第十周 (22/7 - 28/7): 開始練抬頭

上星期先話戒o左夜奶, 我可以夜晚唔使起身, 點知今個星期佢差唔多每晚都4-6點其間起一次身叫人, 要拍先訓得番, 可憐我又無得一覺訓天光喇...不過呢, 朝早乖豬條片有時係全乾o架, 即成晚掛住訓無尿尿, 真係諗都諗唔到咁細個都可以唔瀨尿呢!!

另外, 今個星期開始乖豬好似開始唔鍾意打橫抱, 成日一打橫抱就掙扎, 要同佢搏鬥一陣先得, 但一抱o岩位, 就拍幾下好快訓著, 唔知同train o左佢自己訓有無關呢!!!

24/7: 朋友話2個月可以試下趴bb係度練抬頭, 於是呢日我襯老公子都係屋企, 戰戰兢兢咁第一次趴轉乖豬!!!

可能沖完涼心情ok, 乖豬無喊, 仲真係識少少抬頭, 叻!!!

25/7: 今日帶乖豬去pwh, 因為我大肚時join o左中大o既vit d research, 所以媽咪陪我抱乖豬番去!!首先度我o既骨質密度, 大約係25%,  醫生話我calcium低可能因為我餵人奶, 咁我都無咁擔心, 點知到度乖豬骨質密度, 佢都係大約25%, 屬偏低...噢, 聽到乖豬都唔多夠calcium, 我真係有d擔心喇, 媽咪亦話我應該係飲得唔夠多奶, 為o左乖豬, 真係要注意多d先得喇!!!

離開pwh, 同媽咪打的去火車站再坐火車, 乖豬第一次坐交通工具咋, 不過佢好合作, 訓左!! 另外, o係日照下, 我同媽咪竟然第一次見到乖豬頭頂原來有唔少頭泥, 平時係屋企唔太光真係發現唔到呢!!!!自呢日發現頭泥後, 我每次餵奶就用手輕輕刮佢頭皮...haha, 其實刮頭泥都幾好玩, 不過我媽就成日怕我會刮損佢頭皮... 

最後, 今日番到屋企餵奶, 乖豬又試邊食邊大大(似乎佢真係幾鍾意咁...)...再一次漏到成身都係...好彩今次又有我媽係度幫我...

26/7: o係facebook見到同乖豬同年同月同日出世o既何囡囡肥嘟嘟好得意, 搞到我都有少少worry乖豬手仔仲未出現一截截係咪真係食唔夠?? anyway, 暫時磅重佢仲係中碼, 應該ok o既!!!

食完奶奶訓著左, 成日覺得佢一打側訓就好似隻貓咪!!

伸完個懶腰後...咁訓好舒服咩?

初生衫仔好快唔o岩著喇, 呢排要著多d先得!!

大個女, 可以放佢'ai'住cushion對住我玩!!

乖豬眼中o既媽咪, 見到嗎??

而家掃風乖豬頸仔成日伸直, 成個人仔咁喇, 唔再好似初生咁細細粒一pat o野咁!!

得戚樣, 又成個男仔咁喇!!

乖豬身上o既冷衫仔又係grandma買o既, good taste!!!

連環拍, 每張都好鍾意!!!

影左咁多張乖豬笑相, 暫時我最鍾意呢張, 笑得好甜呢!!! (引乖豬笑o既係grandpa!!)

好眼訓呀, 唔好影啦, 下星期見!!!

第九周(15/7 - 21/7): 訓覺training!

今個星期我決心要train好乖豬作息定時同自己入睡!!!

訓覺方面: 

其實我己經成功令乖豬拍就訓到覺, 唔使抱, 但由佢開始扭訓到真係拍到佢訓著, 有時可以有半個鐘咁耐, 中間一唔拍就喊, 拍得唔好仲越喊越大聲, 就算佢訓o左, 我都要坐係側邊隨時預備佢扎醒拍佢, 如果唔係就仲喊得勁仲難拍番佢訓...

另外, 由於我一直無fix schedule, 乖豬精神先同佢玩, 眼訓就拍佢訓, 但有時佢會訓醒左唔喊, 我以為佢精神玩得, 但其實佢玩得一陣又扭眼訓, 咁樣落去真係唔係辦法, 我唔想佢玩時嗚嗚下, 訓時又訓得差...

