Koey 6-7歲發展記錄!

Koey七歲喇! 其實發展方面, 除o左甩o左6隻牙外, 都同往年分別唔大吧！最大唔同應該係升o左上小一番全日班，開始要過沒有休息，沒有創意，沒有思考空間o既生活吧！

呢兩年都無晒BB味喇, 睇番相, 覺得5歲或之前仲有Baby Face好可愛呢!!

自理能力：呢一方面繼續表現優秀，開學初期已經係自己執書包做功課，o係我無幫手下只係間中欠帶書欠功課，雖然佢怕欠帶而成日帶書有多無少搞到書包好重，但整體上我真係好滿意o架喇！

學業：升o左上小學開始要講學業喇！Koey第一次考試成績雖然唔太差，但其實觀乎佢對學業功課都唔太上心，自覺性比較低，難集中亦未明咩係讀書時讀書，遊戲時遊戲或先苦後甜o既道理！

興趣：唔愛睇書唔鍾意英文同體育，鍾意宗教同音樂，唉，雖然佢由上年學琴到而家都話鍾意，但始終覺得佢有欠資質，但佢興趣方面又似乎好consistent咁鍾情音樂，唯有希望我睇錯，亦希望佢快快show到俾我睇佢o既潛質啦！

缺點：慢！呢點都係我同Koey起衝突o既最大源頭！我做事快但佢超慢，好多時令我無名火起！簡單如叫佢飲o左佢面前o個杯水，咁輕而易舉咁順手佢都唔即時飲都算，最嬲係佢15分鐘甚至30分鐘後杯水仲係度，而佢可能仲係坐o係枱面但已經完全忘記我叫o左佢10次要做o既事！！！我承認我的確太急往往要求小朋友即時回應我要求，但好似佢咁完全無視我要求或因為自己分心而忘記要做o既事，我真係覺得好大問題！

易分心：正如上面所講，叫佢飲水佢好多時會分o左心做o左其他事，而做其他事時佢其實又好專心！！其實，我真係唔肯定呢個係缺點定優點，既然自己諗o既主意佢可以好專心咁做，咁究竟我要點先令到佢專心做到佢“應該”要做o既事呢？？我到而家都未有方法！

無手尾：呢樣只能怪爸爸遺傳吧！食完o野經常唔抹嘴好污糟，去完toilet唔熄燈關門，飲完水唔擺杯，拎完文具用完唔放好等等，好多時d剪刀打孔機被發現o係唔應該出現o既地方有4成都係佢做，另外5成就係爸爸，剩餘1成先係我同細佬所為😅！最恐怖一次係我o係佢視藝袋搵o野，竟然發現7-8張用過，成張都係不同顏料，有d仲係微濕一堆咁o既濕紙巾o係袋底，我有理由相信堆紙巾已經堆o左大半個學期，o個種核突感我真係唔明點解呢位小姐可以接受得到，真係超恐怖！(後補：最近又發現佢書包側袋都塞左超過五六張用過o既廁紙無掉，佢用過o黎抹鼻涕都唔奇，就咁放係度唔知收埋幾耐，諗下都幾嘔心...)

有主見：相對細佬妹，家姐主意都幾多，所以細佬妹都好鍾意爭住要家姐陪玩，不過男女始終有別，家姐似乎鍾意同番妹妹玩斯文玩意多d，唔知妹妹再大d同家姐再close d 家姐會唔會冷落細佬呢？

總結：其實除o左慢之外， Koey大至上都係人見人讚，幾受同學仔同老師愛戴o既小朋友，獨立有主見唔使大人太費心照顧，的確係好乖，希望佢越大做事可以更爽快咁就真係令我最放心！

聽聞香港d小朋友八九歲開始就扮大個，小朋友gathering已經唔會玩低b小朋友玩意，希望koey唔好咁快失去童心，可以響受多幾年無憂童年就好喇!

520, 乖囡Koey!

Koey升小一後全家之改變

上篇講到Koey升小後小學雞與小學雞媽媽之苦, 雖然Koey做o野滋油的確係升小要面對o既後最大至命傷, 但其實Koey都有唔少值得我讚賞o既地方o既!!!

