沙巴之旅終於"再"出發喇!!!
經過上次o既"預習", 今次我推遲o左15min, 於4點45分起身, 點知平時都好少話半夜起身玩o既Kodi呢日傻o左, o係我餵完奶預備起身時就先醒o左, 仲要都幾清醒下, 唔通佢都知今日要坐飛機去旅行去玩??
因為Kodi起o左身,所以就要辛苦原本可以多訓半個鐘o既老公睇住Kodi, 等我可以扮靚換衫, 焗番熱d早餐同Kodi今日食o既粥仔, 仲有最後執拾未入gip o既物品等等!!!
終於, 5點15分叫醒小朋友喇, 一如上次, 早一晚我o地已經著定出發o既衣物, 小朋友只需刷牙洗面就可以食住包包出發喇!!
同上次一樣, 5點45分上的士!!! 不得不讚, 今次坐呢個司機手車好穩唔超速又有禮貌, 我不停叫我老公要mark低佢, 成日出入機場坐個安全o既司機車有保障呢!!!
雖然個幾月前已經預習o左1次, 但要小朋友5點幾起身6點半到機場始終都係一大挑戰!!! 去到機場小朋友們都不停放蚊!!! (家姐都有o架, 但影唔到!)
Kodi心情仲好靚咁!! 話晒4點幾就起身呢!!!
去check-in, 小朋友可能無乜感覺, 但我就有少少陰影, 話晒上次就係check-in時職員告知未能出發嘛!!
當然, 今次終於順順利利喇, 行李gip bye bye , 落機見!!! (第一次帶2個大gip, 平時2個細gip唔使寄倉都夠o架喇, 但今次好多游泳用品同Kodi 食物要帶呢!!!)
Check-in完就直接入閘去坐接駁巴士到停機坪!!
因為今次唔係坐廉航, 上機會有飛機餐, 所以唔使趕頭趕命食早餐, 比預計登機時間早半個鐘已到閘口, 可以慢慢影相去o下toilet坐o下呢!!! (無錯, 之前真係無咩邊次唔趕頭趕命, 趕到無時間影登機閘口相都試過呢!!!)
後面就係要坐o既飛機!!!
職員收o左架BB車後Kodi好似甩繩馬騮咁係咁周圍行~~~
完全唔理大人, 比圖中行多一倍遠都唔會望大人一眼, 好享受咁自由自在地散步!!
開心到呢~~
終於, 要上機喇!!! 跟住老公可以排business條隊登機, 正, HAHA!
上機喇, 仲以為椅背有獨立電視添, 有少少失望!! (失望在唔可以令小朋友覺得有自己電視睇
而覺得好新奇!!!)
上飛機後, 由於飛機要排一大輪先可以起飛, Kodi開始勁唔耐煩, 我抱住都係咁典, 我一度想餵奶試o下, 點知件披一包住佢佢就掙扎, 仲叫得大聲d, 又踼前面座位...雖然前座旅客無投訴, 但我心入面已經勁唔好意思...Kodi發惡真係唔係人咁品, 記得Kobe細個都好大聲, 但佢一扭就好快訓, 似乎都無Kodi咁麻煩!!!!
終於, "舞"o左Kodi一段時間, 佢終於訓o左...真係鬆一口氣!!
其實眼訓o既又何止Kodi? Kobe坐o係窗口等飛機起飛等到頸都長, 唯有不停咁叫佢等多陣, 起飛o左先訓~~
終於, 等o左半個鐘, 起飛喇!!! 細佬無上次去台中時咁驚咁緊張, 但都仲有一邊話好驚一邊睇~~~
飛到上雲上面喇~~~
飛機餐吸引力
飛機餐都出場喇!!!
睇相都知, Koey好喜歡個飛機餐, Kobe就毫無興趣!!!
d餐具好靚呀!!!!
又的確幾靚喎!!!
早餐有脆薯波同熱香餅!!
大人o既早餐有牛肉麵!!
點解Koey同我有飛機餐食都開到影一餐? HAHA, 係咪好大鄉里咁呢? 無法啦, 近年廉航當道, Koey出世以o黎去親旅行都係坐廉航, 所以佢係第一次食飛機餐咋!!!!
Koey嘆完個早餐, 問我: 媽咪, 你知唔知我最鍾意邊次旅行?
