自足月後, 雖然明知生仔好痛, 但一直好期待陣痛早日來臨, 因為咁代表我就快可以同肚入面o既乖豬見面!!
踏入39周, 我曾經問過老公子有無話想乖豬幾號出世, 雖然大家都無所謂(因為知道唔係自己控制), 但都不約而同覺得'520'呢日幾好, 而家諗番轉頭都覺得幾得意, 唔通呢d就係爸媽對自己小朋友出世o既直覺??
講番18號(39W1D)凌晨訓覺開始, 我就出現10分鐘一次o既宮縮, 比m痛痛少少, 行得走得活動自如, 到朝早7點幾去toilet, 發現小許見紅!! 10分鐘一次宮縮一直去到19號(39W2D)中午都無變密同加強o既跡像, 紅亦都係好少, 但奶奶同我媽都覺得我好應該去醫院檢查安全d, 所以當日下午我就同我屋企食個lunch就到威院喇!!
到威院7F, 當時門外有幾位產婦等緊, 媽咪先幫我去做入院手續, 我就等做檢查!等o左15分鐘左右終於到我喇, 磅重(63.2kg, 139磅, 估唔到最後體重都唔到140, 肚圍亦無過40寸呢!!)量血壓, 最後就係check宮頸喇!!
一check...
姑娘: 嘩, 你宮頸好厚, 有排都未開呀!!
我: o下, 咁我可唔可以唔入院住...
姑娘: 你而家咩手續都辦晒喇, 無得唔入院喎...
我心諗: o下, 咁你o地procedure上就唔好要我辦o左入院手續先幫我檢查啦...
就係咁, 我就入o左院, 睇見爸媽要走都有少少唔捨得, 因為我好怕訓唔到覺, 亦怕有排未生得唔知要住院幾耐...
入到產前房, 我係34號床, 先駁機check bb心跳同宮縮情況, 人o地check半個鐘, 唔知d姑娘係遺忘o左我定點, 我check o左最少45min...!!! 我訓呢邊8張病床都訓滿人, 有2個同我一齊入院o既, 但佢o地過o左幾個鐘見未陣痛只見紅都要求出院, 另外2個產婦就己經住o左一日, 但周數都係37左右, 未生得亦要求出院...um...正當我都疑惑緊係咪要求出院時, 我留意到我d宮縮好似終於密d喇, 有時8分鐘, 有時5-6分鐘, 雖然都係唔多痛, 但似乎有d'進步', 算啦, 都係住一晚院睇下點啦!!
是晚, 出院o既都出晒, 我呢邊病床得番連我在內5個大肚婆, 除我同另一個大陸產婦係生得外, 其他都係因其他事(check糖尿之類)入院, 估唔到大家幾o岩傾, 就係咁吹水吹到12點, 時間都唔太難過, 不過佢o地都覺得我行得走得笑得, 認為我可能到第二朝都係要出院, haha!!!
深夜來臨, 我訓唔著, 開頭係因為陌生床, 亦因為緊張mon住自己宮縮時間, 後來開始有睡意喇, 但己經再訓唔到喇, 因為宮縮開始加強, 開始痛喇, 點幾兩點落床去toilet, 開始要扶住o野先慢慢行到, 甚至要等唔痛先郁動到...
=======================================================
半夜3點幾??對面個大陸產婦開始發出呻吟怪叫, 好嘈, 姑娘鬧佢叫佢唔好嘈, 話嘈都無用, 至於我, 因為開始要好專心咁對抗陣痛, 我哼都無哼, 心諗, 死啦, 己經好痛喇喎, 但仲未痛到好似對面床咁忍唔住叫出聲, 唔通我宮頸仲未開, 仲有排先痛到對面床咁o既程度?
4點幾5點, 大陸產婦痛到嘔o左出o黎, 我襯陣痛停o左行去toilet時通知姑娘, 去完toilet順道又同姑娘講我見紅多o左好多, 亦痛o左好多, 但姑娘話我5-6分鐘痛得30秒仲未得, 要5分鐘痛夠1分鐘先得喎...
噢...無可奈何, 我繼續戴住眼罩專心抗痛...
天光喇, 6點幾吧?終於有姑娘check大陸產婦宮頸, 之後就送o左落產房, 我問隔離床聽唔聽到佢開o左幾多度, 因為我好想知佢痛成咁開幾多, 我係咪仲有排先痛到佢咁...隔離床話聽得唔多清楚, 但好似係5度...
ic...唉, 我而家己經極痛喇, 但似乎仲有排...
8點幾, 醫生巡房, 求其問我而家宮縮咩程況, 我話5-6分鐘痛30秒, 之後佢o地就走o左, 完全無意欲要幫我檢查...老公子呢個時間打俾我, 我同佢講我痛o左好多, 出唔到院o架喇, 但唔知幾時先落得產房, 可能仲要等...