讚讚乖女

1. 唔賴床: Koey似我一樣, 一叫就醒!! 雖然都時不時會喊咁口嗌"好眼訓"或訓o係梳化唔郁一陣, 但so far咁早起身算合作o架喇!!! 6:50鬧鐘響7:15落樓, 都算快手!!
2. 會自理: 刷牙換衫著鞋番屋企沖涼等等Koey都係自己包辦, 我基本上只係預備早餐同預備佢番學用到o既毛巾餐盒水樽同幫佢紮頭髮!
3. 自己功課自己做, 自己功課自己執: 雖然做功課速度真係慢o左d同有時唔專心, 但自從開學以o黎我基本上都無對過佢功課亦無續本幫佢執書包, 只係佢做到唔明問我先答同埋開學初期從旁協助下執書包!!! 
4. 享受小學生活: 雖然又要早起又要番全日, 放學番o黎仲要做功課無晒玩樂親子時間, 但每次問Koey番小學開唔開心佢都會俾我正面回應, 每次聽到佢話開心我都安樂d, 至少只係我主觀覺得現今小朋友生活好苦而當時人不自知, 咁都算係好事o黎呢!!!

總之, Koey其實除o左慢, 基本上都唔使媽咪我太操心 (其實要我操心我都無時間去操心...😓), 有時催到我忟o既時候諗下佢其實已經算好乖女, 我火氣都真係會少D!!!

鐵人媽媽一湊三生活之改變

Koey升小要早起, 要番全日班呢d改變當然大啦, 但原來Koey升小, 對鐵人媽媽我都有唔少影響!!!

• 接送困難1: 7點15分一拖三送家姐上校車

老公出差我要7點幾1拖3落樓送家姐校車, 呢個挑戰係我事前一直都好擔心o既!! 雖然為此老公子已經同老細表示要飛疏d, 但隔個星期飛幾日點都走唔甩! 

結果呢, 開學幾日後我已經要一拖三7點15分落樓!!!! 

妹妹剛訓醒look~

又估唔到, 呢個事前最擔心o既task無我想像中咁難呢!!!

其實Kobe 暑假尾有o左個電子鐘後就日日6點幾自動波起身, 好似越早起身越叻, 成日同家姐鬥早, 可能因為咁, 我完全唔使叫Kobe起身, 只要臨出門口抱起阿妹就搞掂呢!

因為上校車地點o係屋苑樓下, 呢個task要比想像中無咁難!!!  

不過...好戲在後頭!!! 隨住近來Kobe再無6點幾自動起身, 加上就快冬天個天越o黎越遲天光, 天氣又慢慢會凍, 1拖3落樓應該難度會增加唔少, 又要叫醒小朋友又要同佢o地著外套, 諗起都驚驚, 希望入冬後繼續順利啦!!!

• 接送困難2: 分身接放學

由於細佬讀下午班, Koey平日有一日會上課外活動無校車,  結果1個5點o係火車站落校車, 1個5點15分o係巿區放學, 我一個人跟本分唔到身!!!

所以, 我每星期都要麻煩我媽咪(Grandma)幫手接細佬校車, 我就出去接Koey放學!!! 雖然我知媽咪絕對唔會托手掙, 但始終山長水遠出o黎只係為接一陣放學, 心理上我都會覺得唔好意思!!! 所以, 我真係超級希望Kobe可以轉到上午班, 咁我帶埋Kobe Kodi出去接Koey放學都可以, 唔使下下要麻煩到媽咪又無咩彈性呢!!

• 接送困難3: 浪費Koey做功課時間

無課外活動o既話, Koey 4點半o係屋苑落校車, Kobe就5點o係火車站落校車!!! 計埋行出火車站o既時間, Koey番到屋企基本上得5-10分鐘, 如果我帶埋佢出去接Kobe, 一個來回番o黎平均5點10-15分!! 計一計數, 即Koey每日會無o左40-45分鐘做功課時間!!!!!!