我: 台中?
Koey: 唔係, 係今次!!!
我: 咁快就知?!
Koey: 因為今次有飛機餐同埋有得玩泳池o既Sir滑梯!!!
係咪好誇張呢? 真係估唔到一向唔算為食o既Koey會為o左個飛機餐而認為呢個仲未開始o既旅程係佢最鍾意o既旅程呢!!!
至於Kobe, 唔知佢係咪太眼訓, 佢睇見個餐已經話唔想食...結果佢只係食o左d薯粒同飲o左杯橙汁就投降喇!!!!
休息o既時間真係短, Kodi眨o下眼就訓醒, 不過佢心情麻麻, 餵2啖包包就唔食喇!!!
Kobe扭眼訓, 我同Koey調位等我可以tum下Kobe, Koey就好乖咁自己拎畫筆簿仔畫畫油顏色!!!
Kobe一向訓得快, 調o左位一陣佢就挨住我訓o左~~
時間過得好快~ 要降落沙巴機場喇~~~
到埗
落機後機場有冷氣, 仲未覺得天氣太熱, 機場亦比想像中算新, 我o地等o左一陣就拎番BB車, 之後又去下Toilet...
搞完一大輪先去到入境大堂, 當然要排長龍啦!!!
由於條龍都郁得幾慢, 又撞o岩Kodi食lunch時間, 我唯有一邊排隊一邊餵妹妹啦~~~
Koey Kobe自得其樂~~ 開始覺得有少少熱喇, 可以除外套喇!!!
入境後Kodi已經食o左7成粥仔, 去拎行李再食埋o個3成, 終於可以離開機場喇!!!
一出閘門就見到幾個著住當地服飾o既表演者, 其中一個見到我拎相機, 仲叫埋佢d同伴一齊望過o黎笑住俾我影, 真係好nice喎, 呢個沙巴俾我o既第一印像唔錯呢!!!
o係機場唱錢同買的士飛之後, 先出發去巿中心lunch喇~~~
因為我o地5個人, 所以的士一定要坐大車, 車費當然都貴d~~~
大家留意車窗, 無錯, 上車後落大雨呀!!!! 都有少少擔心陣間落車食lunch會好論盡!!!
20分鐘車程, 到加雅街喇!!!
怡豐茶室
其實出發前搵資料都見大部份旅客都會去加雅街搵食, 比較多人提及o既都離唔開怡豐茶室/溤業茶餐廳/富源茶餐廳/味雅雞飯/五星海南雞飯 等等, 我同老公o係的士度search下怡豐, 見到d食物唔錯就決定先食呢間喇!!!
去到怡丰茶室, 見到成舖坐滿人, 似乎好旺呢!!! 好彩又即刻有位, 環境有d迫, 枱後面擺放住水筒, 坐得唔太自在~~
叫完o野食食物好快上枱!!!
奶茶~~ 好味!!!
我同老公都發覺星馬o既'奶茶'同香港奶茶唔同味, 佢o地d茶有種特別香味係香港無o既!!!
喇沙!!! 味道OK啦, 唔算驚喜!!!!!
牛雜米粉!!! 個湯OK, 但d餸就麻麻, 個牛丸好林...
沙巴第一餐~~ 妹妹無high chair坐, 坐BB車低o左落去selfie唔到!!!
沙鍋雞飯, 味道唔錯, 但D飯比較林~~
撈麵, 都係普通咁啦, 味道有D咸, 不過小朋友好鍾意食咁!!
呢杯檸檬桔子冰最正, 小朋友一飲愛上, 不過老公就比較擔心衛生, 怕咁多冰唔知小朋友飲完會唔會肚痛!!
Koey食完桔子冰入面兩粒梅話好好味, 要試埋檸檬, 結果...
2個都變晒樣, HAHA!!!
妹妹呢? 佢當然都有扭o野食啦, 我就俾少少米粉佢, 可能落雨潮濕又坐係BB車, 其實天氣唔算太熱, 但Kodi成頭汗呢!!!
妹妹嘔
食完o野o係食店門外就有的士司機兜客, 由巿中心去酒店車程45min左右!!! 的士司機逢車過車, 仲一度逆線爬頭, 都咪話唔驚!!!!
