大眼妹台北自遊行 ~ Day 4

Day 4: 九份 (魚丸 → 阿柑姨芋圓 → 泥人吳 → 悲情城巿 → 昇平戲院) → 飯店 → 機場 → 香港

話咁快最後一日,雖然係夜機,但為o左爭取時間,所以依然晨咁早起身,點知落到車站先知最早去瑞芳o既火車十點先開,等我o地只o係飯店留下買早餐(唔好食!)添,早知行遠d去書本介紹o既舖頭啦!!

第一次坐火車,都有d驚,因為錯過一班車就可能要等多個鐘先再有車o架喇!!!上到火車,本來我o地分開車卡,但當然唔會咁做啦,寧願一個坐一個企,但好好彩,有個台灣人見我o地係一齊,最後讓個位俾我o地一齊坐,真係好人!!!坐o左四十五分鐘就到瑞芳,其實架火車都開得幾慢o架,所以我同honey都好奇怪,點解去九份一定要坐火車,其實公車都應該到吧??

坐公車上九份(竟然撞番尋日o個一家三口,好有緣!),嘩,原來o係高山上o架,天雨路滑,山路又斜,即刻諗起單車禍,都有少少驚!!落車,先去觀景台影相,嘩,大風到吹到我成面髮呢!!叫途人幫我o地影合照,點知個個都只影人唔影景,咁唯有出動腳架啦,點知...我honey唔見o左腳架個轉呀!!!個腳架借o架咋,唔係呀嘛...左搵右搵都唔見,但我明明記得出門口提醒過honey拎番個轉出o黎唔好pack入行李,等呢日有得用...於是我猛叫honey諗番佢拎o左個轉出o黎後放o係邊,點知honey話只記得放係床上,之後就咩都無印像,而我呢,就記得臨check out時明明同honey一齊望過張床,make sure被子下無留低o野先走...估唔到而家都係唔見o野,仲要唔見借番o黎o既o野,慘喇...即刻打番飯店,點知飯店d人又唔helpful,只話執o左房,無發現有o野留低就算...唉...死喇,真係對唔住同事了...

鵝鵝鵝...我又'鵝'了一輪,無法啦,炆都無用,唯有專心食食食...沿住基山街行,先去食魚丸,第一間o既魚丸超大粒o架,不過味道普通,反而另一間無乜人幫襯o既老舖仲好味,我o地叫o左個餐,除魚丸外仲有豆乾包同冬粉,我覺得個冬粉好正,而honey就鍾意個豆乾包!!!之後我o地就見到黑色腸,如果唔係我媽一早講話呢條咁醜o既墨魚腸好味我真係唔會買呢!!!之後仲食o左紅糟肉圓(賣相古怪,味道亦然,麻麻!)、一口臭豆腐同炸雞,食完我已經飽飽o地喇,不過一定要留肚食阿柑姨芋圓,書本講到好多人排隊o架!!!

我o地照住地圖行上長長o既豎崎路(成條路都係石階),點解唔見o既?一個人都無喎,唯有繼續上啦,都有少少支力o架!!噢,終於見喇,原來咁高o既,而且一個人都無,好冷清呢!!買o左芋圓,今次要熱o既(凍o既早兩日係東區粉圓試過了!),由於呢度其實係民居,所以我o地要穿過客飯廳,阻住公公婆婆戶主睇電視先去到觀景座位,估唔到呢度都幾大,別有洞天呢!!由於無乜人,所以窗口位任揀,透過大玻璃邊遠眺海景同基隆山,邊食住熱熱o既甜品(其實味道不及東區芋圓,但咁凍食熱o野好舒服囉!),唯一美中不足係天色唔好,如果唔係一定更好feel!!!

