鐵人媽媽1湊3: fc大日子

顯示具有 fc大日子 - Koey/Kobe生日 標籤的文章。顯示所有文章

2018年6月21日星期四

Koey 6-7歲發展記錄!

Koey七歲喇! 其實發展方面, 除o左甩o左6隻牙外, 都同往年分別唔大吧！最大唔同應該係升o左上小一番全日班，開始要過沒有休息，沒有創意，沒有思考空間o既生活吧！

呢兩年都無晒BB味喇, 睇番相, 覺得5歲或之前仲有Baby Face好可愛呢!!

自理能力：呢一方面繼續表現優秀，開學初期已經係自己執書包做功課，o係我無幫手下只係間中欠帶書欠功課，雖然佢怕欠帶而成日帶書有多無少搞到書包好重，但整體上我真係好滿意o架喇！

學業：升o左上小學開始要講學業喇！Koey第一次考試成績雖然唔太差，但其實觀乎佢對學業功課都唔太上心，自覺性比較低，難集中亦未明咩係讀書時讀書，遊戲時遊戲或先苦後甜o既道理！

興趣：唔愛睇書唔鍾意英文同體育，鍾意宗教同音樂，唉，雖然佢由上年學琴到而家都話鍾意，但始終覺得佢有欠資質，但佢興趣方面又似乎好consistent咁鍾情音樂，唯有希望我睇錯，亦希望佢快快show到俾我睇佢o既潛質啦！

缺點：慢！呢點都係我同Koey起衝突o既最大源頭！我做事快但佢超慢，好多時令我無名火起！簡單如叫佢飲o左佢面前o個杯水，咁輕而易舉咁順手佢都唔即時飲都算，最嬲係佢15分鐘甚至30分鐘後杯水仲係度，而佢可能仲係坐o係枱面但已經完全忘記我叫o左佢10次要做o既事！！！我承認我的確太急往往要求小朋友即時回應我要求，但好似佢咁完全無視我要求或因為自己分心而忘記要做o既事，我真係覺得好大問題！

易分心：正如上面所講，叫佢飲水佢好多時會分o左心做o左其他事，而做其他事時佢其實又好專心！！其實，我真係唔肯定呢個係缺點定優點，既然自己諗o既主意佢可以好專心咁做，咁究竟我要點先令到佢專心做到佢“應該”要做o既事呢？？我到而家都未有方法！

無手尾：呢樣只能怪爸爸遺傳吧！食完o野經常唔抹嘴好污糟，去完toilet唔熄燈關門，飲完水唔擺杯，拎完文具用完唔放好等等，好多時d剪刀打孔機被發現o係唔應該出現o既地方有4成都係佢做，另外5成就係爸爸，剩餘1成先係我同細佬所為😅！最恐怖一次係我o係佢視藝袋搵o野，竟然發現7-8張用過，成張都係不同顏料，有d仲係微濕一堆咁o既濕紙巾o係袋底，我有理由相信堆紙巾已經堆o左大半個學期，o個種核突感我真係唔明點解呢位小姐可以接受得到，真係超恐怖！(後補：最近又發現佢書包側袋都塞左超過五六張用過o既廁紙無掉，佢用過o黎抹鼻涕都唔奇，就咁放係度唔知收埋幾耐，諗下都幾嘔心...)

有主見：相對細佬妹，家姐主意都幾多，所以細佬妹都好鍾意爭住要家姐陪玩，不過男女始終有別，家姐似乎鍾意同番妹妹玩斯文玩意多d，唔知妹妹再大d同家姐再close d 家姐會唔會冷落細佬呢？

總結：其實除o左慢之外， Koey大至上都係人見人讚，幾受同學仔同老師愛戴o既小朋友，獨立有主見唔使大人太費心照顧，的確係好乖，希望佢越大做事可以更爽快咁就真係令我最放心！

聽聞香港d小朋友八九歲開始就扮大個，小朋友gathering已經唔會玩低b小朋友玩意，希望koey唔好咁快失去童心，可以響受多幾年無憂童年就好喇!

520, 乖囡Koey!

