙錄整晚,訓到十二點半先被我媽咪電話嘈醒,連我自己都好驚雅自己可以訓到咁遲,證明我真係好支力!!問番老公子,原來尋晚最終成四點先有得好訓,唔怪得知!!

雖然間屋漏水忙o左一晚好辛苦,不過我同老公子都認為其實係好彩,因為,如果打風時我o地去o左honeymoon咁就仲大件事!!放o係書房窗台地上o既Printer報消不特止,相信床、書櫃同梳化,都一定會浸壞!!所以我同老公子都慶幸呢個風打得合時!

由於太支力,兩個人決定留o係屋企執屋,其實我尋日先抹完地,今日又要再抹,可憐!!不過今日老公子算好乖,都幫忙執o左唔少o野,結婚物資都清理埋,相簿油畫開始長埋床下底,飯台亦終於有番d空間!!

'家'終於似番'家',雖然仲有大把要努力,但好有滿足感呢!!

嚴重渴睡

新生活其中一個最大挑戰就係睡眠時間!!

我同老公子拍拖10年,佢咩生活習慣我當然相當了解,但始終唔係一齊住,佢鍾意做夜鬼對我呢個生活好有規律o既'難'訓豬當然無影響!

而家就唔同喇,之前都話去旅行無夜生活無電腦甚至無電視,朝朝又要早起趕行程所以迫住十一點幾十二點就訓!而家番到香港,唔係去我媽就係去奶奶度食飯,番到屋企成十一點,沖埋涼再開電腦續d續d埋結婚d數已經近一點,上床訓,老公子覺得'好早',仲猛'了'我傾計,而家只係過o左幾日,我留意到我越o黎越唔係狀態,以前番工坐車唔會訓得著,而家朝早都hup到,就連番工都好想釣魚,可想而知我幾眼訓...

我朝朝要7點起身o架,再咁落去,真係會影響工作,呢幾晚我已經無心機再同老公子傾計,一上床就想訓,我唔想之後我都係咁一上床就唔想同老公子傾計呀,所以真係好希望好希望所有o野盡快可以settle down,我好想過番d比較貼近我舊習慣o既生活呀!

零適應能力!!

今日係婚後五日,時間過得真快,不過我仲未適應到新生活...

首先,連續幾晚執行李,由於honeymoon去十五日,三四年未出過門o既我於是執埋執埋一大堆唔要o既舊衫,方便邊著邊掉,旅行後期行李就可以減磅,點知俾老公子話我適應力咁低,點解要帶咁多件,帶少D可以手洗...

之後就係尋日,前日番工無早餐,好肚餓,於是夜晚買o左包尋日朝早食,點知...中午開始就肚痛,仲要疴足五六次,夜晚仲要執行李,都幾肯定係個碎蛋沙律包問題...認真有氣無力...

尋晚洗衫,我同老公子都唔識用部洗衣機,結果睇埋說明書都唔知點FING乾d衫同去水,搞到成點都唔掂,最終決定唔理D衫就咁訓,諗住第二朝D水會去晒...

點知今朝D水仲未去,我o地速手無策,唯有夾硬開個洗衣機蓋,等D水流到全廚房都係,再過水同用人手扭乾,再掠o係架上...不過人手扭又點'乾'到,結果滴水滴到廳o既地下都濕晒,但無法子,我o地又趕住要番工,唯有開大冷氣開埋抽濕機狂抽啦...唉,而家仲好擔心今晚番去D毛巾唔乾o架,如果唔乾,我就無毛巾去旅行喇...

唉...新生活真係難適應,今晚深夜就出發去honeymoon,未來無白飯無菜食o既日子,相信仲難適應,而且我仲幾肯定自己實執漏旅行用品...唉...大家祝我好運吧!!

P.S. 新生活中暫時唯一順利o既竟然係好難訓得好o既我,竟然連續幾日都一上床即訓得著,以前o係舊屋都唔可以,勁!!