回顧過去, 展望將來!

2017年算係鐵人媽媽過得唔太順意o既一年！負能量太多全家都受影響!

開心事：
去o左2次旅行(沙巴 & 花蓮); Koey入到間心儀o既津校, 細佬妹之後都唔使煩，阿妹亦順利入到上午班，可喜可賀; 屋企清理o左好多BB用品，掉o左High chair, Potty, BB床, BB圍欄等，搬o左書櫃出廳，新添置o左個大衣櫃, 換鞋櫈, 鞋櫃同魚缸(雖然仲未正式養魚), 年尾仲換左個蒸焗爐同二手Staub, 又添置o左d兒童玩意如室內千秋， 總之，住o左五年，屋企有一番新景象，再加上12月老公成月唔使出差, 屋企多番d笑聲, 總算係開心o既!


唔開心事：6月同12月都係黑仔月！6月Koey獲派第一志願本來開心到上天，但估唔到10日後就跌o左落地獄！雖然最後雨過天清，但到今時今日我都仲未明白發生咩事，人性險惡，我要學識好好保護小朋友，保護自己！一波剛停，一波又起！6月尾小朋友輪住流感高燒，終於輪到阿妹中招，仲要燒到抽筋！第一次睇見自己小朋友反晒白眼面唇發黑手腳疆硬毫無反應, 真係嚇到我心都離埋, o個種驚恐真係前所未有, 而家都仲有唔敢諗番起o既感覺!!! 兩件事最最最徬徨仲要係事發時, 老公子都係出o左差!! 雖然老公已經最快速度趕回香港, 但o係咁緊張時刻只得我一個o係屋企面對, 有時真係覺得好無助好孤單!!!


9月Koey小一開學, 惡夢o既開始！全日制後要早起，放學後茶點沖涼做功課食飯訓覺日日如是，咩親子時間都無，母女之間只餘催促同跟時間競賽，身心勞累又破壞親子關係，好辛苦！雖然近來Koey搵到快點完成功課o既方法(邊上堂邊做功課)，但我仲未搵到可以提高Koey做事效率o既方法，慢活係佢性格，要改變唔容易亦辛苦大家！講到尾，都係諗唔明點解政府唔留番少少半日制俾好似我呢d FTM多個選擇，而家先小一，遲d高年班加埋細佬妹都升上小學，我一定死更多細胞！


12月破財又傷身! 先o黎整壞焗爐再整壞電話, 單單呢兩樣已經無o左半皮...再加上聖誕網購大出血, 真係跌錢咁跌!!! 以為破財擋災啦? 錯!! 聖誕假期間全家輪住病, 今次Koey燒o左4日, Kobe燒o左2日, 大人如我都又痾又嘔, 老公子都周身骨痛...估唔到呢個普世歡驣o既大節日就係日日困o係屋企咁過, 都算係近年過得最唔Happy o既Xmas呢!!


回顧到呢度，好似都係關於小朋友o既事，咁我自己同老公o既回顧呢？
Sorry, 好似真係無，彷彿我人生已經同自己無關...

其實今年係鐵人媽媽自信心較低落o既一年...特別係今年染上惡習~~食宵夜同夜訓(1am)後!!!

深深o既眼圈、無精打彩o既眼神、仲有肚腩越積越厚o既脂肪...自信心就係咁完全被打殘！所以今年fb 自拍照少o左，有時唔係無影，而係影極都搵唔到張望落精神見得o下人！

點解要自我放棄？我都唔明！阿妹比較夜訓，好多時到夜晚11點我先有自由時間，其實我都好想早D訓,但網購一陣甚至只係睇一陣fb upload o下相就12點幾，時間好唔見使!! 唔知幾時開始幾塊餅乾一支甜筒就好似仙丹咁，唯我獨享o既感覺令人留戀！老公長期出差，就算唔出差都好多時玩手機，拍拖時間嚴重不足 (全年可能不出5小時拍拖時間...而家要我諗可能只得結婚周年我發住燒食個lunch咁多時間...)少溝通加上老公貴人事忙，普通家事可以拖半年以上都未做到，日積月累多番催促破壞感情...宵夜一碗美味即食麵就成為我同老公o既溝通橋樑！年紀開始大加上長期唔夠訓(阿妹仲未戒半夜叫食奶!), 新陳代謝慢到阿媽都唔認得, 試問想fit想靚點可能? 自信滿滿點可能? 心情靚點可能? 心情唔靚就對小朋友越呵刻, 小朋友就越唔聽話, 結果惡性遁環我就心情更差...休息唔夠鎖事繁重溝通不足都係壓力來源, 有時都認唔住諗, 抑鬱症應該離我不遠了...

展望2018, 願望唔多, 希望暑假大旅行順利老公小朋友健健康康!!!! 亦希望老公飛少d, 對家人積極D, 鐵人媽媽有感力有不繼, 好多事要學識放手...希望Kobe今年有望轉上午班, 實現我期待7年之久可以重獲每天3小時自由時間o既願望, 等我有多點時間處理家人自身各樣大小事, 有時間做o下運動釋放多D多巴胺重拾自信同開心能量, 相信咁先有助屋企各人健康開心發展!

Koey升小一後全家之改變

上篇講到Koey升小後小學雞與小學雞媽媽之苦, 雖然Koey做o野滋油的確係升小要面對o既後最大至命傷, 但其實Koey都有唔少值得我讚賞o既地方o既!!!

讚讚乖女

1. 唔賴床: Koey似我一樣, 一叫就醒!! 雖然都時不時會喊咁口嗌"好眼訓"或訓o係梳化唔郁一陣, 但so far咁早起身算合作o架喇!!! 6:50鬧鐘響7:15落樓, 都算快手!!
2. 會自理: 刷牙換衫著鞋番屋企沖涼等等Koey都係自己包辦, 我基本上只係預備早餐同預備佢番學用到o既毛巾餐盒水樽同幫佢紮頭髮!
3. 自己功課自己做, 自己功課自己執: 雖然做功課速度真係慢o左d同有時唔專心, 但自從開學以o黎我基本上都無對過佢功課亦無續本幫佢執書包, 只係佢做到唔明問我先答同埋開學初期從旁協助下執書包!!! 
4. 享受小學生活: 雖然又要早起又要番全日, 放學番o黎仲要做功課無晒玩樂親子時間, 但每次問Koey番小學開唔開心佢都會俾我正面回應, 每次聽到佢話開心我都安樂d, 至少只係我主觀覺得現今小朋友生活好苦而當時人不自知, 咁都算係好事o黎呢!!!

總之, Koey其實除o左慢, 基本上都唔使媽咪我太操心 (其實要我操心我都無時間去操心...😓), 有時催到我忟o既時候諗下佢其實已經算好乖女, 我火氣都真係會少D!!!