2018年5月8日星期二

Kobe 4-5歲發展記錄

終於有時間記錄番Kobe 4-5歲呢年o既發展！

身高：115cm,繼續跟住90%條線！

體重：46lbs, 睇番半年前44lbs, 唔怪得近來多o左人話kobe大個o左好多又瘦o左啦！

唔輸得，乜都想鬥快鬥勁！

好o既方面當然係食飯沖涼做功課乜都快，好切合現今社會同媽咪要求，但壞面就當然係輸唔起啦！有時輸o左會喊，其至知道自己就輸時就話唔玩，好無體育精神！再衰d就係會為o左快為o左嬴郁手郁腳粗粗魯魯，老師家長日都話過我知Kobe試過襯老師無望到推開同學仔被同學仔投訴，roller時又係成日要同人鬥快拉扯推撞，有時真係幾勞氣！

牛高馬大但膽小怕事！

雖然好勝，但Kobe膽小怕新事物，怕黑畏高日光日白都唔敢一個入房話怕有人或怪物，大部份公園樂園入面較有挑戰性o既活意都唔敢玩唔敢試！所以我成日覺得只能用“牛高馬大”而唔係“高大威猛”o黎形容佢呢！😅

雖然我都明天生畏高唔係咩錯，但正因為佢高大，好多時大人包括我同老公都會以家姐個standard去對待Kobe, 認知上可能我地會少d犯呢個錯，但活動能力上，有時真係唔係有意，但往往就會忍唔住話家姐做到佢做唔到，久而久之令Kobe自信心比較低，成日對自己無信心試新事物呢！

自信心不足

又好勝又自信低，其實都幾難搞，所以一做唔到佢就好唔開心！好似做功課咁，我對佢其實零要求，只要睇得明寫咩我已收貨極少刷，但掉轉佢對自己有要求，明明唔太差佢都刷完又寫寫完又刷搞到自己喊，有時又會臨番學先好緊張功課做成點，想刷過再做！

對於欠自信呢點，我有時都唔知點做，唯一可幸就係佢做事爽快，我成日會多讚佢呢樣希望令佢信心加強！加上佢有學roller家姐無，希望佢有樣o野叻過家姐都有助令佢更自信啦！

姐弟妹感情方面

極黐家姐，無o左家姐好似無o左人生目標咁，家姐一同阿妹或其他自己朋友玩而冷落細佬時，細佬就成日好慘咁喊住話我知：家姐唔陪我玩！次次都真係好慘情失戀咁，睇見都可憐！試過問佢有無好朋友，佢都係答家姐，見到佢咁愛家姐有時真係覺得好sweet! 不過誇張到家姐唔陪佢就喊兼乜都唔願自己玩就麻煩d，呢樣應該又同信心有關，慣左家姐帶住壯膽，無o左家姐就打回原形！

至於對阿妹，呢一年好似無之前一年咁粗魯，可能識得分輕重，會令妹妹受傷，又或者阿妹惡左唔敢再hup得太勁吧？！不過，令阿妹撞親o既舉動仲係唔少，有時都幾激心，試過我睇電話相片入面係阿妹都要隔住個mon扮打相中阿妹(阿妹不在場)，又成日教阿妹粗魯野，真心令我費解，究竟佢對阿妹o既感情係點o既呢？雖然粗魯，但有時又會攬住阿妹鍚，唔通係又愛又恨？？？

最後，簡單再記低我呢一年留意到Kobe o既性格愛好先！

食: 食飯快，但嫌三嫌四，一開飯就頭痛咁款，除烏冬通粉係鍾意外，其他所有款式麵食同飯都唔鍾意，最愛食外賣(其實即係話我煮得差o者...), 咕嚕肉食極唔厭, 最怕cream狀物, 醬汁太多都驚！

運動：單車Roller都鍾意, 老公同佢踩出吐露港，都話佢爬頭轉急灣都頭頭是道，不過叫佢學又話唔好！學泳半年仲未識，所以唔鍾意游水！

知識：開始極怕英文書，我一拎起就叫救命咁，講緊時會遊雲，搞到我好頭痛！不過比家姐好o既係佢會自動拎中文書睇，雖然大部分時間係百科全書類，但因此識o左勁多字，希望都有助培養佢將來自己睇書o既興趣啦！另外開始對數學有興趣，相信爸爸最開心！

番學方面，有少少玩得熟o既朋友，但由K1開始到而家都係唔鍾意番學，放假最開心，有時長假後會有情緒，試過失驚無神喊住發脾氣話唔番學或係都要媽咪送番學！

說話能力方面, 過去呢一年睇o左幾次言語治療, 發音方面隨住Kobe好勤力睇書同肯讀之下, 都改善o左8成, 而家差幾個音仲未可以正確發音!!! 不過見佢問題唔嚴重同佢肯糾正, 所以我地最後都無再報任何治療課程喇!!