己經成功train到bb自行入睡o既好友send o左條link (http://www.baby-kingdom.com/forum.php?mod=viewthread&tid=3006929 )俾我, 係baby kingdom o既媽媽分享, 用crying control o既方法令bb自己入睡, 於是我今個wk開始試, 順便set埋好d time schedule, 由而家3小時一餐, 見佢精神就玩, 攰就訓, 改做4小時一餐, 食完最好玩一陣到佢支力先訓, 訓醒就下一餐!! 

試左幾日, 真係幾work, 總之見乖豬開始扭眼訓, 就放佢係床,  跟住下面o既規律去安撫bb:

喊1分鐘, 未停, 安撫2分鐘, 仲未停就行開

喊2分鐘, 未停, 安撫2分鐘, 仲未停就行開

喊4分鐘, 未停, 安撫2分鐘, 仲未停就行開

喊8分鐘, 未停, 安撫2分鐘, 仲未停就行開

...

如此類推, 令bb知道媽咪係o係度, 會安撫佢, 但佢再唔收聲就要等越耐先有得被安撫!!! 安撫方法可以係拍, 唱歌, 講o野, 但唔好抱, 亦唔建議同bb有眼神接觸 (原因不明)!!

頭幾次乖豬己經o係第8分鐘喊o個個slot訓左, 如果佢好眼訓, 可以再快d, 喊聲亦同不斷拍佢唔同, 係越喊越疏越細聲, very good!!! 不過呢, 訓訓下中間扎醒o既喊就難搞d, 試過喊到第16min 個slot都仲喊得好惡好勁, 最後忍唔住要抱起佢安撫佢, 等佢calm down o左又未訓著再重頭放番佢係床再1, 2, 4, 8 o黎過, 都要喊到第4min個slot先ok...其實睇佢喊到好似眼腫腫咁訓都有d心痛o架, 但睇見佢識自己訓左又覺得佢好叻好有滿足感, 心情好矛盾!!

試到第四至五日, 乖豬己經可以係第1min個slot我拍一次, 甚至拍都唔使拍, 見佢眼訓就放番佢上床, 佢10-20min就自己訓著, 中間只係短短喊幾聲, 輕叫幾下, very good!!, 當然中間俾人嘈醒都仲要拍到第8min或16min個slot, 但d喊聲唔再係震晒喉嚨o個種, 只係斷斷續續細細聲, 所以喊耐d都己經唔會覺得太心痛喇!!!而我, 亦唔使再寸步不離拍到手支力, 佢又唔使狂喊做個燥bb, 真係對大家都有好處!!!

要成功, 各住媽媽最緊要記住:

1. 要抵得bb喊聲!!! 一個人湊bb最好, 唔會有人阻止你任bb喊!! 其實心痛都係幾日, train好佢就係一個少喊bb, 到時真係先苦後甜, 反而仲開心!!! 同埋bb其實真係好醒, 用此方法後, 我發現拍佢時, 佢知道有人反而喊得仲大聲仲慘, 你行開o個陣佢喊得無咁勁, 所以媽媽們唔好俾bb得逞呀!!

2. 唔好有eye contact!! 應該係有d 理論支持o既, 但我就唔清楚詳情, 可能係怕有eye contact父母會心軟??? 有eye contact bb會反而覺得爸媽望到自己咁慘都唔理, 會覺得爸媽唔理佢唔愛佢?? 有eye contact會令bb覺得有人可以求救可以依賴, 喊得仲勁???!! (朋友send俾我另一段講sleep separation o既片都有類似o既technique,唔可以有eye contact: http://www.supernanny.co.uk/TV-Show/Clips/Clips/Sleep-Separation-Technique.aspx)

3. Make sure BB訓時知道自己係張床度!! 睇d reference時見到呢個問題: 你諗下你係房訓覺, 醒左卻係o係sofa度, 你驚唔驚? 想像下都會覺得大人都會驚呢!!! 所以bb明明俾你抱住訓左, 醒就去左張床, 唔喊就假!! 所以要train bb識係床仔訓, 最緊要係要佢未訓仲係醒時知道自己係張床度, 同自己張床仔建立安全感!!!

