Koey 3歲喇! 520 2014!

Koey 3歲喇!!!!

一朝早就玩佢o既生日禮物, 希望佢鍾意啦!!!

3歲大o既Koey, 發展係點o既呢?

高: 97cm (85%)

重: 29磅 (20%)

四個字: 又高又瘦!!!

我由上年7月開始同Koey每月度高一次, 不知不覺就高o左咁多喇!!

體能發展: 體能應該算係差, 不過跑同跳都總算學識喇, 但跳得好唔好就...HAHA!!! 上樓梯可以好似大人咁左右唔同級上, 落樓梯就仲未得! 仲未識踩單車, 出街去遊樂場只限玩滑梯, d攀爬有d難度就唔會試...細膽亦文靜...um...我明明都係運動唔差o既媽咪, 點解Koey咁無運動細胞?? ...都係等細佬大個d帶佢玩算數!!!

智能發展: 除o左砌lego, 我諗唔到佢仲鍾意玩咩...!!!! 砌Lego識得跟住書仔指示搵材料, 亦識得一步步睇圖自己砌, 係間中d方向分唔到要提下, 基本上都砌得幾好, 但一定要我係度先會砌, 自己就唔會跟書, 會自己砌自己鍾意o既形狀, 幻想係d車呀, 椅之類!!

其餘智力玩具, 特別係牽涉數字/英文字o既玩意, 如uno, kum綿胎等, 一律零興趣...所以佢依然停留o係未認識A-Z/a-z o既階段, 數字都係近來先識識o地數11-20, 雖然多數都會skip o左d...!! 總之數理方面, Koey真係零興趣咁...同佢爸媽呢兩個數理人南轅北轍!! 中文字, 認得20個左右啦, 近呢個幾月少o左認新字, 不過sure佢認中文字興趣比學數字英文有興趣就是了!!!

說話能力: 強!! 2歲幾已經同大人講o野無咩分別, 到而家3歲, d懶音都改o左唔少!! 而家Koey會用大人語氣 (正確d 講, 係我o既語氣) 教訓細佬同爸爸! 其實有時聽到佢語氣差我都會嬲, 但出聲話佢時我亦都知佢只係學我...唉, 身教呢...呢方面我的確做得麻麻o地...唯有希望Koey大d識分我語氣差多數係因為佢曳同埋爸爸講10次都聽唔到1次我先會咁惡啦!!

自理能力: 極強...除o左自己食飯之外!! 我都唔記得佢幾時開始咩鞋咩襪都係自己著, 近個幾兩個月褲都係自己換, 如果唔係過頭笠o既衫, 佢都識得著, 仲多數唔會搞亂方向, 著得o岩!!! 

2歲開始戒片, 到2歲半時正式成功, 自此出街無再瀨, 係屋企去toilet 成個過程包括抹pat沖廁洗手都唔使人幫, 近呢幾個月開始夜片都無著 (佢話唔舒服所以唔願著!), 不過夜晚飲得多水都有可能半夜瀨, 平均3-4星期都有一次啦, 唔算太多, 但每次都係5點幾6點整濕走過o黎搵我o地, 搞到成床所有o野都濕, 我要捱眼訓幫佢處理, 洗起上o黎亦好麻煩, 成日洗2次先清到d尿味!!! 希望佢快d學埋半夜急自己去toilet就好喇!!!

食: 差!!!!!唔止唔肯自己畢, 近呢個月更惡化到食到半路落地玩唔肯坐番上台!!!! 偏偏Koey唔愛食正餐 (of course愛零食!), 你唔餵佢, 佢可以坐係度點都唔畢, 餐餐飯食個半鐘, 除o左頭幾啖應該全部都係凍!!! 近排唔知係高o左, 病過瘦o左, 定係真係食少o左, 佢又好似瘦o左, 面青青o左咁喇, un chi chi 開始唔係太好睇, 希望佢大d會貪食d啦!!!