訓：呢一年終於少左好多半夜叫(之前成日半夜eeaa嘈)，亦終於完全唔使午睡，無o左下午坐坐下sofa訓o左o既情景lu！

有時真唔捨得比較嗲o既乖仔大得咁快，而家佢重到抱都抱唔起喇，相信佢下一年一定更大個仔，希望佢下年能建立多d自信，多d主見，獨立d！加油呀乖仔，I love you!

2016年12月20日星期二

Kodi妹妹1歲喇!!

Kodi妹妹1歲喇!!!

時間過得真快, 眨o下眼Kodi就1歲喇, 呢一年老公繼續做空中飛人, 全職1湊3 o既生活真係令時間過得好快, 妹妹出世就好似尋日o既事咁!!!

回顧番呢一年, 屋企真係熱鬧o左好多, 每日嘈嘈吵吵就過o左, 不知不覺妹妹就變o左1歲咁呢!!!

Kodi妹妹~

1歲體重: 8.335kg (18.4磅, 30%)
1歲身高: 76cm (自己度可能有誤差, 大約50-75%之間啦!)

性格; 妹妹一出世就o係個咁多人氣o既家長大, 對比起哥哥同家姐, 佢真係特別大聲同惡死, 無辦法啦, 唔大聲唔惡死爭取注意其實自己蝕底, 第二時佢大o左, 真係唔怕佢生存唔到俾人hup!! 另外, Kodi唔太怕生保, 甚至尚算獨立!! 可能因為我未能陪伴太多, Kodi o係唔餓唔眼訓時, 好大部份時間都可以自己一個自娛, 只會間中行入廚房攬o下我腳, 之後又繼續周屋走o係不同地方探險!! 當然, 屋企人氣勁, 家姐哥哥就算唔係陪佢玩都仲會係附近, 所以Kodi唔似家姐細個咁黐身吧!!!

食: 自從妹妹6個月加固後, 我o既奶量亦直線下降, 所以妹妹6個月後明顯瘦過之前好多!!! 本來妹妹出世時, 我目標係想餵到好似Kobe咁2歲先停, 但觀乎而家狀態, 人奶之路能夠捱到而家1歲, 我已經覺得好難得!!! 另外, 唔知係咪細佬o個陣訓練有素, 妹妹而家半夜仲有醒1-2次食奶, 但我竟然一d都唔覺得辛苦, 為免奶量再降, 夜晚醒多幾次又有乜所謂?!

最近, 妹妹開始接觸更多大人食物, 開始俾佢黐少少大人飯餸內o既魚, 包, 飯等等, 佢一試愛上, 而家日日好似餓鬼咁乜都想食, 睇見佢呢排好似肥番少少唔再太瘦我都好開心, 希望佢再大d食o野好似哥哥咁又快又多咁叻啦!!

Potty Training: 同家姐哥哥一樣, Kodi由6個月開始我就同佢坐potty去便便, 近來成功率開始上升, 出街無再去大大, 會等到番屋企坐potty先去, 好叻!!! 希望佢快快識主動出聲示意啦, 咁就仲方便喇!!

體能發展: 呢樣都算係Kodi最令人驚喜o既一樣!! 一直覺得男孩子大隻d力量強d所以早d識行, 點知瘦瘦o既Kodi竟然比哥哥更強, 6個幾月就識扶住企, 7-8個開始間中唔使扶自己企起身, 未夠10個月識自己踏1-2步, 直到11個月多d真正識行, 而家妹妹o係屋企已經好少爬, 行得好穩喇, 有時見到呢個人仔細細粒咁行行o下真係好得意呢!!!

說話能力: 近呢個月Kodi又多o左幾個新發音!! '波波', ' bye bye', '擺(物件)', '爸爸' 呢幾個發音越o黎越準, 計埋之前識o既Wawa (所有動物或卡通/毛公仔, 花花草草都係呢個發音)同Mama (食物, 或有人蝦佢叫救命咁解!), 再加埋近日無乜意思o既Dada同Nana, 有時妹妹會一串咁講呢幾個音, 好似學大人講o野咁, 好搞笑!! 希望佢快d識叫我做'mama'啦, 佢基本上叫咩人都係叫'baba',真係等得我好心急呢!!!

智力發展: 坦白講, 媽咪我真係分配唔到太多時間去理/教Kodi, 感覺上好多玩具佢都似係'無啦啦'識咁!!! 穿圈圈, 疊高積木, 擺物件入盒, 擰頭up頭, 扮著鞋著襪, 學家姐哥哥拎筆畫畫畫, 玩小明同火車捐山lone...總算應識o既都自動識o左!!! 就好似哥哥Kobe咁, 當年我都係好少時間'教', 但而家一番學就自然學識, 所以我都唔太擔心, 更何況, Koey Kobe做榜樣, 佢第二時學o野應該都唔會太慢吧!

