Kodi拍劇記

2016年5月12日, Kodi 妹妹人仔細細走去拍劇...um...應該話做臨記先o岩!!!

雖然係做臨記, 但呢位臨記阿B可以同視帝陳豪同視后胡定欣做對手戲 (做Kodi爸爸媽咪), 機會都幾難得呢!!

話說一個月前, 朋友話我知TVB搵BB拍劇, 問我有無興趣, 於是我就send o左相去, 結果揀中o左Kodi, 拍o既係TVB 《來自喵喵星的你》!

咦, 《來自喵喵星的你》咪《鬼同你OT》原班人馬拍o個套?正呢, 我都有留意娛樂新聞, 好似美心妹妹Celine做陳豪囡囡, 唔通Kodi就係做Celine妹妹o既BB版?

為o左去拍劇, 事前安排就多喇...

• 叫老公子唔好出差 (好彩安排到)
• 叫我媽咪幫手湊Koey Kobe
• 煮定飯餸等老公子可以好方便咁蒸番熱同Koey Kobe食
• 最後, 亦最重要一樣, 就係同Koey Kobe做定心理準備, 話佢知媽咪唔得閒湊放學同埋唔得閒番o黎一齊食晚飯!!! 

好喇, 準備就緒, 出門口前再幫Kodi揀定靚衫再就得喇!!!

Look1

Look2

最後我同Grandma都覺得Look2靚D, 好, 就做迷人pink BB啦!!!

出發, 由於怕上落巴士轉車麻煩, 最後我無帶車仔, 真係太失敗, 極後悔!!!

帽仔係用o黎襟番扁佢d頭髮用o既!

Kodi全程都無訓, 我不知幾怕佢無精神拍攝會扭計呢!!

3點45分坐接駁巴士去電視城!!!

見到TVBuddy, 但影得唔太清楚!

左等右等, 終於登記完帶我去12廠, 由於未夠鐘開廠, 佢就先帶我去臨記休息室餵奶!! 

休息室入面好多臨記, 佢o地一見BB入o黎都有D起哄, 我都估唔到臨記BB記原來咁觸目, HAHA!!!

5點, 夠鐘入廠喇! 

職員呢個時候話我知, Kodi要拍3場戲, 預計要拍到9點!!

o下?? 9點, 咁咪番唔到屋企食飯, 亦趕唔切番去tum Koey Kobe訓囉??? 呢下真係失晒預算, 我連自己晚飯都預備埋o架嘛, Koey Kobe亦無預我唔番去tum佢o地訓, 實扭計囉...點算???!!!

都未o黎得切通知老公要遲番己經入到廠喇, 咦, d廠景又幾靚喎!! 

坐o左一陣, 陳豪出現喇!! 大家打招呼後我講o左我一早諗定o既開場白, 指住Kodi介紹: 佢都係3小姐o黎o架!!!

寒喧幾句後當然襯未拍攝先同陳豪影幾張相留念啦!!!!

睇娛樂新聞, 陳豪個角色好似係做'科學家', 所以造型就...

話時話, 我都唔記得多口問問個頭髮係真定假添...

影完相, 陳豪就要預備喇, 我就再同Kodi影多幾張!

呢個時候Kodi心情超靚呢!!!

又坐多一陣, 胡定欣都出現喇!!! 佢真人高我少少, 同o係電視睇分別唔大, 一樣都係咁靚咁瘦呢!

打招呼後又邀合照, 不過好快胡定欣就要忙, 都o黎唔切叫佢單獨抱Kodi影相就行開o左喇!

5點半左右, 正式拍攝喇!! 但估唔到一拍, 扣除中間1個鐘食飯, 我要拍到夜晚10點15分先走得!!!!

老實講, 第一次拍o野可能時間太長, 俾我想像中辛苦...

• Kodi喊時想拍佢唔喊, 唔喊時又話想佢喊
• Kodi難得訓o左唔喊, 拍一陣又話要整番醒佢, 仲要想佢唔喊
• Kodi喊得好慘, 但剛好就係想拍佢喊, 但因為來回拍幾個鏡頭, 變o左Kodi喊好耐都無人安撫, 最後一度喊到喘晒氣, 我邊餵人奶佢仲邊食邊喊, 都幾陰公
• Kodi唔食奶粉但想拍佢食奶樽戲份 (好彩最後封o左奶樽嘴扮餵就算喇!)
• 因為我餵人奶, Kodi無食奶粉同奶嘴, 所以喊o既時候都幾影響拍攝, 要我不停抱佢或行出廠避一避 (所以我覺得人奶B其實無奶粉B咁適合拍o野!! :p)
• 我無帶車仔, 全程要抱, 對手番到屋企斷o左咁, 酸到成晚訓唔到

當然, 有機會同視帝視后傾計, 其實機會都真係幾難得!! 