希望今次分享幫到各位媽媽啦!!

training頭2日, 乖豬未慣, 扭眼訓時喊得好惡!!!
而家發脾氣識向上推喇, 好快就上到床頭!!

頭幾日乖豬難免要狂喊, 睇見佢喊到眼紅紅腫腫先訓得著, 都有d心痛o架~~

train多幾日, 扭訓前只會小喊同呼喚~

最後自己訓左~~

食奶方面: 

我開始train 4 hr一餐後, 乖豬由11點訓到7點幾先起身, very good, 肯定係戒左夜奶喇, 起身時間仲就o岩老公子番工, 可以同爸爸say個bye, haha!!

至於由3hr改4hr一餐, 乖豬都好似無乜問題, 基本上, 佢好似不論3hr一餐定4hr一餐, 佢都好似唔會扭肚餓, 仲有試過掛住訓4個幾接近5個鐘先食第二餐, 真係爛訓bb...

雖然食少兩餐咁多, 但我都盡量想佢每餐由之前10-20min不等改到食夠30min, 就算食唔到咁耐, 但餵少兩餐變相比較谷, 我諗出奶會快o左 (之前試過好谷時pump, 10min就有3安!!...不過真係好谷!!), 食到尾聲都feel到其實仲有, 唔似之前咁好快無乜, 所以我諗都ok o既, 餓親乖豬佢應該會投訴嘛...

16/7: 今日同我爸媽講想train乖豬4hr食一次奶, 定時定候訓, 點知猛俾佢地質疑!!其實佢地呢排間中都話覺得乖豬個面珠仔無再進步咁, 己經成日未夠3個鐘就叫我餵bb, 而家佢o地覺得餐數少左, 當然覺得唔好啦, 勁怕餓親佢o地個乖孫囉...好彩我自己湊b, 佢o地都唔會太干預, 係煩少少...不過我真係要加油, train好乖豬證明我o既方法係ok o既!!

19/7: 我同姑仔又係facebook開片, 我又忍唔住煩到喊, 好彩老公子支持我, 仲知我訓唔著陪我傾計傾到2點幾先訓!!傾傾下先諗起, 原來己經踏入20號, 乖豬2個月喇, 我o地傻下傻下都差d忙記o左!!

今日好朋友wendy o黎探我, 我o地又試雞啄唔斷, haha!!

20/7: 乖豬2個月喇, 由於乖豬己經算算o地識自己訓, 唔算喊得多, 我第一次feel到湊女都可以好free, 無論佢訓緊定喊緊, 由於佢喊只係叫幾聲, 唔算喊得好勁, 我完全可以唔理佢做自己o野, haha~~~終於明白點解有朋友講頭3個月反而易湊d, 因為再大d佢識郁, 我就真係唔可以好似而家咁成日行開喇!!另外, 本來好想今日同老公子一家三口影下相, 但我又為姑仔o既事而激氣, 喊到眼腫最後都無影喇...唯有就咁影乖豬...

掃風, 好似大頭狗...haha, 好得意, tum番我開心!!!

21/7: 今日乖豬去健康院打針, 重4.99kg (50%), 高38.9cm (90%), very good, 知道佢好似幾高咁真係好開心, 希望keep住落去, 做個高妹!!到打針, 佢今次無上個月喊得咁大聲, 打第一針直頭無乜反應, 到第二針時先喊, 喊聲都係normal喊咁, 唔使幾分鐘就唔喊, 都算係咁...至少我無上次覺得咁肉赤喇!!

koey: 我高58.9cm喇!!

另外, 我爸媽亦襯姑娘係度, 問晒佢o地o既concern, 例如4 hr一餐奶得唔得, 唔餵水得唔得等等, 其實呢d我都講過o架喇, 但由姑娘講始終先能令佢o地信服...anyway, 佢o地而家安心就得, 唔好成日誤會我虐待個女唔俾飽奶佢飲...haha!!

