Kodi妹妹1歲喇!!!
時間過得真快, 眨o下眼Kodi就1歲喇, 呢一年老公繼續做空中飛人, 全職1湊3 o既生活真係令時間過得好快, 妹妹出世就好似尋日o既事咁!!!
回顧番呢一年, 屋企真係熱鬧o左好多, 每日嘈嘈吵吵就過o左, 不知不覺妹妹就變o左1歲咁呢!!!
Kodi妹妹~
1歲體重: 8.335kg (18.4磅, 30%)
1歲身高: 76cm (自己度可能有誤差, 大約50-75%之間啦!)
性格; 妹妹一出世就o係個咁多人氣o既家長大, 對比起哥哥同家姐, 佢真係特別大聲同惡死, 無辦法啦, 唔大聲唔惡死爭取注意其實自己蝕底, 第二時佢大o左, 真係唔怕佢生存唔到俾人hup!! 另外, Kodi唔太怕生保, 甚至尚算獨立!! 可能因為我未能陪伴太多, Kodi o係唔餓唔眼訓時, 好大部份時間都可以自己一個自娛, 只會間中行入廚房攬o下我腳, 之後又繼續周屋走o係不同地方探險!! 當然, 屋企人氣勁, 家姐哥哥就算唔係陪佢玩都仲會係附近, 所以Kodi唔似家姐細個咁黐身吧!!!
食: 自從妹妹6個月加固後, 我o既奶量亦直線下降, 所以妹妹6個月後明顯瘦過之前好多!!! 本來妹妹出世時, 我目標係想餵到好似Kobe咁2歲先停, 但觀乎而家狀態, 人奶之路能夠捱到而家1歲, 我已經覺得好難得!!! 另外, 唔知係咪細佬o個陣訓練有素, 妹妹而家半夜仲有醒1-2次食奶, 但我竟然一d都唔覺得辛苦, 為免奶量再降, 夜晚醒多幾次又有乜所謂?!
最近, 妹妹開始接觸更多大人食物, 開始俾佢黐少少大人飯餸內o既魚, 包, 飯等等, 佢一試愛上, 而家日日好似餓鬼咁乜都想食, 睇見佢呢排好似肥番少少唔再太瘦我都好開心, 希望佢再大d食o野好似哥哥咁又快又多咁叻啦!!
Potty Training: 同家姐哥哥一樣, Kodi由6個月開始我就同佢坐potty去便便, 近來成功率開始上升, 出街無再去大大, 會等到番屋企坐potty先去, 好叻!!! 希望佢快快識主動出聲示意啦, 咁就仲方便喇!!
體能發展: 呢樣都算係Kodi最令人驚喜o既一樣!! 一直覺得男孩子大隻d力量強d所以早d識行, 點知瘦瘦o既Kodi竟然比哥哥更強, 6個幾月就識扶住企, 7-8個開始間中唔使扶自己企起身, 未夠10個月識自己踏1-2步, 直到11個月多d真正識行, 而家妹妹o係屋企已經好少爬, 行得好穩喇, 有時見到呢個人仔細細粒咁行行o下真係好得意呢!!!
說話能力: 近呢個月Kodi又多o左幾個新發音!! '波波', ' bye bye', '擺(物件)', '爸爸' 呢幾個發音越o黎越準, 計埋之前識o既Wawa (所有動物或卡通/毛公仔, 花花草草都係呢個發音)同Mama (食物, 或有人蝦佢叫救命咁解!), 再加埋近日無乜意思o既Dada同Nana, 有時妹妹會一串咁講呢幾個音, 好似學大人講o野咁, 好搞笑!! 希望佢快d識叫我做'mama'啦, 佢基本上叫咩人都係叫'baba',真係等得我好心急呢!!!
智力發展: 坦白講, 媽咪我真係分配唔到太多時間去理/教Kodi, 感覺上好多玩具佢都似係'無啦啦'識咁!!! 穿圈圈, 疊高積木, 擺物件入盒, 擰頭up頭, 扮著鞋著襪, 學家姐哥哥拎筆畫畫畫, 玩小明同火車捐山lone...總算應識o既都自動識o左!!! 就好似哥哥Kobe咁, 當年我都係好少時間'教', 但而家一番學就自然學識, 所以我都唔太擔心, 更何況, Koey Kobe做榜樣, 佢第二時學o野應該都唔會太慢吧!
