上回講到, 離開清境後坐o左個半鐘頭車, 終於駛入小路, 差唔多到高美濕地喇, 唔知呢個臨時加插o既景點究竟係點o既呢?
開頭見到好多田, 差d以為呢度係睇呢d, 仲拍醒小朋友睇呢, HAHA!!!
後來, 司機兜o左我o地去一條好熱鬧o既街, 車o既一面就望到海, 應該呢度先至係高美濕地呢!!!
落車前先向司機查詢一下高尾濕地o既路適唔適合推BB車, 司機形容有條木棧道通向濕地, 木棧道推BB車應該無問題, 但落濕地就當然唔得...由於唔太知實際環境, 我同老公最後都決定辛苦少少, 揹住Kodi算數!!!
落車, wow, 雖然已經近4點, 但太陽依然猛烈!!! 我同老公得2個縮骨遮唔夠用, 司機好好人借o左佢把大遮俾我o地, 咁小朋友就可以遮下, 唔使乾煎!!!
準備好, o係車上幫小朋友們同自己換番濕得o既涼鞋, 出發!!!
我o地先過o左o個條好熱鬧o既小食大街, 行上海堤, WAH, 終於望到濕地o既景貌同遠處o既風力發電風車!!!!
由於實在太熱太曬, 我o地先行到一個大涼亭度休息一下!!!
高美濕地!! 相中我頭頂對上少少打橫o個條直線, 就係由海堤通往海邊濕地o既木棧道, 只見木棧道上面好多人向海中心走去, 好似好遠, 力上全無遮擋, 天氣咁熱, 我同老公子都有少少想打退堂鼓, 想就咁係涼亭度hea下之後食下小食算!!!
其實我件披都幾厚, 咁熱天氣真係好唔想著, 但條揹帶又qoo實o左, 除又麻煩...最後熱係熱d, 不過可能就係有佢擋一擋令我無被曬傷!!! 阿妹亦都一樣, 長袖衫反而保護o左佢d baby skin!!!
另一角度睇到風車!!!
o係度猶疑行唔行出去木棧道同影相時, 有對台灣本地遊客好nice, 讚妹妹好可愛, 又幫我o地影合照!!!
zoom出去, 見到唔少人落o左濕地~~~
影完相, 一場o黎度, 行到木棧道再睇環境決定啦, GO!!!
多得呢把大遮, 總算遮o下小朋友無咁曬!!!
離開涼亭, 風景更開揚, 極速又影幾張相~~~
左邊就係大涼亭!!!
咦!!!
小朋友觀察力總係比大人強, 好多時留意到大人所忽略o既, 原來呢度有幾個顏色鮮艷o既牙簽人公仔o係度踩單車呢!!!
同老公見到對"疑似"香港人(純以衣著打扮猜測!), 為o左求證, 我就索性叫佢o地幫我o地影合照....結果, 猜錯了!!! HAHAHA!!!
上木棧道前先經過一個類似'閘口'o既地方, 有個巨型彈塗魚石像, 小朋友主動話要影, 好彩喝得住Kobe無摸到落去, 咁熱天氣曬住舊石, 我諗上面可以煎蛋呢!!
臨行到出木棧道, 因為天氣太曬太熱, 由涼亭行到木棧道路程都已經唔算近, 我同老公就問清楚小朋友意願!! o係再三強調行出濕地仲有一段好長o既路要曬要熱下, 小朋友都係好堅定咁話要去濕地睇, 好, 既然係咁, 大人都無謂退縮, 熱就熱啦, GOGOGO!!!
行出木機道已經見唔少遊人停埋木棧道邊睇蟹仔!!!
d蟹仔好細隻, 有d係全白色(圖上方), 有d就紅色單臂一隻巨鉗!!
木棧道~
蟹仔真係好多, 濕地上仲有好多蟹洞, 真係有少少密集恐懼, HAHA!!!
曬到傻!!!
o係木棧道上面影風車更清楚呢!!!
相中間白色一舊o個d係黑白色o既雀鳥~
行行o下見到呢灘水有'物體'o係上面移動...
原來係另一種蟹仔(圖中水tum上一粒粒一點點o個d就係!!), 佢o地移動得實在太特別, 引起唔少遊人注意!!!
想睇佢o地點移動? 去片!!!
天空出面飛機發過o既痕跡~~
行o左25分鐘, 終於到木棧道盡頭喇!!! 只見遊人們都o係木棧道盡頭前o既兩邊除鞋同放低個人物品, 我o地都有樣學樣, 搵個位置除低鞋同放低遮, 準備行落濕地!!!!