鐵人媽媽一湊三生活之改變

Koey升小要早起, 要番全日班呢d改變當然大啦, 但原來Koey升小, 對鐵人媽媽我都有唔少影響!!!

• 接送困難1: 7點15分一拖三送家姐上校車

老公出差我要7點幾1拖3落樓送家姐校車, 呢個挑戰係我事前一直都好擔心o既!! 雖然為此老公子已經同老細表示要飛疏d, 但隔個星期飛幾日點都走唔甩! 

結果呢, 開學幾日後我已經要一拖三7點15分落樓!!!! 

妹妹剛訓醒look~

又估唔到, 呢個事前最擔心o既task無我想像中咁難呢!!!

其實Kobe 暑假尾有o左個電子鐘後就日日6點幾自動波起身, 好似越早起身越叻, 成日同家姐鬥早, 可能因為咁, 我完全唔使叫Kobe起身, 只要臨出門口抱起阿妹就搞掂呢!

因為上校車地點o係屋苑樓下, 呢個task要比想像中無咁難!!!  

不過...好戲在後頭!!! 隨住近來Kobe再無6點幾自動起身, 加上就快冬天個天越o黎越遲天光, 天氣又慢慢會凍, 1拖3落樓應該難度會增加唔少, 又要叫醒小朋友又要同佢o地著外套, 諗起都驚驚, 希望入冬後繼續順利啦!!!

• 接送困難2: 分身接放學

由於細佬讀下午班, Koey平日有一日會上課外活動無校車,  結果1個5點o係火車站落校車, 1個5點15分o係巿區放學, 我一個人跟本分唔到身!!!

所以, 我每星期都要麻煩我媽咪(Grandma)幫手接細佬校車, 我就出去接Koey放學!!! 雖然我知媽咪絕對唔會托手掙, 但始終山長水遠出o黎只係為接一陣放學, 心理上我都會覺得唔好意思!!! 所以, 我真係超級希望Kobe可以轉到上午班, 咁我帶埋Kobe Kodi出去接Koey放學都可以, 唔使下下要麻煩到媽咪又無咩彈性呢!!

• 接送困難3: 浪費Koey做功課時間

無課外活動o既話, Koey 4點半o係屋苑落校車, Kobe就5點o係火車站落校車!!! 計埋行出火車站o既時間, Koey番到屋企基本上得5-10分鐘, 如果我帶埋佢出去接Kobe, 一個來回番o黎平均5點10-15分!! 計一計數, 即Koey每日會無o左40-45分鐘做功課時間!!!!!!

要知道而家d小朋友繁忙到不得了, 呢40-45分鐘真係唔可以白白浪費去接送細佬身上!!! 好好彩, 我搵到個好鄰居佢肯俾我留Koey去佢屋企做功課, 直至我接埋細佬番屋企, 咁Koey d時間先得以更好地利用!!

不過, 都係同上面一樣, 要日日麻煩鄰居都真係會唔好意思, 如果Kobe轉到上午班就咩問題都無呢!!

• 缺乏睡眠, 鐵人媽媽變身"無記性"媽媽

坦白講, 鐵人媽媽每日'放工'後o既私人時間真係超級琴貴, 為o左享受更長"私人空間", 鐵人媽媽絕對唔係早睡之輩, 而家因為要照顧Koey番學, 本來睡眠時間已經唔長o既我就訓得更加少! 

可能因為唔夠訓, 鐵人媽媽由原本"記性唔錯"變為"極之無記性"...開學後, 因為我無細心幫Koey執書包或無記性而先後欠帶過幾次書/回條/視藝袋/功課, 最嚴重係明明Kobe可以著便服回校慶祝中秋節我都竟然搞錯, 完全無o左年事...搞到我都有d自責同急急諗方法改善自己記性!!!

Anyway, 阿Q d諗, 每次欠完我同Koey都有因此小心o左, 所以欠交唔太密o既話其實應該唔係咩壞事呢!!!😜 

• 煩燥媽媽

1湊3少d精力都唔掂, 鐵人媽媽本身EQ唔算高, 小朋友唔聽我講我就好易"燥", 而家...我o既"燥火"簡直就同Koey o既速度成反比!!!! Koey動作越慢, 我就越"催", 越"催"我就越"火"!!! 基本上, 我發火鬧人o既次數比之前真係多好多...

其實鬧完後我自己都好後悔, 但我發覺好多時自己都控制唔到自己...唉...真係苦了小朋友苦了自己!!!!

所以, 為免更進一步破壞大家感情, 我已經將同Koey 溫書o既責任交o左俾牌氣較好o既老公子身上, 相信咁樣對Koey對我都比較好, 亦係好好o既機會俾老公子同Koey更多時間相處!!!

Kobe Kodi生活之改變

唔好以為Koey升小唔關Kobe Kodi事呀!!

• Kobe Kodi 變睡寶寶

一早叫醒小朋友落樓...番上樓後仲未夠8點, 小朋友眼訓嗎??? 佢o地用行動話晒我知!!!

Kodi 9點幾10點開始扭計, 試過幾次攬住我訓番...

哥哥襯阿妹唔反抗抱佢, 冧到呢~~

Kobe其實一向早眼訓, 而家就更加唔使講...

食食o下飯唔願食走去sofa訓o左, 食完訓係sofa睇睇o下電視訓o左, 甚至未食飯就訓o左都試過...雖然有d陰公, 但睇見佢咁訓得我其實好安慰...HAHAHA!!!

• 時間多到唔知點用

如果呢句o野apply 落家姐度就好喇...家姐而家同我傾句閒計都無時間, 但Kobe Kodi就時間多到唔知用o黎做咩好!!!

由於太早起身, 朝早同Kobe Kodi睇完故事, 玩完積木, 甚至睇完一陣卡通落埋街玩後都仲有好充裕o既時間先到Kobe番學, 開學初期同我真係覺得有d浪費o左Kobe o既時間, 好想好想襯佢未升小做大忙人時幫佢報多d興趣班消磨朝早o既時間!!! 

可惜...不論跆拳單車游水定足球都無平日上午班!! 好彩...近來終於湊到幾位Kobe同班同學又夾到Roller教練自定平日朝早上堂, 可以好好利用下d時間, 心理上覺得好d咁呢!!!

• 3姐弟妹感情更進一步

無錯, Koey番o左全日後佢真係連同細佬妹玩o既時間都無, 但以我所見, 每到weekend Kobe同Koey又會一早起身不停吱吱喳喳一齊玩, 感覺就好似兩姊弟o係度把握時間相處玩樂, 補番平日玩少o左o既時間一樣!!!  



其實見少o左爭執都少o左, 感覺上都唔係太壞!!! 

相反, Kobe而家無o左家姐帶住, 佢就多o左追住個妹一齊玩, 兩兄妹相處多o左感情都有進步, 亦係好好機會叫Kobe學o下做大哥哥!!!

