"免費"沙巴親子遊 ~ 前言

免費去旅行???????????????? 有無咁著數呀???

Um...差唔多啦, 因為呢次沙巴之旅o既機票同住宿都係用里數同積分換番o黎, 所以今次旅行主要開支就得番機場稅, 酒店以外o既飲食, 旅遊保險同其他開支好似交通或公園入場費係要自己俾!! 

嘩, 儲到咁多里數好正呀, 好羨慕呀!!!

其實又唔使羡慕, 只要你願意好似我老公咁, 除o左o係Kodi出世o個2-3個月之外, 連續一年半每星期Weekday坐飛機出差, 再好似我咁, o係老公出差呢年半以o黎o既weekday大住肚1湊2, 再1湊3打理家頭細務接送小朋友番放學咁就得o架喇!!! 係咪好容易呢???

由於我同老公子都確實付出o左唔少, 所以今次"免費"沙巴之旅我視之為我o地應得o既獎勵, 算係"公司福利", 就好似o係航空公司在職可以1折買機票咁理所當然吧!!!  

噢!!!! 出意外喇!!!!

好喇!!! 9月book好機票店, 懷住興奮o既心情預備行程同各樣旅行物資, 終於到出發o既日子喇!!!

21/11 facebook status: 陽光與海灘，比普通旅行帶多好多o野，究竟有無漏帶o野呢？聽朝未夠5點要起身，究竟今晚我可以幾點訓呢？

結果, 呢晚1點左右訓, 4點多就起身準備, 事前一早同小朋友講o左要好早起身, 佢o地都好合作, 全家順順利利5點半上的士!!!

o係的士入面睇住個天慢慢光, 仲同小朋友自拍!!!

6點半去到機場, 點知一去check in counter職員就話: 呢本Passport唔夠6個月唔可以飛!!!

o下!!!!

聽到o個刻間直情天霹靂, 我同老公呆o左一陣都唔知咩反應...

回過神o黎, 職員提意我o地改行程去唔需要6個月有效期o既地點, 老公聽到後就去另一個counter再詳細查詢改機票要點做, 而我就負責將"無得去旅行"呢個壞消息話俾小朋友聽!!!!

Kobe一聽到無得坐飛機即時眼仔濕濕想喊, 家姐就無咩反應!!!睇見細佬想喊我都差少少想喊, 不過我都好快冷靜落o黎, 解釋佢知, 家姐passport出唔到飛, 我o地無可能唔理家姐自己出發, 放低家姐一個人o係香港, 我o地就算飛到都一定好掛住家姐...(講到呢度, 只係想像下個畫面都有d想喊!!!)!!! 細佬好乖, 明白o左後心情都好快恢復, 無再唔開心!!!

老公查詢完後, 佢一度真係想即改機票飛第二度, 但我就超唔想, 因為我極唔習慣完全無planning 咁去旅行, 覺得太衝動可能浪費金錢同時間!!!

最後, 擾攘完一輪, 我o地決定都係先番屋企再算!!

22/11 9am facebook status: 估唔到閘口相變左扁嘴相，好彩小朋友唔係想像中咁失望，去唔到已成事實，就教小朋友點樣苦中作樂吧！沙巴，搞掂晒passport續證機票酒店改期我o地一定會o黎o架，等我呀！😅

極速疑難排解, 好有效率!!!

番到屋企, 小朋友同大人因為太早起身個個都攰到飛起, 不過大人唔可以停呀!!!

老公子負責: 不停打電話問改機票同酒店o既事, 做外賣仔買lunch番o黎, 去街巿買番Kodi 呢幾日需要食o既肉同生果(因為雪櫃已清倉!!!)!!

我負責: 盡量維持屋企運作, 照顧小朋友, 上網約時間幫Koey申請護照, 打電話查詢已book o既沙巴Local Tour同已生效o既旅遊保險可唔可以退款或改期!!!

22/11 PM facebook statue: 經過一輪電話/whatsapp/fb, 我o地今次o既金錢損失只係旅遊保o既費用同少少里數, 真係不幸中之大幸, 所以心情亦無想像中咁唔開心!!! 不過精神上o既損失就真係補唔番喇, 我應唔應該keep住咁靚o既指甲做我做唔完o既家務呢? 一諗到去o左旅行咩家務都唔使處理就心酸...😌

真係連我同老公子都覺得自己好有效率, 大約下午3-4點吧, 我o地已經大至上搞掂晒改期旅行o既事項!! 最後結局只係俾多原本一成里數改機票同損失o左旅遊保險同呢日來回機場o既的士費用, 金錢上o既損失咁少, 其實真係好幸運!!!

考EQ好時機

o係fb 分享o左件事後, 竟然得到好多正面回應, 覺得我o地處理得好冷靜又有效率, 真係好多謝大家欣賞, 鼓勵同安慰!!

無錯, 去唔到旅行已成事實, 有時用另一個角度睇番成件事, 可能就無咁唔開心同失望, 真係幾考EQ呢, 唔知小朋友有無因此上到一課呢????!!!

好喇, 而家"免費沙巴親子遊"終於鐵定1月5-10號重新出發, 睇番轉頭, 改o左期後o既假期其實可能更精彩更好玩:

• 原本11月出發前, Koey微燒o左2日, 仲又咳又鼻水, 之後仲傳晒俾Kobe Kodi, 如果上次去得成, 小朋友一定要病住玩, 其實都辛苦!
• 改期後旅程橫跨星期日, 可以去到當地星期日限定o既加雅街巿集!
• Kodi由原本未識行變做識行, 去泳池沙灘玩就可以參與更多!
• 上次出發前淘o左少少旅行物品趕唔切送到老公office, 而家唔單止物資齊備, 仲買多o左更多靚衫去影相!
• 先前book唔到食o既酒店餐廳而家book得到!!

HAHA, 係咪好似推遲o左旅遊日子好似仲好過之前呢? 希望真係如我所講咁啦!!! 

重新出發

仲有幾日又'重新出發'喇, 唯一比較煩心o既係上次執好o既行李有部份日用品又抽番出o黎, 真係有少少擔心重新執拾時比第一次執會更易有遺漏...總之, 希望今次旅程順順利利啦!!! YEAH!!!