睡: 越大越好精力, 基本上一出街o個日就唔使午睡!! 如果無出街, 朝早8點前起身o既話, 午睡o既可能性會高d, 如果唔係, 好多時3點趕o左佢上床佢典半個鐘訓唔到都會出o黎搞住我!!! 有時佢唔nap o個晚係會攰d, 但佢 'lup lup lor lor'好多時都只係比平時早得半個鐘訓覺!!! 雖然佢唔nap可能對佢遲d番下午班有幫助, 但我都想自己多d free time, 所以我都係prefer 佢nap 多d!!! 

好喇, 發展寫得七七八八喇!! 告別Trouble 2, 希望3歲後o既Koey可以繼續進步, 聽教聽話, 番學順順利利, 健健康康, 最希望佢唔好咁怕新事物, 勇敢d多d嘗試新事物咁就好喇!!!

==================================================================

講番Koey正日生日!!! 520 (我愛你)本來已經夠浪漫, 再加埋今年係2014 (愛你一世)年, 真係浪漫過浪漫呢!!!

呢日一朝Koey 除o左玩佢份生日禮物外, 佢仲去o左探醫生叔叔!! 因為佢同細佬都又咳又鼻水, 早兩晚Koey仲半夜發燒添, 所以今日都係要去睇醫生拎d藥食, 以求安心!!

面青+雙目無神, 成個病樣!!

睇完醫生番到屋企樓下, 俾兩姊弟玩一陣啦!!!

一陣風吹埋o黎, 兩個都笑晒, HAHA!!

番到屋企...

遲o左送o黎o既網購物品送到, 不過大部份買大o左, 要擺多一兩年先o岩身...

Grandma 係度睇住小朋友, 咁我就埋首整整整...

wow!!! 好靚, 第一次整彩繪瑞士卷, 算係咁!!!

藍莓cream + 新鮮士多啤梨 & 藍莓, d色都襯番今日, 好浪漫!!

完成品!!! 雖然好多lone仔, 但都算係咁, 味道好good...雖然Koey同我老公都麻麻o地欣賞...但我自我感覺良好, 好滿意o架喇!!!

等老公子放工, 又影合照!!!

鍚鍚!! 兩個都好勉強咁呢!!!

Koey, 大個女喇, 520, 2014!

Look@ME 媽咪大變身!

母親節又到喇! 眨o下眼, 今年係我同Koey同Kobe過o既第3同第2個母親節喇!!

雖然話照顧小朋友係我o既'天職', 再辛苦都無得怨無得賴, 但有時候, 真係唔可以只係掛住d小朋友, 有時候都真係要顧下自己, 所以襯母親節將至, 我決定要對自己好d, 獎勵一下自己, 送自己一個新look!!!

掂唔掂?

掂唔掂?

早前我見到朋友share o左STENPHENMAKEUP o既Look@ME 女主角大變身活動, 覺得好似好好玩, 最緊要可以變靚d嘛, 於是我就膽粗粗參加o左!! haha, 平時幫Koey參加呢樣o個樣小model活動就多, 自己參加真係算第一次!

o係4月20日, 我就去o左同Stephen見面, 一去到先知, 原來佢o地o既製作係咁認真!! 現場唔止有星級化妝師Stephen, 仲有造型師、髮型師, 連埋攝影師同錄影師, 成個團隊有成9人之多, 好利害呢, 今次真係無join錯!! :p  而另一個驚喜, 就係我遇番Sarona呢, 佢係我結婚影pre-wedding時認識o既婚紗設計師o黎, 負責今次活動o既Styling, 幫我設計造型呢!

等o左一段時間, 終於輪到我喇!! Sarona先同我去換衫, 佢預備o左幾套衫俾我試, 其實幾款衫我都幾鍾意, 因為顏色夠sharp夠醒神, 不過最後我都係揀o左條青綠色Pattern褲, haha, 因為平時o既我絕少會著有pattern o既衫褲, 今次話明要'大變身', 我自己都好想突破一下框框, 作d新嘗試!!

換好衫, 要化妝喇!! 坐定定俾人化妝唔係第一次, 但俾射燈照住, 邊化邊望實鏡頭保持微笑真係第一次, 感覺好得意, 真係好似做緊平時o係電視度見到d化妝品牌model咁!!!