要知道而家d小朋友繁忙到不得了, 呢40-45分鐘真係唔可以白白浪費去接送細佬身上!!! 好好彩, 我搵到個好鄰居佢肯俾我留Koey去佢屋企做功課, 直至我接埋細佬番屋企, 咁Koey d時間先得以更好地利用!!

不過, 都係同上面一樣, 要日日麻煩鄰居都真係會唔好意思, 如果Kobe轉到上午班就咩問題都無呢!!

• 缺乏睡眠, 鐵人媽媽變身"無記性"媽媽

坦白講, 鐵人媽媽每日'放工'後o既私人時間真係超級琴貴, 為o左享受更長"私人空間", 鐵人媽媽絕對唔係早睡之輩, 而家因為要照顧Koey番學, 本來睡眠時間已經唔長o既我就訓得更加少! 

可能因為唔夠訓, 鐵人媽媽由原本"記性唔錯"變為"極之無記性"...開學後, 因為我無細心幫Koey執書包或無記性而先後欠帶過幾次書/回條/視藝袋/功課, 最嚴重係明明Kobe可以著便服回校慶祝中秋節我都竟然搞錯, 完全無o左年事...搞到我都有d自責同急急諗方法改善自己記性!!!

Anyway, 阿Q d諗, 每次欠完我同Koey都有因此小心o左, 所以欠交唔太密o既話其實應該唔係咩壞事呢!!!😜 

• 煩燥媽媽

1湊3少d精力都唔掂, 鐵人媽媽本身EQ唔算高, 小朋友唔聽我講我就好易"燥", 而家...我o既"燥火"簡直就同Koey o既速度成反比!!!! Koey動作越慢, 我就越"催", 越"催"我就越"火"!!! 基本上, 我發火鬧人o既次數比之前真係多好多...

其實鬧完後我自己都好後悔, 但我發覺好多時自己都控制唔到自己...唉...真係苦了小朋友苦了自己!!!!

所以, 為免更進一步破壞大家感情, 我已經將同Koey 溫書o既責任交o左俾牌氣較好o既老公子身上, 相信咁樣對Koey對我都比較好, 亦係好好o既機會俾老公子同Koey更多時間相處!!!

Kobe Kodi生活之改變

唔好以為Koey升小唔關Kobe Kodi事呀!!

• Kobe Kodi 變睡寶寶

一早叫醒小朋友落樓...番上樓後仲未夠8點, 小朋友眼訓嗎??? 佢o地用行動話晒我知!!!

Kodi 9點幾10點開始扭計, 試過幾次攬住我訓番...

哥哥襯阿妹唔反抗抱佢, 冧到呢~~

Kobe其實一向早眼訓, 而家就更加唔使講...

食食o下飯唔願食走去sofa訓o左, 食完訓係sofa睇睇o下電視訓o左, 甚至未食飯就訓o左都試過...雖然有d陰公, 但睇見佢咁訓得我其實好安慰...HAHAHA!!!

• 時間多到唔知點用

如果呢句o野apply 落家姐度就好喇...家姐而家同我傾句閒計都無時間, 但Kobe Kodi就時間多到唔知用o黎做咩好!!!

由於太早起身, 朝早同Kobe Kodi睇完故事, 玩完積木, 甚至睇完一陣卡通落埋街玩後都仲有好充裕o既時間先到Kobe番學, 開學初期同我真係覺得有d浪費o左Kobe o既時間, 好想好想襯佢未升小做大忙人時幫佢報多d興趣班消磨朝早o既時間!!! 

可惜...不論跆拳單車游水定足球都無平日上午班!! 好彩...近來終於湊到幾位Kobe同班同學又夾到Roller教練自定平日朝早上堂, 可以好好利用下d時間, 心理上覺得好d咁呢!!!

• 3姐弟妹感情更進一步

無錯, Koey番o左全日後佢真係連同細佬妹玩o既時間都無, 但以我所見, 每到weekend Kobe同Koey又會一早起身不停吱吱喳喳一齊玩, 感覺就好似兩姊弟o係度把握時間相處玩樂, 補番平日玩少o左o既時間一樣!!!  



其實見少o左爭執都少o左, 感覺上都唔係太壞!!! 