2016年4月18日星期一

Happy 3rd Birthday to Kobe!!!!

Kobe仔3歲喇!!!

過去呢一年Kobe仔進步不少呢:

說話能力: 之前Kobe將所有'G'音變晒'D'音(e.g. 哥哥讀成'dor dor'), 2歲9個月左右忽然改o左!! 長句子o既表達亦越o黎越好, 甚至開始學埋大人講o野語氣, 亦極之多問題問, 雖然間中仲係講到甩甩咳咳詞不達意, 但正因為咁佢俾人感覺仲係好BB好可愛呢!

智力發展: 呢樣真係慢過家姐, 除o左學識o左認顏色同數1-20外, 就只係認得幾種動物, 基本上形狀(除圓形), 數字, 英文字都唔識...anyway, 我都唔太擔心o既, 佢因為認thomas佢好叻, 所以我知佢只係未有興趣去認, 而唔係無能力認o者!

體能發展: 呢樣不嬲都係強項, 2歳半左右己經可以踩家姐部單車, 爬高爬低全無問題, 有望3-4歲呢年內可以學識唔同輔助輪添呢!!!

自理能力: 2歲多D個暑假用o左一星期就成功戒日片, 夜片亦都係2歲半左右自己話唔著, 好叻仔! 但著衫著褲著鞋著襪呢d都係近期先叫主動做多o左, 直到而家為止啪鈕同扣鈕都仲未識, 呢樣真係慢D!! 另外餵食飯呢下都仲未戒, 雖然餵佢佢都好合作, 大大啖好快食晒, 但始終自己食會更好呢!!

手足相處: 同家姐一時friend過打band, 一時就郁手郁腳...男仔粗魯d都明, 但整損家姐就太離譜...有時對住佢日日話'最鍾意'o既妹妹都會好粗魯, 有時望少陣都會搞到家姐阿妹喊住抗議, 真係無晒佢符!! 不過overall Kobe都算鍚家姐妹妹o既, 最終於家姐做乜佢做乜, 執家姐口水尾講o野, 亦會成日問家姐意見, 有時真係聽家姐話多過聽媽咪話!! 阿妹出世後, Kobe簡直多o左個小情人咁, 日夜係咁鍚阿妹攬阿妹, 仲成日話'好鍾意妹妹'添, 自從妹妹出世後, 媽咪o既地位就被取替, 而家我要叫佢佢先會鍚我呢, haha!!!

o黎緊呢一年Kobe開始讀書喇, 希望佢順利適應學校生活, 繼續keep 住佢個甜甜笑容, 健康快樂咁成長, 同家姐妹妹相親相愛!!

I love you Kobe!!!

2014年10月19日星期日

Kobe仔1歲半喇!

Kobe仔1歲半喇!!!

重: 11.5kg / 25lbs (80%)
高: 83cm (75%)

呢個月又進步o左唔少喇!

食: 早晚仲埋身食緊人奶, 雖然供應唔太多, 但Kobe仔仲係好喜歡!! 清晨6點幾一定會叫食奶, 有時抱o左佢去大人床佢會忍唔住哈哈笑!!

正餐方面, 佢對自己d粥仔越o黎越無興趣, 加上上個月腸病毒後成個人瘦o左個碼, 我想佢快d食番多d o野, 所以我終於放棄煲粥仔喇, 比Koey早半年有多呢!!! 改o左食大人o野後, Kobe仔真係食得好o左好多, 肯自己畢, 又大啖又食得快, 睇見佢咁'為食', 同家姐好大對比, 真係覺得好開心, 希望佢可以維持落去, 咁我就唔使擔心佢好似家姐咁細食....呀, 都有o野要擔心, 就係Kobe仔餐餐無肉不歡, 成日指住d肉要食(佢已經出緊第16隻牙喇, 食肉無難度!!), 雖然未識拒絕食菜, 但睇怕多肉少菜都係唔少男仔會有o既問題, 要留心先得!!

剛病完無耐, 瘦o左個圈!!

好彩食得訓得, 呢排好似回復番之前咁o既身形喇!!!