仲有, 可能剛食完o野, 我無留意安全帶原來束實o左Kodi個肚仔, 搞到Kodi連咳o左幾聲我先醒覺, 我已經第一反應搵定膠袋, 點知都係遲o左少少, 跟住Kodi就嘔o左一大啖食物出o黎, 整污漕o左自己件衫, 仲整污漕o左少少我條褲同架車!!!
的士司機好爽手拎紙巾俾我抹, 佢好似一D都唔擔心妹妹嘔整污漕佢架車, 反而係我就有D唔好意思...Kodi 嘔o左少少之後就好快訓o左, 可能嘔完始終有少少唔舒服呢!!!
酒店: Shangri-la Rasa Ria Resort
終於到酒店喇!!!
o係車上登記後知道係Garden Wing, 噢?? 之前Email唔係話間房睇到海景嗎???
o係酒店大門落車, 有個似係酒店經理o既男士同幾位酒店女接待員迎接, 寒喧幾句後女接待員就直接帶我o地上酒店房!!! 老公邊行邊問女接待員, 先知原來我o地的確係訂o左Garden Wing, 不過因為老公係酒店o既Diamond member, 所以就如之前Email聯絡所提及咁, 已經將我o地Upgrade o左去Garden Wing比較高o既樓層同望到海o既房間呢!!!
因為女接待員o係房內Check-in, 我都唔好意思拍片住喇...
加上間房其實唔太特別, 影相算啦~~~
King Size Bed, BB床仲有個近露台o既大sofa!
另一邊有個長bench放行李同坐, 呢個設計唔錯呢!!!
有生果, 仲有因為係會員, 送o左香檳同一小盒朱古力!!
Toilet比想像中細少少~~
露台~~~
小朋友拎o左自己帶o既車仔出o黎玩~~~未出發時我仲叫佢o地唔好帶, 話酒店地下係地毯推唔到車仔, 估唔到間酒店房近露台位置唔係地毯有得推車喎, HAHA!!! (不過佢o地架車都係推得呢一陣, 之後全程都無再玩過喇!!!)
妹妹好好訓~~
酒店Welcome letter~~~
出露台影下相~~
個海景View唔錯呢~~
我o地o既房間係酒店Garden近盡頭位置~~
沙灘好大呀, 仲好大浪, 可惜天色唔太靚~~~~~
大件事: 開唔到行李!!!!
Settle down後, 小朋友們都滿心期待住第一個節目: 去泳池玩水!!! 點知我同老公試o左無半個鐘都有20min, 都係開唔到旅行gip個鎖!!!!!
最後, 我同老公都投降, 打去酒店搵人求救!!! 5min後, 有酒店職員拎住工具入房, 職員用工具唔使1min就幫我o地開到, 好似好輕易咁...其實都估到酒店應該一日遇唔少好似我o地呢D開唔到行李o既客人, 真係後悔點解我o地浪費o左咁多時間試開而唔早D call人幫手呢!!!
Anyway, 終於開到Gip, 游泳用品終於可以拎到出o黎喇, 小朋友, 換泳衣喇!!!!
同一時間, 酒店職員亦幫我o地舖好Sofa床, 咁我o地就唔使全家迫埋o係大床訓喇!!!
搞完一大輪, 妹妹仲未訓醒, 唯有推車仔拎定妹妹D泳衣落泳池啦~~
去泳池之前, 諗住先去check-in counter再問問做Spa o既o野, 因為做Spa原來唔可以直接redeem積分呢!!!!
頭先check-in就有接待員直接帶上房, 都無機會影o下酒店個靚靚大堂!!!
o係Counter問完一大輪, 原來做SPA要用積分, 就要先用積分買voucher...o係一邊等住去泳池玩o既Koey Kobe不停催促, 結果唯有分頭行事, 我先帶3位小朋友去玩, 老公就繼續辦手續同埋揀今晚dinner o既menu!!!
去泳池玩水...兼拍"無聲慢動作映畫"!!!!
就係咁, 我又1拖3喇!!! 去到泳池落住毛毛雨, 妹妹仲訓緊, 所以先泊車仔係太陽傘下面, Koey Kobe就除鞋落水!!!! 由於坐o既位置同泳池有少少距離, 我唔敢離開阿妹太遠, 所以無陪Koey Kobe落水!!! 佢o地2個傻豬仔就不停叫好驚, 怕水深喎...其實D水淺到不得了, o係我提醒下, 佢o地先慢慢夠膽落水!!!!