上面條片係咪好sweet呢~~~~

當然, 現實呢D場面出現並唔多, 兩兄妹大部份時間都係爭吵尖叫中...但可能呢個就係佢o地兩兄妹之間o既相處模式!!!

總結

總之, Koey升小後, 除o左爸爸繼續努力工作出差外 (其實仲變o左"補習老師", 不過老公子o既改變比起家中其他人都算少了!!), 基本上家中各人都面對緊天翻地覆o既變化!!! 

雖然而家已經開o左學2個幾月, 但坦白講, 大家都仲係處於適應階段, 每日都身心俱疲呢!!! 希望全家人都快快適應, 盡快搵到一個比較舒服, 唔使成日"催促"o既方式渡過只會越o黎越忙碌o既學習生涯!!!

最後, 再次多謝開學後每星期特地出o黎幫手接細佬放學o既Grandma同俾我放低個女大半個鐘做功課o既好鄰居, 唔係你o地, 鐵人媽媽o既1湊3生涯一定更加辛苦, 多謝你o地呢!!!

小學雞與小學雞媽媽之苦

小朋友升小後家長及小朋友面對o既苦況其實唔止一次聽過, 但到真正殺到埋身時, 還是忍唔住覺得好辛苦...


小學雞生活


Koey番o左全日制小一3個星期, 佢o既生活只係得番...

...做功課、沖涼、食飯、練琴、訓覺...

鐵人媽媽o既生活就只係得番...

...催、催、催...


功課以外, 還有甚麼?



想像o下都覺得生活了無生趣呢!!! 基本上, 每當Koey...

• 想分享o下學校趣事咩? ......講唔夠兩句就被我打斷: 好喇唔講喇, 專心d做埋去先講!
• 想同細佬妹玩咩? ......玩唔夠一陣就被我阻止: 又落地? 你做好晒功課喇?
• 想慢慢嘆下午茶/晚飯? ......20分鐘內仲有半碗飯就被我鬧: 個個都食晒喇, 你仲有咁多飯, 食快D!
• 想同爸爸傾計講笑? ......講唔夠兩句就被我打斷: 唔好再講喇, 做完功課未? 老公, 有時間不如你同你囡默書溫書好過啦!
• 想聽媽咪講故仔? ......得, 完成晒"要完成o既"而又未過夜晚9點先啦!
• 想睇一陣youtube卡通? ......得, 完成晒"要完成o既"而又未過夜晚9點先啦!...學校網上教材或者可以o既, 但都唔好睇超過10min喇~

唔通...Koey o既童年就只餘做功課溫書? 運動時間、培養興趣o既時間、親子時間、同兄弟姊妹相處o既時間呢? 通通都無!!! (開學只係個幾月, Koey就連星期六學緊o既Roller堂都真係無時間再handle, 唯有暫停o左先...)

睇見自己o既小朋友童年生活得番做功課, 作為媽媽真係忍唔住替小朋友難過, 覺得肉赤!!!


唔催可以嗎?

其實我都知催得多...

• 小朋友會對催促感到麻木
• 影響大人小朋友心情
• 破壞感情

其實我每日催催催, 真係催到自己都頭痛, 無奈係睇見Koey開始當我耳邊風, 繼續佢嘆慢版o既節奏, 真係名副其實o既皇帝唔急太監急呢!!!

我問過Koey, 自從佢番小學後有無發覺每日放學都好趕時間, 完全無時間同媽咪睇故事書, 無時間同細佬妹玩...咁樣有問題嗎?

佢竟然答: 無!

聽到佢咁答, 真係有d"吹脹"o既感覺...

換言之, 唔通暫時無o野可以令Koey有動力做快d專心d? 如果我唔催, Koey就會晚晚嘆慢版食飯沖涼做功課到10點先訓, 仲要係無時間去練琴o個隻嗎?????!!!!!

反過o黎諗, 其實佢都唔介意過d咁o既生活, 我做咩要替佢緊張替佢急呢? 或者我唔催唔理, 佢反而可以自己調節番自己應有o既節奏??

唉...

暫時, 我都仲未搵到一個比較理想o既方案, 或者, 我同Koey都真係再需要多d時間去適應小學雞生活呢! 如果各位有代替催促, 又或者有效令小朋友做事快手腳d專心d o既好方法, 歡迎留言提供, 鐵人媽媽一定感激不盡!!


P.S. 講完小學雞之苦, 下一篇要記錄番d正面d o既!!! 下次要講講家姐升小一後值得讚賞o既地方, 同埋三位小朋友以及鐵人媽媽一湊三生活o既改變!!!


(補充: 功課真係好多好深嗎? 我問過其他同學仔, 有d快手腳o既番到屋企做1個鐘完成, 而Koey平均就要個半鐘!!!! o係鄰居屋企做功課似乎係專心d, 一番到屋企只係食個下午茶就45min, 晚飯再 >1hr...d時間就係咁無o左...但要我恨心連休息一下食個tea o既時間都取消我又未做得出...

其實要埋怨o既都係o個句: 點解要番全日制? )

為何我想/敢生3個?

俾條簡易數學題俾大家:

Simple Calculation!

無錯, 我要生第3個小朋友喇!!

其實, 我一直有生3個打算, 生完細佬適應o左1湊2, 再等埋家姐番學, 覺得係時候了!!

為何我想生3個?

o係fb公佈喜訊後, 好開心收到唔少朋友留言祝福, 真係好多謝大家! 

或者呢個年代, 有人願意生3個小朋友真係少數吧, 除o左相熟o既朋友知道我一直想生3個外, 其他朋友知道後第一個反應多數都係: 勁, 你好犀利呀!

真係犀利嗎? 或者係, 又或者唔係吧! 其實睇番自己朋輩, 有唔少都係3兄弟姊妹一齊長大, 唔講其他, 就講我媽咪, 生o左我之後年半就生對龍鳳胎, 一次過湊3個唔係比我還犀利嗎? 所以我成日覺得, 現今社會物資豐富, 我輩比上輩已經有更多人幫助 (如有長輩或請工人), 無理由我輩會比上輩退步呢!

另外, 當中有朋友問: 

- 人都係有重複自己嘅傾向?

- 好奇想訪問下點解想生3個?唔4 個/2 個?

係喎, 一直以o黎我都係簡簡單單以一句 '3個小朋友熱鬧d' 交代點解想生3個就算! 但一句 '熱鬧d' 真係足以令我肩負起將3個生命帶到世上, 一世照顧佢o地, 愛護佢o地o既責任嗎? 

可能, 上面第一個問題正好亦係我生3個o既最大原因!!! 

無錯, 我本身都係3兄弟姊妹, 所以由細到大我好清楚3兄弟姊妹一齊成長、一齊學習、一齊吵鬧究竟係幾咁開心熱鬧, 亦因為咁, 由細到大我都認為要生小朋友, 生2個或以上係基本同必然! 

