發惡&牙牙學語

第四十周 (17/2 - 23/2): 乖豬9個月大出牙仔喇!

呢排天暖幫乖豬著少o左衫, 加上可能拉高o左, 有時連我日日對住佢都覺得乖豬真係幾瘦...加上我而家都唔再谷奶, 有時都好懷疑我係咪唔夠奶俾個囡食, 所以佢先成日咁餓粥同瘦...而且, 呢排乖豬朝早o個覺硬係唔肯訓, 有朋友都估可能乖豬餓(可能我朝早唔夠奶!), 所以呢一覺佢訓唔到...

由於對自己真係無乜信心, 所以我終於打o左去FRISO叫佢SEND兩罐細2號o黎, 打算每日補一餐奶粉, 早晚繼續人奶, 唔知乖豬到時會唔會肥番少少!!!

今個星期乖豬繼續學企, 爬同企o既動作開始快o左, 基本上一訓醒就轉身要企, 好似要等我入房搵佢咁, 試過有兩晚半夜訓都係咁, 好彩我次次都聽到佢醒, 睇住佢企起身, 唔係半夜三更無啦啦等到佢叫時先望到佢企係度都幾得人驚!!!

由於成日要企, 而家朝早D小睡時間變得好難搞!!! 以前就咁訓佢落去拍下就得, 就算佢未眼訓就咁陪佢玩到攰就OK, 但而家佢未眼訓放佢落去好快就要企番起身, 一訓低佢就趴番起, 真係好麻煩, 成日搞到佢喊我又攰都未訓到, 真係勁難捉摸佢幾時先真係眼訓呢!!!

19/2: 今日我o既大學同學o黎o左我屋企玩, 老公抱住佢玩card game時心情普通, 但之後我抱住佢同朋友傾計時就心情幾好, 又hi又bye, 交足功課呢!!! 而且, 乖豬今日仲第一次無啦啦訓醒企係度等我入去搵佢, 見到一刻都俾佢嚇一嚇, 要快快手調番張床去最低一格先得喇!!!

訓醒企係度迎接媽咪!

20/2: 今日乖豬9個月大, 本來係好開心o既一日, 因為我幾個月前團購book o左今日去影樓影family pic, 點知....詳情都唔想再回顧喇, 下面係當日攰極番到屋企係facebook 寫o既感想...

本來今日一家三口開開心心去studio影相, 結果...去到間舖頭一個人都無, 電話又話已經停用...

等我仲...特登揀Koey 9個月大o既正日當小小慶祝...一早叫老公請假...一早叫老公為今晚出城食飯book枱...為一家三口襯衫/諗造形花心思...為今日Koey唔肯訓覺而擔心佢無精神影相...結果得到o既只係...浪費了o既一日假...因對付出街唔肯訓而煩燥不安o既Koey所得o既滿身疲勞...因呢幾個月以o黎對今日o既期待而得o既失望...唉...試問, 又豈只損失了o個百幾蚊團購費可以衡量... 

(同Bee Crazy 來回o左一輪email後, 佢地會退番錢俾我, 唉, 都係o個句, 都唔係o個百幾蚊問題!!...

由於真係怕koey再大D會再瘦D, 大左又惡D, 又怕到時佢識企/行難控制D, 所以我book o左另一間影, 我諗下星期就影點都唔會執喇o卦, 貴D就貴D啦, 好過貪團購平要務風險!!)

乖豬因為中午訓得少, 結果5點左右係APM度坐住車HUP著左, 我第一次見咋, 好搞笑!!

仲要無挨住坐, HAHA!!

雖然係好唔開心, 但都要影番張9個月紀念合照!!

另, 9個月體重應該都係17磅左右, 高就無度喇!!! 3奶2粥, D粥越食越多, 多得好誇張, 如果俾我一餐食咁多粥應該都夠飽!!!便便就每日一次, 唔定時, 但係potty去o既%應該都超過9成喇!! 小睡就越o黎越good, 每日大約2覺係個半鐘, 1覺就45min!!!
22/2: 今日好清楚睇到乖豬下右方隻門牙有條白線呀, 一摸就摸到硬喇, 真係出牙喇, 唔使再做無牙婆lu!!!