(而家諗番轉頭真係有d stupid, 其實妹妹仲訓緊, 我應該交阿妹俾老公, 咁我帶Koey Kobe咪可以盡情玩住先囉!!!)
第一次正式用Action Cam, 廣角鏡影相出o黎效果又幾特別!!!
不過, 因為個防水殼臨出發前一日先買, 都唔記得試係咪真係防水, 開頭我都唔敢成部機浸晒落水用呢!!! 仲有, 個防水殼可能唔係原裝, 全部相影出o黎都有個圓型邊呢, HAHA!!
Koey Kobe就住就住咁一直唔敢去深少少水o既地方...終於, 大約15min後吧, Kodi終於訓醒喇!!!
幫Kodi換泳衣後我o地都落水喇!!! 不過妹妹剛訓醒, 天氣又落住毛毛雨, 所以其實都涼涼o地o架, 妹妹開頭都好似好緊張咁, 捉實我唔放!!!
熱完一陣身, 妹妹肯o係水入面行喇, 佢一見到家姐仲...
Kodi: HAHAHAHA!!!!
估唔到得1歲o既妹妹見到家姐戴泳鏡個傻look都識指住笑...呢個反應好似大人咁, 好搞笑呢!!!
妹妹開始敢自己行喇~~~
行到媽咪度攬實好開心~~
拖住行, 睇得出佢開始好enjoy 玩水喇~~
就係咁, 我開始單手抱住阿妹去深少少水o既地方陪Koey Kobe~~~
(haha, 條片...慢動作無聲, 我照post, 大家自行決定睇唔睇啦!!!)
等呀等等呀等~~~睇見家姐細佬周圍走去玩, 我不知幾想跟住去影佢o地, 但可惜又抱住阿妹, 成日上水佢實凍親, 加上落住雨, 其實我都幾無奈...點解老公咁耐都仲未搞掂o黎幫手o架???
終於, 我估我都等o左近半個鐘吧?? 老公終於出現喇!!! 佢話搞o左一大輪, 酒店終於print到張voucher俾佢, 不過時間已經4點喇, 本來我係要4點半去做SPA, 而家水都未開始游呢...仲點去做SPA, 所以我就叫老公再幫我改時間...
就係咁, 老公一去又15min...
妹妹都等到好悶~~~
同埋妹妹俾我抱住無得悶, 其實佢好凍, 嘴仔都紫紫o地又間中嘴唇凍到震~~~
老公番o黎喇, 話酒店d職員又話voucher要即日用唔改得期之類...anyway, 而家點都趕唔切, print唔切voucher亦真係對方問題, 所以唯有等職員再向上請示先再算吧, 老公話應該無問題我就唯有先放心啦, 都係專心泳水陪小朋友玩o下先, 大家都等o左好耐呢!!!
終於齊人selfie喇~~~
我亦終於自由少少, 可以周圍影下喇~~~
仲可以叫老公幫我影~~~
爸爸同Koey Kobe玩波~~~
三張鐵人媽媽最愛看o既笑臉~~~
睇相依然覺得好sweet 好開心~~~~
咁happy , 我同阿妹都selfie下~~
都有笑下喎, 都算俾面~~
拍呀拍影呀影...忽然間!!! OH!!!!!!!!!!!!!!!!!!!!!!!!!!!!!!!!!!!
大件事!!!! 原來部Action Cam set o左慢動作mode!!!!!
慢動作咪慢動作囉...調校番快去播都OK o架??
係...但慢動作片係無聲o架!!!!
即係話我玩o左咁耐水, 拍o左咁多小朋友玩o既片, 竟然係全部慢動作無聲影片!!!!
...
當下真係有d晴天霹靂 o既感覺, 點解我會咁大頭蝦o架!!!!
由於已玩到尾聲, 雨亦越落越大...最後我set番正常拍片mode後抱住Kodi補拍番一次玩水片....
...之後就怱怱幫阿妹上水暖番個人喇~~~
幫阿妹抹乾身, 自己都唔得閒理 (其實當時我都覺得幾凍), 餵o左阿妹食蕉先~~~玩o左咁耐一定好餓呢!!
