其實佗Kodi時Kobe先剛夠2歲, 對於Kobe喜唔喜歡BB同對做哥哥o既Concept我都唔係太了解, 所以有妹妹前主要都係向Koey套心聲為多, Kobe傻豬豬咁有樣學樣話鍾意BB, 我都不以為意!
一直到我大肚7-8個月吧, 有一次帶埋Kobe去探朋友BB...
當日有兩個2個月大o既男BB仔, Kobe好有興趣抱同鍚BB面仔, 表現同平時o既佢好唔同, 係好溫柔同小心o架!!
我先發現, 原來, Kobe都幾鍾意BB呢!!!
自從呢次探完BB後, Kobe仔對BB o既興趣就一觸即發咁, 越見明顯喇!!
例如: Kobe會成日主動鍚我肚皮, 問妹妹係咪BB o黎, 係咪好細個等等!!
出街見到鄰居o個對1歲大孖女又會係咁摸人o地面仔同拖BB手仔...
估唔到平日對家姐粗粗魯魯o既Kobe都會有溫柔一面, 似乎, Kobe好有潛質做個好哥哥呢!!!
不過...
平時o既Kobe仔都好嗲媽咪好黐身o架, 雖然發現佢好鍾意BB, 但見我日夜抱住BB, 到時佢會唔會真係唔呷醋呢??
好喇, 妹妹出世喇!!
Kobe對妹妹真係好有興趣!!!
雖然...頭2日因為見唔到媽咪點都有D唔自在, 尷尷尬尬同唔合作發o下脾氣在所難免...
o係妹妹出世2-3星期時...
Kobe: 媽咪, 去醫院塞番妹妹入個肚度, 要試下~
我: o下?
Kobe: 試下~
我: 塞番妹妹入我個肚度?
Kobe: 試o下呀~
我: 唔得喎, 妹妹大隻o左喇, 去醫院醫生都塞唔番入去o架喇~
Kobe: 要試o下~~
我: 咁塞番妹妹入去你咪無得鍚妹妹囉?
Kobe: 要試o下~
雖然全程Kobe都係笑笑口咁講, 但聽到佢咁講o個陣我都難免有d緊張, 係咪Kobe呷醋, 唔鍾意媽咪成日抱住妹妹, 所以先會咁講?? 係咪我呢排真係太冷落o左佢, 理少o左佢呢?
好彩, 自從佢咁講完後, 佢由早到黑咁鍚妹妹面仔o既場面都無減少到, 我先無咁擔心!!! 不過間中情緒化同唔合作就真係比以前多o左o既, 睇o黎佢只係想爭取大人多點注意, 並無因為我成日抱妹妹而將情緒發泄o係妹妹身上!!
Kobe真係好'鍚'妹妹o架, 有片為證:
對妹妹極之好奇, 成日問妹妹點解咁細個!!
拍片前完全發自真心主動搖妹妹
我去'了'妹妹時Kobe多數都會參與, 片中仲成日拖住妹妹手仔!! 相對上家姐都有同妹妹玩, 但真係少好多, 鍚妹妹面更加少, 多數叫先會!!
基本上, Kobe真係日日夜夜都不停鍚妹妹面仔!! (流住鼻涕鍚都時有發生... :p) 睇得出佢真係好鍾意妹妹, 只係佢仲有少少唔習慣媽咪對佢關注少o左而仲有D脾氣同唔合作o者, 希望隨住妹妹長大越o黎越多反應同埋唔使媽咪日夜貼身照顧, Kobe會快d適應多o左個妹妹o既日子, 唔好再叫東去西咁唔合作就好喇!!
妹妹, 你有呢個肉緊哥哥愛鍚, 其實真係好幸福呀!!!
最後, 希望Kobe仔大個繼續都係咁愛惜妹妹, 最後就學埋愛惜家姐, 對家姐少d粗手粗腳, 做個'周紳士'咁就最好喇!!!