相反, Kobe而家無o左家姐帶住, 佢就多o左追住個妹一齊玩, 兩兄妹相處多o左感情都有進步, 亦係好好機會叫Kobe學o下做大哥哥!!!

上面條片係咪好sweet呢~~~~

當然, 現實呢D場面出現並唔多, 兩兄妹大部份時間都係爭吵尖叫中...但可能呢個就係佢o地兩兄妹之間o既相處模式!!!

總結

總之, Koey升小後, 除o左爸爸繼續努力工作出差外 (其實仲變o左"補習老師", 不過老公子o既改變比起家中其他人都算少了!!), 基本上家中各人都面對緊天翻地覆o既變化!!! 

雖然而家已經開o左學2個幾月, 但坦白講, 大家都仲係處於適應階段, 每日都身心俱疲呢!!! 希望全家人都快快適應, 盡快搵到一個比較舒服, 唔使成日"催促"o既方式渡過只會越o黎越忙碌o既學習生涯!!!

最後, 再次多謝開學後每星期特地出o黎幫手接細佬放學o既Grandma同俾我放低個女大半個鐘做功課o既好鄰居, 唔係你o地, 鐵人媽媽o既1湊3生涯一定更加辛苦, 多謝你o地呢!!!

小學雞與小學雞媽媽之苦

小朋友升小後家長及小朋友面對o既苦況其實唔止一次聽過, 但到真正殺到埋身時, 還是忍唔住覺得好辛苦...


小學雞生活


Koey番o左全日制小一3個星期, 佢o既生活只係得番...

...做功課、沖涼、食飯、練琴、訓覺...

鐵人媽媽o既生活就只係得番...

...催、催、催...


功課以外, 還有甚麼?



想像o下都覺得生活了無生趣呢!!! 基本上, 每當Koey...

• 想分享o下學校趣事咩? ......講唔夠兩句就被我打斷: 好喇唔講喇, 專心d做埋去先講!
• 想同細佬妹玩咩? ......玩唔夠一陣就被我阻止: 又落地? 你做好晒功課喇?
• 想慢慢嘆下午茶/晚飯? ......20分鐘內仲有半碗飯就被我鬧: 個個都食晒喇, 你仲有咁多飯, 食快D!
• 想同爸爸傾計講笑? ......講唔夠兩句就被我打斷: 唔好再講喇, 做完功課未? 老公, 有時間不如你同你囡默書溫書好過啦!
• 想聽媽咪講故仔? ......得, 完成晒"要完成o既"而又未過夜晚9點先啦!
• 想睇一陣youtube卡通? ......得, 完成晒"要完成o既"而又未過夜晚9點先啦!...學校網上教材或者可以o既, 但都唔好睇超過10min喇~

唔通...Koey o既童年就只餘做功課溫書? 運動時間、培養興趣o既時間、親子時間、同兄弟姊妹相處o既時間呢? 通通都無!!! (開學只係個幾月, Koey就連星期六學緊o既Roller堂都真係無時間再handle, 唯有暫停o左先...)

睇見自己o既小朋友童年生活得番做功課, 作為媽媽真係忍唔住替小朋友難過, 覺得肉赤!!!


唔催可以嗎?

其實我都知催得多...

• 小朋友會對催促感到麻木
• 影響大人小朋友心情
• 破壞感情

其實我每日催催催, 真係催到自己都頭痛, 無奈係睇見Koey開始當我耳邊風, 繼續佢嘆慢版o既節奏, 真係名副其實o既皇帝唔急太監急呢!!!

我問過Koey, 自從佢番小學後有無發覺每日放學都好趕時間, 完全無時間同媽咪睇故事書, 無時間同細佬妹玩...咁樣有問題嗎?

佢竟然答: 無!

聽到佢咁答, 真係有d"吹脹"o既感覺...

換言之, 唔通暫時無o野可以令Koey有動力做快d專心d? 如果我唔催, Koey就會晚晚嘆慢版食飯沖涼做功課到10點先訓, 仲要係無時間去練琴o個隻嗎?????!!!!!