本來呢隻都係預俾阿妹, 點知家姐都上水見到, 食o左阿妹o既...HAHA!!!
游完水番上房疏洗 (小朋友大個喇, 今次無再拍佢o地出浴照, 不過連阿妹都唔記得影!!!!! :p)!!!
搞完一大輪...
阿妹當然係最搗蛋o個個, 成個人爬入gip搵o野玩!!!!
好喇, 換好晒衫已經六點有多, 係時候去食晚飯喇!!!!
天雨關係, 與Gazebo無緣!
今晚餐飯我其實好期待o架...不過...呢日一直落住雨...唉...
回一回帶先, 其實出發前一早就book好酒店, 酒店一直都有email聯絡我o地希望提供更貼心服務, 其中一樣就係餐飲膳食!!! 由於Rasa Ria Resort呢度遠離巿區, 所以晚飯基本上就只能係酒店享用 (旅程尾聲先知附近坐一陣車都有海鮮食!), 而酒店推介需要預先訂位o既, 係一間日式餐廳, 同埋酒店6個特式Gazebo!!
Gazebo係咩o黎?? 原來係指涼亭, 嘩, o係Gazebo入面嘆晚飯? 正喎, 想像o下個畫面都知影相放閃一流啦, 所以我同老公都心儀Gazebo多d!!! 可惜, 11月原本出發o既時候因為太遲book, 所以只能book到日式餐廳!!! 好啦, 上次最終出發唔成, 今次醒目早D訂, 成功book到Gazebo喇, 點知...
...呢D就叫人算不如天算, 落。大。雨!!!!
由於酒店都提過, 太大雨Gazebo就唔會開, 為免白行一趟, 老公先上大堂問清楚, 我就同小朋友企o係度一路餵蚊一路等!!!!
老公終於問完, 結果酒店都係將決定權交番俾我o地, 好啦, 一於親自行出去再睇情況啦!!
雨其實唔細, 好彩沿路都係有蓋o既路~~
後來知道, 右邊藍色有光o既應該就係負責主理Gazebo膳食o既地方!!
行到藍色建築物, 有酒店員工接待我o地, 佢o地都話雨唔算小, 而且我o地又多小朋友, 都唔多建議我o地去Gazebo用膳!!!
聽到當然覺得可惜, 但仲係唔肯死心, 於是叫老公同職員冒雨出去視察環境!!
我就幫小朋友影o下相~~
可能落雨, 呢度勁多蚊~~~好彩我有蚊怕人o係身, 即噴!!!
老公視察完, 話涼亭入面其實唔會濕到人, 加上職員都話大雨其實蚊唔會太多, 於是我o地就決定照去喇!!!
行出去涼亭要經沙地同冒雨出去, 小朋友沖好晒涼換晒新衫真係唔多想整污漕, 2位職員再加埋我o個把一共3把遮, 但行出去涼亭都仲係有少少狼狽, 小朋友無可避免都係要淋濕少少身~~~
終於到Gazebo喇~~~
嘩, 張枱setup勁靚呀!!!
影相控o既我已經忍唔住想周圍影...可惜雨一D都唔細, 加上陣陣涼風, 小朋友又淋o左少少雨, 穿得單簿兼無帶外套 (係有少少失策, 但無諗過戶外dinner會咁涼嘛!!!)...其實唔好話小朋友, 當時我都覺得真係涼o左少少...望過對面Gazebo, 同樣set好晒枱但無人o係度, 睇o黎我都唔可以只為影相而一意孤行...
OK, 為小朋友唔使凍親, 都係放棄啦!!!
不過辛苦行到Gazebo, 點都影番張相扮食o左Dinner都好嘛!!!
多謝職員幫忙拍照, 好彩咁暗都無手震!!!
之後我再拎住遮淋住雨影一影Gazebo外觀...其實我仲想行出沙灘遠少少影埋個熒火o架, 但實在太大雨...
怱怱影完相, 又要冒雨行番去酒店有蓋o既地方喇~~
行番去藍色建築物, 影一影另一個Gazebo...營火+涼亭+西餐...我o既放閃大計呀...或者我o地同呢個Gazebo真係無緣吧...