見到我隻牙仔嗎?? 

請投Koey一票!

http://www.facebook.com/CCK.CottonCandyKids?sk=app_250953391656372&app_data=8438&ref=nf

穿圈圈

第三十九周 (10/2 - 16/2): 乖豬越學越快

細路仔學o野真係好鬼快!!!

今個星期乖豬學識o左好多o野:

1. 鍚鍚: 之前係我哄塊面過去佢先識哄個頭o黎鍚, 但今個星期試過一兩次佢趴係我腰附近, 我叫佢鍚鍚, 佢就爬過o黎我面度鍚, 搞到我超開心!!! (不過之後無再做喇!)
2. 俾俾: 雖然未至於識伸手俾過o黎, 但我放隻手係佢拎住o既o野前面話俾俾, 佢就會識放手, 間中會伸前少少手, 都算係識o架喇!!!
3. 'Shake Shake Shake': 一俾o野佢叫佢shake佢就會搖D o野, 因為會發聲!!!
4. 換衫將玩具左右交手: 而家換衫佢拎住o野我只要叫佢, 有時甚至唔叫, 佢就會自動將要著衫o個隻手拎住o既o野交去另一隻手!
5. 'Hello': 其實呢個我無教過佢, 但可能出街撞到人我會拎住佢手揮兩揮, 某日我叫佢hello佢就自己揮手, 令我好驚喜!!!
6. Bye Bye: 手仔仲係唔明顯咁郁, 不過有日見到grandma著鞋, 叫佢bye bye, 佢識望門口, 到打開門grandma行出門口, 佢竟然想成個日撲過去grandma度, 之後grandma行走遠遠咁bye bye, 乖豬竟然喊呀!!!! 唔知佢係唔捨得grandma定係喊自己無得出街, 好得意呀!!! 

另外, 我覺得佢仲聽得明好多大人話, 好似有時我問佢係唔係好開心/笑, 佢好似真係會'笑'o黎回應 (當然係佢開心時!), 平時問佢'係唔係/好唔好', 佢就會擰頭, 我估佢有少少理解到呢D係問佢o野要佢回應...雖然佢仲未識up頭...HAHA!!! 試過又有次我想抱佢, 咁我順口叫佢放低波波先, 點知佢真係即刻鬆手放低左個波, 真係令我好surprise o架!!! 睇怕好快我同老公子就好快要小心D, 唔好係佢面前講佢壞話喇!!!!

13/2: 淘寶大豐收, 最開心o既當然係o個200個波波啦!!! 我急不及待用滴露浸同抹D波就放入網床, 之後好似一貫咁有野做就放佢入網床, 點知佢一入網床就勁喊, 仲要喊得好勁好不安...試過好多次都係咁, 後尾我收番埋大半波波, 等網床有位坐佢先唔喊, 睇o黎乖豬仲未識欣賞D波波呀, 只係覺得D波阻住佢坐呢!!

14/2: 今日情人節, 我同老公子一向都無乜慶祝呢個節日, 所以今日同平時一樣!! 我就用hip seat帶乖豬落商場行o左陣!!!由於hip seat好似我抱住, 佢又可以向外周圍睇野無咩縛住好free, 佢一路都好開心, 仲四周圍'了'人, 望到人望住佢仲出聲'了'人傾計, 呢日我因為咁最少同左4-5個人(包括一個俄藉美女)傾計, HAHA!!!!
是晚情人節, 老公子去o左新街巿買美食, 好豐富好飽, 價錢仲唔平o架, 不過咁美味, 都食得好開心, 老公子, 情人節快樂呀!!

