沒錯!!!我就如你們想像一樣,是一個急性子,事事計算(計較?),要求嚴慬不容許自己犯錯的人!(有著如此性格的我真的不可愛...!)
由於性格如此,在整個婚禮籌備過程中,我很容易便為小事煩惱,影響睡眠,最近樣子真的特別殘,距離婚期只餘個半月,要回復取佳狀態,相信已經不是易事,所以...
我決定要學會放手!!!!
婚禮過程最重要的rundown,我決定金盤洗手,不作任何參與(um...望兩望給點意見還是需要的!),交給honey負責!因為大日子當天我只會忙於扮靚,能夠分身兼顧流程的,便只有honey及眾兄弟姊妹,所以由honey全權負責計劃行程應該比較合適!!而我,亦可以避免因為緊張當天流程而影響心情,可以好好享受這一年半以來的籌備成果,與honey拍拖十年的最美時刻!!
Honey,rundown就交給你了!我要專心成長片製作以及盡我所能早點休息趕走臉上的熊貓印記!你要加油啊!
既然無得出街,今日就集中火力DIY d襟花手花,plan埋Honeymoon(其實都plan到尾聲喇!)同睇下有無心機的起心肝開始成長片製作啦!!!
多謝大家支持我,為我喊加油呀,等我都為自己打下氣先!!
加油!!!
o係云云reply中,今日收到o既呢句印像比較深刻!!
'Mr Chau, take good care of soon-to-be Mrs Chau!!!'
巧合地,今日打去傢俬公司更改送貨時間時,對方叫o左我一聲'周太'...當時真係唔識反應呀...只識傻傻咁笑住答'哦~~係呀...'...
坦白講,我覺得呢個稱呼唔係太型呀,我覺得我要一段時間先接受到呢個稱呼...甚至有d唔想跟我honey姓!!!因為我覺得我個姓型過佢o個個好多...哈哈!!!!
唔知點解,好想呢個二月快d過...
o黎緊幾星期我o既安排如下:
14/2: 去情人節婚紗展睇CDL catwalk show,希望睇得中新番o既靚衫,方便月尾揀衫有更多idea!另外,呢日要買奇華唐餅卡,因為會造八折!如果可以,希望去埋長沙灣睇印帖公司!至於情人節大餐,上年我同honey去o左街巿熟食中心叫食送食飯,唔知今年最後一個單身情人節我o地又會懶到有咩'新意'?
15/2: 去同honey親友團拜!
21/2: 上麥田影室內相,希望麥田有新室內景同有靚新衫俾我揀!
22/2: 繼續o係深圳,上咁多次,今次一定要去荀崗入貨,仲要買DIY花球襟花o既花材!
28/2: 約姊妹們睇姊妹裙同埋陪我去CDL揀衫,其實我想叫我媽去,但我媽見我有咁多人去又話唔去喇喎...睇怕我要落多兩錢肉緊請佢出山先得,我媽由細到大都係我stylist,我揀裙褂婚紗咁大件事點可能無佢份!!
以上行程看似豐富,大家亦可能以為我好積極,但實情剛剛相反,我最近完全洩o左道氣咁,想二月快d過只係因為完o左2月,以上item就會由'未完成'變為'完成'而已...過程係點結果係點,我好似唔太在乎,只想快點完結唔使煩...
另外,我仲有兩件一等一大事正在煩惱中:
1. 裝修: 師傅過年外遊仲未番,我屋企o既裝修工程停o左成個月後仲係復工無期...唉...開頭我仲擔心年尾咁早裝完修又唔入去住屋企會唔會因為無人氣加上天氣潮濕而又出現天花發霉o既現像,而家睇怕唔使擔心喇,不如擔心我遲D又趕Wedding又趕入伙添值傢俬如果可以分身有術好過啦...
2. 成長片段: 我到而家都係諗住DIY,但我對於呢方面認識只係好basic,時間緊迫下,我開始擔心做唔做得o黎...而更重要o既係,擔心還擔心,我仲未提起勁去'開始',點算?
洩氣o既氣球,吹番脹後注定好快又會再洩氣...有無人可以幫我搵到個漏氣位,補番佢?
...
就係食錯藥!!
今日已經係第三日病,星期四食完藥除o左退燒後一直到今日都好似無好過咁,依然氣促同好支力,仲心跳急促同開始有痛肚(醫生話係感冒困入腸!),最重要係我已經連續第三日無覺好訓,成日個幾鐘就醒一醒,好明顯係我食d藥唔o岩而令我無好番不持止,仲產生反效果!!!
