突如奇來

今日本來平平無奇,都係陪o下我媽咪食午飯,買食送,係屋企發夢...!!!!點知下午突如奇來收到我之前interview失敗o個間機構打o黎,話有第二個Position available,問我有無興趣去in,o係毫無心理準備下我只好不斷答'係,係...',由於個post佢地未公開recruit,所以我都唔係好知份工做乜...一切只有留待下星期四上去interview時先揭曉!!而家個心仲係有少少'驚喜'感覺,因為我已經兩個月無寄過信搵工喇,仲諗住一切待我完成學業先打算,雖然人o地唔係話請我,但呢個突如奇來o既電話真係好似打亂o左我陣腳咁,如果真係請o左,最好可以我學期完後先番工就好....噢...我似乎諗得太遠喇...不過都要作定準備,因為我份Final Project仲係原封不動,要打把勁!!!!!!

=====================================================

尋晚無意中上網睇o左陣'聖鬥士星矢',忽然令我諗起我以前好鍾意紫龍同埋入面一個'壞人'女角,上網搵先知個女仔叫'Hilda希露達',原來係北歐神鬥篇入面本來善良o既女仔,但戴上金戒子後變成邪惡!!!!雖然我對星矢o既故仔的確記憶模糊,但我仲記得呢個女仔冷冰冰好吸引...

星矢、冰河、紫龍、瞬、一輝、天馬流星拳、星雲鎖鍊、阿典娜、冥鬥士...忽然好懷念小時候看'星矢'的日子呢!!!!

      

美人兒

唔知大家覺得何謂'美人兒'呢?唔同國家唔同地區都會有唔同o既審美標準,甚至每個人o既審美眼光都會唔同,不過,我想信'靈魂之窗'o係唔同o既審美標準中都佔了重要的位置!!

想做'美人兒',除o左減肥化妝整容外,原來南韓流行帶一種黑色隱形眼鏡,帶上後能令眼珠看上去變成大大的、水汪汪的烏黑色珠寶,令眼神變得如黑洞般具吸引力!!唔使辛苦節食或冒險整形就可以變得可愛如日本娃娃,聽落幾吸引!!!

原來Ayumi一早帶o左,唔怪得佢對眼成日大到怪怪o地咁啦!!!!

其實我之前行街已經見過旺角d舖頭有賣呢種隱形眼鏡,今日我上網再搵,原來韓國興o左一段時間,好多明星都有帶所以先咁有'魔力'!!!睇完後我都好想買番對,唔知香港有無眼鏡舖幫人配呢,等我都可以做o下'美人兒'呢!!!

充實

今日過得好充實,雖然其實都係做o左好少o野,但比我前兩個星期成日呆在家發霉分別已經很大!!!

首先今朝好勤力咁做家務:抹地、抹家具、洗衫,之後就陪我媽咪去食午飯、行街、買食送,再之後我就要番早大開會傾Project!!!個Project係講我o地要重新包裝一個歌手,一傾就傾到五點幾,原果個個project都可以好似呢個project咁有趣就好喇!!!!之後我一直留o係中大直到夜晚九點幾上完堂!!!嘩...雖然我尋晚其實唔多夠訓,所以我成日都係'撐'大隻眼,不過難得咁充實,忽然又覺得有少少開心,真係奇怪!!!

啖啖肉

一朝醒來看見很久不露面的太陽伯伯呀,心情即時變好,人也特別精神!!!

今晚同我Honey去o左打邊爐,叫o左魚頭,我Honey好鍾意食魚頭,但我就覺得無咩o野好食,唔係唔好味,只係無得啖啖肉始終唔太好咁!!!我屋企好笑食多骨o既食物,唔知係咪咁,所以我一向唔識得'欣賞'多骨o既食物,同Honey完全相反呢!!!!我咁鍾意啖啖肉,唔怪得我都咁'啖啖肉'啦...夏天又到,再係咁點著短袖衫呢????

懷舊

今日節目好豐富呢,首先下午我'迫'o左我Honey陪我去唱K,夜晚就約o左CogSc d朋友出o黎食飯!!

由於我太耐無唱K喇,所以今日'迫'o左我Honey陪我兩個人去唱,雖然我知我Honey唔多想去,但佢又真係好幾年都無同我去唱K喇,所以唯有'迫'佢陪我一次,最多呢年內都唔會要佢再陪我去!!!今日一次過唱o左好多歌,原來而家d歌都幾新,好似張韶函'潘多拉'集碟都有,所以今日真係過足K癮,好開心!!!!