開hiu了, 開hiu了, 不過係我開hiu!!! 我唔再怕佢食到周圍污漕晒, 任Kobe仔自己畢, 多數每餐都可以自己食到一半, 比家姐而家仲要餵好好多!! 由於Kobe仔好肯食, 所以食幾多我亦由佢自己決定, 唔會好似家姐咁怕佢食唔夠而迫佢食!!!

訓: Kobe仔雖然戒o左夜奶, 但一直仲係半夜醒幾次, 等我仲成日懷疑佢係咪無'一覺訓天光'o既能力時, 奇蹟終於出現!!! 大約3星期前左右吧, 佢終於多o左一覺天光喇!!而家佢9點幾上床訓, 多數到5點幾6點天光先會叫'mama'要求食奶, 好間中先會3點幾4點叫o下, 但多數拍兩下就番訓, 清晨過o左大人房食奶後多數都可以訓到家姐起身嘈住, 或者到8點幾先醒, 間中直接6點幾起身!! 雖然我要5點幾6點起身餵奶, 但總算重拾'一覺天光'o既樂趣, 我已經好欣慰o架喇!!!

午睡Kobe仔都唔可以一覺訓晒, 到而家都仲會斷開訓, 所以下午家姐番學後, 我o既free time實際上比想像中少, 因為Kobe成日訓到中段就叫我抱佢再訓!!

語言能力: 雖然仲係講緊單字, 但今個月進步都唔少o架喇!!! 暫時唯一會講o既詞語係'提子', 唔止識講, 仲好鍾意食...um...可能係好鍾意食, 所以好有興趣講都未定!!

段Video都差唔多show晒佢早兩星期識發o既音, 但小朋友要學起上o黎真係學得好快, 而家佢仲識講熱, 凍, 燈, 凳, chi (肚臍), 鼻, 眼, 頭, 到 (撘lift會跟我講'到'), Bi (Baby, Kobe, P.S. 呢排唔肯認自己做沛譽, 但Kobe佢就會笑住up頭認係自己!!), 得 (問佢得唔得, 佢識答'得'!), 未 (得未? 未), 豆豆, 蔔, 摸, 跌, 唔好, Mit, 抆, 抱, 無, 奶奶, 魚魚, 亦 (肉), 白 (小白鷺), 的(的士), 單 (單車), 巴 (校巴/巴士/小巴) 等等, 開始不能盡錄喇!!

唔知過o左歲半, 佢會唔會好似家姐咁語言能力進步神速呢??!! 不過問心, 有個嘴gel gel o既家姐, 我就唔係太想細佬咁快嘴gel gel喇, 講耐d BB話可愛d, 嘻嘻!!!

四肢發展: 襯接送家姐上校車段路Train Kobe仔行多d, 基本上全程都乖乖拖住, 係每日回程時要抱一陣, 都算幾好, 不過暫時出街都唔敢唔帶車仔住, 怕佢眼訓又怕佢扭抱, 話晒佢而家都唔輕呢!! 上樓梯已經進展到扶住牆邊可以自己好似大人咁一步一級上 (唔使兩隻腳上晒同一級先再上!), 落樓梯亦好大步, 雙腳連跳十下更加係易過食生菜!! 雖然成隻馬騮無時停, 但唔知係咪大個仔o左, Kobe仔好似無早兩個月咁'唔知驚', 少o左玩跳sofa或做其他危險動作, 希望佢無想像中咁百厭就得喇!!

百厭星o既傑作!

扭抱個衰豬樣!

情感: Kobe仔最黐緊係我啦, 特別係想食奶訓覺o個陣, 但俾佢睇相, 佢又會唔理我, 剩係識指住爸爸叫'babababa', 問佢媽咪呢又或者指住媽咪, 佢就會擰頭唔笑, 一指番爸爸就笑番, 激死!!

性格方面, 絕對係大喊大笑型o既爽朗男孩!!! 玩到癲同發脾氣都會尖叫, 呢頭喊緊俾人一引轉頭即笑, 仲要好多時係咭咭聲大笑, 咁就會唔記得自己喊緊!! 同埋唔知係咪男仔始終大方d, 同親家姐爭o野玩, 只要同佢講'輪住', 或者解釋係家姐o既, 佢就會好快乖乖自己俾番家姐玩, 唔再爭, 真係好乖仔好扺鍚!!! 有時因為佢o既大方, 家姐亦會跟住大方, 玩一陣就讓俾細佬玩, 有時睇見佢o地咁互愛互讓, 我都會好開心好欣慰, 希望佢o地兩姊弟可以Keep住咁相親相愛一齊長大就好喇!!!