結果,我今日還是乖乖出去沙田睇番睇開o個個醫生(星期四我發燒手軟腳軟,求其落o左屋企樓下睇!)!!都咪話唔神奇,改食新呢批藥後到而家都未夠兩個鐘,好明顯我個人無再溫溫dun dun,無o左氣促無埋心跳(應該話回復正常心跳!),感覺舒服番好多,希望今晚可以訓番覺好啦!!!
=========================================================
由於我病o左,所以今日去睇出租車o既事就交由我honey全權負責!!聽honey講,租車公司已經無晒24座Van,得番29座,價錢要貴$100...由於實在太懶,雖然我其實24座都嫌太大,但實在唔想再花時間慢慢格價,既然呢間租車公司出名好,就爽快扑搥算啦!!!
由上年年頭開blog至今,睇住一個一個靚靚新娘子出嫁,唔知係咪婚後生活繁忙(放工就要忙煮飯做家務!唔忙都難!),我發現唔少靚太都無再活躍於yahoo blog喇!相反,新力軍們落力出post分享佢o地o既準新娘心情,充滿熱情活力同朝氣(有時,佢o地預備好o既項目分分鐘比我呢位“自以為prepare得好早o既前輩”仲要多仲要快,有時都唔到我唔感到“汗顏”,哈哈,我要加把勁先得!!),又令yahoo blog keep住熱熱鬧鬧,連串o既hi and bye,應該就係準新娘blog圈子入面o既必然現像吧!!
唔知我嫁人後會唔會一樣忙到唔得閒再update呢度呢??
買?唔買?
結果,我選擇o左'唔買',就算我媽話我對boot好殘係咁叫我去買我都係唔買,但honey就相反,佢選擇o左去買!今日佢就捉o左我出尖沙咀睇佢尋日睇中o既o野,仲買埋添!!雖然錢係佢o既,但我郤好肉赤呀,佢短短兩星期就使o左幾千大元係衣物上喇!!肉赤之餘,其實我仲有d呷醋o架,因為我自己都好想好想買o野俾自己,可惜每當睇到個價錢牌時就會唔捨得咁貴,最後都係放低心頭好!
就係因為呢種咁複雜o既心情,我成晚都好靜,嚇親honey,要佢不斷安撫我...我係咪好細路好無謂呢...哈哈...
歐化又大減價,報紙上面o個張全真皮梳化只係6千幾,真係好吸引,仲話低至三五折,結果行晒全店,得o個張梳化係咁平,其餘都幾萬蚊,連一張木枱都要過萬,鞋櫃都要八千,唉...不過張木枱同鞋櫃真係好靚好靚,如果真係要花錢,我真係情願花係張台好過買衫,不過似乎買呢張台仲敗家,仲用得多錢...都係無謂掙扎喇,就咁望下算罷啦!!!
今次就唔同喇,無錯,我係好早預備,又買girdle又買飾物,仲上網搵o左一d reference預備拎去俾攝影師參考,不過我同honey都唔係太興奮咋喎,唔知點解呢?或者要去到影先識興奮啦,哈哈!!
睇天氣預報,下星期五會好似今日咁得十一二度,上到深圳巿郊應該得番幾度咋,好凍呀,希望影o既時候唔好見到我起晒雞皮牙關緊晒啦!!
過去一年發生在我身上o既大事:
1. 決定人生大事 (正確d講,呢件係07年尾o既事!)
2. 買樓
3. Honey求婚,第一次收鑽戒(婚照拍攝之旅驚喜篇 ~ 幸福的眼淚)
4. 我倆的第一次...婚照拍攝之旅
5. 雷曼出事前趕及轉工,做番in-house,可以多點私人時間搞結婚o野
6. 做奧運馬術義工
7. Honey考到工程師牌(Honey好叻!!!!!)
8. 股巿大跌,我o既身家大縮水
9. 好朋友珍妮同識o左廿年o既Pat Pat結婚,我有份做姊妹
10.當一天模特兒,影新娘化妝相,登o左上雜誌
過去一年差唔多所有大事都係同結婚有關,展望出年,睇怕都係結婚佔大部份!!
來年目標:
1. 完成620,正式成為honey o既老婆
2. 第一次踏足歐洲,去瑞士+希臘Honeymoon
3. 新居入伙
4. 成功同公司續contract (本來應該係希望成功轉perm o既,但咁o既時勢...)
5. 努力還債,結婚新居用o左一大筆錢,還債之餘仲想努力儲番多d!
定住5個目標先啦,完成維期年半o既大project,下半年要relax一點!!
