愛.喜.行 慈善步行籌款 暨 園遊會 (2月8日)

小生命o既出現...

  

...本來就係奇妙o既, 充滿希望、陽光、以及喜樂o既!

人越大, 思想越複雜! o係充滿挑戰o既人生旅途上, 人或會因受唔住挫折而迷失, 忘記o左生命開初最純潔o既意義!

最近, 我亦有朋友因為得知認識多年o既朋友自殺而傷心難過, 第一次面對呢種事, 我都唔係好識得處理, 安慰當然有, 但自己都覺得既無奈又無能為力, 因為有d事真係無take2, 無得番轉頭...

望住Koey同Kobe, 呢兩個小生命當初係為o左咩而來到呢個世界上o既呢?

答案好簡單! 佢o地係我同老公子愛的延續!!

由初生時出盡九牛二虎之力去吸啜第一口初乳, 到現在會跑會跳, 當中挑戰不會少! 我深信, 就算人生路上遇到困難, 只要我o地抱住一顆童心, 諗番小時候憑住爸媽o既愛, 就能戰勝一次又一次o既挑戰, 問題再難解決, 都可以有足夠o既正能量去面對!

記著, 愛, 一直在身邊!

早幾日, 收到Yes-Parents 邀請, 得知一向致力向有自殺傾向、感到絕望及有情緒困擾的人士提供預防自殺服務o既「生命熱線」, 正在舉辦一個名為「愛.喜.行 慈善步行籌款 暨 園遊會」o既活動, 為「生命熱線」o既預防自殺服務作推廣同宣傳, 希望更多有需要人士再展笑容! 活動咁有意義, 真係要多多支持!!!

坦白講, 我開頭都有猶疑應唔應該參與, 因為要早上10點一家四口去到離我家甚遠o既大潭郊野公園, 仲要只有3歲半o既Koey步行2小時 (車仔當然仲要留俾細佬用!)...聽見都擔心會辛苦呢!!

之不過, 呢個挑戰對於人生路上遇到困境o既人o黎講, 其實只係小巫見大巫, 咁o既挑戰都處理唔到, 我o地又點教小朋友將來用正能量去面對挫折同挑戰呢? 

好, 我還是決定要身體力行去支持呢次咁有意義o既活動, 用生命影響生命, 支持「生命熱線」! 亦要趁呢個咁好o既機會, 向Koey進行生命教育!!

活動詳情：

日期：2015年2月8日 (星期日)

步行路線：大潭郊野公園 (全程5公里，行程約2小時，適合所有年齡人士: 長者及年小童或嬰兒參與)

起步禮/終點站：大潭童軍中心 (地址: 香港赤柱大潭道873地段)

起步禮登記時間：早上10時正

終點站園遊會時間：下午12時30分至下午4時正

大會仲會提供：

- 免費穿梭巴士往返大潭及金鐘 

- 免費健康素菜午餐

- 嘉許獎及禮物包

步行完畢後，仲有園遊會，有充氣彈床、親子遊戲手工藝工作坊、親子競技比賽、繽紛扭氣球天地、慈善義賣…… 咁好玩o既親子活動, 相信Koey行耐d都唔會覺得辛苦吧！


大家快d去生命熱線 (http://sps.org.hk ) 或 Yes-Parents.com o既親子報名專頁 (http://woobox.com/7hridf ) 一齊報名啦!!!

生命熱線 簡介： 

成立於1995年，「生命熱線」致力向有自殺傾向、感到絕望及有情緒困擾的人士提供益友及其他預防自殺服務，使他們情緒得以紓緩，從而積極面對人生。此外，我們希望提高公眾對自殺的認識，並尋求預防自殺的有效方法。

網址：http://sps.org.hk