Plan Ahead

尋日lunch得我陪媽媽食飯,好似好耐無試過兩個人手牚台腳同shopping喇,好開心呢!!!下午用o左大半時間backup d相,特別集中處理四年多前去新疆d相,印像中新疆其實都幾美麗o架,真係好掛住當地青綠o既大草源,鮮甜多水o既哈密瓜同西瓜,淡淡o既鮮羊奶同唔'蘇'o既烤全羊...好慶幸自己可以去過呢個地方,可惜honey當時無同我去呢!!!

=========================================

今朝又同同事鬥波,今日仲少人過上次,二打二,不過正因為少人,所以我要又跑又跳,好快出晒汗,面都紅晒,呢d先係真正運動嘛,好鍾意呢個感覺!!!!

打完波番到屋企先十一點半,同o左屋企人去川滬食飯!!下午再約o左honey一齊plan行程,不過我o地掛住食o野,傾極都係第一日行程...我o地要加油先得!!!

恭喜恭喜

恭喜發財呀,今日係十三,估唔到仲有利是收!!!!

今晚約o左舊同事食飯,其中舊同事剛新婚(好事成雙?),第一年派利是,個利是封仲有coupon,都幾得意呢!!!今晚去食新加坡餐廳,不過d西冷扒都幾'鞋',麻麻o地!!!

由於剛過新年,所以話題當然係分享舊公司某同事d怪異派利是行為啦,估唔到真係有人會將人分等級,利是分為10,20,50同100呢!!!另外仲談及我前阿姐,聽聞佢自上年換了男友、在公司失寵後就成個人'謝'了,無我以前認識時咁有衝勁...話時話,我離職後只同佢食過一次飯,都有差唔多一年無聯絡喇,係咪好衰呢!?

面聖又延期了!!

今日著formal預備今晚面聖,點知又延期到下星期五...計我話,最好就無限期延遲啦,哈哈...

=================================================

夜晚Honey個電腦唔知做乜,skype又上唔到,咪又用唔到,仲要電話都無電,搞到傾唔到計,唔制呀!!!

星期日影o既相呀,Sweetie親我呢!

中大同學

今日放工約o左中大同學仔食晚飯,去o左CWB泰簡單,我o地次次聚會都好似變o左"東張西望"咁,八盡好多電影娛樂圈事,因為我o地其中一個係一間電影發行公司做,另一個就係電視台做,大家都好鍾意睇電影或留意明星動向,好似今晚咁,話題就圍繞Academy Awards同電影節,本來仲諗住一齊訂飛睇"惡女花魁",不過我三月尾可能唔得閒呢,所以去唔到喇!!!

電影節官網:

http://www.hkiff.org.hk/chi/programme/show_detail.php?fi_id=188&se_id=89

豪

今日年初八,約o左同事打籃球,不過今次得好少人,計埋我都係五個人,人丁單簿,不過慢慢鬥o下波射o下波,唔太激烈都幾舒服,而且天氣仲由落雨變出猛太陽,俾太陽曬o下人都精神d健康d!!!

打完波十一點幾,由於要等其他同事係又一城等位飲茶,所以朝早有去做運動o既就先上一名公司前高層(剛離職!!)屋企拜年!!!!!呢位高層住o係九龍塘畢架山,豪宅即係豪宅,,歐陸式裝修、水晶燈、高級音響、世界各地旅行買回來o既擺設(e.g. 南非駝鳥蛋)、四房(可能仲有工人房,不過我無行入廚房參觀!)兩廳同露台(種滿好多大牡丹)、落地玻璃(可望到維港煙花!!),氣派認真不凡呢!!!(P.S. 今次係我第二次去豪宅,記得上次係去完新疆後去o左其中一個團友位於寶馬山o既屋企睇相,上次o個度夜景超靚,但裝修無咁'豪宅'!)

除o左屋主一家四口外,去拜年的分別係我、我老細、老細老婆(身懷八個月BB女!)同朋友,以及另一位同事(身懷八個月孖仔!)及佢老公,參觀完豪宅後,男o既一堆女o既一堆咁傾計...我呢個年齡組別o既得我一人,唯有自已搵節目,簡中就同六年級o既屋主大仔玩迷你搖控直升機,簡中又同屋主養o既可愛狗狗玩,不過最後都係埋了女人堆聽幸福準媽媽及媽媽(豪宅女主人)的生仔經...雖然我明顯地撘唔上咀,但聽住佢o地講照4D相(可以睇到BB樣!)、BB郁動令個肚變型(孖仔媽媽話佢個肚試過由圓變方,起角位置應該係BB手手腳腳,哈哈!)、買BB用品、坐月、孕婦奶粉、餵人奶、收奶、前二後八及BB出世後朝早俾奶奶湊 o既安排等等,又幾有趣,感覺到準媽媽們o既幸福!!!!

終於去飲茶喇,成圍十四人,由於太迫,所以先到o既同事留了個'正'位俾我,就係坐係兩位成座山咁又高又大(肚腩!)o既男同事中間,因為佢話得我先'攝'到入去...成餐飯都好有'壓迫感'呢!!!!哈...

==========================================

番到屋企三點半,之後'迫'honey陪我去拎相,其間見到有個兩歲BB扭計,喊住要雙手拎滿o野o既媽媽抱,媽媽於是蹲下半溫柔咁話'想點呀,媽媽無手呀!',我仲估個BB會死扭咁狂喊啦(而家個個細路都超野蠻,好恐怖!),點知個BB仔竟然雙手抱住媽媽個頭咀對咀咁鍚媽咪,仲要鍚o左兩次,看在我呢個途人眼裡都覺得好冧,跟何況係媽咪,不過個媽媽真係無手,所以都係企番起身,當時我已經行遠,只聽到個BB又喊了聲...估唔到人仔細細咁有計仔,識用軟攻攻陷媽媽個心,唔係一味野蠻無理,俾我係媽媽都一定心都溶呢!!!!