十一點依足行程離開酒店,打的食東北菜,不過間o野d食物唔夠熱,好快凍晒,無我上次食佢另一間咁好味,不過狂叫下每人都只係二十幾蚊,再加上個拔絲番薯好玩又好味,OK啦!!!
食完飯行去東門Shopping、吃街頭小食,大家都買到心愛o既DVD同小飾品,好似頸巾、耳環、指甲花飾貼紙、絲襪等,價錢比香港平少少啦,不過係兩蚊店度俾人找d假一蚊,似乎呢度兩蚊店係假,散假一蚊為實,真有少少激氣!!!
行完東門,大家拎住重重o既行裝坐地鐵番羅湖城整手甲,由於怕成日要補甲,所以只係三個人整水晶甲(比蒂個水晶甲超靚呢!!)其餘只係修甲同畫花,不過我個花太簡單,自己畫都畫到,唔抵!!
整完指甲臨走大家再買袋,四位大姐考慮買一個百幾二百蚊o既猄皮袋,而我呢,就用同樣時間考慮買一個廿蚊o既袋...結果我個袋得到o既評語好壞參半,阿媽仲話我點解唔一齊買埋個猄皮袋呢!!!
番到自己安樂窩好舒服,但d o野勁亂,點都要執番好先訓,打開袋,赫然發現一罐菠蘿啤(本來大家買o黎係酒店飲,但酒店無雪櫃所以無飲到!),我完全唔記得原來我拎走o左呢,就當係我係深圳買俾屋企人o既手信啦,哈哈!!
兩點幾三點出到上水,邊食tea邊講解行程,每人手上都拎住Cindy精心製作o既旅行資料,包括地圖、Rundown、食肆/酒店/按摸o既資料,一行九人大約四點幾向北出發!!
上到羅湖即打的去酒店,點知原來間酒店勁近,只係一條直路就到,相信司機都嫌我o地煩呢!!放低行裝後去食小肥羊,我o地好落力咁食呀食、叫呀叫竟然都仲差幾廿蚊先到minimum charge,埋單每人五十幾蚊,抵到飛起!!
食飽飽去按摩,由於大多數都係第一次按,所以開頭大家換衫沖涼時都好疑惑唔知係邊除衫,都幾搞笑,不過好快大家都只係圍住毛巾一齊焗桑拿喇,以前住hall都未試過咁多人同一時間沖涼,更何況見到大家都只係圍住毛巾,都咪話唔香艷!!沖完涼九個人包房,有d做中式有d做香薰推油,邊按邊傾計,好鬼自在寫意,我o地仲影o左張香艷合照添!!!想睇嗎?Sorry,大姐會限定,絕不公開!!!!
之後四圍參觀按摩城,飲o下o野傾o下計再沖涼番酒店,係酒店玩game交換聖誕禮物,我抽中Clok o個份,係一個三眼仔相架同龍貓電話座,超鍾意呢,我驚我會唔捨得用!!!之後九個人兩張大床腳撐腳訓o係度傾計,重拾住hall感覺,我仲分享o左一個笑話,估唔到大家都覺得咁搞笑呢,哈!!!!我o地一傾就到五點先訓喇,可惜一向貪玩o既我玩得太興奮,成個腦不斷轉,訓得唔好呀!!
2006 feonko的十大事件:
1.完成了碩士課程
2.做了半年失業大軍,再加上忙於Final Project,經歷了情緒低落o既日子
3.正正式式投身社會,投入新工作
4.學習理財,建立了收入/支出表,管理自己
5.發了一場白日夢,感受過從熒幕看見自己的興奮和喜悅
6.經歷七年滋養,平淡感漸濃
7.第一次去Disneyland,過了一個難忘生日
8.第一次睇草蜢現場表演,傑仔唱失樂園後送上一吻那一幕至今難忘
9.第一次有好友公佈喜訊,興奮了好一陣子
10.第一次花錢美容,換來滑滑皮膚
...很少做回顧,發現原來要諗十件大事真的不易,諗唔出,咁咪即係我往年無乜建樹...噢...出年要加把勁先得喇!!