大約六點幾,我Join埋Agnes同May去o左諾士佛台一間韓國餐廳食o野,因為要等Ginie所以傾o左大半個鐘計先叫o野食!!!May終於轉工喇,而Agnes就o岩o岩跟完TDC個Program,分享o左佢近距離見到梁潮偉,張曼玉等明星同去Party o既經驗!!!食完飯後我o地行o左陣街就去o左食甜品,期間講番起以前上堂時o既lecturer同tutor,Ginie好好記性,記得好多tutor同lecturer名,而我就肯定係記得最少o既,哈,諗番起以前讀書真係幾懷念,時間過得真係快,話咁快差唔多畢業兩年,我亦就快讀完個PostGrad Course喇...!!!希望下次再見面時我已經甩難,並已經搵到一份好工啦!!!

做忍者

今曰好開心,至少係我呢星期內比較開心o既一日,因為我無再困自己係屋企,同Cindy出o左尖沙咀行街shopping!!!其實今日係特地出去拎'賴Ke'件背心,其實一路我都無呢d運動形背心o架,由於都幾貼身,所以都怕'突'o左d豬腩肉出o黎,睇o黎都要努力做忍者...'忍忍忍忍忍...'~唔好食咁多美食!!!個'賴Ke'package仲有跳舞班試堂coupon同健身中心十四天通行證同一d食品coupon,都幾豐富,好抵呢!!!!睇埋個節目表原來有咁多o野玩,真係好期待,希望下星期真係好玩啦!!!

除o左要忍'口',睇o黎我仲要'忍'分心'...距離交功課日子越o黎越近喇,要加把勁!!!

發霉的人生

今日其實係尋日o既延續(咦!呢句聽落好似有d哲理隱藏住咁...)...無論係天氣定係我懶散o既心情!!o係濕度高於90%o既日子中,個人都特別懶散,個腦就好似d霧咁,一片白濛濛,成日都牢牢豆豆咁,就好似發o左霉咁!!!!!尋日上磅仲忽然重o左,都唔知係咪我個人d水份揮發唔走,所以重o左...

呢幾日成日追港聞版留意殺警案o既調查進展,因此成日見到'疑兇'(皆因仲未審...)d相,本來唔想記得呢d恐怖人物o既樣貌o架...但佢暴光率實在奇高喇,我真係怕自己發惡夢見到佢個樣,感覺佢真係好似變o左魔鬼一樣!!!!

發夢

又唔知今日自己做o左d咩喇...個心知道要做功課,甚至有少少趕,但個身同個精神都唔多聽話...好想大叫'救命'!!!!!!

 

更新網頁

今日忙於更新自己的網頁,所以簡直係癈寢忘餐呢!

其實對上一次更改版面後,腦入面已經構思好其他內容,可是兼顧學業外還有我無數的興趣及日常生活,所以一直都實行唔到!!!今次更新主要是針對'f favourite'一欄, 現在先增加f billboard以介紹我的近期最愛及最新搜羅o既影片(今次係楊丞林新碟~慶祝MV), f friends介紹我對好友o既睇法以及f idols介紹我對偶像的看法(想了解我'老'來才迷偶像是甚麼心態也可一看!)及有關影音片段,希望令網頁更有聲有色,有興趣睇o下啦,因為d影片我花o左幾日時間去搵o架!! (P.S. 搵비影音時自己都認唔住睇o左好多,正!)

至於其他內容,我想可能要我完成學業先再更新了,希望我能忍手唔整住啦,如果唔係就會掛住做呢d'無謂'o野做唔到功課喇!!!!

壓力

被長達一個學期的project折磨,到目前為止還是沒心機做好佢...結果有種無形o既壓力不斷纏繞住我!!!今日難得一家人出去沙田食泰國野,結果回程逃中我爸俾o左份南華早報俾我...這已經不是第一次了,記得年多前我畢業後沒有積極搵工時我爸也同樣不斷地拿南華早報給我,呢種壓力的確令人不勝負荷,我亦曾為此在他面前大哭一場!!!

唉,大人總是覺得自己的兒女永遠是小朋友,不懂打算吧...但其實佢唔提我,我自己也會為失業而煩惱,俾自己壓力呀,如果他人再俾壓力,只會令人發瘋呀!!!!!...特別係而家我其實快畢業了,佢話我而家搵定就o岩...但我卻覺得而家應該專心做好功課,因為我自知不能一心多用..或許這只是逃避的藉口(我甚至也常常覺得選擇繼續學業其實是很錯很阻礙自己前途的決定!),但這至少是我覺得舒服點的決定,我真不希望受太多干預!!!!真希望這可怕的兩個月能快點過去,到時我亦期望自己能真正展開我人生另一頁,不用再處於這種學業事業兩頭不到岸的尷尬位置!!!!!!