最新學識: 無!
最後, 唔知係咪我真係比較少管Kodi, 佢到而家都仲未戒到食手指同執頭髮食o既壞習慣, 一到眼訓就狂伸手指入口...我印象中Koey Kobe應該都無食到1歲咁大個呢, 如果佢一直係咁, 睇o黎要諗諗方法治治佢先得!!!
講o左咁多Kodi, 或者我都回顧一下Koey Kobe多o左妹妹呢一年o既變化啦!!!
Kobe: 仲記得Kobe第一眼見到妹妹見佢喊就好緊張想喊咁叫媽咪餵佢食奶, 頭2個月成日鍚妹妹哄妹妹! 見到佢咁冧妹妹我都好開心, 似乎妹妹唔係老公上世情人而係Kobe上世情人咁! 但唔知點解, 隨住阿妹活動能力提高, Kobe對妹妹o既粗魯程度竟然都越o黎越高...
本來係咁...
而家係咁!!!! 大家睇得出Kobe幾肉緊嗎?
而家, 阿妹爬/行到邊佢就阻到變, 又時不時失驚無神攬實阿妹唔俾佢郁搞到阿妹大叫或喊...無錯, 身體接觸係唔少, 但唔再係鍚而係粗暴 o既推撞拉扯...問佢係咪唔鍾意妹妹, 但佢又話唔係, 甚至次次問佢最鍾意屋企邊個佢都係排妹妹第一...
面對佢呢d表現, 我有時真係束手無策, 隨o左鬧同喝止, 我都唔係好識處理, 究竟佢潛意識係咪呷醋所以先會咁? 雖然我可能真係放得比較多注意落妹妹度, 但我都有特意多抱同攬Kobe, 可惜並未令Kobe對Kodi o既行為有所改善, 究竟我可以點做先得呢? 我真係唔想妹妹大個o左會筧得哥哥成日蝦佢, 而唔係保護佢o既好哥哥呢!
Koey: 對比起Kobe, Koey大個d亦明白事理同獨立d, 明顯Kodi o既出現對Koey影響不大!! 雖然家姐不時成為我照顧妹妹o既好幫手, 但佢對妹妹又稍微不夠熱情!!! 曾經問Koey點解咁少鍚或攬妹妹, 佢解釋係怕妹妹口水...咁妹妹又的確係口水妹, 7-8個月之前口水長流又食手指, 的確有d核突, 但佢對妹妹又似乎只限君子之交咁...!!! 希望妹妹再大d比起Kobe無咁粗魯又係女仔, 家姐會越o黎越喜歡同妹妹玩, 建立深厚一點o既姐妹情吧!!!
其實簡單一句, 如果Koey 同Kobe對妹妹o既態度可以係2個o既中和咁就好喇!!!
我: 其實湊2個變3個o既變化比由湊1個變2個少, 所以我只係由'好忙錄'變為'再忙錄一d', 分別唔算太大, 加上我媽咪每星兩個朝早會上o黎幫下手, 所以湊3個o既生活雖然忙, 但總算應付得到!!! 但唔知係咪真係坐月坐得差定只係咁o岩, 鐵人媽媽唔再係鐵打, 我o係妹妹出世至8個月左右, 大半年內重感冒o左4次, 當中2次仲要高燒...希望妹妹日漸長大, 我可以有再多d時間做下運動調理番好d身體應付忙錄o既鐵人生活啦!!!
老公: 唔係抹殺老公湊仔o既功勞, 但老公依舊只能做weekend father, 湊2個變3個對於佢o黎講分別應該好少吧...畢竟湊o既主要都係我...!!!
好喇, 最後最後, 送上Kodi生日o既相片俾大家欣賞!!! Kodi生日正日老公要出差, 所以全家福係提前一日影o既!!!
去相!!!