之後, 職員就帶我o地去酒店一間意大利餐廳用膳...不過間餐廳係位於酒店另一邊wing, 酒店職員可能行慣戶外比較短o既路, 所以完全無意識要帶我o地經酒店大堂室內地方去行...當然, 我當刻都唔識出聲問啦, 我都係事後先知間餐廳係咁遠!!!!!
老公先抱妹妹跟一個職員出發, 之後我就同另一個職員拖住Koey Kobe行...帶老公個職員折反途中見到我o地再幫手拖Koey Kobe, 好nice~~~不過都真係要冒雨行好耐咁, 明明同一間酒店, 點解遠成咁, 感覺上我o地至少行o左7分鐘呢!!!!
心情不對, "嘆"晚飯變了苦差...
真係好不容易, 終於到意大利餐廳喇~~~
環境唔錯呀!!!! 職員都有問我覺得環境靚唔靚~~~
地方好寬敞呢~~~
到呢, 我o地張枱~~~
Of course, 同Gazebo當然無得比, 但室內真係和暖好多好多, 我同老公都覺得咁樣對小朋友o黎講真係好D!!
其實大家游完水都餓呢, 咁樣一搞又大半個鐘, 而家總算Settle down可以坐低嘆晚餐喇!!!
小朋友見到類似"薯條"即刻話要食!!
餐前小食~~可以任拎o既!!! 餓極o既小朋友食o左好多, 的確係幾香口!!!
老公揀o既Menu係1個2人餐同2個兒童餐!!
2人餐o既冷盤好快上~~~又幾精緻喎~~
仲有香檳~
等呀等...可能西餐真係要慢慢嘆...上菜速度亦然...
但大家記唔記得大人小朋友呢朝都係5點就起o左身? 細佬妹妹就話hup過下, 但Koey 我同老公都無訓過呢, 既眼訓又肚餓, 唔係誇張, 等上菜o既時間真係渡日如年...
終於, 兒童餐都上喇~~~ (好彩兒童餐唔算等太耐...)
細佬已經連應酬我影張相都唔願意喇~~~薯條配滑雞漢堡, 另一碟就薯條配炸魚柳, 小朋友最愛, 正!!!!
Koey Kobe食完餐前小食再食薯條其實都飽o左9成, 最後個漢堡食o左一半, 薯條都食剩! Anyway, 辛苦o左成日, 都唔想困住佢o地, 食完就放佢o地去餐廳個兒童play area玩~~~
掛住講Koey Kobe都唔記得提呢個麻煩妹!!! 佢開餐食o左少少已經唔多願食, 反而不停企high chair同衝上台爬想搞大人食物, 把聲又大又嘈, 好彩呢間餐廳有唔少小朋友o係度, 唔係一定嘈住其他客人!!!
呢個百厭樣...
小朋友食完...個2人餐呢??? 上o左冷盤後一直到小朋友食完兒童餐都仲未有其他dish上...
唔好話小朋友無耐性, 眼訓如我同老公都真係等到忟...再三催促個course都係慢慢, 慢慢咁上....
前菜1: 鵝肝~~~老公話勁正...不過為免收奶, 我一啖都唔敢試...慘慘~~~
另一個前菜: 海鮮沙律~個魷魚幾好味~~~
小朋友去晒玩 (相右邊背景就係佢o地~~~)
我同老公終於可以舒舒服服開餐喇~~~
Play area其實好細, 得D BB玩意, 唔知極眼訓o既Koey Kobe可以玩到幾耐...
帶子凍湯~~燒帶子食得到炭燒味, 上面塊超簿火腿片好香脆!!!
玩玩下, 妹妹跌親喊, 老公一抱, 好臭...衰妹poo poo o左...
跟住我就抱阿妹出餐廳外搵酒店廁所換片~~~ 唔想搵, 出到去我拎住片向接待員查詢Toilet係邊想去換片, 佢指o左我去...點知入面根本就無換片台!!!!
我o係toilet行番出o黎再問, 職員先話我知酒店toilet全部都無換片台...要換最方便應該係番房...OMG...咁都得~~!!!!
於是抱住個臭妹番去搵老公...咁樣搞一搞又好似好耐咁...
番到去Koey Kobe都嘆緊兒童餐果汁呢!!