由於我爸為o左車乖豬去健康院而一早請左全日假, 我就提議今日下午番娘家, 咁就唔使浪費爸爸全日假期, 等佢o地玩下外孫, 我又可以襯機休息下, 癡下父母, hehe!!! 我媽開頭其實反對o架, 因為怕乖豬打完針發燒, 留係屋企佢應該會覺得舒服d, 但後尾可能係佢都恨玩孫啦, 最後都agree!!!於是呢日我只需要做人肉奶樽, 終於可以'放下假', 睇見爸媽同乖豬玩得好開心, 我都好開心!!! 夜晚我細佬同妹o係唔知我同乖豬o係度下不約而同番o黎食飯, 我o地好耐無試過一家五口齊齊整整開飯喇, 真係好難得又開心呢!!!

我媽咪又忍唔住手買衫俾乖豬喇!!!件衫仔好靚呀!! (好多朋友睇到我細個d相簿都大讚我媽買俾我d bb衫好靚, 我媽真係好有taste o架!!!)

我爸將乖豬放係sofa坐, 佢坐係度可以周圍望野好似好鍾意咁, 超可愛!!

我今日又上磅, 唉, 比上次重左3磅呀...help...相中o既我仲手瓜起展咁呢...點算呀...

講番乖豬, 佢打完針到傍晚開始微燒, 摸額頭比平時暖少少, 耳探同肛探都度到37.4-37.5度, 唔需要食葯, 而佢亦同平時一樣, 無乜唔妥, 好彩!! 最後第二朝體溫己經去番正常36.8度喇, good!!

p.s. 今個wk開始同同樣做ftm o既好朋友日日msn傾湊女, 時間易過o左好多, 果然係好'戰友', 如果大家可以住o係同一區就仲正!!!

好like呢張, 但老公子個下巴有d巴斯光年feel...

呢晚乖豬訓訓下伸懶腰, 平時佢伸完會打番平, 但呢日竟然伸伸下停左, 變左打側訓, 第一次見呢, 成隻貓咪咁!!!

day56: 乖豬食手

第八周 (8/7 - 14/7): 同乖豬傾計

今個星期乖豬出聲出多o左, 特別係喊之前, 講o野特別長, 好似有訴求有投訴咁,好得意!!!

乖豬一早見到爸爸笑得超甜!! 我忍唔住都想影番張乖豬望住我笑o既相, 好彩都影到, 但明顯乖豬似乎鍾意爸爸多d!!!

睇下乖豬笑得勁開心, 因為佢好鍾意佢個新朋友仔!!!

新朋友仔就係佢喇, cookie monster!!!乖豬成日望到佢實一實o架!!!

另外今個星期開始乖豬喊開始有眼淚喇, 唔再好似之前咁得把聲, 我估係淚腺發展成熟呢!! 當然, d眼淚仲未多到流出o黎, 但喊時明顯眼仔濕濕, 真係更加可憐咁...!

夜奶方面, 似乎差唔多戒到喇, 但好視乎佢最夜餐奶幾時食, 如果8點幾食, 佢之後訓覺就己經係沉睡mode, 訓到2點幾3點先醒, 如果我11點幾叫醒佢食奶, 結果都係2點幾3點醒!!!如果我早少少餵, 7點幾餵完, 咁佢未會訓到咁'林', 10點幾食完可以訓到5點幾6點, very good!!!叻女呢, 唔使特登同佢戒夜奶!!!

9/7: 又同家人出街,今次出得遠d, 去禾輋食拉麵同去吉之島買o野, 對上一次食呢間拉麵正正就係我入院生b之前個lunch, 時間過得好快呀, 諗番起覺得好似尋日o既事咁...!!! 唔知係咪今日出過街令bb心野, 佢呢日下午好似特別訓得差, 扭眼訓扭得好緊要...

一家三口第一次戶外影相!!

10/7: 今日乖豬全日無乜點喊過, 好快拍到佢訓, 好乖好難得!!

11/7: 今日我爸爸放假, 我又帶埋乖豬出街食lunch, 乖豬明明一朝己經去o左一餐份量十足o既大大, 點知我o地食lunch時佢訓醒o左又整餐勁o既...前日又係咁, 今日又係咁, 乖豬好似每次出街都整餐勁o既咁, 都唔知同出街有無關...(係屋企佢大大o既時間多數唔係咁!)

12/7: 乖豬仲係著緊new born片片, 著過huggies, pampers特級綿柔同pampers超薄3款, 個人最鍾意係pampers超薄, 漏屎漏尿情況好似少d (雖然都有!!), pampers特級綿柔最差, 雖然好似比huggies吸力好乾爽d, 但側身餵奶時一定漏尿, 搞到乖豬d衫濕晒, 都唔知點解會咁...!!! 