食完芋圓沿住樓梯落,經過泥人吳,店內全部都係老闆用陶瓷整o既'鬼'面具,但影相要錢o架,所以只好o係門外影!!繼續落樓梯,因為個view好正,所以沿路開o左好多茶館,以方便遊客邊嘆茶邊欣賞美景!!雖然都係搵食,但呢d茶館裝潢各具特色,將條街點綴得好有味道,可能因為我o地今日唔使趕頭趕命,所以我同honey特別有閒情慢慢行九份,大家都邊行邊讚呢度,好鍾意呢個地方呢!!!!

再繼續落,見到海悅樓同阿妹茶酒館,書入面都有仲紹呢,不過我o地無入去幫襯,再之後終於見到侯孝賢拍'悲情城巿'o既地方喇,側邊就係'昇平戲院',舊舊o既感覺,好有懷舊味道呢!!!

東走走西走走,最後我o地拾級而上,番上去基山街,最後食埋花枝丸(無影相添!)、草仔粿(我o地捨大去熱o既甜紅豆味,大膽揀o左咸綠豆,食落又OK喎!...呢樣都無影相呀!!)同埋牛肉麵,雖然間牛肉麵無人幫襯,但味道又唔錯喎,或者呢d老店(四十年老店)自恃真才實料,所以唔去拉客先會咁冷清吧,好彩我同honey識揀o者!!!...咦?七里香呢??原來九份無,應該係我記錯o左喇,早知尋日係士林夜巿食埋啦!!失策!

回程,咦?點解架公車寫住番台北捷運復興站??為免等到五點半先有火車,於是我同honey就放棄已買o既火車票直接番台北,雖然車錢貴少少(我o地俾少o左錢,俾司機叫住補錢呢,哈!!),但車程同火車差唔多,至少唔使轉車咁煩,而且dun dun o下不知幾好訓,點解書入面提都唔提呀,搞到我一直以為入九份一定要坐火車添,搞到我o地浪費o左程車票喇!!!

番到飯店領番d行李就趕去坐機場巴士喇,時間剛好六點,好彩無遲,如果唔係要多等半個鐘先有車!!!期間架車經過台北小巨蛋呀,即刻爭取最後機會影相!!!因為遇著平日放工時間,塞車塞o左好耐,七點半先到機場呢(我o地坐KA最夜一班機)!!Check in,咦!隔離咪無線東張西望個主持王欣廷?唔知佢係咪去台灣訪問完d明星呢?Honey唔識佢,只係猛話唔靚呢!!

番到香港,依然凍到震,番到屋企沖埋涼兩點,終於結束四天自遊行之旅,時間真係過得好快呀!!!

Picture of the day:

大眼妹台北自遊行 ~ 後記

4/4兒童節(買o左出奇蛋,哈哈!),雖然今日係平日,但我、我爸都唔使番工,細佬又唔使番學,竟然可以一家五口出街食lunch,搞到我成日以為今日星期日,放假放矇o左lu!今日邊食飯邊同屋企share我去旅行o既經歷,簡直滔滔不絕呢!!夜晚俾相爸媽睇,睇完後佢o地又俾番佢o地一年前去o既相我睇,嘩,佢o地去o個個士林夜巿同九份都迫滿人,而我o個d就相對冷清,好搞笑!!

==============================================

經過四天自遊行,發覺自遊行真係好玩過跟團好多,至少我可以自由控制時間同去邊,又可以深入每條街道,同當地來個親密接觸,對o個個地方印像更深刻,唔會去完就忘記,好好玩呢!!!!等我而家為呢個台北之旅做個總結先!!

1. 最美味

除o野食,台灣都無乜特別o野可買,所以手信我都係買o左食物!!!至於食o左咁多樣美食,我同honey最愛要數係雞排,另外,我覺得胡椒餅、東區粉圓、白玉苦瓜汁同阿宗麵線都無被過譽,絕對值得推介!!!至於失望o既,除o左預料中o既鼎泰豐外,仲有蚵仔麵線同蚵仔煎,前者味道太淡,後者有d一pat pat透明o野,好唔o岩食呢!!!而驚喜呢就有書本上無提及過o既饒河街鴨血同臭豆腐、士林夜巿廣東粥、度小月o既野菜同埋九份o既豆乾包同冬粉!!!食足咁多日,想唔肥都難,嘻!!!...不過,我o地都錯過o左士林o既七里香同大香腸,仲有淡水o既o野食,唔知第日有無機會再補番呢,嘻!!