上次我提過我有個好朋友做珠寶o既,佢知我一直搵緊條又大體但又可以出街戴到o既頸鏈,咁o岩佢公司個客訂造o既款幾o岩,特登send俾我睇,嘩,真係唔錯,好掂,價錢又OK,最難得係我媽都覺得靚!!!
今日我confirm要條鏈,但原來佢講o個個價只限14K,因為外國人多造14K,好少造18K,所以我要訂造18K就要貴d,而且仲要特登為我造一條,所以只可能造好o左先覆到我幾錢,o下????我見佢開頭話咁平條鏈又好大體先買嘛,而家佢造好o左開天剎價我都唔可以唔買喎,咁我都好無安全感好無預算!!!!於是我同佢討價還價o左一輪,最終佢都講o左句'價錢唔會差太遠'....唉...雖然都唔算咩保證,但好過無!!!傾到有點傷和氣感覺,真有點不好受,不過算吧,同佢相識廿載,相處方式早變了...!!!
下午收到我爸急call,佢話我知新屋o既磚唔夠,要我即買十件!!!!o下!!!唔夠????????開頭師傅預85件,我見B&Q可以退貨已經買o左100件,而家竟然仲差十件???雖然我屋企係鑽石廳,但數目都未免差太遠吧!!唉,放工即撲去B&Q買十塊,為免又要再翻訂,我再三向我爸確定係咪十磈,佢亦再三確定係,話差九塊就舖好,留番一塊做spare就夠,唔使多,好,你話o架,就十塊!!!不過訂貨一等又要三星期,仲要唔肯定新一批磚同前一批會唔會有色差,諗起都煩,好唔開心!!!
繁忙完番屋企食飯,我爸話我知新屋有樣o野太複雜唔整,o下!!!!我由第一日講裝修已經話要整喇喎,你唔好再遲d先講???本來已經夠煩o既我當刻即時好激動,好大聲講我第一日已經話要整,無可能唔整!!!!我爸當時顧住打NDS,係咁二答我話會同師傅講(一直都係佢同師傅溝通!!!),OK,總之整就得,但當時我實在太激動喇,忍唔住邊食食送尾邊喊,不過應該無人見到...(我要買磚所以要屋企留飯我食!)
我唔明,點解次次d麻煩事總係迫埋晒一日咁湧過o黎!!!...聽日又係繁忙o既一日,加油!!
目前為止,有'叮'一聲感覺o既item有:
酒席場地@萬麗海景酒店Oasis Room
戒子@ctf2
地磚@B&Q
衣櫃@ikea
簽名布design (比起相簿要design成個月,今次用o左一日就搞掂,整完honey都話個design好OK!!)
pre-wedding相@Michael Law Studio x Sarona Studio
相簿design小部份誇頁(雖然係自己design,但十六版入面得少於五誇頁design完有'叮'一聲感覺咋!!)
Wedding Logo(呢樣都算係我暫時最滿意o既一項,不過honey仲未俾我公開...嘻...!!)
花球(上網搵到有'叮'一聲o既款喇,但唔知點整...)
晚裝@CDL (o係catwalk show見過後就好鍾意,不過唔知自己著唔著得起!!)
...
仲有我honey!!!
仲未有/沒有'叮'一聲感覺o既item有:
相簿design大部份誇頁
婚紗
小禮物
場地布置
姊妹裙
...
應該仲有更多item未遇到'叮'一聲感覺,為尋找'叮'一聲,我要加油呀!!
開席時原來d Centerpiece全部都收起晒!!!!!!!!幾時收埋o架???
...等我仲成日諗我間酒店offer o既紅玫瑰centerpiece唔match我紫+綠o既wedding theme,我可以點樣DIY centerpiece添!!!開席梗係食o野啦,要上菜o架嘛,仲放舊花係中間咪阻住晒囉...點解我咁都諗唔到...
既然centerpiece只係出現得o個一陣,咁我花咁多時間心機去諗去DIY,其實係好浪費自己時間同金錢喎!!講真,如果我唔係尋日睇番d片,我都唔會記得我珍妮結婚o個日o既centerpiece係咩啦...咁...點解仲係有咁多人去俾錢做decoration,DIY centerpiece呢???唔通只係為影o個一兩張相做紀念?如果係,咁整一兩個放主家席咪得囉?點解要圍圍整????我真係有d諗唔明喇,好迷惘...
再細心睇珍妮的晚宴片段,睇見佢老公為o左佢填詞學琴自彈自唱,所有感動場面都仲深印我腦海...!!!!無錯,點解我一路都無為意??大日子o既意義,唔係在於我幾花時間心思係d 衫呀首飾呀decoration同食物度,而係兩個人之間o既承諾度呀!!!!!!!!!!