**********************************************

抒緩壓力有好多方法,下午我細佬問同學借o左'死亡筆記'第九冊我睇,其實三個月前我一氣睇o左八冊了,現在再睇第九冊,腦袋只有一個'亂'字同無數個'?'號!!因為呢本漫話劇情進展實在太快,變化實在太多,推理實在太複雜了!!!其實,我一向習慣用輕鬆o既方法去娛樂,去抒緩壓力,所以好少選擇含驚悚及縣疑成份o既戲或小說o黎睇,偵探小說呢d咁用腦o既亦不在話下,因為我一向覺得娛樂係應該讓腦袋暫停運作,休息充電o既活動!!!!而家睇到成腦'?'都幾痛苦,因為我推理能力有限,我好多時不能'完全'明白漫畫中的推論,睇得咁辛苦,真有點想放棄!!!

不過...或許因為減壓只是需要令人脫離現實,而無關減壓方法本身是否需要人'傷腦筋',所以我睇o既時候都有'唔想咁快睇完'同'快d睇到下一集'o既想法,可能呢d亦係呢本漫畫咁出名同成功之處!!

聽聞日本開拍了這漫畫的電影,不知道能否做到漫畫般複雜o既劇情呢?有興趣的話大家都可以挑戰呢本漫畫,希望大家唔好同我一樣,都變'大頭佛'就好喇!!

死亡筆記官網:

http://jump.shueisha.co.jp/deathnote/ 

Online睇死亡筆記: http://dm.666ccc.com/html/class37/comic218.html

同小白鷺BBQ

今日同我honey去o左小白鷺餐聽燒野食,好開心呀,因為我一路都好想試o下兩個人燒野食o架,前幾日上網搵o左少少自助燒烤場o既資料,發現自己BBQ同幫襯呢d燒烤場價錢差唔多,所以懶少少,決定今次幫襯呢d燒烤場,雖然咩都唔係自己預備,但都好開心!

由於係自助午餐,所以唔太多人,坐得好舒服,只係今日太猛太陽o左少少,有d熱!o個度d o野食都幾豐富,除o左基本o既扒丸腸外,仲有青口,蝦同雞串等自己燒野食好少買o既食物!至於最方便o既係佢有鍚紙,將青口同蝦再加埋蒜蓉包住o黎焗,唔使幾耐就有充滿蒜香o既美食,唔錯唔錯,不過最好味都係用牛油焗粟米,雖然食到好飽,但都忍唔住再焗,哈!!我o地由一點坐到四點半,其間除o左可以悠閒地睇雜誌外,仲可以睇住d小朋友玩捉迷藏,o係嘻嘻哈哈o既笑聲中忽然覺得自己好似去o左渡假呢!!

壞新聞

今日睇報紙,睇到"三警互轟　兩死一危" o既消息,真係好得人驚,再加上九鐡管理層好似金枝欲孽o既戲劇性o既權力鬥爭事件、民主黨恐被內地人收買黨員、同唐狗Pan Pan被切四肢棄垃圾站 等新聞...忽然間覺得正在復甦o既香港社會其實並非一片光明,好似仲有好多黑暗o既一面...呢d唔知係咪溫總指o既"深層次矛盾"呢??

睇完呢d唔好o既新聞,個心真係沉o左一沉,希望世界少d壞新聞,新聞版變為好似幅刊、國際花絮或娛樂版般充滿輕鬆無負擔o既軟性新聞就好喇!!!

三順的哲理

今日花了一點心思為星期六的節目搜集資料,嘻,希望Honey都出番分力就好喇!!!

夜晚睇三順,咁o岩做到'吻的熱量'呢一集,之前我o既日記都提過呢一集,可惜亞視cut得好衰,本來三石同三順成場Kiss戲係好浪漫咁舖排出o黎o架,點知佢o係kiss前完o左呢集,聽日再做場kiss戲,令本來連貫o既浪漫氣氛無晒,聽日先kiss咩mood都無晒啦,真係衰!!!