呢日朝早10點幾, 乖豬邊食奶邊開大, 聽聲都知大鑊o野, 我都知應該有漏, 但真係估唔到竟然漏得咁嚴重...因為我餵餵下, 竟然見到乖豬舉高手時前臂都有!!!!!

第一反應當然係捉住佢隻手唔俾佢再郁, 勁驚佢食到入口, 手就得番一隻, 我仲餵緊奶衫都未整理, o個刻真係忽然有d亂唔知應該做乜先好, 好彩呢個時候我媽咪上到o黎, 佢一入門口我就大叫佢入房, 叫佢幫我望下咩環竟 (因為我望訓係度餵, 係望唔到乖豬背面!!), 我媽一睇眼都突, 因為漏屎漏得好誇張, 上到背脊差唔多雞翼位, 衫同隔尿墊都係, 所以乖豬隻手都'high'到唔少!!! 我媽跟住就快手開水預備同佢沖涼, 我就繼續單手keep住個古怪pose捉佢乖豬唔俾佢亂郁, 都幾狼狽, 但真係好慶幸我媽係度咋, 我一個人遇到呢個case一定唔多掂!!

今次都可以話係乖豬出世以o黎bb漏便便最嚴重o既一次, 佢當時著緊pampers特級綿柔...其實, 漏得咁緊要未必同條片有關, 因為乖豬邊食邊舉腳伸懶腰, 可能因為咁所以倒晒出o黎...不過呢, 其實d new born片個腰位越o黎越低, 或者都真係差唔多時候要試下細碼片都未定呢!!!

14/7: 今晚帶乖豬番娘家dinner, 由於乖豬呢日訓得好差, 所以心情麻麻, 抱住佢坐車時架車開住佢見到景物郁就唔喊, 但一停車就扭計, 好搞笑!!!上到我媽屋企餵奶, 我以為佢會眼訓到邊食邊訓, 點知唔係, 佢眼大大周圍望, 知道今日食奶o既地方唔同平時, 八八卦卦!!!食完奶佢都係唔訓, 繼續八卦, 仲成日望實比較少見到o既舅父 (我細佬), 應該係認緊人, 雖然佢唔訓, 但成晚就牢牢豆豆咁, 呢d應該就叫'心野'呢!!!

笑得好鬼馬!!

成日話我老公子蝦乖豬, 呢日到我蝦佢!!!因為手上好多bb帽, 乖豬一直無戴, 呢日諗住襯佢心情靚戴下影下相, 點知佢好唔鍾意, 戴o左係狂fing頭同喊...haha!!!

唔死心再戴頂鬆d o既, 結果佢都係猛fing頭, 好唔鍾意, 但無喊得咁勁, 勉強影到張個樣'正常' d o既, haha!!!! 唔知佢大d會唔會肯戴呢??!!

day56: 乖豬有投訴

乖豬koey呢排識同人'溝通'喇, 開始出聲簡單o既'e e o o', 特別係就喊前!!

第七周 (1/7 - 7/7): 出街街!

自上星期尾個女醒o左開始識笑識玩o下床鈴後, 湊佢忽然好似易o左少少, 因為佢多o左醒o既時間, 醒時除o左可以同佢玩, '了'佢笑外, 我仲多o左時間做o下o野, 唔使好似之前咁成日驚有o野嘈醒個女要成日坐係佢側邊防止佢訓訓o下喊!! 

乖豬精神, 同乖豬玩變o左我同老公子o既節目!!

皺晒眉!

當然, 扭訓依然日日有...自從個女聲沙, 我就放棄train佢自己入睡, 而家我退而求其次, train佢拍就訓, 我發覺佢醒得耐玩到攰o既時候拍佢訓都太唔太難, 反而中間喊醒拍就難好多!!所以為免佢喊醒, 佢訓o左時我多數坐係佢側邊, 一見佢伸懶腰後扁嘴就狂拍佢, 總之佢未喊前就要'先下手為強', 拍佢多數都訓得番, 但如果佢一喊, 咁就一發不可收拾...總之呢, 佢訓覺時我就變o左無得休息, 只可以坐o係佢側邊打o下blog咁囉...haha!!!