無影相o既有草仔粿、花枝丸同埋老蔡水煎包!!

2. 最友善

四日自遊行,問路少不免,加上台灣係香港客自遊行熱門地,所以旅程中都接觸到唔少香港同台灣人,雖然只有一面之緣,但我真係好高興能遇到o個位接載我o地坐順風車o既台灣人,同樣o係淡水狼狽非常o既一家三口同埋主動同我傾計o既日本女人呢!

3. 最失敗

第三日,因為我任性要上多次陽明山,間接搞到夜o左去淡水,遇上狂風暴雨令淡水之行告吹,唉...而且再影o既相又唔係靚,抵唔番去唔到淡水o既損失,失敗!!
因為我記錯,所以錯過o左士林o既七里香同大香腸,失敗!!
最後一日唔見o野,仲要係借番o黎o既o野,最最最失敗!!
仲有,我完全無諗過o野食會過期呢個問題,所以下星期前見唔到大家,手信就唯有落入我肚度喇...失敗!!!!

4. 最大頭蝦

Honey由第一日唔記得帶遮,到第三日三回飯店,再到最後一日唔見o野,再加上番屋企上機場巴士唔記得o都八達通...唉...點解可以咁大頭蝦,其實都幾無奈,我已經盡可能提得就提...經過呢幾日,我已經成功變o左'常鵝'喇!!...其實男人們唔應該成日嫌另一伴'長氣',埋怨從前溫柔體貼o既女朋友何時變了又長氣又煩o既'師奶',其實女人變得'長氣'都係你o地d大頭蝦一手造成咋...你估我o地好想浪費咁多口水咩...

5. 最美麗

我honey四日以來大飽眼福,因為佢覺得台北美媚好多都好靚,而且衣著較香港女仔開放,不難見到美女們胸前兩團肉,而且絕大部份都化了粧,望落的確有唔少美女呢!!至於實際上係咪真係咁靚就不得而知喇,除非個個落晒粧啦!!(不過我honey話唔理實際靚唔靚喎,又唔係同人過人世,望o下之嘛,最重要係個結果靚喎!...)

至於景點,我o地去o左台北101、饒河街夜巿、中正紀念堂、陽明山、故宮博物館、圓山飯店、淡水情人橋、士林夜巿同九份,最靚最有情調都算係九份,我同honey都好鍾意呢個地方,所以影出o黎d相都特別有味道!!!另外,我都好鍾意饒河街夜巿o既熱鬧氣氛!!

至於成個旅程中最靚o既相我已經分別貼o左係各日o既Pictures of the day度,當中最鍾意都算以下呢張,話晒我去台灣其中一個重要目的就係睇花呢!!

6. 最佳模特兒

三年前去泰國我都有帶麥兜去旅行,今次咁多食物,當然要帶埋呢位小model去同食物合照啦!!不過三年前o既麥兜失寵了,因為今次多了麥嘜,佢除o左靚仔外,表情仲好趣怪,頭帶鴨咀帽再加背囊,好有旅行feel呢!!以下呢幾張真係cutie到暈呀!!

當然,除麥嘜外仲有我啦...真多得勞苦功高o既honey同埋...個腳架!哈哈!!

背景o既矇矓效果係我後加,嘻!!

以下呢張係我覺得影得自己最好o既一張...嘻!!

拜山

5/4

今日清明節,同家人過海拜山,好多人呢,離開墳場時仲見到田北辰呢!!之後去飲茶,本來叫埋honey o架,但佢今日都要番工呀,忙到飛起,去完旅行已經連續番o左兩日工,好慘呢,似乎呢個時間去旅行對honey o黎講唔係最好時機呢!!!