三順雖然肥肥o地,年紀又唔小,好多人眼中都覺得佢唔配有拖拍,不過佢真係好有內函,佢每句對白都好有哲理,比喻仲好特別,就係佢呢種可愛o既人生觀吸引了劇中兩位男角,亦深深吸引了我...希望我也能於生活中,找到屬於自己o既生活哲理!!!

係一個台灣網站( http://samsoon2.086.com.tw/os.htm )搵到三順o係劇入面o既對白,當然啦,要睇埋劇集先會感受到那份真摰!!!

"一杯咖啡的熱量是5千卡，等同於kiss5分鐘的熱量。這三年我們分享的kiss的熱量是多少呢？愛的熱量呢，包含在其中的能量都到哪兒去了呢？去了哪里......" (三順要親手造訂婚蛋榚俾前男友,在前男友訂婚禮上懷念起與前男友熱吻的情景時的感想)

吻5分鐘的熱量=一杯咖啡o既熱量,唔知係咪真o既呢?

==============================================

我妹今日上堂學make up(之前好似學做facial),番o黎上晒粧,個粧睇落好pro,令我諗起之前interview個粧,似乎我第二時可以叫我妹教我或幫我做facial同化粧,哈!!!^.^

携帯電話

今日我同媽媽約o左爸爸o係沙田食lunch,食雲南o野,o個間o野d午餐份量一向都幾多,所以只係叫o左兩個餐再加個小食已經夠晒!!!!由於仲早,爸爸知我鍾意睇機同想買機,所以陪我問o左幾間,結果終於俾我見到A1200真身喇!!!!部機都幾纖細,幾o岩女仔用!!!雖然見到真機,但拎唔到上手,因為有個男人試緊機,感覺一個大男人用部咁女性化o既機好似有d怪,好唔得體咁!!!而家得黑色,唔知幾時先出白色同紅色...等待o既心情真係唔多好受!!!!!

另外,自從尋日睇到部日本DoCoMo FOMA電話個2.8"Mon+400萬像像+插卡後就成個腦都諗住部機!!!今日我又不斷上網睇d人講解鎖o既o野,但似乎真係無可能係香港用到...有少少失望!!!講開手機(日文叫:携帯電話),自從我大約年幾前睇中Pan記X800(Symbian S60),之後不斷'蒲'RingHK個forum後,對手機認識深o左,有時朋友仔一講到手機都會問o下我意見(當然,我能力只幫到女仔啦,男仔本身對呢d研究一定仲多,而且男女要求好唔同!!!)雖然對於網絡同wifi等功能仲係無乜認識,但自己對手機o既要求亦高o左,睇見日本d 携帯電話部部都咁正,真係好羡慕呢!!!!

 <=已經灰飛煙滅,我心愛o既X800

等我講o下我o既理想手機啦:

1.樣靚,最好有得換殼(見過我用X800 o既人應該都知我部X800每星期都唔同樣,嘻!所以我唔會買N字頭手機,部部都好肉酸,都係喜歡日本系手機!!!)

2.Mon大,唔可以細過2.2"!!!(因為我最主要o既手機娛樂係睇片!!!!!Mon太細會眼盲...!!)

3.機身要輕巧纖細!!!! (呢點同Point2好難取得平衡!!所以903SH個Mon2.5",但因為又重又厚所以唔多鍾意!!...不過最主要係買唔起!!!)

4.可以Full Screen流暢唔窒咁播1個鐘以上o既片!!!(最好係support mp4/rm format,因為3gp個audio bitrate太細,d聲好多時變晒...加上X800個RAM唔夠勁,播片會窒,所以上年用o左一兩個月狂download software試用唔同輸出率轉片,所以對轉片又有點心得!)

5.可以插卡(話明要睇片嘛,一套劇集長o既片約80-90MB,無插卡,個Mon幾靚,睇唔到片都係無用!!)

6.支援立體聲藍芽耳機(好似話BT ver1.1以下係唔支援立體聲o架,聽歌無立體聲會好唔開心!!!)

7.智能手機(即好似電腦咁,有智能,可以install software令部機更勁,好似來電大頭貼,手機主題,編輯相片等!!!!Symbian OS就最好,因為有好多software可以download!其實唔係智能手機都得,但唔智能即係蠢啦,無d有難度o既o野研究o下好快會玩到悶o架!!!!)

8.MP3鈴聲(有部份手機只支援mmf,aac等格式o既歌做鈴聲,雖然要轉都唔太麻煩,但可以用MP3直接做鈴聲就更方便!!)

