我做全職媽媽的信念: Less (收入) is More (經濟效益)!!!

在朋友堆中, 我係極少數選擇做全職主婦、仲要大部份時間無長輩工人(有請鐘點一星期3小時清潔)幫手o既媽咪, 每當有朋友讚賞我, 我都會好有滿足感, 不過單靠呢點點滿足感, 實在唔能夠令我支手牚起每日繁重o既家務同湊B工作...

咁...實際上令我決心做個萬能媽媽又係d咩呢?

1. 可以睇住自己小朋友從追跑跌碰中成長? Yes!
2. 可以貼身(心)照顧小朋友起居飲食, 確保小朋友健健康康? Yes!
3. 可以以身作則, 親自負責管教小朋友做個'好'人? Yes!

小朋友大得太快, 佢o地成長o既一點一滴, 我都唔想錯過!

相信以上3點, 每一個媽媽都希望做到, 但點解又唔係個個願意做全職主婦呢?

a. 因為要犠牲'自我', 無晒私人時間?
b. 因為自覺無耐性, 唔識'教'小朋友?
c. 因為少o左份收入, 生活質素受影響?

如果a&b大家輕易答'yes', 咁當初決定生小朋友原因又係咩? 生小朋友唔同食生菜, 如果生o左唔願擔起教同照顧o既責任, 咁會唔會太自私? ...Anyway, 咁自私o既父母相信只係少數, 我深信大部份父母放工後都願意奉顯自己所有時間俾小朋友!!!

再攰再眼訓, 只要你願意付出少少時間, 佢o地總有方法令你笑!!

咁, o係香港呢個金錢掛帥o既地方, 大部份媽咪決定唔做全職媽咪, 相信大部份都係c呢個原因吧??

唔怕話俾大家知, 我未做全職媽咪前o既人工係23K左右, 佔當時全家收入35%!! 雖然23K唔算多, 但都唔算少呀, 成個家庭多o左呢23K已經可以足夠請個工人, 每年去多次旅行、俾小朋友同自己食好d, 著好d, 甚至報多d興趣班...

 呢個世界真係無人嫌錢多, 我亦唔例外, 當初知道佗Koey時, 我都唔係偉大到諗都唔諗就放棄份工做全職媽咪!! 但而家回想, 我真係好慶幸無人幫手湊Koey, o係唔想多個外人(工人)o係屋企之下, 再加上老公子o既支持, 我根本唔使o係做在職媽媽定全職媽媽之間作太耐爭扎, 好快就計好條數, 做到決定!

計咩數?

計家庭入息同支出, 計老公子一份人工揹唔揹得起頭家? 無錯, 但又未係全對!!

我要計o既, 係經濟效益!! 其實講到尾, 都係來自Less is More o既育兒理念: Less (收入) is More (經濟效益)!!!

唔知大家有無睇過計算全職媽媽年薪o既相關新聞報道:

全職媽媽人工值幾多錢？根據 Salary.com調查發現，由於家庭主婦身兼多職，要做管家、託兒所老師、廚師、洗衫工人、電腦操作員、設備管理員、司機、心理學家、行政總裁等工作，如果每項職務都有人工，年薪應該有13.8萬美元（約107.6萬港元，即月薪8.7萬港元）...(Source: 國際網絡：全職媽媽年薪值百萬)

全職媽媽o既分身再多, 小朋友最愛o既始終係'陪玩員'呢個身分!!!

就當上面報道過份誇張, 我間化到以全職媽媽 = 工人 + 託兒所老師去計算, 全職媽媽o既人工最少都值20K吧?! 雖然我老公子唔會俾咁多家用我, 但我實際上真係為家庭帶o黎值20K o既經濟效益, 如果再計埋全職媽媽o既其他分身, 好似廚師、管家、甚至倒垃圾工人等等, 再計埋通脹(最近又有報道建議外傭加人工了: 外傭促加薪至$4,500) ...條數點計, 相信大家心裡有數!
當然, 以上計算應用o係我身上答案真係呼之欲出, 但如果老公子人工未能揹起成頭家基本食住開支, 又或者我係醫生律師收入達4、5萬以上又如何選擇呢?

咁, 就要問問自己下面呢幾樣o野, o係你心目中值多少了:

i. 親眼睇住小朋友成長o既每分每秒
ii. 親自陪伴小朋友吃喝玩樂o既開心回憶
iii. 小朋友對自己o既信任、愛甚至依賴

小朋友對我o既依賴, 證明o左我o既存在!!

對於我o黎講, 上面全部都係無價, 幾多錢都買唔到, 錯過了亦追唔番!!

