大肚皮第3回: 20周前o既細細B!

眨o下眼佗住細細B已經20周喇, 即係仲有一半日子就可以同細細B見面, 諗起都興奮同期待呀!!!

坦白講, 而家大住肚1湊2實在太忙, 但為免將來唔記得, 點都要抽少少時間blog低今胎o既特別事, 等將來有機會睇番回憶一下!

發現細細B(4W)

頭2胎都係春天出世, 今次侍住細細B有家姐阿哥跟, 讀書問題唔會太大, 所以一心計劃想生個同我同一個月份o既11月寶寶, 點知第一個Cycle撞正老公子出trip, 細果細細B就變o左12月寶寶喇!!!

2015年4月18日細佬2歲生日當日, 綠D已經見到隱約o既淺線喇, 細細B, 係咪真係你呀?

終於4月下旬, 確定o左細細B存在, 自己計一計日子, 預產期係12月尾呢, 真係唔止係細B, 仲要細無可細, 本來想做細B, 都唔知會唔會細得滯讀書被迫變大B囉...真係有少少預計唔到呢!!

嘔吐生涯重臨(5W)

睇住我佗Koey 同Kobe o既家人朋友可能都知我懷孕反應都幾大, 2胎都嘔到24-28周先開始唔嘔, 我都好記得自己講過: 我諗我係佗10胎嘔足10胎o既體質!!

結果, 今胎再一次證明我都係難逃嘔吐命運o架喇...

5Wk開始, 嘔吐終於開始!! 本來想等到7周照o左Confirm細細B有心跳先通知家人, 但結果都等唔到喇, 因為出街食飯嘔吐大作, 醒目o既媽咪一問就知喇!! HAHAHA!!

腰痛、胃脹、作悶、肚餓纏身...頭十幾周真係好辛苦, 雖然話就話胎胎都係咁嘔到慣, 但再一次經歷都真係唔太好受!!!

今胎孕反應有咩唔同?(5-12W)

今胎有樣孕反應之前2胎無乜試過o既, 就係成日成口口水泡!!! d口水泡係多到要不停lur, 誇張到出街都想拎住個紙杯係身...唔lur o既話吞o左就會想嘔, 都幾辛苦!!!  上網一查, 原來有人仲嚴重過我, 要lur到生都係咁, 好彩, 我到o左12周後呢個情況都改善o左好多, 雖然間中都仲有泡係口, 但lur一兩次就會停, 唔使好似之前咁麻煩喇!

另外, 睇番3次孕反應, 雖然都有嘔, 但明顯佗Kobe時嘔得最辛苦, 基本上未驗到有o左已經開始作嘔作悶, 之後食o野一直都只能食一兩啖就食唔落, 孕反應大過Koey o個陣同今次好多, 輕o左8磅呢, 今次雖然都輕o左5磅, 但明顯係食得多過Kobe o個陣, 所以我都有種直覺, 覺得今次有機會係佗女, 所以孕反應無上胎咁大呢!!

OSCAR(12W)

接近12周左右去威爾斯照Oscar, 我10點去到醫院, 等到12點先真係入得去照, 點知細細B唔合作, 照o左15-20分鐘個姿勢都唔o岩, 照唔到!! 結果我要自己出去食lunch, 趕唔到番去送Koey番學, 要留到下午2點再番去照!! 

2點準時翻照, 個姑娘都算唔話得, 好有心機不停碌碌碌同郁我個肚, 細細B開頭都唔係太合作, 照得唔係太好, 直到照到最尾個位先好d, 影到o既相先叫清楚少少!! 由於姑娘真係照o左好耐, 我都唔好意思問佢睇性別...離開時望o下個鐘, 原來我已經照o左45min, 出面仲有好多人等緊呢, 有時都覺得政府d姑娘惡d唔係無原因...

最後, 就係細細Bsize問題, 姑娘話佢比預產期細, 叫我照埋結構後拎晒d超聲波相番去醫院見醫生, 到時再睇使唔使改細d預產期!!! 其實我唔想改細呀, 因為我好唔想個催生期有機會去到2016, 咁細細B就有機會做大B而唔係我一直想生o既細B呢!!! 

懷孕蜜月期 (12W)

o係12周o個個星期, 我o地一家去o左東京大阪旅行! 好彩作嘔作悶情況已經減輕, 又有老公子擔擔抬抬, 所以我雖然大住肚湊住小朋友去旅行, 但唔使做家務煮飯洗衫打掃, 只係行路行得耐攰d, 其實都唔係想像中咁辛苦呢!!!

