睇醫生 + 第二次健康院產檢 (22W2D)

20/1/2011 (22W2D)

今日請o左病假無番工, 12點15分番番公司clinic睇醫生, 好彩, 今日都只係比尋日多鼻水, 我個人都唔太支力, 應該只係輕微病!!!醫生知我係大肚婆, 都講明唔會開藥俾我, 只係俾o左喉糖, 仲問我有無打流感針, 咁我就問番佢意見, 因為上年都有報導話打流感針會令孕婦流產, 但醫生就話, 呢d只係香港媒體過份渲染d負面消息, 其實根本無研究證明打流感針真係會令孕婦流產, 所以以醫生角度, 佢係建議我去打針, 不過佢都明香港d孕婦未必咁諗,所以都只係著我自己考慮下!!!

睇完醫生坐巴士番屋企, 老公子唔知點解成日打俾我, 又問我去到邊, 陣間去邊度食, 又話佢自己會係食o野o個度等我...????無可能呢, 老公子明明係度番緊工...

去到食o野o既地方, 一入去, 噢, 老公子點解會係度o既???佢仲幫我叫埋o野食添呢, 點解會咁o既???...原來, 早幾日老公子好病都無放假, 今日朝早係出面開完會就請病假下午陪我喎!!!咁都得???不過真係好驚喜呢, 咁佢就可以陪我去健康院產檢喇!!

1點9去健康院, 入去前嘔左少少, 係近呢個星期第一次嘔咋, 呢個都算新記錄呀, 似乎真係越嘔越少喇!!!

對上一次o黎健康院係11周, 今日都22周有多喇, haha, 因為我唔為意要隔6星期自己去健康院, 成日以為威院差唔多隔4星期就去一次, 所以隔o左好耐都唔識再番健康院呢!!

去到健康院好快就驗尿, 同上次一樣係2張試紙測3樣o野, 我只知其中包括糖尿同蛋白尿, 剩低o個樣唔知係咩, 我見到其中一張試紙變左深綠色, 不過姑娘就無表示有問題, 早知多口問句啦...(後補: 多得好朋友o既解答, 原來試紙淺藍綠色係驗尿糖, 變深綠色即係尿入面得好少糖咁解, 所以我呢個result係正常o既!!鬆一口氣!!!)

之後量血壓磅重, 57.1kg, 即125磅左右, 又比上周重左1磅, 似乎唔嘔, 我o既體重開始直線上升, 姑娘話由未有到而家total重o左5kg, 唔錯!!至於血壓係73/123, 姑娘睇番11周o既記錄, 血壓係72/122, 話血壓好好呢!

跟住姑娘就問我有無腳腫, 我話無o卦!!咁姑娘就教我睇喇, 原來要'long'高隻腳用手指襟腳內側睇o下d肉係咪即刻彈上o黎...姑娘教住我, 但老實講, 我都唔多識睇呀, 隻腳內側皮包骨咁, 我都唔覺有襟凹到...但姑娘就話我有輕微腳腫囉...!!!姑娘話, 腳腫好少o者, 不過我周數仲係少, 咁快就有腳腫就要注意下飲食, 叫我唔好食得咁咸...噢, 咁之後唯有注意下啦!!!

之後姑娘摸肚聽bb心跳, 最後講解埋11w時抽o個4支血o既驗血報告就走得, 都差唔多搞o左個半鐘lu, 臨走前咁o岩撞到上星期剛生o左bb o既好朋友同佢老公仲有剛10日大o既仔仔'阿一'o黎健康院檢查, hehe, 好開心呀, 可以見到好朋友o既bb仔, 見到佢o地一家三口咁happy, 忍唔住想像第二時我, 老公子帶住乖豬去健康院檢查o既情景添, hehe!!!