白玉苦瓜汁

早兩日辦年貨行經Citisuper買o左白玉苦瓜,尋晚再買多兩個青蘋果,用攪拌機整o左白玉苦瓜汁!!!

我同老公子仲就咁咬個苦瓜試o下咩味,其實都唔多苦呢!!整完仲覺得青蘋果味好似大過苦味,嫌唔夠苦添!!我見網上其他食譜係唔用青蘋果,而用青椒,下次都可以試下呢!!

雖然咩都唔加就咁飲都飲到入口,不過我o地最後都係加o左一匙蜜糖落去!!

呢晚煮o左咖喱羊腩,咁燥熱,飲番杯白玉苦瓜汁平衡番就最o岩!!

悲劇!!

尋日發生媽媽掟女落街再自殺o既慘劇,真係聞者心酸...

新聞指夫妻當時一家三口去飲茶,夫妻間為女兒升學問題而嘈交,然後妻子一句「你信不信我掟個女落去」，丈夫回答「你夠膽就做」...接住,慘劇就發生...

...

一家三口周末飲茶本來係件開心事,就係一句衝動說話,咁就搞成咁...

唉...兩夫妻床頭打交床尾和嘛,大家為女兒升學問題意見不合o者,但其實兩個都係為個女好先會咁嘛,點解要咁激動,最無辜係個女,就算係阿媽都無權決定女兒生死,而家搞到個女仔過年前無o左媽咪,以後一世都要承受住俾阿媽掟落街o既陰影,真係好陰公......

雖然我唔係嘈交專家,有時同老公子嘈交都會忍唔住語氣唔好,不過我記得曾經睇過一d嘈交智慧,諗番都真係幾受用!!!

1. 激動時最好停一停,透啖大氣,飲啖水,就算係一分鐘都好,通常冷靜一點,好多衝口而出o既說話都能夠吞番落肚!!(呢樣其實好難,我都係近年先開始熟習d...)

2. 除非事情真係去到無彎轉而要'分手' 或 '離婚', 否則任何情況下,邊個唔o岩都好, 都不要亂拎'分手', '離婚', '去死'呢幾個terms出o黎!!!! (呢點我同老公子都做得好好,十年都真係未提過呢幾個字o架!!!)

3. 退一步海闊天空,有時就算自己無錯,只要先放軟語氣,對方通常都會跟住放軟態度...言歸於好,有時就係咁簡單!!!(呢樣我老公子做得比我叻,通常我醒覺自己錯時有時都會夾硬話自己'我o岩', 老公子就會話'係, 係你o岩~', 老公子意識到我其實'知錯', 但又俾面我落台, 呢一點真係好抵讚,我要努力學習下先得!!)

希望大家共勉之!!!

辦年貨 & 大掃除

婚後第一次過年,明知要辦年貨, 但遲遲都的唔起心肝去買,就連利是封都係早兩日朋友俾我先到手...

o黎緊星期日就係大年初一,把握最後一個weekend尋日終於去o左辦年貨!!由於老公子話佢之前一日係旺角超多人,加上今日成日都落雨,結果都係去o左沙田算喇!!

由沙田廣場到好運中心,再到沙田中心, 行o左好耐迫o左好耐,終於都買到合心水o既賀年禮物,不過可能太衝忙啦,番到屋企先醒起無包到d禮物喎...真失敗!!

下午番到屋企同老公子分工合作大掃除(讚下老公子乖先!!）,雖然新屋只係住o左半年多D,但原來平日好少抹o既住置,好似雪櫃頂,書櫃頂,衣櫃頂仲有放滿廚房用品o既雲石面都好污漕下,洗洗洗抹抹抹,搞到七點先開始煮飯,到夜晚休息時已經9點lu...好支力...

休息時諗起sofa底同床下底,仲有水晶燈同埋廚房櫃未抹未執,唯有等下星期年三十o個朝先再努力啦!!!加油!!!

最後,我仲未唱錢入利是,正確D講,今日都仲未計要唱幾多...要快手d先得喇!!

P.S. 今年我終於明白我媽以前過年點解會咁忙喇!!!

搏錯o左?

係咪我黑仔??點解去到邊間公司都遇著re-org??

新公司番o左一個月,呢幾日就收到公司re-org o既通知, 基本上o係working level o既我唔會有咩影響,最多只係對上個manager由呢個鬼佬變o左第二個鬼佬咁解...但好衰唔衰o既係,re-org後, 公司竟然決定o係上海recruit人fill up 番我一直'喉'住o個個perm 位!!!!!!!!