另外, 今個星期個女間中食完奶2個鐘甚至有時個幾鐘就'疑似'扭食, 唔通大個o左食多o左?? 於是我就同老公子做實驗試佢食到幾多奶, 先開4安奶粉, 佢食到3安就唔食, 同一時間我就試o下乖豬平時食15-20min我pump到幾多奶, 結果頭6-7min就出到2安, 之後就出得慢d, 20min大約有2安半, 咁似乎係個女呢排食住訓每餐食太短食少o左所以早o左肚餓, 而唔係食多o左奶呢, 我要留意o下keep住個女每餐食夠30min先得!!!

夜奶方面, 由於我仲係feed on demand, 佢食奶時間唔係太fix, 最早佢試過食完9點o個餐就訓到深夜3點先再食 (可憐我都係12點幾先訓, waste o左佢訓咁耐o既時間無去休息!!), 有時10點半食完到5點先再食, 總之其實佢都似戒戒o地夜奶o架喇, 只係d時間唔太fix同唔太match我訓覺時間!!! 而且, 最慘係我呢個媽咪, 成日4點幾自己醒, 有時掉轉係我開燈見個女仲訓得好lum唔食奶覺得好失望, 因為橫掂我都醒o左嘛, 餵唔到奶好似好waste咁...

七一假期, 舊同事o黎探我!!舊同事有兩個女, 佢o地好得意, 細o既雖然只有歲半, 但因為成日跟住家姐, 所以好醒目呢!!

4條queen~~~如果真係有4個女,都幾horrible呢!!

2/7, 細佬&女友約媽咪去科學園飲茶, 我媽咪問我join唔join, haha, 有得出街喎, 當然join啦, 於是呢日我又瞞住男家靜雞雞帶個女出街...其實有我爸爸車出車入, 又有家人幫手, 帶個女出街都唔太難, hehe!! (不過呢, 我食到尾聲掛住講o野, 又試嘔o左啖水, 睇o黎我呢排食都係少d講o野唔好食咁多風入肚好d!)

飲完茶o係科學園周圍行下!!

呢個樣好得意, 好肉緊

乖豬猛咁周圍望, 好新奇

其實佢明明好眼訓, 但都睜大眼周圍睇, 仲好似好開心咁!!

同日夜晚, 我生o左後第一次自己煮晚餐, 雖然只係滾個魚湯煮米粉, 但咁耐無煮o野感覺竟然好開心, 可能覺得自己生活終於比較'正常'少少o卦...

7月5號, 我又靜雞雞帶個女出街, 媽咪陪我帶住乖豬落屋企附近o既商場食lunch同去超巿, 好開心呀, 乖豬有人全程抱住訓得好'lum', 我諗之後我都應該handle到自己一個人落o下街去o下超巿, yeah!!

今個星期開始覺得有d衫開始'短'喇!!睇下褲腳, 好短呢!!

乖豬識笑後, 仲多o左個扁嘴樣, 以前無呢個樣o架...試過有次我同老公子睇住佢扁嘴, 個樣好可憐, 於是佢成功喇, 令我o地即時抱起佢...haha!!!!

乖豬塞隻手入口o既'技術'越o黎越進步喇, 食o既時候好似吸毒咁...haha!!

訓覺樣, 難得咁平靜咁...

day50: 乖豬同爸媽玩心情大靚

唔合格爸爸

我老公子呢個爸爸暫時真係唔多合格, 要數佢真係好多宗罪...

1. 無耐性: 乖豬喊佢好快就無耐性抱起佢狂un又或者不斷掃風(掃風可以止喊!), 做以上動作時仲要係好唔專心, 對眼只會望住電腦或電視...我成日同佢講bb係會feel到你有無'心'對佢!! 