行落濕地前有幾大級要落, 仲要踩落一個水坑, 我揹住阿妹, 又著住長裙, 真係極之論盡, 萬一失平衡跌落泥水般o既濕地都唔知可以點算...如果一早計劃定, 我一定唔會咁著!!!!
好彩, 最後有驚無險, 順利行落濕地喇!!!
Koey Kobe都好好奇, 周圍行去感覺一下濕地o既感覺!!
太陽依然猛烈, 但背光影又有另一番味道!!!
企定定影平平無奇~
手拖手影o既剪影靚好多呢!!
(當時完全無諗到可以試影天空之鏡, 可惜...不過我當時一手拎遮一手執住條長裙怕整污漕, 仲要揹住阿妹, 睇怕都未能趴低影天空之鏡效果!!!)
周圍搵蟹仔~
叫老公影...永遠都唔滿意... :(
唉, 都係自拍啦~~~
閃爆!!!
想扮2人世界~~~但原來Koey Kobe都入o左鏡, HAHA!!!
小朋友要求摸沙泥, 當然無問題啦!!! 其實o係濕地上行o左陣, 都發覺d沙泥好軟滑好幼細, 仲一d都唔黏腳, 感覺都幾乾淨舒服, 一場o黎到, 即管放擔摸o下啦!!!
HAHA, 成手黑文文!!!
影臭腳~~~細佬係都要加隻手仔埋去~~~
繼續玩泥沙~~
大小腳印~~
唔知係咪濕地太多人定係海水較多, 其實蟹仔比起o係木棧道旁所見少, Koey Kobe玩o左一陣泥沙後, 要回程喇, 因為回程都仲有一大段路要走, 仲要預時間坐低食少少o野先去機場呢!!!
上番木棧道, o係梯級o既水坑沖一沖腳, 泥沙都沖走9成, 太好喇, 比想像中乾淨呢!! 我o地行番去搵番d鞋, 只係行o左一陣, o係日照下腳都好快乾晒, 拍兩拍雙腳都無乜沙, 乾淨晒, so good!!!
由於我揹住阿妹唔方便坐低著鞋, 老公子代勞...HAHA!!
咁浪漫o既一刻, 當然要影低做私人珍藏!!!
好喇, 回程又行o左20分鐘, 由於接近日落, 行出木棧道o既遊人比之前更多更迫, 我o地仲認得o係海堤涼亭度幫我o地拍照o既台灣本地情侶, 估唔到佢o地等o左咁耐先出動呢!!!
差唔多番到去木棧道出口, 我望一望拖住細佬o既老公背影!!!!
噢!!!! 2個做乜曬到紅晒???
噢!!!!!! 大件事, 原來我o地唔記得拎番放低o左o既紅色遮!!!!!!!!!!!
如果係自己遮, 我o地一定唔會番轉頭拎, 偏偏把遮, 係司機借俾我o地, 唔拎唔得...
大家想像得到嗎? 我o地曬住行o左20min回程, 大熱天時, 老公又要行番去木棧道另一邊盡頭真係諗下都想暈, 當刻, 我敢肯定老公心入面早就爆晒粗, 只係無奈唔番轉頭唔得呢!!!
為免小朋友們辛苦, 我就先帶小朋友去陣間會合司機上車o既地方側邊間食肆坐住先~~~
其實當時都有少少不安, 因為我手機無漫游又無得上網, 身上面更加係無錢o架, 萬一有乜事都唔知可以點算~~ 唯一好彩就係呢度只有一條大街, 認路都唔係太難!!!
曬燶o左o既妹妹回程終於支持唔住訓o左!!! 當時都有諗, 希望佢唔係熱暈啦!!!
同老公分頭行事後, 我同小朋友o係海堤望向木棧道, 因為老公子著紅衫好易睇, 小朋友都見到爸爸正飛快咁衝向濕地!!!!
(Photo Hunt 時間, 大家見到我老公嗎?)
之後, 我同小朋友就去o左食店入面坐住等老公番o黎喇!!!
入到食店搵位坐, 唔知係咪其他人都見我一個拖3個又熱到出晒汗好辛苦咁樣, 佢o地都示意我坐向較通風o既位置!!! 坐低後, 我先問o左洗水間位置, 然後著Koey Kobe乖乖坐定, 等我濕紙巾出去幫佢o地洗面抹汗!!! o係toilet門口就撞到余司機, 佢奇怪我點解一個人o係度, 我就話佢知我o地漏低o左佢把遮...