飲完茶本來想慫恿難得過海o既媽去CWB行街,點知我細佬話要趕番屋企做FYP,所以唯有番屋企,唯有乖乖係屋企打遊記啦,寫寫o下都係長篇大論,再加埋d圖,都寫o左我唔少時間呢!!!

6/4

Honey好衰,應承人出街最後又反口,我唔理,星期日一定要出街,仲要出成日,無理由五天假期都無街去嘛!!!今日無出街,只係簡單去o左食蔡潤記同行o左陣超級城,咁橋Stephy做show,都幾靚呀,不過我honey話太瘦喎!!!

夜晚繼續寫遊記!!!

7/4

今朝同親友去粉嶺拜山,聽到一位無知少女決定綴學去做洗頭妹o既故事,好無奈...食完拜神食品好飽呢,之後又同honey行超級城...不過今日特別少少,走o左入冒險樂園,由於我從未玩過呢d o野,睇o左好耐都唔知d人玩緊乜,真係out呢!!

噢,夜晚聽新聞台灣去蔣化,陽明山草山行館燒o左,我o地o個日都有經過外邊,不過無行過去,早知去影幾張相啦,以後都無機會lu~!

夜晚上網搵d花資料,原來我見到o既白色花唔係梅花亦唔係桃花,原來真係櫻花,係來自日本o既吉野櫻(我放大另一d特寫相,對過d葉同花,都幾sure係吉野櫻!)

 

參考資料: http://www.ymsnp.gov.tw/web/webpage.aspx?f=data_file/plant93/flower93_233.htm

而以下呢d桃紅色係山櫻,呢棵花我無suspect過呀,因為佢d花真係向下生o架!!

 

參考資料: http://www.ymsnp.gov.tw/web/webpage.aspx?f=data_file/plant93/flower93_062.htm

櫻花、梅花、桃花o既分別: http://hk.knowledge.yahoo.com/question/?qid=7007021900139
(Source: Yahoo 知識)

大眼妹台北自遊行 ~ Day 3

Day 3: 故宮博物館 → 維格 → 肥前屋(去唔成) → 圓山飯店(臨時加插) → 陽明山(Again) → 淡水(情人橋 → ...其餘都去唔成) → 飯店(臨時加插) → 士林夜巿

睇上面個行程都知呢日簡直係一團糟啦!!!經過前一日經驗,都估到去博物館應該比預期更耐,但估唔到三層樓八個館我o地行足兩個幾三個鐘,由九點半行到十二點先走,而當我o地想睇館內最值得一睇同最出名o既翠玉白菜時,竟然遇到十幾部攝錄機,呢十部機團團圍住白菜,搞到遊人乜都睇唔到,八八卦卦望o下邊個到訪咁巴閉啦,點知只係幾個女人,可能係d地方官o卦,真唔知點解訪問一個人要用十幾部機!!!好不容易等呢十幾部攝錄機離開白菜,我同honey終於睇到呢棵靚白菜,原來都幾大棵呢,不過我覺得被人冷落一旁o既肥豬肉都幾值一睇呢!!

深知自己lag behind schedule,於是趕去圓山寺站去維格買手信,落o左車站沿地圖指示行,開頭勁驚自己行錯,因為街上太靜喇,真覺得自己o係個癈墟度行緊咁...終於到維格,噢,原來只係一間小小餅舖,比我屋企附近o既麵包店大不了多少!!!

