訓覺Training (Kobe@6wk)

湊初生BB, 最難搞就係扭眼訓!! 如果BB可以唔使抱就自己訓, 真係慳番大人唔小功夫!! 

其實Kobe仔暫時比Koey初生時已經訓得好D (唔知係咪佢重D, 抱住放落床都易醒, 但無Koey咁難放!!!!), 所以我開頭都無諗住train佢自己訓, 但由於一湊二o既功夫實在太多, 下下Kobe仔喊都抱o既話, 我就算可以單手抱細佬好耐都唔手斷, 都無可能單手煮飯, 單手同Koey玩, 單手去toilet/沖涼吧!!?? 所以, 為o左方便照顧兩位小主人, 我o係Kobe仔6個幾星期大, 就決定要幫佢進行特'訓', 希望佢可以o係床仔度自行入睡!!

特'訓'方法: (我o係Koey 呢篇blog度都有詳細描述: 第九周(15/7 - 21/7): 訓覺training )

見BB開始扭眼訓, 就放佢係床,  跟住下面o既規律去安撫bb:

喊1分鐘, 未停, 安撫2分鐘, 仲未停就行開

喊2分鐘, 未停, 安撫2分鐘, 仲未停就行開

喊4分鐘, 未停, 安撫2分鐘, 仲未停就行開

喊8分鐘, 未停, 安撫2分鐘, 仲未停就行開

...

如此類推, 令bb知道媽咪係o係度, 會安撫佢, 但佢再唔收聲就要等越耐先有得被安撫!!! 安撫方法可以係拍, 唱歌, 講o野, 但唔好抱, 亦唔建議同bb有眼神接觸 (原因不明)!!

唔知係咪比Koey早開始訓覺Training, Kobe仔第一日成績已經唔錯, 特別係朝早, 同埋o係唔餓o既狀態下, Kobe仔已經可以o係喊2分鐘o個個slot度就差唔多訓到!! 當然, 喊到8分鐘個slot都唔似會停o既情況都會有, 不過, 通常只要餵奶(就算食完只係個幾鐘都好!!)等佢飽肚D, 放番佢落床就會好快訓著, 真係算幾合作!! 



到寫blog呢一刻, 特'訓'已經到第5日, Kobe仔食完奶後間中可以喊都唔喊就自己訓番, 睇見佢咁叻仔又唔使再喊到拆天, 真係好有滿足感!!! 我深信, 成功訓練好Kobe自己訓後, 真係對我, Kobe同Koey都係有益處:

1. Kobe仔唔使成日因為發現自己唔係俾人抱住而扎醒喊扭人抱, 訓覺都訓得好D林D!

2. 我唔使成日抱住BB搞到手痛, o係等Kobe喊o既時間, 我又可以有free time陪Koey, 煮飯, 食飯, 或者處理其他家務!

3. Koey知道我每次入去tum細佬都係tum一陣(2分鐘)就出番去陪佢, 咁就唔會成日覺得我只理細佬唔理佢, 佢又唔會成日要跟住我入房tum細佬, 嘈住細佬搞到細佬訓唔到!

總之, 訓覺training真係好work, 真係強烈推介俾各位全職爸媽!!!