• 好似拍攝途中Kodi扭計, 導演問我有無奶嘴, 我話無!! 及後陳豪主動問我係咪無用奶嘴, 我話我連買都無買o架...睇得出佢想係呢個話題同我討論下o架, 可惜時間唔容許, 如果唔係我一定將我對奶嘴o既睇法同佢分享!!
• 另外, 因為我要餵人奶, 胡定欣又好好咁著我去廠景另一間房餵, 仲提我向埋邊餵唔怕俾人望到, 真係好體貼呀!! (當然, 其實我有餵奶巾, 求其俾個角落我餵都問題唔大o既!! :) )

總之, 陳豪同胡定欣都好nice無架子, 特別係陳豪, 可能大家都係3個BB o既父母, 再加埋佢劇中造型特別有親切感...如果唔係roll機唔可以嘈, 如果唔係主角們要換衫換妝, 我相信同陳豪可以再交流多d湊仔經呢, HAHA!!!

另外, 呢日我仲見到其他演員...

• 徐榮: 當時我去沖奶無抱住Kodi, 真係好可惜呀, 如果我當時抱住Kodi, 我一定會借BB埋去邀合照順便讚佢囡囡'馬家好'好可愛呢!!!
• 陳展鵬, 李佳芯: 當時我又係去搵水機沖奶, 因為走廊無熱水, PA帶o左我去化妝間個水機, 咁就見到佢o地, 可惜我又係做緊o野無抱住Kodi, 無機會集郵呢!!! 不過李佳芯真係超級靚呢!!
• 羅嘉良: 我臨走o係巴士站等車時見到佢一支箭係路中心行過, 但好遠, 睇唔清楚
• 張達倫, 趙永洪

呢度就係劇中陳豪胡定欣睡房個景, Kodi就係呢度食奶中!!

o係Cantten食晚餐! Canteen比我想像中少藝員呢!! 

(因為揹住Kodi, 為方便食, 只能買三文治同熱狗!!)

7點半: 食完乖乖自己番廠!! 襯有時間打俾Koey Kobe, 安撫o下佢o地...

10點15分: 終於拍完Kodi3場戲份, 走得!! 陳豪胡定欣都去o左轉妝唔係度, 我只好怱怱同工作人員導演bye bye 就離開錄影廠!!! 

走到巴士站歸心似箭, 來來回回咁行諗住tum 被嘈醒o既Kodi訓, 但佢竟然完全醒晒!!! 邊等車邊打番去俾老公子佢話Koey Kobe都訓晒, 臨訓當然有掛住我喊啦! 今次真係失晒預算, 亦係我歸心似箭o既主因!!!

回程車上Kodi都係鬼打都無咁精神, 係咁望住我!!!

番到屋企我己經攰到出煙, 見到屋企o係我老公子'打理'下亂到七彩簡直想暈!!! 諗住餵奶等Kodi快快訓覺我就沖涼休息, 點知Kodi傻o左唔訓好精神, 睇o黎佢拍劇都拍得幾興奮呢!!! 最後唯有叫老公抱住佢等我沖涼執屋!!

最後, 呢晚Kodi 1點幾先訓, 而我因為無帶車仔抱o左Kodi成日對手酸足成晚, 再加上個人好興奮不停loop住今日所見所聞, 我完全訓唔到覺!!! 

我估我5點先訓著吧, 第二朝Koey Kobe 7點幾已起身搵我, 真係攰到我傻!! 我望到Koey Kobe都眼腫腫, 睇o黎佢o地都真係幾掛住我...

總括o黎講, 可以參與今次拍攝, 都係開心同難忘o既, 但坦白講, 如果仲有下次機會, 我諗我真係要考慮清楚先玩!!! 始終, 小朋友仲細, 為o左拍一次戲(仲已經只係臨記咁多o既戲份), 都已經要付出唔少人力(老公子&Grandma)物力(來回車程同時間, 仲有抱住Kodi o既體力)心力(Koey Kobe心理準備同眼淚)去應付呢!!!!

Anyway, 唔知呢套《來自喵喵星的你》幾時先有得睇呢?? 拍o左咁耐, 唔知剪輯後Kodi戲份佔唔佔到一節咁長呢?? 從胡定欣對白中, 我先知Kodi劇中叫'思思' !! (番到屋企Google先知Celine妹妹個角色叫'薜思思'!), 唔知劇集出街片尾會唔會有Kodi個名出, 定係只會出薜思思BB--臨時演員呢?

真係好期待呢!!! 到時大家記住棒下Kodi場呀!!! :p