買了手信趕返飯店放低,之後就行去附近的'肥前屋'食飯,書中講到呢間日本o野好多人排隊o架,開到兩點半,所以我同honey都行得好快,點知...行到去,噢,星期一休息!!原來我同honey都無留意書上寫o既休息日子...為免白行,我o地於是坐的士去同一方向但更遠o既'點水樓',點知的士佬(佢估我同honey係星加坡人,讚我o地d普通話無香港口音呢!)話未聽過呢間'名店',反而介紹我o地去食火鍋...唔理喇,為o左可以再上多次陽明山影尋日因天黑而影唔到o既花,食咩都唔緊要,最緊要快!!...點知...落o左的士,行到我同honey傻,問o左幾次路都搵唔到'點水樓',最後唯有求其食啦,點知入o左間食自助餐...噢,趕時間嘛,都係走,行去另一間,點知兩點幾休息,睇住佢落閘...唯有坐的士番去肥前屋附近啦,點知上的士望到圓山飯店,原來我同honey已經行o左幾個捷運站咁遠啦,司機大佬話去圓山飯店近喎,本來之前想去,但怕唔順路浪費時間,而家忽然咁'順路',咁咪去囉!!!

我好鍾意右邊張相,感覺好搞鬼呢!!其實我o地o係度睇緊個相機shutter呀,honey死都唔信影相時可以睇到個shutter眨呢!!

圓山飯店的確靚,可惜唔幫襯(感覺上貴得o黎得點心,雖然餓,但無諗過入去!)o既被'謝絕'內進參觀拍照,所以我o地繼續餓住落山,然後唯有係捷運站買o左盒sushi同包上陽明山...上到山又大風又有雨,凍到震,但因為我任性,加上諗住去天黑去淡水都無問題,所以堅持襯天光上山,結果係就係影多o左相,但全部都唔靚,不過就同一隻松鼠來了個近距離接觸,同見識到尋日熱到飛起,勁多遊人o既山變為凍到飛起,橫風橫雨同得番幾個遊人o既分別...

幸好,霉又唔霉得晒,下山剛好有車,如果唔係就要呆站山頭食多半個鐘風雨...去到北投坐捷運入淡水,去到車站其實都落緊雨,但唔算大,於是照計劃襯天仲有少少光先去情人橋(橋名懶浪漫,皆因條橋2月14落成...)影相,之後先行街...點知...去到情人橋,影唔夠兩張相雨已經越落越大,風大到吹反晒d遮,但由於無其他路可行,唯有冒住俾風吹落橋o既危險過橋...由於天黑,條橋亮燈得的確幾靚,但我o地已經無閒情欣賞,我同Honey手拖手過橋,勁驚滑倒,如果o係情人橋上冒住橫風雨中'漫'步就係所謂o既'浪漫',咁我寧願唔'浪漫'喇...

過完橋,全身濕晒,底都濕埋,勁唔舒服,最衰仲係無車,好彩有間好大o既賣魚地方,等我o地可以有瓦遮頭等車,因為出面已經黑晒,仲開始閃電,好驚!!!等o左半個鐘,終於有車,除o左我同honey,另外只有同樣來自香港o既一家三口,同病相連,上到車自然傾番兩句大談狼狽經歷,原來佢o地同我o地一樣五點幾先入到淡水就即去情人橋,結果同變落湯雞...聽到後都有暗自慶幸自己唔係唯一咁失敗o既旅客,但如果知道結果係咁,唔上陽明山早早去淡水就唔會落得咁o既下場...!!!

成身濕晒,出面又閃電同橫風橫雨,我同honey都決定唔再行喇,唯有離開淡水番飯店,四十五分鐘車程忽然變得好長,因為濕住身好辛苦呢!!!番到飯店換衫用風筒吹身,擾攘一輪再出發,好彩士林夜巿係室內,如果換著第一日o既饒河街夜巿,睇怕行程又要告吹...

出門口,由於只去夜巿,所以我o地都放低較重o既行裝,就o係飯店電梯口發生o左'三回飯店'事件:

等電梯,我問honey: 遮呢?
Honey: 噢...我番去拎...
我o係電梯口等...
Honey出o黎,我問: 記得今日係用一日通張票喎...
Honey: 噢...放底o左...
我o係電梯口繼續無奈地等...
Honey出o黎,以為順利可以落樓,點知電梯內我發現honey無拎遮,於是再問'遮呢?'
Honey: 噢...我拎咭果時順手擺番低把遮...