反過o黎諗, 其實佢都唔介意過d咁o既生活, 我做咩要替佢緊張替佢急呢? 或者我唔催唔理, 佢反而可以自己調節番自己應有o既節奏??

唉...

暫時, 我都仲未搵到一個比較理想o既方案, 或者, 我同Koey都真係再需要多d時間去適應小學雞生活呢! 如果各位有代替催促, 又或者有效令小朋友做事快手腳d專心d o既好方法, 歡迎留言提供, 鐵人媽媽一定感激不盡!!


P.S. 講完小學雞之苦, 下一篇要記錄番d正面d o既!!! 下次要講講家姐升小一後值得讚賞o既地方, 同埋三位小朋友以及鐵人媽媽一湊三生活o既改變!!!


(補充: 功課真係好多好深嗎? 我問過其他同學仔, 有d快手腳o既番到屋企做1個鐘完成, 而Koey平均就要個半鐘!!!! o係鄰居屋企做功課似乎係專心d, 一番到屋企只係食個下午茶就45min, 晚飯再 >1hr...d時間就係咁無o左...但要我恨心連休息一下食個tea o既時間都取消我又未做得出...

其實要埋怨o既都係o個句: 點解要番全日制? )

2日1夜大嶼山渡假營

先前得到老公同事邀請, 我們一家五口6月4號齊齊出發, 去大嶼山渡假營玩番兩日一夜喇!!

臨出發前o既朝早先執行李!!! 雖然只係2日1夜, 但1家5口行李絕對唔少, 只係妹妹個吹氣浴盤同去沙灘o既泳裝毛巾, 帳幕地墊己經夠晒Ar ja, haha!!!

呢日同完Grandpa & Grandma, 舅舅晴EE食完lunch完就去等E車喇!!

古靈精怪!!!

出發, Yeah!!!

用魚眼鏡自拍, 效果唔錯, 唔使用自拍棍!!!

大鄉里出城, 坐E車出發去渡假營時已經好興奮好開心, 係車度已經事事新奇, 笑聲不斷呢!!

終於去到東涌...點知....

我o地過o左站無落到車!!!!!!!!

一發覺飛o左站即刻o係下一個站落, 之後先慢慢諗得明點解會咁, 原來消防局個站無人落, 所以我o地就數錯站!!! 真係枉我以前日日坐E車番工, 咁都會出錯...

不過, 好彩老公同事駕車o黎, 所以兜遠少少接都無乜所謂!!! 而且, 錯有錯著, 落錯車反而有瓦遮頭, 忽然翻風落大雨我o地都無濕身呢!!!

3點幾, 終於去到位於貝澳同長沙海灘之間o既渡假營喇!!!

屋側邊有燒烤爐!

仲有片草地, 不過落住大雨, 戶外好多蚊!

客廳

老公同事讓出主人房俾我o地，好大呢！

我o地間房!

妹妹仲有私家床仔添，睇佢幾happy！

跳床是常識吧!

Settle 好，但外面一直落大雨, 小朋友落唯有食少少茶點等！

原本打算去沙灘, 但天雨關係無得去...好彩一朝老公提議小朋友帶卡通DVD o黎, 咁小朋友就唔會悶!!!

屋入面仲有一張high chair, haha, 妹妹第一次坐high chair咋, 一臉惘然!!

終於, 4點半左右, 開始見番少少藍天, 我o地即刻執o野開車出發去沙灘!!!!

可惜, 去到沙灘仲係不斷落住細雨, 雖然附近有間餐廳可以坐下避雨, 但抱住阿妹係度餵蚊都無意思, 最後我決定抱阿妹番渡假屋, 老公就帶住3個大小朋友冒雨玩沙!!!

番o左屋內妹妹就大覺訓, 無去沙灘其實都唔係咩壞事, 至少而家妹妹好舒服!!!

不過睇住天空越o黎越放晴, 又有少少恨無得一家五口去沙灘玩下呢!!! (妹妹都有帶泳衣仔o架, 可惜無用武之地lu!!!)

