上篇(
愛.喜.行 慈善步行籌款 暨 園遊會 (2月8日))提到我得到
Yes-Parents邀請, 決定唔怕早起唔怕遠, 挑戰一下自己, 一家大細參加2月8日, 由「生命熱線」舉辦o既「
愛.喜.行 慈善步行籌款 暨 園遊會」活動, 身體力行支持「生命熱線」
o既預防自殺服務作推廣同宣傳, 亦要趁呢個咁好o既機會, 向Koey進行生命教育!!!!!
眨o下眼2月8號到喇!
早一日我就整o左小朋友最愛o既'蘋果汁' (其車係洛神花果茶) , 執好行裝, 呢朝7點半起身梳洗換衫食包, 雖然真係幾衝忙, 但總算趕及8點25分出門口, 9點15分準時去到金鐘坐上大會安排接送去大潭o既shuttle bus!!! YEAH, 挑戰早起成功!
金鐘到大潭雖然有shuttle提供, 但車程唔短, 加上山路多彎, 我同Kobe仔都暈車浪作嘔, 好彩嘔o左少少後我o地都好快回復狀態, 無影響之後o既活動...挑戰遠征大潭尚算成功啦!!! HAHA!!
去到大潭童軍中心會場, 當時已經好多人喇, 我o地先去搵Yes-Parents o既聯絡人登記，拎大會T恤, 免費小食遊戲券同親子競技活動入場券, 換好衫之後當然係影下相啦!!
Koey搶住要自己貼貼紙, 睇o黎佢都好期待今次活動咁呢!!!
活動起步禮於10點半舉行, 本來想叫Koey 坐低睇, 點知d椅子貼晒名, 於是我o地就唔敢坐喇...
起步禮頒獎俾籌款同參與人數有出色表現o既團體, 大會仲請o左紫珊姐姐同小肥做活動嘉賓添!!
隨住彩色笑面氣球昇上高空, 活動亦正式開始!!!
出發!!
起步無耐就見到兔兔, Koey主動話要合照!
影完相, 老公子話我知見到Harry哥哥一家都有參加活動, 噢, 掛住影相miss o左添!!!
好, 睇番今次步行路線:
全程約五公里, 由童軍中心出發數, o係大約第一、四同六o既箭嘴位置都有checkpoint, 會有工作人員貼貼紙到我o地身上o既batch度, 貼齊3個貼紙回程番去童軍中心就會有小禮物!
o係第一個Checkpoint之前, Koey都係自己行o既~~
但由於之前起步禮比想像中長, Koey企足全程又聽唔明, 又攰又悶之下, 行o左唔係太耐佢已經跌跌o地watt...
難得去到大潭水塘, 當然要邊行邊影下相啦!!
Koey已經支持唔住, 終於要迫埋上細佬架戰車休息!!
過o左第二個checkpoint, 上山路段開始比較斜喇!!!
開頭有氣有力, 老公子仲可以扮下'辛苦', 但後尾就真係唔講得笑喇!
見人影我又影, 係吊鐘花呀, 好靚!!!
上山段路又斜又長, 我同老公子輪流推都推到無晒力...同一時間, 我o地亦開始見到有參加者已經回程落山, 唔知我o地仲要推幾耐先到頂呢?
'哇~~~~'
忽然間, 車仔傳o黎家姐扭計喊聲, 原來兩姊弟迫住坐得耐發生d小推撞, 細佬粗魯係咁推坐後面o既家姐!! 為o左調解糾紛, 我o地唯有停埋架車一邊同小朋友'訓話', 仲'罰'細佬落車仔唔俾坐車, 直到佢肯同家姐say sorry 為止!
就係咁訓一 訓話, 再加上細佬要自己行上斜, 本來已經行得唔快o既我o地就更加慢了!!!
唔知係咪坐得太耐車仔, 忽然有得落地活動一下, 細佬竟然一路跑上斜一路破涕為笑!! 真係估佢唔到!!
你睇細佬幾Happy!!!
由於上斜路段太長, 細佬好快就攰, 最後都乖乖say sorry同應承我唔再推家姐, 所以細佬行o左一陣又同家姐繼續坐車仔上山喇!!
