照結構之乖豬性別揭盅!!! (20W6D)

懷孕日誌終於追到real time喇!!!今篇開始唔使再回顧喇!!!

今日20W6D, 係去威爾斯照結構o既日子, 因為下午3點45先照, 所以中午放工後我就先去o左沙田行一田同荷花, 不過無老公係身邊一齊揀, 所以其實都唔知自己睇o左d咩...hahaha!!!

同老公子去o左一間叫悅翠小廚o既食, 味道ok, 但貴得o黎細碟, 所以食完老公子要再去好運d茶餐廳再食,haha!!!食完都無咩時間行街就坐巴士去威院喇!!

3點45準時去到!!我地去o左同平時產檢唔同o既另一邊31號房門口等, 當時只係有個大肚姑娘等緊, 咁應該唔使等好耐o卦!!!

未照得結構先照陰超check子宮頸長短, 個女醫生極細聲, 仲要戴住口罩, 我都唔係好知佢同我講o左d咩喇, 總之就係'正常'啦!!!

等呀等, 到4點50分, 終於到我照結構喇!!姑娘幾nice幾好人, 好清楚咁邊照邊解釋照緊d咩, 而我亦一開始就表明好想睇到性別...haha...姑娘o既回應同我朋友講佢照結構時醫生個回應一樣: 5個月都仲未睇到, 應該係女仔多喇...

開始照喇, bb pose又係怪怪咁, 屈埋晒, 姑娘左扭右扭, 續樣o野慢慢照, 見到乜就check o左乜先啦唯有...

兩邊腦, 小腦: ok
眼窩: ok
鼻骨: ok
兔唇: 無
手指: ok
大脾骨: ok
腳掌: ok
4個心房/室: ok
胃: ok
右邊腎: ok

照上面d items時bb都唔太合作o架, 不過我同老公子就覺得好得意, 因為見到bb打喊lo, 又見到佢用手仔捉住自己腳板, 想數佢手指仔時佢仲兩手互握, 差d搞到姑娘數唔清佢手指仔呢, haha!!!

至於性別呢, 開頭bb用隻手遮住重要部位o架, 但好彩佢好活躍, 好快又郁走o左隻手, 俾姑娘照到, 姑娘先後用2個角度睇, 話'1, 2, 3 三劃, 大機會係女'!!!

係???真係女???

照呀照, 乖豬硬係唔合作, 仲差左邊腎同脊骨睇唔到...姑娘叫我坐起身一陣, 希望bb轉pose, 點知都係唔成功, 最後仲墊高我pat pat先睇到脊骨, 但左邊腎嘛...都係睇唔到!!!姑娘唯有叫我出番房, 俾最後一個媽咪照埋先!!

出番o黎, 嘩, 原來我照o左40分鐘喇喎!!!之後等o既時間過得好快, 因為我好興奮呢, 笑笑口同老公子講: 係女呀, 係女呀...

25分鐘後, 另一位媽媽都照完喇...

嘩, 點解人o地咁快我咁耐o既...

我又入番去照, bb pose好d, 姑娘再一次照到bb重要部位, 話'大機會係女喇, 你下次去私家可以再verify' (但我老公子以為只係差個腎未照, 佢一入到佢竟然恰眼訓, 無留意!!)!!!至於腎, 都係有d難照, 因為佢d手仔腳仔舉起晒, d陰影剛好遮住o左左邊腎o既位置!!!姑娘好努力再照呀照, 差d想re-schedule我第二日再去照...好彩, 呢個時候bb打側訓, 姑娘終於可以分別再照清楚d左右兩邊腎, yeah!!!

最後, 姑娘入埋少少data, show到個graph bb size係中碼至大碼中間(頭同肚圍都係中碼至大碼中間, 大脾骨就係中碼size), 重量有15oz, 差1oz就有一磅喇!!嘔到咁都咁吸收, 乖豬good job呀!!!  

今次照o左15分鐘左右, 我同老公子終於係6點15分走得!!!醫院周圍都熄晒燈lu, 好彩有老公子陪o者!!!

雖然今日又試照左好耐(3個月時照oscar, 4個月照私家我都係次次照勁耐囉...), 又一張相都拎唔走, 但終於知道乖豬性別, 加上佢健健康康一切正常, 都算收獲豐富!!!

至於性別嘛, 老實講, 仔定女都無所謂(而且我一早都認定自己陀仔添!!!), 但人總有少少偏好...爸爸接我走時, 我叫爸爸估下仔定女, 佢話 '睇你個樣笑成咁, 一定係仔啦!!'...haha, 爸爸, 果然識睇我眉頭眼額...haha, 不過你阿女我係想要女呀, hahaha!!!

至於老公子, 佢偏好係仔, 所以我都猛問佢知道係女有無失望...

老公子: 無所謂...當然係仔就好d啦...
我: 女都可以陪你踼波o架!!
老公子: 踼粗佢對腳...
我: 下一胎再生個仔啦...但如果又係女呢?? 再生多個...
老公子: 咁如果都係女呢...唔好喇...

wakaka!!!今晚, 我真係成日忍唔住咪咪嘴笑...hehe...

"
當, 初初有左, 大部份朋友己經直覺地猜: 仔!
當, 清宮圖表話我知: 仔!
當, 嘔到五個月都仲嘔緊, 朋友們紛紛話: 仔!
當, 胎動越來越密, 乖豬連環飛腳踼我時: 仔!
...
...老實講, 連我自己都以為極大機會係: 仔!!!

結果...

wakaka~~想不到大熱倒灶了!!! wakakaka....
"

my sharing @ facebook , haha!!!

P.S. 阿女腳頭好呀, 老公子今日收到公司正式announce 男士侍產假detail, 佢會entitle有3日侍產假呀!!! so good!!!