15/2: 今日一貫咁grandma走後我就tum乖豬訓覺, 佢未有睡意, 所以佢就趴轉再企係床度玩緊, 點知忽然間, 佢嘔吐大作, 嘔o左之前飲o既魚湯出o黎!!! 咁污漕我咪幫佢換衫囉, 呢頭換完訓佢係床TUM佢訓啦, 點知又嘔, 仲要由個鼻同嘴噴d粥出O黎, D粥成個鐘之前食o架喇...由於佢當時訓係度, 所以即刻juk親透唔到氣, 我即扶起佢等佢再嘔同透順條氣!!! 好喇, 終於順番氣,  因為頭髮都係粥, 咁我放佢上我大床坐係度, 又換衫, 換完我就拆床單啦, 點知佢再嘔, 都幾多, 我拿拿林推佢個頭出床嘔係剛掉係地O既被單度...呢個時候我已經好手忙腳亂, 但都仲handle到, 咁我就諗住幫乖豬再沖個涼乾淨d啦, 點知...沖完又訓低佢諗住著衫, 之後又嘔, 又係鼻同嘴一齊出, 剛沖乾淨o既頭髮同新衫, 仲有毛巾都係嘔吐物...唉...跟住我就勁亂喇, 成地嘔吐物又無乾淨毛巾, 佢D頭面又係....又怕佢再嘔, 所以我唯有放番未著衫o既乖豬坐番o係浴盤度打電話同我媽求救, 叫佢打的番o黎幫我!!!!

...唉...由於乖豬仲未著衫, D水又開始唔暖, 仲要有嘔吐物係水, 我一方面怕佢凍親, 但另一方面又行唔開去拎乾淨衫同毛巾...好彩我媽o黎緊, 唔係我心一定仲傍徨無助!!!由於D水真係凍, 我於是第一次放佢落大人浴缸, 之後就開熱水淋住佢, 等佢無咁凍先!!好快我媽上到o黎, 咁佢就幫我搵乾淨衫同毛巾, 咁我先可以清理現場!!! 由於乖豬嘔完攰加上過晒訓覺時間, 基本上佢著衫時已經訓著o左, 好似兩個月前便秘出力過渡o個種好無力咁訓, 陰公豬!!!!

之後我媽陪到我乖豬訓醒食埋奶, 佢無再嘔, confirm無事先走, 今次真係多謝我媽咪幫手呀, 唔係我都唔知點算!!!! 諗番轉頭, 乖豬嘔o既原因應該係D魚湯放得太耐凍左D, 同埋今日天氣熱我同佢著得少衫, 打出個肚仔凍親而出事, 下次真係要小心D, 天氣再暖都唔好再著D唔包肚仔o既衫先得!!!

今周其他精選相:

開始少o左'投降'咁訓!!


著春裝, 暴露o左乖豬瘦小o既身形!




成日都企!


傍晚訓晒我就開燈, 搞到乖豬咪實眼睜唔開!

分享星星餅

20120214 day271

Oops

20120211 d268

第三十八周 (3/2 - 9/2): 乖豬越大越惡

呢個星期乖豬繼續係咁爬高企係度, 基本上我一坐係佢附近佢就係都要爬上我身, 但又唔係要我抱又唔係要我扶佢企, 因為一扶佢企佢就會放軟對腳坐番低...所以佢應該係想'ai'住我企o黎玩, 目標係sofa上一切佢唔掂得o既o野...所以佢多數都會好快因為只能'眼看手勿動'而發惡大叫, 搞到我都好唔得閒!!!

不過呢, 可能佢終於意識到我行開行埋其實好快會番番去理佢, 而家我行開一陣佢終於都無再喊喇, 有時只要佢玩緊玩具坐定定o既話, 我行入廚房切個生果, 去個toilet都應該問題唔大, 實在太好喇, 我終於可以'自由'少少, 唔使成日怕佢喊而唔敢行開!!!

學野方面, 以為乖豬學識踼踼, 擰頭, Give me 5呢D新動作好似好醒啦, 點知佢而家唔再做請請...我覺得佢係唔記得點請請多過知道唔做呢, HAHA!!! 