咁樣一計, 做全職媽媽定在職媽媽, 相信各人心中自有天枰, 如何衡量我真的不再多言了!!

總之, 我就係靠堅信Less (收入) is More (經濟效益), 做了我認為對自己、對另一半、對小朋友最有利的決定, 亦憑此肯定自己全職媽媽呢個身份o既存在價值!!!

話說回頭, 雖然老公子呢3年人工有增幅, 但收入始終唔及兩個人搵錢, 所以為o左令老公子減輕負擔, 我都要乖乖識做, 令佢覺得我係個知慳識儉o既老婆, 咁大家都開心!!!

下面就係我呢位湊仔婆o既少少慳錢小tips:

i. 網購代替出街Shopping 
ii. 帶小朋友去公園代替主題樂園/收費室內遊樂場

有時遊樂場都唔一定要去, o係公園行個圈, 睇下風景睇下雀仔, 都已經係好好o既娛樂!

iii. 帶小朋友去圖書館借書/去書局睇書代替買書
iv. DIY玩意(如用廁紙筒整動物、親子料理等)代替買玩具

最近我俾Kobe仔初嘗整o野食, 雖然幫唔到太多手, 但間中佢都會跟指示做, 還一臉認真呢!!!

v. 煮住家飯代替出街食飯
vi. 著二手童裝衫或鞋代替買新童裝
vii. 免費日去博物館玩

總之, 要練成呢雙臂彎的確唔係易事, Less (收入) is More(經濟效益), 只要我信, 我就做得到! 

希望呢篇分享, 能幫到o係在職/全職媽媽之間爭扎o既你啦!!! 加油!!!

新加坡親子遊@2014 ~ Day4: 聖淘沙沙灘&Gardens by the Bay!

20140704 (Thur)

一朝訓醒, 三位小朋友都好醒神喎!!!!

隔o左兩日無見信信, 影番張相先!!! 

我同May忙於整早餐同煲粥, 仲有執今日去沙灘o既o野, 到11點鐘, 正式出發!!!!

May帶我o地坐地鐵, 有時都諗, 如果唔係識朋友住o係當地, 真係無乜機會坐巴士地鐵呢d公共交通, 特別係我o地仲要一家大小, 出入一定係的士最方便, 所以真係要多謝May帶我o地周圍去呢!!

出發前合照!!!

一家五口構想圖??!!! HAHA!!!

月台!!

坐o左大半個鐘車, 轉車, 再坐多一陣就到Vivo City喇!!!! 我o地先去food court搵位食Lunch!!! 老公子行出去睇o野食時, 我又一貫咁拎部相機出o黎影下呢度影下o個度, 點知影影下個按扭按唔到, 一望, 原來無電!!!!!!!!!!!!!!!!!!!!!!!!

未發現相機無電前影!!!

呢個food court其實幾靚o架!!!

Koey係度飲緊豆漿, 佢話好好味!!!

OMG!!! 

新相機差滿電、帶了防水套防沙、結果臨出門去沙灘我竟然諗住有部大機決定唔帶新機, 又諗住輕便d, 唔帶大機個相機套！結果大機今日唔夠電，相機套入面舊電又無帶, 要慳住影，影少好多相呀！！去旅行點解要懶帶機呢，仲要係預備好晒都會忽然發神經話唔帶，我真係忍唔住怨o左自己成日，我真係好stupid呀！！！！！！！！！！！！

(以上就係當晚我怪自己咁stupid而post o既facebook status...)

為o左影相, 我差d想叫我老公子一個人坐地鐵回程拎機...當然, 最後我都無咁做, 但自呢刻起我就唔係太敢再用大機影相喇, 全部改用手機...

食物到喇, 本來心情都仲未平伏, 但食食下d o野食又真係幾好味, 心情就慢慢好番d喇!!!

上左至右: 蝦麵, 魚麵, 印尼椰漿飯!

下左至右: 蘿蔔絲卷 (好好味!!但唔係好記得咩名堂!!!), 海南雞飯!!

Kobe仔未到Vivo City已經訓o左, 仲要訓o左好耐好耐, 信信由未訓到訓, 再到訓醒食埋粥仔Kobe仔都未醒!!!

食完o野, 去買ticket坐輕軌列車去聖淘沙!!!

入閘時職員問Koey幾大, 結果我o地要補買番Koey張車票, 大小同價!!!

輕軌有三個站, 第二個站係去睇魚尾獅, 其實我都想去o架, 話晒Kobe仔今次o黎無機會影魚尾獅! 不過當時已經好晏, 老公子傍晚又約o左舊同事食飯, 唔想行程太趕, 所以最後都同魚尾獅無緣見面喇!!!