沙灘都有牛, Koey話俾我知見到牛牛唔知VV定poo poo喎~~

呢位就係老公同事個小朋友, 大Koey一年, 兩位小姐一見如故, 好friend!!!

大家睇Koey幾開心, 佢由冬天問我幾時去沙灘問到而家, 終於得嘗所願, 小小雨又點阻得到佢呢!!

玩o左個幾鐘沙後, 老公同事就接小朋友番渡假屋疏洗喇!!

疏洗完大人們就預備BBQ食物, 小朋友都幫手包番薯!!

可能玩完沙好攰, 小朋友們都對BBQ零興趣, 三催四請先肯出戶外一陣!!

家姐發現最愛o既三色椒!!!

我一直以為係燒o黎食, 但原來生食都好甜好好味!!! 

呢兩位食'素'o既妹妹食得幾Happy!!!

小朋友有'專人'送BBQ食物做餸, 另外仲有烏冬食, 認真識嘆!!!

妹妹大覺訓o左3個鐘, 終於醒喇!!!

Yeah, 齊人大合照!!!!

影完呢張合照後我就番戶內照顧小朋友!!! 

之後, 大人們好似'走鬼'咁拎o左d食物入屋, 原來佢o地俾昆蟲突襲呀!!! 可能呢日落過大雨翻風, 好多飛蟲撲向大光燈, 仲飛埋去爐度呢, 小朋友們真走得及時呢!!!!!!

由於外邊漫天飛蟲, 每有人開門出入, 小朋友都為o左有無飛蟲飛入屋而大呼小叫, 好搞笑呢!!!

老公子接力湊小朋友, 我就去幫妹妹沖涼, 佢第一次用吹氣浴盤咋, 呢個盤由Koey 時放到而家, 個底o個part原來有少少漏氣喇!!!

妹妹沖得好開心呢!

沖完涼小朋友再係麻雀枱搞搞震後, 9點就催小朋友刷牙訓覺喇!!!

最後, 家姐可能唔太攰, 佢同平時差唔多,10點半左右先搞掂!!! :p

終於訓晒!!! 我終於可以休息喇!!! YEAH!!!

妹妹有BB床訓零舍放心!!!

疏洗完我就同另一位媽媽傾下計, 其他大人就出o左去行山, 老公番o黎話我知佢o地個個都好專業, 睇到好多不同o既蛛, 蛙同蝶, 老公仲見到2粒流星添呢!!!

=========================================================

5/6 Day2:

漫長o既夜晚於完結喇...點解咁講? 因為我成晚都訓唔著呀, 5點幾餵完奶後我諗我應該6點天光先訓到...但8點鐘又醒!!!! 其實自從湊小朋友後,基本上攰到生保床都訓得著, 唔知點解近年極少發作o既怕生保床毛病又復發呢!!!

總之, 呢朝早我浮浮o下不在狀態, 真係慘...

雖然我訓唔到, 但小朋友們都訓得好好咁, 個個心情大靚!!! 只係Kobe訓醒有少少想家, 第一句就問今日係咪番屋企呢!!!

兩位猛男送吻!

叔叔姨姨預備o左豐富o既早餐, 但Koey Kobe唔知做乜耍大牌, 樣樣都話唔食, 連平時都食o既白麵包塗蜜糖, 甚至Kobe最愛o既雞翼都話唔要....

最後, Koey好似只係食o左幾塊餅,Kobe就食o左個蘋果做早餐...

因為人多, hea兩hea都差唔多中午, 估唔到今日天氣唔錯, 好猛太陽, 如果呢朝先去沙灘就一流呢!!! 大人們相量完, 決定今日去大澳lunch同行山, 預備出發前, 大人們忽然爬上屋頂睇風景, 小朋友們都好好奇, 躍躍欲試!!!

估唔到Koey都夠膽, 勇氣可加呢!!!

yeah, 成功上o左屋頂喇!

YEAH!!!

由於7人車唔夠坐咁多人, 所以我o地分2車出發, 小朋友坐第二車!!! 由渡假屋到大澳來回車程要45min, 小朋友無無聊聊自創玩意, 笑到咭咭聲!!!! 睇o黎o係屋內玩幾時都Happy 過出外熱辣辣周圍行呢!!