另外, 唔知同上星期乖豬hum親頭有無關, 乖豬呢排好似開始驚玩'跌喇跌喇', 連我傍住佢'sir'滑梯都好似驚驚地, 我老公子同佢玩人肉跳樓機都想喊, 唔通真係有'陰影', 無啦啦怕左向下跌o既離心力??

最後就係乖豬而家係就係少喊o左, 但變o左成日不滿就大叫, 仲要叫得好大聲好惡, 真係唔知點對付佢好!!!基本上佢係屋企時比較少大叫, 最多都係食粥時催人先大叫, 但係我呢個'狠'媽媽控制下, 佢一大叫我就唔餵又話者拎住D粥行開, 佢好似知知地唔大叫先有得食!! 不過, 出街就麻煩喇, BB唔鍾意去嘈o既地方, 所以乖豬多數去到呢D地方就特別容易大叫, 好似要同周圍D噪音鬥大聲!!! 其實我都知唔應該為令佢收聲而就佢, 等佢誤以為大聲有用, 但係公眾地方咁大聲嘈住人, 我都真係無辨法唔就下佢...希望大大下佢聽得明道理會合作D啦!!

4/2: 今日我老公子親友團拜, 我一早'報定案'同99講BB要早訓我又要餵人奶, 所以最夜9點9就要走, 點知99勁煩, 成日都唔理解我已經係'就到最盡', 鵝左我好耐...激死我...其實我覺得全世界人都會明BB早訓, 係佢呢個夜訓99唔明囉!!! Anyway, 乖豬呢日真係因為酒家太嘈而成晚勁嗌, 好似同人鬥大聲咁, 只係'舞'住佢已經搞到我超攰!!! 最後9點9終於走得, 乖豬因為酒家太嘈一直唔肯訓, 上到的士終於訓著, 番到屋企唯有涼都唔幫佢沖就餵奶訓覺, 相信佢今日一定好攰呢!!

4點幾去到, 因為爸爸約左親友打tennis, 乖豬開頭識跟住個波望左望右o架!!




個會所都有playroom, 老公子話乖豬個樣好似架車!!

6/2 呢晚乖豬深夜兩次訓醒唔喊自己趴轉仲想扶o野企, 喊都唔喊好奇怪...好彩我訓番低佢佢又無反面, 拍就訓番!! 

今周精選相: 

今日我係一隻牛牛!!




乖豬終於唔怕坐草地喇!!!



仲好專心研究D草, 仲真係試味添...!!!!!!


可能D衫厚, 乖豬終於肯爬草地喇!!


老公子親友送o既Sophie the Giraffe!!


因為5月會一家3口去Singapore旅行, 係時候幫乖豬申請證件相, 不過影證件相真係好難呢, 影2X張得上面3張叫似樣d...


最後揀o左呢張!!

第三十七周 (27/1 - 2/2): 乖豬同各位BB相聚

發展方面, 乖豬再次肯做'鍚鍚', 而近排我開始見到bye bye 時乖豬手仔有少少開合o既動作, 雖然未係好明顯, 但好似有少少跡象似係想做'bye bye'呢!!!

27/1: 老公子放埋初四初五, 因為有買一送一coupon, 今日諗住去天際100, 點知天氣太差喇, 係平台望番上ICC都見唔到頂, 最後我o地都無上到去, 白行一趟!!! 由於唔想運大吉, 我同老公子回程時o係TST落車諗住行海旁番紅磡, 沿路好多自由行, 好難先同到麥嘜合照, 不過埋去麥嘜度時有個外國遊客舉機影乖豬同我, haha, 我同老公子都諗起上次上報紙件事, 講笑咁話可能乖豬張相會好快o係外國出現, HAHAHA!!! 

去開Elements, 於是上網搵下食咩好, 結果揀o左去食日本烏冬!
乖豬好似好認真咁睇緊o野!!