咁點解係3個, 唔係2個? 

2個對口對面, 互動唔及3個一齊多同複雜, 所謂3個女人一個墟嘛!!! 所以3個小朋友基本上都係一個'小社會', 所有社交互動, 好似如何爭取認同者互相結盟排除異己、如何為自己爭取資源、如何分配或共享資源、如何互相扶持等等等等, 所有將來投身社會所面對o既生存技巧, 通通自細就無師自通!! 有時我會覺得, 面對住現今新一代自我中心得緊要o既港童, 呢d生存技巧比起盲目追求分數更能令小朋友贏在人生起跑線呢!!!

咁點解唔再生多d, 生夠4個5個?

坦白講, 如果唔使再佗, 又有個免費兼唔使住o係我屋企o既工人, 咁我或者會想生多d, 聽o下家計會最新建議最理想生4個o既呼籲..可惜, 呢d都係幻想, o係衡量過自己無工人無長輩長期幫助下, 我諗1湊3真係我o既能力極限喇!!! (唔怕話俾大家知, 其實我都曾幻想過今胎打孖上(我細佬妹係龍鳳胎), 不過既可惜又好彩, 我無我媽咪咁好福份可以懷孖胎喇!

我和我的龍鳳胎弟妹!

生3個的現實考慮

理想還理想, 基本上係人都知生3個係 '熱鬧d、開心d', 但現今社會大多數人生小朋友都係1個起2個止, 可想而知生3個, 還要有很多現實環境o既顧慮: 生理問題、資源分配問題、經濟考慮、同湊小朋友o既人手考慮!

至於我...

可幸, 我對'Less is More'育兒理念一向有自己睇法, 以上顧慮在我角度, 其實都非不可解決...

1. 生理問題! 因健康問題而無法生育真的很可惜同無奈, 但如果係因為遲結婚遲生育, 生第一胎時已經接近高齡, 咁到第二、三個, 身體機能自然不及年輕時, 不論能否成功懷孕、佗或湊, 都要面對不少問題同困難 (妊娠糖尿、高血壓、及湊小朋友時體力不足等), 力不從心!! 

所以, 有心想生多幾個, 就要及早計劃! 其實我生第一胎時亦已經20尾了, o係醫學角度都唔算年輕, 但比起唔少同輩, 又早o左幾年, 就算而家佗第3胎, 都仲同高齡有d距離, 所以touchwood由懷孕、佗或湊都未遇到太大問題, 少點顧慮!! '有仔襯嫩生'呢句老生常談總有其道理, 正如家計會最新出o既廣告咁, 透過跟另一半及早計劃, 高齡問題相信係可以避免o既, 到時就真係想生多幾個都無問題了! 

haha, 睇番佗住Koey 32周幾o既相, 真係算幾青春o架!!! :p

2. 資源分配問題! '唔想分簿對小朋友o既愛/時間/資源', 呢個都算係我曾聽過拒絕為小朋友添細佬妹最普遍o既理由! 的確, o係有限o既時間同金錢下, 每多一個小朋友, 每個小朋友從父母中平均所得到o既時間同金錢就會比之前減少!

不過, 所謂'Less is More', 雖然'從父母'中得到o既時間同金錢少o左, 但其實同一時間, 小朋友從'兄弟姊妹'中所得到o既時間又會增加! 當然, 從兄弟姊妹中得到o既唔會係金錢, 而係更加珍貴、千金難買o既資源: 手足之情! 互相扶持、守望相助、共同分享、同步成長...呢d都係父母用幾多時間同金錢都俾唔到小朋友o既!!! 所以, o係我心目中, 小朋友有兄弟姊妹後, 其實所得到o既要俾失去o既多!!

愛呢? 呢點比較抽象, 可能真係要為人父母, 甚至係多於一名小孩o既父母, 先可以理解同明白!!! 愛, 係無形同抽象o既, 根本唔可以用任何量詞去計算愛o既多少, 所以亦唔會有'被分簿'o既可能!! 每一名小孩, 都係自己懷胎10月所生, 每多一名小孩, 就多一份愛!! 父母愛剛出生o既弟妹, 但同時間, 亦會同以往一樣咁愛兄姊! 相反, 兄姊仲會得到多一份愛: 兄弟姊妹之間o既愛! 

很肉麻吧? 但呢d都係我成為2名小孩o既媽媽後所感受到o既!! 其實唔止小朋友, 企番o係父母角度, 每多一名小孩, 父母從小孩中所得到o既愛都會多一份! 亦即係話, o黎緊細細B出世, 我就會得到三份愛, 點計, 我都認為自己得到o既將會更多、更幸福呢!

媽媽對小孩o既愛, 只能用心感受, 係無法衡量同比較o既!

3. 經濟考慮! 若多添一名小孩會令屋企經濟有負擔, 連基本衣食都出現困難, 那當然就苦了自己苦了小孩! 就算即時經濟未有困難, 衣食住行起雙或三倍都沒有問題, o係今時今日養小孩要'400萬'o既觀念下, 將來讀書、興趣班等唔少人眼中o既'基本'消費就要變成2倍甚至3倍, 養多個小朋友o既經濟壓力便應運而生!

不過, o係我認知當中, 用'400萬'培養出o黎o既, 未必包括上文我提到, 小朋友從兄弟姊妹日常相處中所學到o既社交技巧, 品德培養、禮貌、EQ等等等等, 有好多比學業分數更重要o既人生態度, 都非'400萬'所能買回來!!  所以, 我深信, 用少於'400萬'養的小孩, 未必就比用多於'400萬'養的小孩差! 

所謂 '窮有窮養, 富有富養' 甚至 '天生天養', 俾唔起私立學校, 可以搵優質o既學券學校; 俾唔起興趣班, 可以帶小朋友去多點公園同圖書館; 只要父母用心培養、以身作側, 我就唔相信養育小朋友真要'400萬'咁多, 所以, '400萬' x 3 呢個數字, 我同老公子都無視為壓力呢!!

私家醫院能順產、政府醫院都能順產!

只要媽咪花o既氣力一樣, 住院費用就算相差幾百倍, 小朋友都可以順利出世, 係咪?

4. 湊小朋友的人手考慮! 現今太多雙職父母, 父母無法分身照顧子女實在無奈, 所以平日照顧小朋友日常起居o既重任就交到老人家 (我甚至聽過唔少將小朋友長期寄居長輩家中, 只在周末接回家o既'周末父母'! )或工人手中!! 可是, 老人家力氣有限, 照顧多於一名小孩的確太過辛苦! 請工人嗎? 人揀你你揀人, 聽聞現今唔少工人都拒絕到需要照顧多於一名小孩的家庭工作, 所以現今不難見到一個家庭請2名工人湊2名小孩o既景像, 但請2名工人並非人人負擔得起, 就算請得起, 都未必有地方容納2名工人住, 問題又輾轉去到居住問題, 亦即係經濟考慮了!

坦白講, 除非在職父母願意轉做全職父母, 否則湊小朋友o既人手考慮真係相當難解決!! 可幸, 我信Less is More, 決定做全職媽媽, 所以我無需面對呢個人手考慮! 無錯, 要一湊三的確唔容易, 但根據 '我做全職媽媽的信念: Less (收入) is More (經濟效益)!!!' 內o既計算, 我1湊3將會為成個家庭帶來再多一倍經濟效益, 辛苦少少都值o既!

1湊2靠1對手, 1湊3都係靠同1對手, 唔知到時又係點o既一番景像呢?

家人支持就係我強心針!

好了, 問題都解決了?! 仲未呀, 老公子, Koey & Kobe點諗呢?

或者我呢4年o既全職媽咪表現都合格吧, 老公子對我1湊3都有信心, 加上大家對上文提到o既各種問題睇法一致, 所以老公子都好支持生3個小孩呢個決定 (湊o個個唔係佢, 又唔使佢多使錢請工人, 多個人熱鬧d又點會say no 呢? :p)! 

好喇, 得到老公子o既支持基本上就可以行動喇, 但我又點可以唔顧一下Koey 同Kobe o既睇法呢? 於是, o係未行動之前幾個月, 我已經開始試探Koey同 Kobe, 睇o下佢o地對多多一個細佬/妹有咩反應!!

我: 而家有個細佬啦, 你成日同佢玩咁開心, 如果我再生多個細佬或妹妹, 好唔好呀?

Koey: 好呀! (答得好爽快!)

我: 咁你鍾意弟弟定妹妹呀?

Koey: 妹妹 (怕怕醜醜咁講!)

我: 細佬呢? 生多個BB好唔好呀?

Kobe: 好! (我硬係覺得佢唔係太知我問乜!)

我: 弟弟定妹妹好呀?

Kobe: 妹妹 (明顯地係跟家姐口水尾講!)

問過幾次, Koey 同Kobe反應都好正面, 我都有d喜出望外, 特別係Koey, 始終佢經歷過多o左個細佬o既轉變, 當時都有d情緒反應嘛...真係估唔到佢會咁爽快答'好'呢, 睇o黎佢都好鍾意細佬, 知道生多個又多個伴一齊玩會開心d呢!

好喇, 我生命中最重要o既3個人都大表支持, 就好似幫我打o左支強心針一樣, 對生3個再無猶疑了!

Koey & Kobe正幫我肚皮打強心針嗎?

1湊3, 無有怕!

終於, 4月Kobe生日當日發現o左細細B o既存在, 眨o下眼而家已經快5個月了! 1湊3 o既日子仲有5個月左右就到, 不過今次並無上次細佬出世咁緊張!

點解1湊3都無有怕? 

1. 經歷過細佬出世o既轉變吧, 當時Koey都只係有點情緒反應而無呷醋, 今次佢積極表示想要多個'妹妹', 咁應該更加唔會呷醋啦!!

2. Koey & Kobe而家亦好習慣互相爭吵/互相分享o既日子, Kobe更係一出世就有人同佢爭寵爭玩具爭注意, 再多多個細細B一齊爭寵, 相信都唔會太大分別吧?!

3. Koey & Kobe而家成日一齊玩唔使我理, 相信我忙於照顧細細B時, 佢o地都可以好似而家咁自己玩唔會被悶親, 咁我就可以專心湊細細B喇!

4. 細細B出世時Koey4歲半大個囡, 加上細細B未出世佢已經成日同我講要幫手照顧細細B,  睇o黎佢將會有足夠能力幫我愛鍚同照顧細細B呢!

5. 細細B出世時Kobe2歲半, 比Koey 做家姐時大, 應該更明白事理, 加上男仔天生性格大方d, 爭風呷醋機會都唔高呢!

6. 第3個B了, 湊B經驗都算'豐富', 餵人奶成功率又應該算高, 煮飯洗碗等家務又唔會因為多個B而增多! 係洗衫要密d, 出街換衫沖涼要處理多個B耐少少o者, Overall功夫不比之前多 (因為之前已經夠晒多了!! :p), 適應應該唔太難吧!

所以我對我1湊3 o既日子絕對有信心!! 加上有老公子, Koey & Kobe, 仲有家人、朋友o既支持同鼓勵, 我相信我一定做得到!!! YEAH!!!

我對小朋友藝術方面的期望及培養

睇o左我幾篇Less is More o既文章, 或者大家都感覺到, 我並唔係o個種主張填滿小朋友課餘時間, 人仔細細就要懂18種武藝o既怪獸媽媽! 所以, Koey到而家將近4歲, 都仲係未上過任何興趣班~ 

o係農曆年前, Koey就讀o既幼稚園舉行o左場華服/民族服表演Show...

從老師拍攝o既片段所見, Koey表現算淡定, 拍子舞步都應該無出錯, 仲略帶笑容呢!

我同老公子都係第一次見Koey上台表演, 睇見佢表現唔錯都覺得好難得, 甚致有點喜出望外, 覺得Koey好似又大個女o左咁! 

原來, Koey已經做得到了! 

唔通, 而家係時候幫佢報唱歌跳舞班?!

當我開始疑惑係咪要為Koey報興趣班時, 估唔到係Koey先主動開口...

Koey: 媽咪, 我大個d係咪要去學XXX o架?

我: 唔一定, 大個d先再決定啦~ 你做咩無啦啦咁問, 你好想學? 但好似上次帶你去跳舞咁, 要學就要自己上堂, 無媽咪陪o架喇~

Koey (蚊吱咁細聲): 我鍾意跳舞~

我: 但要自己一個上堂喎~

Koey up頭

我: 你真係好想學跳舞?

Koey: 唱歌我都鍾意~

我: 唱歌都係無媽咪陪o架喎~

Koey: 好似番學都無媽咪陪o架!

我: 又係喎! 咁你鍾意學唱歌多d地跳舞多d?

Koey: 唱歌~

我: 好啦, 咁等媽咪搵下有無學唱歌o既班俾你學好唔好?

Koey up頭

聽完Koey咁講, 我內心真係有種興奮莫明o既感覺, 似乎Koey真係大個o左, 開始知道自己鍾意乜o野, 就連一向最怕離開媽咪一個人去上堂都唔怕!!!

Koey is ready!!!!

為o左保住Koey 對學唱歌跳舞o既熱情, 我當晚就好積極咁上網搵資料, o係之後兩日仲記出埋報名表添! 

早兩日終於去面試喇, 離開我一刻Koey喊喇, 唔知佢應唔應付到呢? 小朋友自己去面試, 家長就去另一課室聽導師講解課程, 可惜, 聽完後我只係覺得好失望!!

課程太著重樂理了, 唱遊部份只佔最多一半時間, 其餘時間教樂理, 音樂家介紹同名曲欣賞, 上完12堂仲要進行評估先可以升班...

我唔係想Koey去'上堂' , 而係想佢去玩去唱o下歌仔咋!!!

當然, 我明白樂理係學音樂o既一部份, 有o左樂理基礎將來學唱歌或樂器都有幫助, 但我個人反而著重興趣o既培養, 希望課程能真正令小朋友'愛上'音樂多於'學習'理論, 我成日深信, 只要有興趣, 小朋友就會主動去'追求'相關知識, 咁樣所學到o既反而更深刻!

另外, 太商業化了!! 佢提供o左一套供家長自學、自適用於iPad2/mini o既教材, 等家長可以學完幫小朋友溫習樂理! 的確, 對於完全唔識音樂o既家長可能有幫助, 但對於有音樂底子o既家長o黎講就真係完全無用了! 可惜, 家長並無選擇權, 因為費用係報名註冊費內'必須'包括的!

最後, 我應該係少數無即場註冊俾錢o既家長吧!

睇見Koey面試完係開開心心咁走出o黎, 我忍唔住覺得有d可惜...

我: 呢度好唔好玩呀?

Koey: 好玩!

我: 不過我o地唔會係度上堂喇!

Koey: 點解呀?

我: 因為媽咪覺得呢間唔係太適合你, 放心, 我會再幫你睇下其他地方有無得學唱歌, 好唔好?

Koey up頭!

Koey: 我都鍾意跳舞o架!! 唱歌跳舞都鍾意!

番到屋企靜落o黎, 問問自己...

想Koey做大歌唱家畫家舞蹈家女飛魚溜冰公主...??? 從來無諗過, 亦覺得無呢個需要!

學o下都無壞吧!? 咁應該又真係無壞o既, 但點解要俾咁多錢去玩, 唔留番d時間o係屋企免費同細佬玩o下笑o下? 

早d接觸唔同種類o既興趣, 咁先知小朋友鍾意邊樣嘛!! 咁又好似係~~ 但人仔細細太早樣樣學, 掉轉頭會唔會令佢無o左求知欲, 唔識爭取自己真正喜歡o既, 亦不懂珍惜每個學習機會?? 如果真係搞到興趣班都變例行公事, 意義又何在? 咁唔係反而會令小朋友對所學o既失去興趣嗎?

再望望學校派番o黎, 要家長對小朋友表演表現所填o既評估問卷...

無錯, 藝術只係表達自己情感o既一種方式, 技巧知識都係次要, 最重要係俾機會小朋友自由發揮o既機會, 樂在其中就足夠了!!!

可惜, 現實歸現實...上網一search只見贊助o既廣告或比較有名氣o既音樂中心, 想搵間無咁商業化o既似乎都唔係咁易!!!

雖然, 幫小朋友搵個比較上無咁商業化成績化o既興趣班原來唔係咁簡單, 但為o左保住Koey呢份主動求學o既精神, 我會繼續努力搵適合o既興趣班, 唱歌又好, 跳舞又好, 只要可以令Koey學得開心, 培養到佢對自己喜歡o既活動o既興趣, 咁就得喇!!! 

講到底, 都係笑住學o野開心d嘛!!! Right?

如何有效地令小朋友自動自覺收拾玩具?

如何有效地令小朋友自動自覺收拾玩具?

假設小朋友將波波池入面2-300個波波掉到地上, 請問你會...???

a. 早o係未倒到成地波波時喝停小朋友並執拾已跌出o既波波
b. 不停叫小朋友自己執拾, 自己唔會幫手
c. 不停叫小朋友自己執拾, 自己亦會幫手
d. 以威迫 (唔執拾就罰) 或利誘 (執完有糖食) 方法叫小朋友自己執拾

e. 等小朋友玩完訓晒覺再自己執拾

坦白講, 我都唔知以上邊個方法最好!!! 

老公子怕麻煩, 通常選擇a! 無錯, 咁樣對大人最方便, 但小朋友無得玩, 大人幫手執拾亦未能令小朋友培養自己收拾玩具, 自己o既事自己做o既責任心! 所以我會改良佢呢個做法, 改o係小朋友開始搞破壞時, 先要求小朋友答應我事後會收拾整齊才答應放任佢o地自由玩樂!

至於我, 因為成日抱住'Less is More'心態, 成日覺得要'放手'俾小朋友自己處理佢o地先會學到更多, 所以我b-d都有試過, 總之自己盡量唔幫手...但知易行難, 好多時小朋友就算事先答應都未能完全配合地乖乖執拾, 結果嘛...就變成e喇!! 

有時我都會忍唔住諗, 係咪因為我本身係一個執o野狂, 一見到地方亂就會周身唔舒服, 唔執唔聚財, 所以小朋友就依賴我, 知道地方再亂, 訓醒第二朝就會變番整齊, 萬大事有媽咪執拾... (噢, 咁真係violate晒less is more 理念?? 但唔通真係要到全屋變成垃圾堆佢o地先會學識自己執拾 ????)

收拾好一樣玩具才有得換另一樣玩具呢?

為o左'收拾玩具'呢樣o野我勞氣o左唔少次, 而家為免屋企亂嘈嘈, 我已經將大部份玩具收入櫃中, 要求小朋友收拾好玩緊o既玩具再同我交換, 我先會拎櫃入面o既玩具出o黎...

但呢個方法只能令屋企比較整潔, 現代小朋友物質太豐富, 玩少幾樣玩具一d都唔可惜 (呢個又係另一個課題...), 結果Koey & Kobe亦好少因為想玩櫃入面o既玩具而自覺地執拾玩具同我交換!!!

唔通...小孩子真係天生破壞王??

早排百貨公司大減價, 小朋友又有新玩具喇!!!! (仲買? 上文先提到小朋友玩具太多唔識珍惜!!! 信我, 其實我同老公子係好少買玩具o架, 但一o黎大減價, 二o黎有playtent俾小朋友玩波波池我o地就可以收埋比較佔地方o既膠圍欄嘛...)

有新玩具, 當然玩癲啦!!

玩到咁上下...成地波波係好正常o既!!!

唔知係咪受到呢個Playtent形狀啟發, 呢日我將佢訓低一擺, 洞口斜斜向上, 好自然就叫o左Koey & Kobe學我咁射d波波入籃!!!

就係咁, 遊戲開始了!!! 睇o下Kobe仔幾落力, 差d自己都入埋籃囉!!!

執到咁上下就地取材, 放d波波上架倒泥車度叫架車運送波波!!

咁有趣, 小朋友又跟住做!!

Koey仲有樣學樣, 用矮椅子做工具收集波波!!!

結果, 唔使5分鐘, 成屋波波就乖乖番番入playtent入面!!!!

而我, 亦得到前所未有o既成功感!!!!

原來, 將繁複o既事化為遊戲, 小朋友就會主動參與, 仲會樂在其中!!

成日聽人講, 最佳o既學習模式就係'從遊戲中學習', 相信就係咁樣喇!!! 只係簡單如執波波, 就可以...

1. 練習小朋友小肌肉

2. 訓練眼界

3. 發揮創意, 將身邊物品化成小工具

4. 培養責任心

5. 培養保持屋企整潔o既好習慣

6. 學習如何分工合作

7. 嘻嘻哈哈, 增進家人感情

呢個方法好處咁多, 最緊要不用威迫利誘就可以令小朋友乖乖完成應該做o既事, 點解我而家先發現呢?! 當然, 我都明白小朋友性格各異, 呢個方法未必係'最好', 但至少不傷和氣又有得玩, 就算未能成功令小朋友收拾玩具都無壞, 所以, 我決定好好blog低呢個方法, 等自己日後記得多多運用先得, 希望大家都覺得有用吧!!!!! 

不過, 知易行難, 有時成屋亂糟糟, 家長火遮眼起上o黎仲要冷靜咁同小朋友設計遊戲都唔係易事, 希望我日後能成功做得到啦!!!

後記: 

呢篇blog 寫得o黎, 同一個方法apply落Koey & Kobe度已經無第一次咁好玩咁有效喇, 早幾日Koey更講明 '我唔要玩射波', 睇o黎要好玩落去, 做家長都要花唔少心力同創意去諗'新遊戲'先得喇....!!! 大家一齊加油啦!!

最後, 如果大家有其他方法令小朋友自動自覺收拾玩具, 歡迎留言提供, 等大家一齊研究參考, thanks!!! :)

展開人生新一頁: Koey開學了!!

期待已久o既日子----- 9月1日開學日, 終於都o黎臨喇!!

期待已久? haha, 我估Koey未必期待喇, 因為o係佢心目中, 番學=離開媽咪, 所以佢一定好唔想呢日來臨!!

無錯, 等呢日等得好耐o既, 係我!!! 雖則我係好享受一拖二帶住Koey & Kobe周圍去街, 但有時真係想透下氣, 特別係Koey近呢兩個月開始拒絕午睡, 我由朝到晚真係想休息一陣都唔得, 所以我真係好期待Koey番學o個幾個鐘開檔, 到時再配合埋Kobe仔午睡時間, 咁我就每日最少有個半至兩個鐘休息時間!!! (雖然o個d所謂'休息時間' 其實都係做家務或自己去梳洗下咁, 但精神上點都係可以休息o下嘛!)

終於...

9月1日:

先同Koey執書包, 我o係佢面前介紹好放落書包o既物品, 再同佢一齊放入書包!!! 雖然佢都未必太上心, 但至少等佢知道下番學有咩用品要帶同放咩位置!

換好衫喇, 未出門口時好興奮咁!!! 上到小巴好似有小小緊張!!

早o左到學校門口, 好乖咁笑笑口影相!!!

9月1同2日小朋友都係番1個鐘, 仲要有媽咪陪伴認識學校新環境, 所以Koey都尚算OK, 係第一日老師臨放學, 忽然叫媽咪走出課室問外扮接放學o個下佢無心理準備, 爆喊收場, 但第二日佢已經OK!! 

9月3日:

真正挑戰係呢日, 呢日Koey都係番1個鐘, 但今次媽咪無得陪喇, 要o係學校門口同我say bye!!

不出所料!!! 亦正如佢自己開學前不斷同人預告: 我番學會喊o架!!! (所以我個相機已經一早standby!!haha!!)

呢日放學, 老師話俾我知佢成個鐘都無咩心機, 茶點無食, Sir滑梯都無玩!!!

接放學喇, Koey一開課室門口見到我就激動到想喊同即刻攬實我對腳...噢, 好可憐咁呀, 但又覺得好搞笑, 傻妹妹!! 自呢日開始, 問親佢番學最開心係咩事, 佢就答: 放學開門見到媽咪!!

9月4日:

放學拎住紙巾, 話係喊時老師叫佢拎住抹眼淚o既!!

9月5日:

帶埋細佬送家姐番學, 點知家姐入學校時喊o既唔係家姐, 而係細佬!!! 佢緊係擔心緊家姐唔知去o左邊!!! HAHA, 好可愛!!!

放學, Grandpa俾o左個Surprise我同Koey...

仲幫我影o左d親子相, 好開心!!!

估唔到第一個星期番學就有功課: 連兩條線!!

如是者...

第一星期: 適應2日有媽咪陪番學1小時、適應3日無媽咪陪番學1小時

第二星期: 適應番學2小時

第三星期: 適應番學3.5小時、適應坐校車番學

未開學前, 我對呢個遁序漸進o既適應時間表好有期望, 希望咁Koey就可以慢慢適應番學生活, 但點知我錯喇!!! 原來對住對番學充滿焦慮o既小朋友, 呢種遁序漸進並唔係好事, 反而係一種折磨!!! 因為Koey o係呢3個星期要不斷面對新變化, 擔心完一樣又要擔心第二樣, 好似坐校車咁, 佢不止一次喊住問點解要坐校車, 點解唔係媽咪送到學校門口...

唔知係咪Koey實在太擔心, 佢開學後由平時7點幾8點起身變為6點幾起身, 咁早起身夜晚黑食緊飯已經眼dup dup大叫眼訓, 黑眼圈超大, 成個人無厘精神咁, 睇見都肉赤...但無法子, 適應學校生活呢樣o野, 就算我再努力去形容到番學有幾好玩, 老師有幾好人, 同學仔有幾友善都好, 最終都係要靠佢自己去克服無媽咪o係身邊呢個挑戰!!!

就o係Koey 番o左近1個月學左右, 佢放學開始話我知佢無o係學校喊, 同一時間, 老公子forward o左佢唔知o係邊度睇番o黎(佢應該無咁神心, 我估係佢d同事send俾佢!!), 幾有意思o既一個小方法, 俾未能適應學校生活o既小朋友一個小安慰:

放張相入書包, 話俾小朋友知'爸媽'會陪伴小朋友上學!!!

呢個方法聽落簡單, 但對小朋友弱小o既心靈, 似乎真係好有效用!!!

我放o左相落Koey書包後, 亦寫手冊之會老師, 等佢見到Koey又因掛住媽咪而情緒不穩時提醒佢, 等佢望o下張相!!! Koey之後某日放學回家, 話我知老師有叫佢掛住媽咪時拎張相出o黎鍚下, 佢會開心番!!!

自此之後, Koey開始enjoy番學, 成日提人主學校d同學仔o既名, 同學校發生o既事, 開心番好多, 亦無再因為心理壓力而6點幾起身, 成個人精神生猛番晒喇!!

番學個半月, 老師o係手冊俾我o既留言都好正面, 睇到Koey正努力適應同進步中, 加油呀!!!

而家, Koey番學真係無再喊喇, 直到而家開o左學近2個月, 佢都仲有話我知, 食茶點去書包拎用具時, 都會望下張相, 我就知道呢個方法真係work喇!!!! 真係好開心我終於可以盡一點愛盡一點力去幫助Koey適應學校生活, 希望佢未來10幾20年o既讀書生捱可以順順利利, 媽咪一定會繼續支持你o既, 加油!!

我做全職媽媽的信念: Less (收入) is More (經濟效益)!!!

在朋友堆中, 我係極少數選擇做全職主婦、仲要大部份時間無長輩工人(有請鐘點一星期3小時清潔)幫手o既媽咪, 每當有朋友讚賞我, 我都會好有滿足感, 不過單靠呢點點滿足感, 實在唔能夠令我支手牚起每日繁重o既家務同湊B工作...

咁...實際上令我決心做個萬能媽媽又係d咩呢?

1. 可以睇住自己小朋友從追跑跌碰中成長? Yes!
2. 可以貼身(心)照顧小朋友起居飲食, 確保小朋友健健康康? Yes!
3. 可以以身作則, 親自負責管教小朋友做個'好'人? Yes!

小朋友大得太快, 佢o地成長o既一點一滴, 我都唔想錯過!

相信以上3點, 每一個媽媽都希望做到, 但點解又唔係個個願意做全職主婦呢?

a. 因為要犠牲'自我', 無晒私人時間?
b. 因為自覺無耐性, 唔識'教'小朋友?
c. 因為少o左份收入, 生活質素受影響?

如果a&b大家輕易答'yes', 咁當初決定生小朋友原因又係咩? 生小朋友唔同食生菜, 如果生o左唔願擔起教同照顧o既責任, 咁會唔會太自私? ...Anyway, 咁自私o既父母相信只係少數, 我深信大部份父母放工後都願意奉顯自己所有時間俾小朋友!!!

再攰再眼訓, 只要你願意付出少少時間, 佢o地總有方法令你笑!!

咁, o係香港呢個金錢掛帥o既地方, 大部份媽咪決定唔做全職媽咪, 相信大部份都係c呢個原因吧??

唔怕話俾大家知, 我未做全職媽咪前o既人工係23K左右, 佔當時全家收入35%!! 雖然23K唔算多, 但都唔算少呀, 成個家庭多o左呢23K已經可以足夠請個工人, 每年去多次旅行、俾小朋友同自己食好d, 著好d, 甚至報多d興趣班...

 呢個世界真係無人嫌錢多, 我亦唔例外, 當初知道佗Koey時, 我都唔係偉大到諗都唔諗就放棄份工做全職媽咪!! 但而家回想, 我真係好慶幸無人幫手湊Koey, o係唔想多個外人(工人)o係屋企之下, 再加上老公子o既支持, 我根本唔使o係做在職媽媽定全職媽媽之間作太耐爭扎, 好快就計好條數, 做到決定!

計咩數?

計家庭入息同支出, 計老公子一份人工揹唔揹得起頭家? 無錯, 但又未係全對!!

我要計o既, 係經濟效益!! 其實講到尾, 都係來自Less is More o既育兒理念: Less (收入) is More (經濟效益)!!!

唔知大家有無睇過計算全職媽媽年薪o既相關新聞報道:

全職媽媽人工值幾多錢？根據 Salary.com調查發現，由於家庭主婦身兼多職，要做管家、託兒所老師、廚師、洗衫工人、電腦操作員、設備管理員、司機、心理學家、行政總裁等工作，如果每項職務都有人工，年薪應該有13.8萬美元（約107.6萬港元，即月薪8.7萬港元）...(Source: 國際網絡：全職媽媽年薪值百萬)

全職媽媽o既分身再多, 小朋友最愛o既始終係'陪玩員'呢個身分!!!

就當上面報道過份誇張, 我間化到以全職媽媽 = 工人 + 託兒所老師去計算, 全職媽媽o既人工最少都值20K吧?! 雖然我老公子唔會俾咁多家用我, 但我實際上真係為家庭帶o黎值20K o既經濟效益, 如果再計埋全職媽媽o既其他分身, 好似廚師、管家、甚至倒垃圾工人等等, 再計埋通脹(最近又有報道建議外傭加人工了: 外傭促加薪至$4,500) ...條數點計, 相信大家心裡有數!
當然, 以上計算應用o係我身上答案真係呼之欲出, 但如果老公子人工未能揹起成頭家基本食住開支, 又或者我係醫生律師收入達4、5萬以上又如何選擇呢?

咁, 就要問問自己下面呢幾樣o野, o係你心目中值多少了:

i. 親眼睇住小朋友成長o既每分每秒
ii. 親自陪伴小朋友吃喝玩樂o既開心回憶
iii. 小朋友對自己o既信任、愛甚至依賴

小朋友對我o既依賴, 證明o左我o既存在!!

對於我o黎講, 上面全部都係無價, 幾多錢都買唔到, 錯過了亦追唔番!!

咁樣一計, 做全職媽媽定在職媽媽, 相信各人心中自有天枰, 如何衡量我真的不再多言了!!

總之, 我就係靠堅信Less (收入) is More (經濟效益), 做了我認為對自己、對另一半、對小朋友最有利的決定, 亦憑此肯定自己全職媽媽呢個身份o既存在價值!!!

話說回頭, 雖然老公子呢3年人工有增幅, 但收入始終唔及兩個人搵錢, 所以為o左令老公子減輕負擔, 我都要乖乖識做, 令佢覺得我係個知慳識儉o既老婆, 咁大家都開心!!!

下面就係我呢位湊仔婆o既少少慳錢小tips:

i. 網購代替出街Shopping 
ii. 帶小朋友去公園代替主題樂園/收費室內遊樂場

有時遊樂場都唔一定要去, o係公園行個圈, 睇下風景睇下雀仔, 都已經係好好o既娛樂!

iii. 帶小朋友去圖書館借書/去書局睇書代替買書
iv. DIY玩意(如用廁紙筒整動物、親子料理等)代替買玩具

最近我俾Kobe仔初嘗整o野食, 雖然幫唔到太多手, 但間中佢都會跟指示做, 還一臉認真呢!!!

v. 煮住家飯代替出街食飯
vi. 著二手童裝衫或鞋代替買新童裝
vii. 免費日去博物館玩

總之, 要練成呢雙臂彎的確唔係易事, Less (收入) is More(經濟效益), 只要我信, 我就做得到! 

希望呢篇分享, 能幫到o係在職/全職媽媽之間爭扎o既你啦!!! 加油!!!