落輕軌後再轉呢d車入沙灘!!

原來沙灘好長好大, 當日人亦唔多 (見到o既都係一大班類似香港讀U玩OCamp 咁o既年青人), 加上今日天陰陰無乜太陽, 我o地唔使特別搵樹底坐, 好快就搵到地方Settle Down喇!! (May特登帶o左個防水相機, 以下d相全部都係May部相機影o既!!!)

到沙灘喇!!! 訓醒無耐o既Kobe仔終於有粥仔食!!! 當時已經2點有多喇!!!! 

玩o左一陣信信已經忍唔住玩食沙!!!!! 成口都係呢, HAHAHAHA!!!

之後引小朋友齊齊望鏡頭!!! 影o左都有20張吧, 但...

上: 信信望...

中: Kobe望...

下: Koey望...

偏偏影極都影唔到齊齊望!!!! 以上呢張已經係一齊見到最多樣o既一張喇...

信信食完沙, 到Kobe仔玩倒沙落塊面度!!!

呢個樣真係搞笑到暈!!!!

跌膊o既Sexy信信!!! 

(睇番d相, 真係好掛住信信呀, 同埋原來信信對鏡頭好sensitive, 好多相都有望鏡頭o架!!!)

食沙二人組: Kobe & 信信!!

玩o左陣沙, 落水喇!!! 但Koey & Kobe都唔係好鍾意呢個水泡!!

游o左陣水, 忽然救生員開咪叫人唔好落水!! 點解呢?? 我o地同附近o既年青人都o係好淺水咋喎...後來救生員再開咪, 我o地再望多兩望, 先望到呢個灘原來係'No Swim Area'!!!!!!!!!!!!!!!!唔怪得無乜人落水啦, 後來見到有人玩水上活動, 先知有快艇係度, 所以呢度唔俾人落水, 怕危險呢!!!

Koey唔想合照, 但又好合作咁俾o左個笑容, 影完即閃!!!

Koey鍾意呢個水泡多d!!!

唔玩得水, 又番去玩沙!!! Koey開始hyper喇!!!

好投入睇爸爸玩o既兩姊弟!!

一湊三~~~

成面沙o既信信!!

成面沙o既Kobe!!!

我o地又試下o係淺水位置玩水!!

堆d沙係爸爸度, 笑得好奸!!!

大合照!!!

影完大合照4點半喇, 係時候執o野回程喇!! 老公子帶Kobe, May帶信信去沖身先!!

Koey可以玩多陣, 佢係度玩埋左Cookie Monster!!!

太陽有d西斜, 海邊開始閃閃下好靚!!!

右下: 香蕉船

右上: 滑輪, 好似好好玩呢!!

到Koey沖身, 最後到爸爸, Kobe仔等到唔耐煩又開始爆喊!!!

執好晒o野去等車出番聖淘沙輕軌站,  其實我o地都算早走, 但始終接近回程高峰時間, d車真係迫滿人, 我o地仲要好多行裝同兩架BB車連扭抱o既Kobe, 迫車呢下真係唔容易!!!

終於到站, 我o地先去便利店買飲品, 無記錯好似買o左香蕉奶俾小朋友, 小朋友有o野飲就最開心!!!

但睇番相, 咩事兩個都喊晒呢?? 唔通係爭o野飲??? 事隔成個月先blog, 我已經完全忙記o左咩事喇...

解完渴, 我o地就坐番輕軌去番Vivo City~

西斜喇~

雖然舟車勞動o左成日, 小朋友們都好攰好攰 (特別係死都唔願訓o既Koey!!!!), 但今日o既行程仲有排都未完呢, 因為我o地仲要去Gardens by the Bay同埋老公子約o左舊同事食飯呢!!!

又坐地鐵喇!!! 

我o地要由Harbourfront 去Marina Bay, 如果黃色線真係如其名咁係'Circle Line' o既話就會好快到, 可惜原來Circle Line未係Circle, 所以我o地就要坐紫色線再轉黃色線喇!!

終於到站!!! 我o地要行一條好長o既Subway先去到Gardens by the Bay!

條Subway有鏡, 玩下自拍先!!

到喇!!!

其實段路本來唔算太長, 但我o地玩o左成日喇, 大人小朋友都好攰, Koey亦越o黎越唔合作喇!!

拎番部大機影下相先!!!! 呢張Koey有笑, 算係好俾面了!!!

因為大部份相, Koey都係呢個樣!!!!!

係呢個位影完, 仲要行一條天橋先到公園內圍~

Koey攰到一見細佬無坐車就霸車坐喇!!!