今朝同美國conference call時聽到大老細咁講真係有D突然,點解好地地我已經as a contractor 同2位HK同事work得好好都仲要再係上海請,而唔轉我做perm去fill up呢個位???我唔信我做得一個月佢地會因為我表現唔突出而咁做...唔通又係人工作怪???

開完會問清楚我leader, 聽聞大老細o個邊應該有研究過係邊度recruit呢個位, 而leader佢地當然爭取過係HK recruit,因為係HK一齊work點都方便D,但turn out個decision係上海,佢都無法子,因為我leader都係small potato,無能力話到呢D事...

anyway,仲有無彎轉似乎係未知之數,亦唔可能樂觀...

唉...忽然間覺得好灰添...唔通我真係只能係呢間公司做完3/4個月就要離開??嗚...

囍!

31/1應該係一個大好日子!!!因為呢日只係我認識o既, 已經有3單婚禮(不過其中一個我唔太熟,所以無attend!)

首先係'一生一世(1314)' (1月31號4點)行禮o既大學同學Agnes,同佢工作時認識o既Fai, 於中環2號碼頭行禮!!好搞笑地,我o地幾位大學同學都係又跑又趕下剛好4點鐘到達,個個見到面時都上氣唔接下氣,甚至出晒汗...

March-in

交換戒子!!

我o既傑作!!呵呵,影得唔錯吧!!!

切蛋榚!!!證婚場地真係幾靚!!!

新人講感受!!新娘子忍唔住喊呢!!

證婚會場外provide o左cocktail, 環境好靚!!

婚後肥o左成個碼...

等同一對新人合照時我o地先合照!!今日少o左Carol同阿簡!!!

恭喜晒!!

臨走時先有時間睇番一對新人o既結婚相簿!!

後尾新娘子換上黃色晚裝,好靚好sharp!!!可惜我部相機d相震o左,唯有等新娘子send番俾我啦!!

臨走再偷影一下新娘子!!

由於要趕下場, 我o地6點未夠就走喇!!

成個ceremony雖然好簡單,新娘子Agnes同新郎哥又成日怕怕醜醜好少出聲,不過正正因為佢o地兩個都表現有點緊張,睇得出佢o地好重視呢個wedding呢!!

==========================================================

坐船去到TST只係6點,所以我o地行o左陣街,7點鬆D先去到海景嘉福出席另一單婚宴!!

夜晚呢餐一對新人都係我同老公子中學同學,男o既更加係同我由中一至中七都同班添!!

海景嘉福會場!!天花o既水晶燈勁靚!!

一對新人男才女貌,真係好登對!!
(今日兩位新娘都不約而同著黃色晚裝呢!!)

今晚仲見到好幾位好耐無見o既中學同學(唔同班,所以無咁熟!)

切蛋榚!!

迎賓時新娘子同我講話新郎今日無預備驚喜,好失望,點知原來係有o架...

新郎用powerpoint預備o左個slideshow, 配上其中一位兄弟用顏聯武tone去講新郎同新娘o既愛情故事,然後就o係一眾兄弟伴唱下,用saxophone奏出唯獨你是不可取替!!!

型到爆呢!!!新娘子實好lum!!!
(新郎哥送客時話要多謝我老公子,因為係我老公子o係我Wedding時俾surprise我而inspire到佢有吹saxophone呢個idea喎!!)

台上右二係前一屆港男呂熙, 佢都係我o地中學同學o黎o架!!其實我好想搵佢同我影相o架,但好怪,最後都唔敢出聲!!

Cheers!!

敬完酒,一對近人再續圍去影相,但其實已經十一點有多呢!!

新娘子話化妝師都走o左喇,最終換唔到送客晚裝!!

我老公子同其他中學同學又去hup極不勝酒力o既中學同學喇!!

由於overrun, 本來我o地都好想等一對新人送完客再o黎飲多杯,點知實在太夜,第二朝要番工,所以最後十一點七,八個字都係要走喇!!

Overall,成晚婚宴好'Kino', 充滿住新郎哥個人風格,因為如新郎哥自己所講,佢一向唔按常規做事!!雖然係咁,但我覺得呢個婚禮好sweet,  特別係新郎吹奏唯獨你是不可取替時,我忍唔住感動到眼濕濕!! 另外, 做醫生o既新娘子成晚表現既大方又得體亦令我印像好深, 斯文大方o既佢真係好charming!!一對新人郎才女貌,好匹配!!!!

==================================================

最後, 讓我跟老公子祝願Agnes & Fai, Jodi & Kino永遠幸福, 婚後甜甜蜜蜜, 早生貴子呀!!!