9.價錢合理!!(功能咁強勁,價錢當然會好貴啦...所以始終唔捨得買O2 Atom...)

10.相機功能(而家有d商務手機係無得影相,因為怕洩露商業機密,但自從我部X800無o左後,行街見到d特別o野都無得即時Snapshot底,好似我第一次去將軍奧Interview咁,有專心幫我化粧Set頭都影唔底,的確幾唔方便!!!但至於像數,因為手機影相同DC仲有段距離,質素未靚到可以晒出o黎,所以像數130萬像對我o黎講都好夠用喇!!!)

講o左10大條件(希望幫到想換機o既朋友作參考!),其實我部X800除o左4,8,10 表現未達理想外,其餘都好好,所以我本來都有諗過買番佢,之但係街外無晒行貸喇,無保養之餘身邊朋友們都覺買新機玩仲好,所以我決定買新機...但我始終都好懷念我那部'跌o左落咸水海'o既手機...嗚...

過骨

今晚約o左我final project個supervisor online meeting,於是今日成日就坐係電腦面前...發呆...下午o既時候,仲忍唔住用o左好多時間去o左睇手機網頁...就係咁到o左開會o既時間喇,雖然只係短短二十分鐘meeting,但我緊張到死呀,因為自知準備不足呀,但最後又俾我過到骨,仲換o黎'幾好呀,progress唔錯'o既讚美添...噢,真係受之有愧喇...

*************************************************

引開我集中力o既衰鬼手機就係呢部喇...超大Mon(2.8")同超簿,真係dream機,但無藍芽,搵o左好耐資料,因為係日本DoCoMo o既電話,所以無可能解鎖,買番香港都用唔到,但佢個大Mon真係超級引死人,買番o黎當PMP玩都抵,真係超正呀~可惜我只可以得個'恨'字...

購物慾

尋日出去行街o既時候其實個心好想好想買o野,雖然而家無收入,但想買o既o野又好多...今日,我就用o左二百大元買o左一頂Cap帽,頂帽上星期已經睇中,係韓國製o既,雖然幾貴,但我尋日見旺角銅鑼灣都無類似款式,所以今日決定擁有佢,由行入間舖頭到俾錢,相信只係一分鐘...!!!!!!有時都唔知有咩方法可以抑制住自己呢種購物慾!!!!

由我個寶貝做model示範我頂淺粉紅色繡金線Cap帽,係咪好有型呢??

以下係我目前想買o既items:

1. 船底涼鞋 (睇雜誌話今年好興,加上我未著過高跟鞋...所以好想試!)

2. Mo記A1200 (之前都提及過想買,尋日番貨,但周圍都未見有現貨,Mo記專門店仲話已經賣晒,真搶手...而家我等佢出紅色,忍到手o既話希望等佢跌多少少價先買...不過如果有新機個mon大得過佢我唔排除我會見異思遷,哈!!!)

3. 激光矯視(呢樣唔係一樣item...不過價值不菲,其實諗o左半年喇,仲未實行,似乎都係有份工先實行會安心d...唔知幾時先唔使做大近視一族呢...)

4. 仲有...一大堆濕碎物品...好似衫呀,裙呀,化粧品同護膚品等等...

女人錢真易賺...

 

毛毛娜生日會

雨過天青後第一次出街,一次過行o左好幾個商場!!!!但唔知係咪太耐無o係星期六日行過街,旺角呢個地方真係人多到得人驚,令我無晒行街o既興緻呢!!!!!最後我同Honey由聯合行到潮流特區,無收獲之餘仲行到腳都軟!!!!!

行完旺角後我去o左銅鑼灣會Athena同Karen再行街,結果終於買到件背心,$50唔使,好抵!!!!!七點幾去食泰國o野,因為上次Athena出水痘無o黎,所以今日補番慶祝!!!!美味o既食物,幾好feel o既露天座位再加上Clok帶出o黎o既Lomo相機,今次影o既相一定幾好feel幾有趣呢!!!!!!

今晚大家傾o左好多計,傾日記,未來大計,化粧,求神問卜...知道大家覺得我d日記好長篇,知道大家o既未來幸福計劃,知道大家o既美容心得,同知道兩單幾'得人驚'o既迷信事件...!!!我決定寫日記要精簡d,等待去飲o既機會來臨,為自己o既大計努力,研究o下點修眉,同埋唔好咁迷信...哈哈!!!!

每次開完生日會我都好開心,嘻,期待下次生日會同希望今年可以有個沙灘派對!!!!Yeah!!!!