成個化妝過程其實好快, 唔講咁多, 去片~

段video好正哩? 我自己都忍唔住睇o左好幾次, 仲上網搵方法download o左留個記念!! hehe!!

自從做o左媽咪, 特別係我呢d真正o既全職媽咪之後, 一對手做N樣家務同應付兩隻小馬騮, 真係忙到日日無時停, 所以出街都係以快同方便照顧小朋友為主, 真係莫講話搵時間執靚自己, 化番個靚妝先出街見人!!!

不過今次大變身後, 我對於要自己變得靚d sharp d有唔同睇法!! 因為今次無論化妝、造型定髮型都完全照顧到我係'媽媽'呢個身份, 做到又快又簡單, 但效果就已經好突出!!

髮型: 直髮俾人fresh d o既感覺, 襯番夏日feel, 仲感覺yound d! 完全唔使梳唔使紮, 一個字: 快!

妝:  雖然Video唔多唔少都經過剪輯, 但實際上成個妝容真係最多10分鐘就搞掂! 唔識化妝o既我睇住個video都覺得個妝似乎唔難化, 跟住一步步好似教學咁做, 似乎我要pick up都唔會太難呢!!! 

造型: 白色雪紡上衣+青綠Pattern長褲 + 金色粗踭涼鞋 + 簡單民族飾物! 簡單得o黎好fresh!! 上身可以遮住我湊B後出現o既粗手臂同大肚腩, 粗踭涼鞋又可以拉高個人, 但又企得穩唔影響我彎腰湊細路! 亮點當然係條褲啦!! 相信識我o既朋友都一定未見過我著咁花碌碌o既衫褲, 今次真係眼前一亮, 連我自己都估唔到自己都carry 到呢類Pattern衫褲呢, 睇o黎我以後買衫褲可以多個選擇, 今次新嘗試真係無揀錯!!

原來, 做o左媽咪之後都可以又型又靚!! 雖然小朋友未識欣賞, 但只係花少少時間執執自己, 換個sharp醒look同靚心情, 對自己好d真係幾值!!! 淨係睇我今次大變身後, 開心o左成晚就知啦!!!

總之, 真係好多謝STEPHENMAKEUP o既團隊幫我大變身, 幫我做個又型又靚o既潮媽咪!!!

好喇, 拍攝近尾聲, 老公子帶埋Koey 同Kobe o黎影合照!

我: 媽咪靚唔靚呀?

Koey點點頭!

我: 咁媽咪化妝定唔化妝靚d?

Koey: 媽咪都係唔化妝靚d~~

拍攝完畢, 因為時間已經好夜, 我又無街去, 所以好可惜地, 我無得帶住呢個新look去街, 而要番屋企用呢個靚妝幫小朋友沖涼餵小朋友食飯!! HAHA!!! 無法, 再型再靚我都依然係'媽咪'嘛, 呢個身份無得走! 

食飯其間, Koey不斷問: 媽咪幾時先變番普通媽咪?

HAHA, 睇o黎佢真係好唔習慣見到我化妝呢!! 最後, o係Koey問o左至少3次之後, 我就帶住依依不捨o既心情乖乖去落妝沖涼, 還番個'普通媽咪'俾Koey喇!!

臨落妝前忍唔住再自戀一下!!!

化o左妝, 真係笑容都充滿自信!!!

睇o黎Koey未識欣賞我個新look呢!! 唔怕, 等我試下勤力d, 出街慢慢化番多少少妝等佢習慣下咪得囉, HAHA!!! 不過要化番妝, 睇o黎我要出一出血, 利一利其器, 送番d母親節禮物俾自己先得喇 ...唔怕話俾大家知 (...講出o黎真係有d唔好意思!!), 我個化妝袋入面用得最多o既唇膏, 應該都用o左超過3年 (...過晒期用都唔知有無問題!), 睇o黎我要跟住段片買番d化妝品旁身先得!!