想點呀...當刻真係幾嬲o架,簡直激死我!!!...不過諗落都幾搞笑...呢d就係真正'唔知好嬲定好笑'喇...

去到夜巿,人人話士林夜巿旺,但呢日橫風橫雨,除o左間中有團到達買雞排外,巿內其實好少人,少人到d舖要不斷拉客,好煩!!我o地食o左雞排(超大超好味!)、大餅包小餅(揀o左麻辣味,正!)、花枝羹(好難食!)、蚵仔煎(透明一pat pat唔知係咩,好難食!)、廣東粥(無諗過去到台灣食廣東o野,但呢度o既旗魚粥真係好味,超有驚喜!)同白玉苦瓜汁(一d都唔苦,連一向唔食苦瓜o既honey都話正!)!!其餘食店由於無乜人去,而且間間舖賣o既差唔多,都唔明點解士林夜巿咁出名,我就覺得食物種類少o左d,感覺上第一日去o既饒河街仲有氣氛仲正呢!!!(或者無人o既士林夜巿只有今日橫風橫雨同埋遇著星期一先會出現,咁都俾我o地遇到真好彩!!)

離開夜巿,去o左附近搵阿宗麵線,因為我o地唔會有時間去西門,所以一定要呢度食!!終於搵到喇,呢間分別比西門正店多o左座位,但無台無筷子,點食呢??哦~,原來阿宗麵線其實似碗仔翅,所以只有湯匙已夠,味道亦好好,Yummy!!!

回程,遠望街上大樓o既電子bill板,原來得13度,尋日明明27,28度,唔怪得凍成咁,我o地仲要個身濕濕o地...唉,今日行程認真亂,可以再由頭過多次今日就好喇!!!

Pictures of the day:

終於搵到有較多花o既一棵,影出o黎似唔似漫天櫻花??

冷得我驣驣震呀~

大眼妹台北自遊行 ~ Day 2

Day 2: 中正紀念堂 → 永康街(鼎泰豐 → 冰館 → 永康牛肉麵)  → 陽明山(竹子湖 → 陽明公園 → 花鐘) → 東區(度小月 → 東區粉圓) → 東區地下街

第二日九點出發去中正紀念堂,呢度都幾大,左右兩邊都有座戲劇院,唔知係咪星期日關係,劇院外有好多年青人o係度排戲,不過認真該煨,望望o下我o地竟然見到有個癲佬o係度做d四級行為,好核突好得人驚,honey唔應該叫我望嘛,真巴不得洗眼兼洗腦!!!

除o左劇院前o既青年人外,呢日廣場內仲擺滿攤位,有好多巨型吹氣恐龍同畢業公仔,似乎係一個中學生o既畢業嘉年華,好熱鬧,不過要搵個靚位影相就變得唔容易,無理由o係紀念堂影埋d恐龍入相嘛!!由廣場頭行到尾後上樓梯睇銅像,其間有個日本女人叫我幫佢影相,我勁想用日文答o架,但一時間口窒窒乜都講唔出,好彩,影完後我終於鼓起勇氣用日文問佢影得好唔好!!影完相後honey自己走o左去睇o野,就o係呢個時候,個日本女人番o黎同我傾計呀,佢問我係咪韓國人(我後尾先諗起佢其實係用韓文問o架,但因為我都識聽,所以當時無為意,照用日文答唔係!!!),之後大家用動作加埋我簡單o既日文,估唔到又溝通到喎,好開心第一次用日文同日本人溝通呀,都算係意外收獲!!!

參觀完趕去鼎泰豐,可惜已經十一點幾,只在星期六、日先有得賣o既小籠湯包十點已經賣晒...噢...等我仲精心安排今日去鼎泰豐添,結果都係無緣品嘗!!!我o地係鼎泰豐叫o左小籠包、蝦肉蒸餃、酸辣湯、擔擔麵同千層油榚,不過味道真係普通,特別係酸辣湯同千層油榚,前者唔酸唔辣,後者又乾又硬...早知留肚食第二d!!!