2. 技巧差: 乖豬出世個半月有多喇, 老公子仲未識得抱佢, 睇親佢抱我都忍唔住要出聲叫佢抱好d!!試過尋日我煮飯老公子湊女, 個女喊, 老公子冇乎就抱起佢, 點知半個鐘個女都仲未訓著, 佢仲問個女係咪餓, 因為佢擰側晒塊面狂食佢手臂喎...次次佢抱唔掂個女仲係喊佢就屈我未餵飽佢, 結果我煮完飯出o黎接手5分鐘唔晒個女就訓o左, 我叫老公子檢討下, 佢都有d'汗顏', 但把口就不服輸話其實係佢tum o左個女9成快訓著, 我咁o岩做埋o個一成喎...其實我知我日日對住個女, 技巧實叻過老公子, 我都唔係怪佢, 我怪o既只係佢無'心'去改善佢o既技巧, 唔鍾意佢次次搞唔掂好快就投降推番個女俾我!!!

3. 無放我同個女係第一位: 叫佢襯bb精神唔喊同bb玩多d, 如果唔係bb第二時唔癡佢, 佢好多時為o左check公司email或睇新聞睇波話'等陣先', 但bb唔係成日咁好心情嘛, 等陣先等到佢喊你就無得同佢'親子'...而且都係o個句, 我覺得幾時都係我同個女重要過電視新聞同email囉!!

4. 同個女無計傾: 叫佢同bb講多d o野, 佢就話'無o野好講', '唔知講乜好', 只係識得對住bb, '嗚', 'wow'...仲有極少叫bb個名...

5. 成日'虐待'個女: 好似用被/紗巾/米袋蓋住佢個頭/眼睇佢識唔識反抗或發惡喊, 佢喊時'暗'住佢個口, 又會'嚇'個女, 好似'wow'佢, 用口大力血佢面吹風(俾我老公子發現吹佢面個女會有一個好奇怪o既reflex action!!!), 仲有當佢幾個月大咁抱住佢跳到好高...

...睇見佢咁對個女我就成日忍唔住鬧佢...佢就話我大驚小怪係'怪獸家長', 但我就覺得佢係'怪獸爸爸', 人o地女仔o黎嘛, 做乜對個女咁粗魯, 當佢好似實驗品同玩具咁玩... 

老公子發現吹佢面個女會有一個好奇怪o既reflex action: 嚇一嚇大力吸氣!!!

讚乖豬

希望唔好讚壞個女, 但事實上, 又好想讚o下, 因為我估我個女唔算太'惡湊'呢!!

1. 夜晚唔扭計: 乖豬好識分日夜, 夜晚訓得特別好, 佢出世到而家都未試過半夜扭計, 唔似朝早會'喊醒', 有時我覺得佢夜晚餐奶食完好似識自己訓添o架!! 當然, 肚餓喊幾聲都有, 但只要食飽佢就會乖乖自己訓番直到第二餐, 中間多數唔會醒, 例外情況只係發生過一兩次, 兩次都係餐與餐中間喊醒扭便便!

2. 夜晚訓得特別耐: 乖豬一出世夜晚己經訓得特別耐, 好快己經可以夜晚連訓4-5小時, 所以佢對我算好好, 同埋佢一出世己經係3小時食一餐 (反而而家先食密o左), 所以我唔使2個幾鐘醒一次咁密 (就算係2個幾鐘醒一次,都係怪我訓覺時間唔match佢最夜餐奶時間, 同埋成日自己半夜醒又或者老公子番工嘈醒我, 同乖豬無關!!)!!!

3.  食奶食得快: 出世無耐補奶粉時乖豬用10-15min己經食晒3安奶, 好爽快, 而家埋身好多時都係食15-20min, 夜晚唔知係咪上奶多d, 佢更加只係食10min就又訓番(初生時就都係要食30-45min)月, 所以餵奶唔算辛苦!!!我媽成日讚佢呢樣, 因為我妹當年食奶好多時要食成個鐘, 食完都到下一餐!!!

4. 掃風快: 乖豬出世頭一兩日掃風己經係一坐直拍兩下就得, 超快, 掉轉搞到我幫佢掃風無乜耐性, 掃1分鐘都無就算...haha!(我媽又讚, 因為無錯, 又係我妹, 佢當年掃風要掃好耐, 如果唔係就會噴奶!!)

5. PatPat有便便唔扭計: 其實呢點唔知讚唔讚, 讚當然係我唔使處理佢因便便up住而喊, 唔應該讚就當然係佢污漕漕啦, haha!!

day46: 乖豬大笑

第六周 (24/6 - 30/6): 乖豬笑喇!