用sofa 背o既cushion做Sir滑梯!!! 仲自己諗到用椅子頂住穩陣D唔會跌!!!

之後再玩人肉支撐, 笑到傻o左!!!

最後仲玩埋跳遠!!! 小朋友都係搞破壞最叻最開心呢!!

終於, 到第二輪車出發喇!!! 沿路同小朋友睇o下水塘, 數下藍色的士, 傾o下講o下好快就到大澳喇!!!

老公第一次去大澳, 而我就好似去過, 但唔太肯定, 真係無記性呢!!

估唔到太陽咁猛, 行o左一陣已經好焗好熱呢!!

沿路好多海味舖呢!!!

仲有曬乾o左o既河豚呢!

老公1湊4, haha!!!

妹妹熱到面紅紅呢!!

行o左一陣太熱, 臨去食lunch前買o左幾隻蟹!!

開餐, 好豐富呢, 不過味道就正常啦, 唔算突出!!!

4隻蟹係呢度!!!

食完飯都近3點, 相量好乘車安排後就call 藍的, 點知打極都搵唔到車, 最後要出double先有車應!!!

臨走我買o左袋章魚同蝦醬, 唔知會唔好味D呢??!!! haha!!

要回程喇!!!

3位小朋友o黎個靚靚合照, 好開心Koey Kobe咁鍾意同姐姐玩, 雖然時間係短d, 但將來一定仲有機會再見面o既!!

番渡假屋執好行李藍的到喇!!! 可惜臨走有點怱忙, 都無時間幫Kobe同藍的合照添!!!!

係藍的入面求其影張留念...其實都睇唔出係藍色...

藍的去到東涌就要轉紅的番屋企喇!!!

Kobe Kodi訓o左都唔奇, 連Koey都攰到訓著就真係好難得呢!!!

而我, 訓得2個鐘都唔識係的士訓, 真係天生妹仔命...有覺都唔識訓!!!!

番到屋企, 我同老公都忙於執拾, 我邊忙邊催促小朋友除鞋洗手, 但佢o地叫極都唔郁~~~

本來諗住影下屋企有幾亂同埋Kodi番到屋企好自在....點知...

...點知, 我留意到Kobe訓係地下默默咁流緊眼淚, 眼淚仲滴埋落地下...

噢, 傻豬仔咩事呢?

我走埋去安慰Kobe, 問佢咩事, 問佢係咪唔想咁快番到屋企!!! 

佢含住泡淚扁住嘴點頭, 之後就一發不可收拾: 媽咪呀~~~~嗚...

之後就攬住我喊喇~~~

細佬一喊, 家姐都忍唔住喊, 估唔到2位小朋友咁唔捨得呢2日1夜!!!

唔知點解, 雖然佢o地喊得好陰公, 但我又忍唔住覺得佢o地好可愛, 所以我做手勢示意老公拍低呢個畫面, 好好記錄呢一刻!!

如果無估錯, Koey Kobe應該係好掛住相處o左兩日o既姐姐, 掛住渡假屋, 沙灘, 牛, 藍色的士, 甚至好多好多蚊...呢d全部都係平日少見o既事物...總之成件事對佢o地o黎講實在好新鮮好夢幻 (其實同去廸廸尼感覺差無幾呢!!), 又難怪佢o地咁唔捨得呢!!!

...估唔到小小年紀已懂離愁別緒，感情特別真摯，此情此景真係特別珍貴, 要好好記住呢！

喊o左一陣, 連妹妹都喊埋, 似乎情緒俾哥哥喊聲影響埋呢!!!

因為我走o左去抱妹妹, 細佬無人攬, 喊得好慘...好彩, 喊o左唔算好耐, Koey Kobe都終於冷靜番落o黎, 沖埋個涼就回復番正常一樣, 小朋友真係又善變又可愛呢!!!

o黎緊下星期一家五口去台中，仲要同好朋友靖靖一齊去，到時唔知小朋友會唔會更失落？定係去太耐會想家多d呢？

一齊拭目以待吧！