飲完果汁小朋友都無再出去play area玩喇~~~加上阿妹個pat咁臭, 我都唔好意思俾佢出去玩臭到人, 唯有抱住佢繼續用餐~~~~
等呀等, 催呀催...
又等o左唔知幾耐, 個main course 終於上喇...
羊架~~
牛肉~~
呢個羊架5成熟剛好, 超軟熟超易咬, 好正!!!!
個牛都係5成熟, 都林, 但塊肉本身比較鞋, 普通~~~
最後又等一輪...
甜品終於到喇~~~餅干配芝士果醬~~~
雪榚+心太軟~~
個心太軟超好味~~
兒童餐都有甜品, 係雪芭~~
就係咁, 個Dinner終於o係9點前食完喇~~~
坦白講, 餐Dinner其實係幾好味o架...之不過...之不過係我同老公仲有D小朋友真係唔多適合'嘆'西餐...又或者, 以5點鐘起身呢個狀態o黎講真係再正o既美點都無心情去嘆去欣賞呢!!!
好喇, 終於埋單番酒店房....
唉...唔好忙記, 意大利餐廳呢邊同我o地住o既房係2邊Wing...要行番去又要7-8min...今次當然醒目喇, 行酒店大堂舒舒服服...不過路程真係遠, 抱住個臭妹真係好想快D番到去!!!
沿路又經過酒店大堂~~
望去戶外完來已經停雨, 天空仲幾清~~
跟住仲見到有外國人唱緊歌好有氣氛o既酒廊同o個間要book台o既日式餐廳, 八卦o下睇o下食咩, 賣相又唔錯...可惜我o地o係唔o係Gazebo食都已經揀o左Menu, 酒店已經預備o左食材, 唔係我一定要求轉食呢間日本餐廳呢!!!
同老公一邊行一邊傾, 我同佢都覺得最後決定番室內係無錯, 試諗o下d餐點上得咁慢, 坐o係Gazebo吹住風困獸鬥咁, 小朋友連走動o既位置都無都咪話唔辛苦, 到時小朋友一定勁扭計大人又會好辛苦, 仲要吹住風, 唔想凍病都難呢!!
Gazebo 睇o黎都係留番老o左同老公拍拖二人世界傾密計先再o黎過啦!!! :p
小朋友訓晒, 我o既工作先"剛開始"...
終於行到位於另一邊wing近尾房位置o既酒店房喇，走廊好多4腳蛇，房門同隔離房門對上都有，有一隻仲勁肥美，我o地開門後勁快手攝入房，好驚四腳爬爬會跟入黎呢！
快手幫小朋友沖一沖腳換衫刷牙, 小朋友們都極速訓晒!!! Koey臨訓都仲口硬話唔眼訓...5點起身o既小妮子過然深得我"唔使訓"o既遺傳呢!!!
Sweet Dream babies!!!
BTW, Koey Kobe係都話要訓大床, 梳化床我同老公一齊訓好似太窄, 所以呢晚我都訓大床, 老公就訓梳化床...
小朋友訓晒, 我就好似剛開始咁...
因為第二日係全個旅程最辛苦行程o既一日, 我o地參加o左個full day local tour, 朝早8點20就要食完早餐出發, 所以我呢晚一定要執好行裝同煲定粥呢!!! (唉, 忙成咁, 唔怪得知完全唔記得去酒店露台睇星...嗚...明明出發前查定無月光o架, 個露台又咁正, 外面又無光害...嗚...)
整完一大輪...我諗我訓得上床時已經近2點!!! 可惡o既係我又試訓。唔。著！！！！嗚...可能我太緊張會帶漏用品, 又擔心天氣, 同埋因為Local Tour無人聯絡過我而有D擔心聽日係咪真係成行吧...
Day 1天氣未如理想, 又發生蝦碌事(拍無聲慢動作影片), ...想知Day 2 行程順唔順利, 天氣好唔好? 咁就要繼續留意下一篇喇~~先謝謝大家耐心等待, 我會努力寫o架喇!!!
機場==>巿中心: 42RM
怡豐茶室Lunch: 36RM
巿中心==> Shangri-la Rasa Ria Resort: 80RM
晚膳 & 酒店住宿: Free (用酒店積分付費)