HAHA, 佢無客套咁話: 沒關係, 不回去拿都沒關係~~~
咁即係我o地有番去拎係應該啦, 原來真係唔可以唔見呢!! :p
Settle好後, 我先叫o野食, 叫o野食o個下都有d擔心o架, 因為我身上面真係無錢o架, HAHA!!
叫完o野食同最重要o既橙汁冰, 我就同小朋友睇貼係台上面, 介紹濕地常見螃蟹o既poster~~~
原來濕地有咁多品種o既蟹, 我o地今日只係見到當中3-4種呢!!! 小朋友都好積極係咁搵今日見到邊幾種!!!
橙汁冰先到, 正呀, 小朋友都掙住飲, 個個都曬到又熱又攰, 飲一啖認真夠消暑呢!!! 等老公期間, 坐對面o既一對台灣夫婦同坐隔離台o既台灣女仔都有好奇問我係邊度遊客同點解一個帶三個咁辛苦呢!!
傾o左一陣, 老公好快就出現喇, 又幾快喎, 真係辛苦晒老公呀...不過其實都係自己論盡唔記得拎遮o者!!!
小食到!!!
食物唔平o架, 但賣相總算唔錯, 味道都可以...或者我o地實在太攰, 呢個時候食咩都好味吧!!! 家姐食o左唔算多, 細佬就俾面d!
食完, 準時6點鐘上番車, 要去機場喇!!!
呢個時間太陽終於無咁猛喇!!!
夕陽下風車更美!!! 而家唔曬, 出木棧道睇日落o既遊人一定仲多呢!!!
有彩虹呀!!!! (又考大家眼力喇!!!)
20min車程好快過, 涼一涼冷氣個人都無咁熱咁辛苦喇!!!
快日落喇, 個天好靚呀!!!!! 連司機都話近幾星期一直下雨, 好耐無見過咁靚o既日落呢!!!
用日落mode影~~~~
正常mode~~~~
望住咁靚o既夕陽, 忽然又好感恩呢幾日台中之旅天公造美呢!!!
余司機再一次盡好客之道, 主動幫我o地影日落~~~
可惜一係背光一係就天空都太光, 好難影~~~
唔甘心, 但自拍都係唔成功~~
咁靚o既日落, 都係用眼睇用心記吧!!!
入機場喇, 機場內旅客唔多, 我o地運o左個吉後先搵到check-in櫃台!!!
等check-in期間妹妹心情好靚咁呢!!!!
曬到黑文文, 咁多日行程, 最辛苦妹妹應該係今日去高美濕地時囉, 因為我成身臭汗佢都仲要埋身呢!!!
又表演食腳趾, 全個旅程都唔知表演o左幾多次俾路人見識呢!!!
開始認得家姐咁, 家姐一引好快笑!!
check-in完再搵o左間食台灣麵o既食晚飯, 早知有咁多時間食完晚飯先上機, 頭先o係高美濕地就唔使叫咁多小食啦!!!
家姐呢餐又食得好好, 仲添食呢!!!
食完仲有時間, 家姐整古做怪引妹妹笑~~
去片~~~
Koey Kobe爭住引阿妹笑, 笑到妹妹透唔到氣咁~~~
去完toilet, 入閘lu~~~
等上機時, 有職員見我o地有BB, 就帶我o地行特別通道~~~
日落完唔係太耐, 天仲有少少光, 再加埋夜景, 好靚呀~~~
台中真係一個幾唔錯o既地方, 呢幾日我o地都玩得好開心, 再見喇台中!!!
呢度就係特別俾我o地o既候機室, 人影都無, 得我o地係度, 感覺好尊貴咁, 真係托阿妹o既福呢!!!
上機喇, 去程時家姐坐窗邊, 今轉回程到細佬坐喇!!!
記得去程時未起飛細佬就訓o左, 今轉細佬金晴火眼等起飛!!!
郁喇郁喇~~~
原來今轉到妹妹未起飛先訓著~~好彩都算快訓著, 因為未訓前佢不停喊, 我埋身極都仲喊, 雖然無人眼望望, 但我都覺得嘈住唔少人, 好唔好意思呢!!!
起飛喇起飛喇~~~
再見喇美麗o既台中!!
眨o下眼, 1個鐘機程就過o左!!!
番到繁榮又熟悉o既香港喇!!! 香港感覺真係好大城巿, 同台中完全唔同感覺!!!
5日台中之旅終於結束喇, 又要回歸現實, 番到屋企幫3位主子沖涼刷牙tum訓覺, 仲有洗衫執拾行李手信...真係好掛住旅行乜都唔使處理o既日子呢, HAHA!!!