呢度係電梯口位置, 比較多人出入等電梯, 但影相唔錯!!! (少少out focus添!!!!)

之後我o地就行入園內搵位坐o係度等天黑喇!!!

襯未天黑, May又餵緊信信, 我同老公子都想周圍行下睇下, 但Koey個pat就咁貼實車仔, 推佢睇野又唔制, 叫佢落車又唔制, 留佢係度陪May EE又唔制, 總之乜都唔制, 好忟憎!!

其實又難怪Koey會扭計, 因為呢度只係普通公園一個, 無咩o野玩同睇, 佢咁攰捱o左成日, 而家仲要等個天黑d d'樹'著燈先影相, 真係好慘慘呢!!!

最後Koey都有'被迫'跟我o地周圍行下睇下~~

影相仲肯笑, 算好俾面了!!!

之後我係袋度搵到o係Legoland酒店袋走o左o既餅餅, 原來係朱古力餅o黎, 叫做有d o野tum下小朋友!!!

等呀等, 等呀等, 等到7點半d樹先終於有燈呢!!!!

大機係時候出馬, 但無腳架...有大機都無用...嗚...

好震呀!!!!

May幫我o地影, 好彩佢手好定, 影得唔錯呀!!!! 等得咁辛苦, 仲要成日慳住用部大機就係留番影呢度, 如果影得唔好, 真係好唔抵o架嘛!!! 

都係May影o既, 多謝你影得咁靚呀!!!

調轉一向手震o既我影得你o地個人震晒, 唔好意思呀!!!

路人甲好好人不停幫我o地影, 但耐何大機真係震得太勁, 最後用防水相機影大合照!!! 

影完相終於走, 但今日o既節目仲未完呀!!! 因為老公子仲約o左舊同事食飯!!!!

由於當時已經8點有多, 最近最方便o既選擇得番金沙foodcourt!!! 

兩位抱仔o既爸爸!!!

由於金沙好大, 雖然全程有冷氣, 但對於又餓又眼訓o既Koey o黎講都係好漫長好辛苦, 結果佢不停扭抱呢!!!!

幾經辛苦, 終於到Food Court, 我同Koey先去Toilet, 去番food court時...

細佬呢?

原來佢已經融入o左係堆行李中, haha, 真係可以當佢透明呢!!

老公子&同事~

大家都好餓, 叫o左好多o野食, 好好味!!!

Kaya Toast + 奶茶 (但唔係亞坤o既!), 煎蚝餅, 豪華車仔麵 (唔知咩名堂...HAHA!), 仲有蝦麵!!

老公子同事仲預備o左一大袋山竹俾我o地食, 好清甜好好味!!!

我o地食足成個鐘, 信信就陪我o地坐足咁耐, 無玩具無人抱都唔扭計, 真係好乖好扺鍚!! 俾著Kobe仔已經發忟憎lu!!!

Koey見到有佢鍾意o既番茄同蝦, 終於有番d笑容!!!

食完回程, 仲要去賭場等一陣先有的士, 我o地又多行裝又多人, 要分開兩架的!!! 由於番到去仲要沖涼刷牙先訓得, 唔想Koey坐的士訓o左唔肯沖涼, 所以我同May都好努力係的士不斷同佢傾計, HAHA!!

終於番到, 拿拿聲幫兩個小朋友沖涼就搞佢o地訓覺!! 

睇番呢張相, 原來已經23:07分, Koey係由一早7點幾起身到呢個時間, 真係辛苦佢今日捱咁耐呢!!!

兩位寶貝訓o左, 兩個爸爸仲未忙完!!!!

因為是晚世界杯8強法國對德國, 佢o地上網睇下收唔收到!!!

我當然無佢o地咁好氣啦, 今日咁攰, 我都要訓!!

清晨5點, 行雷閃電, 老公子之後就行出廳, 我開頭以為佢去Toilet, 點知出去一睇~~~

原來兩個爸爸又睇波喇!!!!

我唔係男人, 都真係唔明睇波點解有咁大吸引力, 令到佢o地再攰都要捱眼訓睇呢, HAAH!! 

是日回顧, 當然係無帶相機啦, 搞到無得好似之前咁乜都亂snap一餐, 全日只係拍得一段片, 好啦, 到用得大機影, 點知又手震, 搞到辛辛苦苦等天黑先影o既Gardens by the Bay d相都唔係太靚...唉...總之今日就係好失敗啦!!!

不過, 學fb上朋友們o既安慰話齋, 用心'記錄'低旅程就夠啦, 唔使咁介懷...

...我諗, 有時行程中就係要有少少唔順意先難忘o既, 係咪????!!!!