雖然只係3個月肚, 但可能係肚脹同埋我肚皮已經鬆晒, 著緊身衫似4-5個月肚咁呢!!! (結果到而家5個月我個肚都係咁上下大, HAHA!!)

10級驚嚇, 無心跳?(14W)

o係日本旅行番o黎之後o個個星期, 我要去健康院作第一次產前檢查!! 媽咪一早就o黎幫我睇住Koey Kobe, 我就自己去健康院! 去到健康院都係熟悉o既程序, 點知...

見醫生o喇, 醫生用胎心機碌o左一陣, 點知都係無心跳聲, 之後佢再試o左一陣, 都係無!! 我諗前後佢試o左5分鐘都無, 之後佢就同我講, 無聲得2個可能性, 一係BB太細, 一係就小產o左!!

小產o左??

醫生講o既時候真係何其冷靜, 但我個心就真係涼o左一截!!! 當時我都唔識反應, 醫生只係幫我寫轉介信, 著我即刻去威爾斯急症俾封信佢o地, 等佢o地安排我照超聲波! 我問醫生去到急症使唔使等, 點知佢話要...

o下? 咁即係點???'

離開醫生房, 我即刻打俾朋友求救 (老公子出o左差唔方便, 我手機無得上網!), 叫朋友幫我搵我附近可以即刻有得照超聲波o既私家診所! 當時我都仲好冷靜, 個心只係不停諗: 唔會o既...但14周喇, 以我所知應該聽到心跳o架喇...唔通真係...

結果朋友好幫得手, 即係搵到間可以即刻去照o既, 於是我就去o左呢間私家診所度等!! 

唔係講笑, 等入去見醫生o個5-10分鐘, 真係我呢一生人最長o既5-10分鐘, 眼淚都忍唔住開始流出o黎...唔通我去旅行真係太頻撲, 所以搞到細細B...

好喇, 終於入得去見醫生!! 入到去我講番因為健康院聽唔到心跳, 所以o黎睇, 講o左兩句已經忍唔住喊到收唔到聲, 醫生見狀都唔再問, 叫我即刻照!! 

上床一照...心跳咪係度囉...BB仲郁緊添!!!

終於, 我終於放下心頭大石喇!!! 醫生見我平靜番, 就再慢慢幫我照, 呢個醫生都算細心, 都係第一次有醫生解釋埋我知Screen 中顯示o既方向係點睇, 總之呢個醫生真係幾好人啦!!! 離開診所, 姑娘安慰我, 話其實健康院成日都係咁, 佢o地已經遇見過唔少好似我呢d case o既媽媽

結果, 就係因為健康院'求其', 我無啦啦可以見多次細細B, 亦無啦啦無o左$1200, 最慘仲係無啦啦被嚇到喊一大餐, 而家諗番都覺得好嬲...當然, 我都知最緊要細細B健康無事, 遇到今次件事, 唯有當自己唔好彩啦!!!

(P.S. 上面呢件事我最後都無同媽咪講, 費事佢真係話我, 一早就叫我唔好去旅行之類, 搞到自己嚇一跳... :p)

Confirm細細B健康無事, 即去買營養補充品同肚紋膏, 大出血!!

細細B性別係???(17W)

呢個星期我終於Feel到細細B郁喇, 個心定o左好多, 去健康院都應該唔會再被嚇親喇...

去私家產檢成績唔錯:

媽媽增重: -2磅 (之前最輕-5磅, 雖然仲嘔緊, 但已經開始回升喇!)

細細B頭圍, 肚圍, 腳: 都超過預產期size少少, 睇o黎唔使好似之前政府照Oscar時咁, 想改細我預產期喇!

最後, 產檢重點, 照性別!!! 細細B雖然揮手同我say hello, 但佢成個人好似玩yoga咁摺埋o左, 所以睇得唔太清楚!! 醫生最後就話'比較大機會' 係我同Koey所期望o既性別

...hehehehehehe!!!! (而家已經成日忍唔住偷笑中呢 :p)!!!

20150715 (17W1D)

20150802 (19W5D): 前兩胎都係冬天大肚，今胎終於有機會俾我試下大肚游水喇! 可能個肚仲細，基本上落水同平時無咩分別呢！

下回照結構喇!!!! 請繼續留意細細B最新發展, 多謝支持!!