食完後過幾條街去冰館,呢間o野日本都有分店,加上今日超熱,門口勁多人!!!不過我同honey又遲一步,夏天先有o既芒果泡泡冰已經賣晒,所以我o地叫o左個綜合泡泡冰!!個冰有草莓、芒果同奇異果,d草莓好紅好可愛,賣相超吸引,o係咁熱o既天氣食冰真係透心涼,好正!!!食完後,我o地又過幾個街口食永康牛肉麵,但由於太飽,所以無叫到台台都食o既粉蒸排骨飯!!!坐我o地對面坐o左一個ABC同兩個香港人,其中一個不斷用英文介紹d食物俾個ABC聽,佢聽見我同honey用廣東話,所以問我o地點解識去呢間o野,我o地答係書介紹,而佢o地就係坐的士時個司機介紹o既,似乎呢間牛肉麵都真係幾地道,我honey都大讚好味!!!

食完已經十二點幾一點,噢,本來諗住要早早上陽明山o架,而家咁晏都唔知點算...搵路番捷運站,其間問路,個台灣人好熱心咁答,之後仲車埋我o地番捷運站,估唔到有順風車坐,雖然車程好短,但已經足以令我呢個香港遊客感到台灣人o既友善,好開心呢!!

上到陽明山已經兩點,由於係星期日,所以除o左遊客仲有勁多台灣本地人,塞車去第一站竹子湖,以為一落車就到,點知要行大半個鐘,行都唔係問題,問題係山上無行山徑,遊人要同d車一齊行,吸晒d癈氣,又怕被d電單車撞到,行得好唔舒服!!!途中見到有幾棵白花,都算開得靚,所以即刻影相,開頭以為係櫻花,但後尾聽途人話原來係梅花呢!!行到身水身汗,終於到竹子湖,o個度好多遊人o係度採海竽(即馬蹄蘭),好熱鬧,我o地都有係花田度影相,雖然唔係一片花海,但腳踏泥濘,好似自己做o左花農,又有另一番味道!!回程喇,點知行錯路,行番轉頭時忽然有個老闆拋o左個'牛奶芭樂'(我媽後尾睇相話係石榴喎!)俾我honey,話係請途人食,早知頭先就唔使自己俾錢買啦!!去到等車處,人龍過百呀,唯有自己行落山,o個時已經四點幾,天開始暗,o係車路行足成個半鐘,由於塞車,所以d癈氣好多,都唔明一個公園竟然空氣咁差,真係命都短幾年,加上d電單車不斷擦身而過,都幾危險!!

行到落山已經成面油,但又怕天黑前都搵唔到櫻花,真係好心急!!!結果行o左一大輪冤枉路,終於見到櫻花喇,但新葉都出晒,得番d殘花,好失望...再行呀行,諗住去花鐘影相,好彩其間經過一棵較大較多花,都影o左張靚相,但天色開始黑,張相靚極有限...!!最後去到花鐘,附近有個濆水池,原來天黑會著燈o架,多得同事借o既腳架,我o地影o左張好靚o既相呀,估唔到上山影得最靚o既相唔係花,而係濆水池呢!!!

回程坐'過山車'落山,車速快過香港亡命小巴,最驚係條山路又窄,隔離線係對頭車,真係撞死都唔知咩事,好彩有乘客出聲叫司機開慢d咋!!!番到台北東區食度小月,我媽之前聽收音機話台北最好味魯肉飯就係呢間,所以即叫,但呢樣竟然唔係最好味,反而另外叫o既擔仔麵、龍蝦卵河粉卷、野菜、烤虱目魚肚同茶鵝仲正,好味!!之後去o左食東區粉圓,d芋圓好煙韌,紅豆同地瓜甜甜,加上d冰,好好味!!!

食完後行東區夜街,但呢區人流都幾雜,行o左一陣小街已經好驚,而地下街又關晒門,所以好快就番飯店,結束第二日之旅!!!

Pictures of today: