對於夫家, 老實講, 除了對老爺外, 我一向只有一個感覺: 煩厭!!
煩厭o既地步, 已經接近佢地未開口, 我已經忍唔住o係內心皺眉大喊救命, 每每有衝動搬離所住呢一區o既地步!!!
曾幾何時, 我的確想開一個blog分類去數我睇夫家不順眼o既地方(當然係私人blog), 不過老公子同朋友都認為唔應該咁做, 加上我都覺得我只會越寫越激氣, 所以忍住o左, 亦從來都無係呢度提我對夫家o既睇法...
今日, 我終於決定記低我對我姑仔o既不滿, 原因好簡單, 因為我呢兩日又被刺激到, 加上我真係唔認為我o地o既關係可以得到改善, 我無需要留後路做好人, 我真係要寫一寫我o既不滿, 唔想再屈住係心入面!!!
(以下內容充滿負面情緒, 唔想睇我鬧鬧鬧就唔好睇喇!!!)
========================================================
回想結婚當日, 姑仔(老公子個妹, 細我5年)同佢當時o既男朋友出力為我Wedding做司儀, 雖然出現錯漏, 但我亦曾經以為我同我姑仔可以自此做個好朋友, 日後關係變得更親, 甚至可以相約行街食飯...
點知, 結婚頭一年我o地就因為大家待人接物各有一套睇法而係MSN嗌過三次大交, 每次都不歡而散...
自此, 我只可以講, 我同姑仔而家o既相處只限表面, 面和, 心不和!!!
其實上年嗌交, 我已經好想寫blog(當然係私人blog)發洩, 但最後都係忍住左, 因為上次件事, 唔可以話係姑仔完全唔o岩, 因為佢出發點都係好o既, 只係方法用錯左, 硬要套佢認為'最好'o既一套落我同老公子身上...詳情唔再提喇, 因為嗌過三次交, 結論係無結論, 事件無對錯, 只係大家處事方法不同, 大家都認為無法再為同一話題溝通落去!!!
今次, 件事相對小事, 但積小成多, 而家每每有少少刺激, 都只會增加我對姑仔o既不滿情緒, 所以我決定唔忍喇, 或者試下blog一blog, 發洩下鬧下人個心會舒服點...
事緣一個月前, 老爺奶奶同姑仔三個去張家界旅行, 其實佢o地係有相機o既, 但都問o左我借相機當後備用, OK, 無問題, 當時我爽快答應!!
佢o地旅行番o黎後第一次上奶奶食飯, 當時姑仔係想還番部相機俾我o既, 可惜食完飯大家都無o左件事, 咁唔緊要, 咪下次先拎囉!! 如是者, 第二個星期番去食飯, 姑仔唔係屋企, 我亦都再次忘記了...
到第三個星期, 我病了去唔到奶奶度食飯, 但我心急開始心急拎番部相機, 因為我個肚開始大, 我都想影下相影下肚皮留念, 於是叫老公子番奶奶度食飯時打俾姑仔問放o左部機係邊, 結果係搵唔到姑仔, 亦o係奶奶家搵唔到相機!!
第四個星期, 我o地番去奶奶度食飯姑仔又唔係度, 但今次搵到人喇, 老公子話佢知我星期六要用相機, 急住拎番, 但部相機放o左係佢宿舍, 姑仔呢晚好夜番, 我o地等唔到咁夜, 唯有再約之後一日拎...
之後一日(星期五), 我親自打俾姑仔, 因為我真係心急要番部機, 想約佢放工時間係火車站交收, 點知佢竟然話佢部相機仲放o左係佢醫院宿舍(佢係護士學生, 係醫院實習緊!!), 一係星期五深夜12點佢放工, 一係星期六一朝先俾到我!!!
..o下????早一晚你好似已經知我心急要拎番部機喇喎, 星期四晚唔係應該由宿舍拎番屋企, 等我星期五可以拎得番o架咩???點解星期五打去部機可以仲放o係宿舍??
結果, 老公子唔想12點落山去火車站拎相機, 揀o左星期六一朝拎 (我星期六朝早有2位大肚朋友上o黎, 我真係好想影低d淘寶戰利品同珍貴o既大肚合照!!)...仲要係要我老公子去奶奶屋企拎!!!
火頭起喇!!!
借我相機成個月後先還唔係問題, 因為我唔急用!!食飯見唔到拎唔到唔出奇, 佢見未還拎去同醫院朋友影相我都覺得無問題, 我介意o既, 係佢竟然將相機"據為己有"似的放係宿舍!!!!
要用OK, 但正常o既, 佢唔係應該隨時放係身, 方便隨時還番俾人嗎? 定係佢真係無諗過要還???
好啦, 還喇, 但竟然要我老公子親自去拎, 唔係佢拎過o黎, 擺明hup阿哥o者, 還o野都無誠意, 借o左咁耐影o左咁多"唔該"都無聲...
OKOK, 星期六一早最重要係有相機用, 以上都係小事!!!
好喇, 老公子拎到相機喇, 點知番到屋企, 原來相機入面無o左張4G卡, 電同'士啤'電都放晒電無叉番俾我, 保護'士啤'電個膠套又唔見o左, 還相機還到甩皮甩骨, 我真係忍唔住火都o黎, 朋友係我屋企都忍唔住鬧o左幾句...如果唔係我屋企有另外一張4G卡同即刻叉電所以最後都影到相, 我真係想殺人都似!!!
事後, 我當然嬲, 但都係小嬲, 只係同老公子講, 以後black list 姑仔, 無必要都唔會再借d 咩俾佢, 因為佢record花晒!!! (事實上, 未發生呢件事之前我已經成日聽奶奶同老公子講, 表面斯文整齊o既姑仔實際上仲烏where過我老公子!!!舉個簡單例子, 我親眼欣賞過佢張滿係廁紙餅碎o既床, 佢絕對可以咁樣訓覺大半年以上唔會執...事實上, 有其母必有其女呀, 奶奶唔執, 佢又唔執, 咪可以咁囉!!...數開又數, 叉開少少, 我奶奶屋企好污漕o架, 周圍都係塵, sofa滿滿頭皮屑, 我咁多年都唔多敢係佢屋企亂坐亂訓...!!!)
好, 以為小事告一段落, 我o既不滿當然無向姑仔表達!!
o黎緊年初一, 老爺奶奶姑仔又出trip, 話去長隆玩, 所以年三十要執行李提早年29食團年飯, 年初四先叫我o地上去拜年!!
問題o黎喇, 奶奶又開聲話要借相機!!!
自上面件事後, 老實講, 就算我唔使用相機, 我再借出去都唔多願意, 更何況過年放假咁多日, 我自己都要同親友或朋友gathering影相用啦, 於是咪叫老公子婉拒奶奶, 話我o地自己都要用, 姑仔本來都有部8百萬像相機(無錯呢, 連我都差d唔記得姑仔係有相機o架, 咁更加無理由要我借相機吧????), 用佢o個部咪OK云云...
奶奶都OK o架喇, 點知尋晚深夜12點, 姑仔send o左個SMS俾老公子:
"你o地未訓吧? 我o地想去旅行影d相靚d, 你o地要用, 一係我俾我部相機你同你交換!"
嘩, 真係激到我彈起, 搞到我成晚嬲到唔多訓得著!!!臨天光仲發夢當面鬧爆我姑仔!!
而家咩意思呀, 你地去旅行重要, 咁我呢幾日影D相就唔重要??? 部相機係我同老公子真金白銀買番o黎, 我要用自己部相機好"合情合理"呀~~~唔係, 用自己部相機根本係"應該", 係"正常不過"...而家係咪我要用番自己部相機都唔俾, 都要問過姑仔問過奶奶先得???道理好似唔係咁喎...
仲有, 姑仔自已大大個相機係度, 主觀覺得我部機靚D都未必出奇, 但其實佢部相機同我部機差唔多新o架咋, 佢o個部都有800萬像, 總之要影相, 未至於影得'核突'亦未到用唔到o既地步吧???去長隆o者, 又唔係去北極, 你認為去長隆重要, 我都認為我同親友朋友影低我大肚o既合照好重要喎, 大家觀點唔同, 無得比較嘛, 點解我就要屈就用姑仔部"無咁靚"相機, 你o地就用"靚"機????
呢個msg係咪想用奶奶壓我??我唔排隨呢個可能!!!但我好肯定呢個msg係好無禮貌, 我部相機而家仲甩皮甩骨, 姑仔都仲未還番4G卡同搵番個電池保護套俾我(...actually我都未同佢講, 我懷疑佢都唔知自己整唔見o左)...你話呀, 上次o個筆都未搞掂而家又咁無禮貌借第二次!!!
我真係未見過借o野借到咁, 同"強搶"無咩分別, 因為成個意思根本就係要我"唔借唔得"咁!!! 而家我條氣就真係好唔順o架喇, 我今次點都會企硬, 唔借!!!!!
(P.S. 今次件事令我聯想到日後可能會出現奶奶"硬搶"乖豬去湊...好驚, 希望呢樣o野唔好發生!!!)
========================================================
好喇, 以上"小事"鬧得八八九九, 下面鬧姑仔o既說話係對人唔對事...唔知有無嚇親大家, 我唔係想像中咁好脾氣咁好hup, 真係好想數多幾樣我姑仔不是...
1. 拜金!!! 自己未識搵錢先洗男友錢, 買名牌袋名牌銀包, 仲有洗男友錢買貴演唱會飛請老爺奶奶去睇...仲試過N次買野送俾老爺奶奶o係我老公子唔知情下極無禮貌咁打開我老公子銀包拎錢走話自己無錢所以阿哥俾!!!...anyway, 可能係個前度心甘情願, 我唔知, 我未嫁前姑仔同阿哥D錢銀瓜葛我就算唔鍾意都理唔到, 但婚後我都見過一次, 我真係睇得超唔順眼!
2. 姑仔前度男友同我老公子做同行, 老公子話姑仔前度男友o係公司出命"怕老婆"... 男o既最後有第三者, 三年情玩完, 姑仔決絕唔原諒男友, 事發唔夠一星期就同家人去北京, 轉個頭識o左第二個, 佢係facebook都話自己無想像中咁傷心!!!...實際上, 奶奶因此喊住打俾我 (嚇死我!!), 話擔心個女唔開心, 又肉赤個女花左三年青春...其實當時我知道姑仔轉個頭已經同第二個一齊左, 但我都無爆俾奶奶知姑仔其實不知幾OK...!!!...三年情可以轉個頭就投入另一個男人懷抱, 佢被前度hurt得幾深有幾傷心我真係唔知, 都係o個句, 我只係睇唔順眼!!
3. 人前斯文背後烏where到暈!!! 呢樣我又唔算睇得太唔順眼o既, 有其母必有其女o者, 我只係想話, 好多人唔係表面睇咁樣...!!!
4. 處事唔成熟!!! 仲未畢業仲未識搵錢未知搵錢/生活實際困難, 但就用佢自己呢個未成熟o既觀點硬套我同老公子身上, 要我同老公子用佢o既方法處世!!! 呢個亦係之前MSN嗌大交o既主因, 事件詳情唔係我要數o既重點, 重點係, 各人有各人一套處事方針, 我同老公子成家立室, 已經係一個個體, 處事係兩個人決定, 並唔需要他人作干涉, 覺得我o地做得唔夠可以提醒提點, 但唔係夾硬迫我o地行你o個一套!!! ...姑仔呀姑仔, 我無你咁好彩, 未搵錢就有男友錢洗, 一畢業人工就高過我兼可能釣到個醫生做老公, 你o個套我用唔著!!!
...唉, 鬧完喇, to sum up...奶奶幾咁麻煩長氣都好, 我反而明白老一輩思想守舊已經有自己一套, 算係比較易理解同情有可原, 但姑仔受現代教育, 雖然都係我奶奶帶大, 但都算係個知識份子, 點解我同佢可以溝通唔到, 搞到面和心不和??? 唔通呢D就係相隔5年o既代溝???
"港女"呢個term可能正好形容我姑仔吧???我真係唔知...理解唔到...溝通唔到...