乖豬今個星期開始識蝦我喇, 又扭眼訓又扭抱, 扭眼訓最不得了, 因為喊得勁惡勁大聲, 拆天咁, 有時抱起o左仲會繼續喊, 因為佢要人行住路搖搖o下先罷休,有時半睡時一有o野分佢心, 好似有乜古怪聲, 光, 甚至佢自己打喊露或伸懶腰, 令佢忽然醒起自己好眼訓但未訓就會即刻大喊, 一d面都唔俾, 真係喊到我都麻目晒咁滯!!

睇見朋友開始train佢2個月大o既bb自行入睡, 我又試, 第一日佢喊30min後真係自己訓o左, 雖然都係訓得唔深入, 中間醒o左都係勁喊, 但好似真係有效!!第二日再試, 不過就唔多順利, 可能中間我俾佢發現我偷望佢o卦, 到第三日, 佢喉嚨沙, 細聲叫無乜聲, 我媽話我殘忍, 我都覺好似過份o左, 不過我會繼續努力盡量係唔抱o既情況下(好似唱歌, 拍心口, 拍pat pat)令佢入睡!!

個女其實第三星期左右己經疑似識食拳頭, 只係唔係好控制到手手放入口, 呢個星期佢開始定d咁識塞隻手去嘴度喇, 通常好餓就會出現動作, 食得好肉緊!!

6月26號星期日朝早中學同學上o黎探bb!

其中一位中學同學懷第二胎喇, 估唔到第二胎個肚真係會大好多, haha!
加油呀, 到2b出世時我乖豬夠大個可以出街街探你呢!!

raphael bb歲半, 佢o個日行埋o黎睇bb時笑得好甜, haha!!

同日夜晚兩家人出去酒樓食乖豬滿月飯, 健康院以外第一次帶乖豬出街, 又要拎bb車又要拎多d衫, 事前仲要pump定奶出o黎, 都預備好多o野!!結果成餐飯乖豬係咁訓(中間只係扭o左2次喊), 好乖, 但我呢個媽咪就曳喇, 唔知係咪酒樓好凍凍親, 我食到尾聲時嘔肚大作, 嘔到無o野嘔先停, 有少少手軟腳軟添, 好彩最後番到屋企沖完個熱水涼就無事!

多謝我細佬女友訂o既滿月蛋榚, 好靚呀!! (不過其實好睇多過好食, 因為太甜!!)
右上角係姑仔送俾乖豬o既card!!

乖豬全程都訓得好lum!!

6月28號, 我細佬妹提早慶祝生日, 我要求下我媽都批准我番去湊熱鬧, hehe, yeah!!!不過呢, 由於乖豬未番男家先番女家, 我媽怕我個麻煩奶奶唔鍾意, 所以是次為秘密活動, 唔講得, 不過我呢晚真係好開心, 因為我好耐無番過娘家, 而且今日好齊人, 大家又可以慢慢同bb玩同影相, 總之happy啦!

細佬&女友(頂帽係我同老公子送俾佢o地o既生日禮物!)

細妹&男友(副超係我同老公子送俾佢o地o既生日禮物!)

6月29, 尋日己經好happy, 點知今朝又有surprise, 因為一朝起身乖豬見我'了'佢, 佢竟然笑呀!!! 佢出世到而家今日先真正係o係清醒時笑咋, 你話我係咪好開心呢...見佢心情咁靚, 我開埋床鈴俾佢睇, 佢真係識睇喎, 根住d公仔望, 好叻呀!!! 小朋友真係大得快呀, 一日比一日進步, 相信未來更多o既'第一次'一定同樣難忘!!!

早一日佢都仲係訓緊先識笑!!

今日...笑得幾開心!!

乖豬好似好鍾意床鈴!!

p.s. 番娘家終於可以磅重, 我大肚時一直以呢個磅為準, 今日上磅好緊張, 結果抱住個女時重133, 放低個女重122.6磅呢, yeah, 原來只係比未有b前重o左7-8磅咋, 咁呢7-8磅應該唔太難減o卦(雖然唔知幾時先減得...)...hehehe!!!

出浴照!! (右邊係我細個, 差唔多角度!!)

上面呢幾張係我細個, 我媽話好似乖豬!! (應該話乖豬真係好似我喎!!)