味道OK啦, 但少食貴o野o既我o地覺得唔太值咁貴!!


o係Elements餵埋奶後差D就直接上o左天際100, 好彩老公子八卦, 話要上平台睇o下, 結果見到ICC咁o既樣, 當然無上到去啦!!


張相影到好似無乜人, 其實唔係囉!!!


乖豬唔知係咪怕多人, 唔肯坐車, 一抱起就笑晒!!

因為老公子放9日假, 變相我o既'假期'都係9日, 雖然...因為有老公子幫手睇女我差唔多要日日煮飯(煮o左煲仔飯, 意粉, 煎榚!!!), 但有老公子幫o下手(講真, 其實唔幫到太多!! 我老公仲係唔願學同個女沖涼!!), 心理上都算係有得休息, 連我都好唔捨得老公子放完假呢!!!

28/1: 今日有BB Gathering, 好開心呀!!!

四個BB, 兩個歲幾識行, 另外兩個就未識, 因為屋企地方淺窄, 咁多BB場面有d亂, 好難影合照, haha!!


放是我再帶各位去會所Play Room玩!!落樓時o係電梯合照, HAHA!!!


Playroom一個人都無, 我o地好似包場咁!!! BB爬下玩下, 大人們就傾下計, 地方大咁多舒服好多呢!!!

最後玩到6點幾天都黑先走, 下次再玩過啦!!!

29/1: 今日lunch番o左99度食飯, 乖豬今日好合作, 俾足99面好乖咁玩o左好耐, 真係好少有呢!!!

31/1: 今日又有BB gathering, 靖靖無耐之前見過, 都係差唔多, 但HeiHei就好耐無見喇, 佢個樣大個仔o左好多呀, 一抱上手依然斤兩十足, 好有睇頭呢!!! 是日乖豬一去到就被新奇o既玩具吸引, 不斷爬o黎爬去探索, 好似好乖!!大一個月o既靖靖果然係大D, 佢會'哄'個頭埋乖豬度好似想鍚佢咁, 只係乖豬眼中得D玩具, 好似當靖靖透明咁, 理
都無理佢!!! 之後乖豬食奶訓覺, 訓醒後就心情麻麻, 雖然未至於大喊, 但呆呆滯滯間唔中喊一兩下咁囉!! 最後5點食埋生果就走喇!!!

HeiHei呢個樣好搞笑呢!!


好難先令佢地排排坐一陣!!


除靖靖外, 另外兩個B都當其他BB透明...




靖靖今日好開心, 仲好多o野講, 好得意呀!!


互相交流中??

夜晚老公子睇女不力 (我睇唔到實際情況, 但我估都係我老公子掛住用電腦或睇電視, 無專心睇女!!), 搞到正在摛高o既乖豬pikpak一聲頭頂Hum o左落playmat外o既地磚度, 即時爆喊, 我心都赤埋, 煮緊飯都衝出去幫手呵番乖豬, 好彩喊左5min度都收聲!! 我之後問老公子有無'肉赤'感覺, 佢話無, 佢反而怕我會鬧佢睇女不力多D...搞錯呀, 咁都唔肉赤? 睇o黎我老公子到而家都仲係唔夠'愛心'...呢個爸爸真係有排都唔會合格!!!

最後, 我第二朝一摸乖豬個頭就摸到佢起o左個瘤呢, 陰公, haha, 不過我都要放鬆下自己, 因為以後大把會hum親, 都肉赤唔得咁多!!

1/2: 今日約o左好友食下午茶, 佢個仔一歲多喇, 聽得明好多大人說話, 仲成日手指指Er Er Er想講o野, 好得意!!

呢兩個B 好引人注目, 勁多嬸嬸婆婆走埋o黎'了'佢o地...搞到我有D尷尬, 好似好多人望咁, HAHA!!!

其他精選相:

黑超B!!


今日天氣勁靚, 當然要帶乖豬曬o下太陽!!