推呀推, 上呀上, 咦!!! 咁熟口面o既?? 原來係Harry 哥哥呀, 佢o地一家已經回程落山喇! 由於大家打照面, 我就大擔要求合照, Harry 哥哥仲叫一推二上山o既老公子加油添呀, 真係好nice呢!!!
終於上完斜, 去到大潭副水塘見到第3個checkpoint喇, 但原來仲要兜個大圈回程先可以貼埋第三個貼紙!! 好, 繼續努力!!!
水塘入面d錦鯉好大條好肥美呀, 呢度一定好食好住喇!!
水塘塘邊一層層o既紋理好特別呀!!
呢個時候, 兩個小朋友忽然又好friend, 充滿活力咁又笑又叫, 又同o係途中遇到o既義工Hello ByeBye, 做o左途人o既開心果!!
落斜比上斜舒服, 加上小朋友玩玩笑笑, 上斜時覺得走極都唔完o既路, 落斜時眨o下眼就行完呢!!
陽光照耀下o既蘆絮~
終於, 我o地一家四口用o左大約1小時45分行完5公里路喇!!!
雖然Koey大部份時間坐車, 但都算挑戰5公里成功!!! YEAH!!
番到童軍中心園遊會場地已經近1點, 有好多參加者已經o係度排隊拎嘉許狀、小禮物(原來係餅o黎!)同午餐飯盒, 我同老公子決定分頭行事, 我先帶小朋友去場邊坐低Settle Down, 老公子就去拎飯盒!
兩隻過晒鐘未食Lunch o既餓鬼見到餅餅即刻琴琴青爭住食!!
Koey更主動話要自己拎住個飯盒'畢', 唔使我服侍餵!!!!
食肉獸Kobe見到我食飯盒內o既沙律菜竟然主動話要食, 食完覺得好味仲不斷Encore!!!
神奇哩~~~睇o黎呢兩位小朋友真係 極。肚。餓!!!!!!!!!!!!!!!!!!!
食完飯, 我o地就用綿花糖券換綿花糖食!!!!
小朋友一見綿花糖就笑晒!!
果然係...
嗒
晒
糖!!!!
食食下綿花糖, 兔兔又出場喇!!!
之後老公子去買雞髀!!
睇下, 有隻等食o既雀仔呀!!!
應我要求拎住嘉許狀合照!!! 個pose又擺得幾pro喎!!!
餅餅出場, 又食過!!
我就襯呢個時候行o下會場~~~~
會場都幾大o架, 相中間位置有參加者擔晒椅子坐, 因為有音樂表演呢!!
有三個充氣彈床, 小朋友見到就最開心~~~
作為生命熱線 「愛.喜.行 慈善步行籌款」的「親子伙伴」, 當然唔少得Yes-Parents o既義賣攤位啦!!!
行完一圈, 小朋友都食完餅餅喇, 係時候去玩吹氣彈床喇!!!!
睇o下佢o地玩到幾開心!!!!
不過開心o既時光永遠都過得好快, 又係時候講bye bye喇!!! 其實我本來仲想玩埋親子競技遊戲先走o架, 但我o地都已經玩到有d攰, 加上仲要'長征'番屋企, 所以我o地2點半就上o左最早班shuttle 出番金鐘, 結束今次大挑戰喇!!!
番到屋企, 我試圖向Koey解釋今次活動背後o既意義係可以'幫助有需要o既人', 不過Koey始終太細喇, 基本上佢係'完全唔明'!!!! 唔緊要啦, 想信將來參加多d同類活動, 佢就會慢慢明白o架喇!!!
臨訓前, 我好似平日咁問Koey呢日有咩開心事, 佢答我: 去行山囉!!!!
又估佢唔到喎, 仲以為佢行一陣就嗌攰要坐車仔, 實係覺得好辛苦唔好玩呢!! 知道佢原來都好鍾意今次o既親子健行活動, 我就放心喇, 咁第二時再遇到咁有意義o既活動, 我就可以放心再帶埋Koey Kobe一齊參與喇, YEAH!!!
最後, 我要特別多謝
Yes-Parents o既邀請, 佢o地唔係PR公司, 係義務與生命熱線合作, 係今次活動的'親子伙伴', 都係多得佢o地
協助招募家庭參與同進行義賣, 我o地一家先有機會參與今次咁好玩咁有意義o既活動, 希望出年再有機會參與啦!!
.jpg)
.jpg)
.JPG)
.JPG)