珍妮兩公婆俾o左我一個活生生o既好例子,任你個場地幾靚,d衫幾靚首飾幾名貴都好,都真係唔及雞泡呢位新郎哥為珍妮製造驚喜o黎得浪漫感人,同令人印像深刻呀!!!
為o左大日子o既DIY,我都花o左唔少時間去構思同上網搵資料,似乎真有點走火入魔,我真係應該小心點,將個重心放番係大日子o既真正意義之上!!
...當然,我亦唔係話咩都唔整咩都唔搞,成個晚宴一味得新人互訴有幾愛對方先係o岩先係好,始終一生人一次o既婚宴上,有適量o既DIY可以令賓客感覺到新人o既誠意同心思,但真係要記住,DIY o既同時唔好將重點放晒係靚唔靚,而要記住你想咁樣DIY o既真正目的,有番呢個重心,相信DIY就算幾簡單都好,俾賓賓o既感覺都一定係溫暖o既,自己亦可以留個紀念,有個美好回憶!!
我要好好記住呢一點先得!!!!
=====================================================
另外,由於我同仙廸婚期好近,而我同佢都有一班common好姊妹,經過珍妮幫忙搜集各人意願後,尋日終於都正式confirm到姊妹人選:
Athena,Betty,Clok,Karen&Jenny!
計埋我伴娘Natalie同埋我,剛好七個人...問題又o黎喇!!!!!!!
成日話要雙數雙數,咁係就咁計姊妹要雙數?定係姊妹+伴娘要雙數?定係姊妹+伴娘+我要雙數?
問一問媽咪,原來佢結婚時都無理呢d,其實我都唔多迷信,我都唔多想理喇...
總之兄弟姊妹同數量,咁所有人加埋咪一定係雙數囉...係咪???????????????
髮型: All back髮髻,簡潔醒神!!其實佢面部輪廓咁sharp,佢梳起晒d頭髮真係好好睇!!
化妝: 深啡smoky eyes!影相出o黎幾好睇,不過我睇電視訪問時就覺得個妝好似唔太精神,可能係Kelly忙o左成日本身有d支力啦...anyway,我覺得佢呢個妝唔係佢最靚o既妝,我諗應該可以再化靚d佢!!!
首飾: 我同媽都以為佢屋企開珠寶店,又有金至尊贊助,實有好多鑽飾睇,點知o岩o岩相反,佢成晚d首飾都唔多,好簡單!!!好似佢先後著o左兩套婚妙同一套火紅晚裝,三套衫佢都無戴頸鍊,而耳環同戒子都係最簡單o既一粒款(不過超大粒!!哈哈!!),就算佢著火紅晚裝時戴o既龍鳳金飾都係一兩對,總之就好plain好簡約!!不過三套衫都唔戴頸鍊好似又簡約得滯,我個人覺得可以配條幼身鑽鍊可能更好!!!
WG & EG: 一個字:靚!!!!Kelly身型咁fit,又高,真係著咩都好好睇!婚紗五十尺長拖尾佈滿999朵牡丹,好震憾但又唔覺好累'聚',真係好靚!!至於紅色EG簡直靚到'wow'一聲,我honey話覺得隻紅色好sharp好靚,好似法拉利o個隻紅咁喎!!!
禮服: Alex o既禮服都好簡單,不過簡單得o黎又有d特別,因為佢唔係成套白色o架,褲係黑色,仲有條白黑間...(怪怪,有d似運動褲)唔似general結婚咁白色禮服就全白,白色就全黑!!哈哈,白襯黑又幾特別...不過我諗我都係鍾意全黑或全白多d!!!
兄弟姊妹衫: 兄弟就睇唔到,不過睇電視見到d姊妹著銀灰色姊妹裙,都幾grand幾靚呀!!而伴娘仲戴o左頂帽添,好突出!!!
花球: 白色花球,清雅!!
場地布置: 雖然睇唔到場內係點布置,只聽描述話Kelly用o左紫色水晶布置,但我估都係以簡單為主,好似樓梯佢只得兩條大花柱而無係扶手位圍花就知!!!
Wedding Cake: 真係好簡單o既款式,哈哈,而家睇圖先見到,最頂o個舊好似好得易咁呢!!!
雖然個wedding無o左一份'華麗'o既感覺,但就令人好有親切感,就好似Kelly本身係娛樂圈出汙泥而不染一樣,簡單但係耀目!!!華麗又好,簡單又好,恭喜Kelly嫁到如意郎君,擁有自己最喜愛o既Wedding,祝你倆白頭到老,快d生隊足球隊出o黎!!!
