古惑Koey之睇戲任務!!

好o野, 今日我, 老公子同Koey有得睇戲呀!!!!!!!

haha, 做乜我好似仲興奮過有卡通片睇o既Koey??? 無法子啦, 忙住湊仔o既我同老公子, 對上一次入戲院已經係2年前 (去睇功夫Panda 2!) ...你話我係咪餓o左睇戲好耐!!!!!!!!!!!!!

其實Koey都快3歲, 仲記得半年前我同老公子都已經有帶Koey 入戲院睇卡通電影o既諗法, 不過...一o黎怕佢唔理解, 二o黎更怕佢因為要坐定定咁耐會扭計嘈到人, 所以最後都係放棄o左!!

所以今次我真係好開心, 得到Yes-Parents o既邀請, 請我o地一家去戲院睇優先場!!

睇咩戲呢??

請得一家大小, 梗係卡通片啦, 套戲叫《古惑松鼠 之 飢餓任務》!!! 

優先場戲飛3張! 

由於Koey係第一次去戲院, 所以早兩日我已經話定俾佢知有得去睇卡通, 仲要係立體o既, 雖然唔知小小人仔對'睇戲' 同 '3D/立體' 會有咩concept, 但小朋友要求唔多, 只要知道係'卡通片'就已經夠晒興奮喇!!!

呢日等我媽上o黎幫我睇住Kobe仔之後, 我同老公子就帶住Koey出發, 9點半去到戲院!!!

本來我同老公子都唔算特別鍾意食爆谷, 但為o左可以俾Koey更能感受到咩叫'睇戲', 我o地都係照買, 等Koey感受下咩叫'睇戲'!!

好喇, 影完相, 入場喇!!! 點知原來我o地太遲入場喇, 優先場係無畫位o架, 所以得番第一行!!! 哎也, 坐第一行真係幾辛苦...希望Koey唔好因為咁而唔鍾意睇戲啦!!!

副3D眼鏡太大, Koey成日跌...其實有無小朋友size??

由於坐第一行, 加上我o既3D鏡係大人size, 套戲一開波我已經覺得Koey睇得好辛苦, 於是我決定抱住佢睇, 等佢挨住我, 個頭唔使抬得太高太攰, 不過因為副眼鏡太大, 佢挨住我就頂起副眼鏡, 所以我仲要用手幫佢扶住眼鏡...為o左唔好破壞佢第一次睇戲o既感覺, 我辛苦d都無計!!

好, 講下套戲: 《古惑松鼠之飢餓任務》!

故事大綱: 

風光如畫的自由公園住滿各式各樣的小動物，大家相處和諧，除了犀利哥獨斷獨行只靠自己食腦搶食。今年公 園嚴重缺糧，公園領袖大浣委派自命正義的奀宜及公認為英雄的威神去搵糧食，撞破正計劃騎刧果仁車的犀利哥，它們在混亂間令公園內儲存糧食的大樹爆炸，所有 糧食被完全燒毁，大家註定捱餓過冬。犀利哥亦因此被放逐，永遠不得返回公園......

簡單講, 套戲係講d松鼠搵Nuts o既同時, 撞正人類大盜o既偷金計劃...為o左'搵食', 人類同動物都有貪心自私o既一面, 最後松鼠之間由唔信任、作對到最後齊心合作...haha, 結果當然係合家歡o既Happy Ending, 搵到好多Nuts唔使捱餓啦!!!

我o地睇o既係廣東話配音(睇完戲我先留意到係由'狂舞派' o既演員配音o既!), 但由於對白講得太快同比較多潮語, 再加上只係得3歲o既Koey應該唔係太睇得明, 我有時都要分心簡單咁解釋俾佢聽d松鼠仔o係度做緊乜, 所以好坦白講, 我自己都唔係好專心睇到套戲!! 

Overall, 套戲對於Koey 咁細個o既小朋友o黎講程度有d'深', 可幸o既係Koey有得食爆谷, 又可以俾我抱住, 所以佢都坐得足個半鐘, 無中途扭計要走, 都算係咁!!! 雖然Koey未必enjoy, 但院內都間中聽到其他小朋友o既笑聲, 睇o黎大個d真係明得多d呢!! 

我諗對於Koey o黎講, 全套戲o既亮點, 可能係片尾, 因為片尾首歌大家都耳熟能詳, Koey 同大部份小朋友, 甚至大人都一定鍾意, 所以大家有機會入場睇呢套戲o既話, 記得睇埋片尾先走呀!!!

最後, 我番到屋企訪問番Koey佢o既觀後感...HAHA, 睇o黎佢都唔係太睇得明套戲喇!!!

......

後記:

本來我以為Koey對睇戲o既印像麻麻, 點知睇完戲第二日, 佢同我講...

Koey: 媽咪, 不如下次再睇戲呀!
Koey: 點解睇戲要黑忟忟o既?
Koey: 下次睇戲都係要立體o架!
Koey: 睇戲呢...好得意o架!

睇o黎佢對睇戲都幾有興趣呢, 真係估佢唔到!!


=================================================

《古惑松鼠之飢餓任務》

上映日期: 4月17日    

電影預告片: http://www.yes-parents.com/knowledge/article/T3/T3C500517.yp  

電影簡介:

《古惑松鼠之飢餓任務》為曾擔任《反斗奇兵2》等片的動畫師，也為《鬼馬小靈精》做過視覺設計的Peter Lepeniotis首次執導長片，改編自他本人於2005年創作的卡通短片，並由加拿大及韓國班底聯合製作。講述松鼠犀利哥偷果仁引發的一連串有趣、刺 激及驚險的故事。