無奈, 襯宮縮停去刷牙, 襯宮縮停快口狂送醫院早餐入口(無錯, 間直就係倒入口咁滯, 因怕好快又痛過食唔到...另外, 早餐係火腿通, 雖然無心情食, 但印像中係幾好味!!)!! 唔痛時仲同隔離床傾到幾句, 其餘時間就繼續帶住眼罩唔出聲專心抗痛...
9點幾, 頂唔順, 真係己經痛o左好耐, 而家o既痛仲間中好似有少少力向下推咁, 總之痛得又唔同o左少少, 就算未落得產房, 都好應該幫我檢查啦, 好歹都俾我知開o左幾多, 仲要痛幾耐嘛...於是襯姑娘經過request要檢查, 可惜, 等o左15min都無人o黎show我, 我唯有叫隔離床幫手叫姑娘...
10點, 終於有2位姑娘o黎幫我check...
一check...
姑娘: 嘩, 你都犀利喇...
我: 點呀, 開o左幾多呀?
姑娘: 6度!!
大家想像到我當刻有幾興奮嗎?? 6度呀!!!!!!!!!!!!!!!!!!!!!
真係鬆一口氣, 原來我唔係仲有排先宮口開, 原來我己經終點在望!!!
可能宮口開得大, 產前房一輪騷動好快有人拎床o黎, 我要襯唔痛時自己過床自己除衫著袍, 呢個時候我仲聽到有人問我執好袋未...大佬呀, 自己過床己經好辛苦, 而且我都唔知自己開到咁大落得產房, 又點會執好o野喎...於是我好唔奈煩咁答"我而家點執呀!!"...
過o左床, 我諗起我要通知我老公, 但手機要鎖落袋喇, 隔離床好好人, 問我老公子電話幾號, 幫我通知老公...(後尾先知, 我老公子以為呢個係姑娘...自我落o左產防後就見唔番吹水吹o左大半日o既隔離床2位產婦, 佢o地應該都唔知我最後咩情況...能夠識到佢o地都幾開心, 可惜無法再聯絡喇!!)
離開產前房之前, 病床泊o左係路中心, 之後好多姑娘走過o黎讚我, 話我好犀利, 叫都無叫, 見我帶住眼罩仲以為我唔多痛係度訓緊 (咁專心抗痛嘛, 邊有閒情叫出聲!), 又有人讚我後生所以捱得痛, 又有人話我唔聲唔聲呢d通常先開得快...可能知道終點在望啦, 我心情都好好, 仲有心機多謝佢o地讚我呢!!
=======================================================
好, 終於推落產房, 我係7號房, 間房都幾大o架, 唔知係咪剛騷動完一輪, 忽然宮縮疏o左少少, 我問姑娘仲有幾耐先生得, 佢話通常1個鐘開一度, 望o下鐘, 當時10點多d, 咁即係我要到2點幾先開晒10度...噢...時間變得好漫長呢!!
之後有人幫我放尿同穿水, 有好多暖水流出o黎, 但我唔知究竟係放緊尿定係羊水o黎...
之後姑娘又俾電話我, 我終於可以打俾老公子, 同佢講'我生得喇' , 叫佢快d由中環o黎, 收線後姑娘笑我唔應該咁講, 會嚇親我老公, 因為其實我仲有段時間先生得...
o係產房有笑氣聞(可能因為我己經開多過6度, 都無人問我打唔打止痛針lu...), 但聞住其實都好痛, 但我自問都幾self control, 每到痛楚去到peak時就會拎開唔聞, 一拎開個人真係wing wing o地無乜知覺, 都唔知係咪笑氣有效定係本來痛楚己經過o左peak本來就己經無咁痛...
11點半, 有人o黎check宮頸, 7度, 果然係一個hr一度呢...
7度之後o既陣痛真係唔講得笑, 亦開始有股向下o既力往下推...
12點幾, 我問可以幫我check嗎?但姑娘話唔得, 話我穿o左水唔可以check咁密, 會細菌感染, 噢...仲話我宮縮唔夠密, 其他人似我開到8度應該己經3-4分鐘痛1分鐘, 但我仲係5-6分鐘痛唔夠1分鐘, 咁落去我到生得時就要好好把握每次宮縮o個少少時間!! (諗番呢句, 我而家先明, 當刻掛住痛都唔多明點解佢咁講!) 姑娘亦唔知點解忽然對我講起道理o黎, 話我呢個年紀算後生, 仲唔知講o左d咩, 總之係好語重心腸咁安慰我吧...
點幾開到9度, 有人o黎檢查, 陣痛時開始有好大股力向下推, 呢股力一出現, 應該就係人o地講好想疴o既感覺, 但我又覺得唔似人o地講似想疴大便咁, anyway, 呢股力一出現我就忍唔住成個人chok到彈起, 俾姑娘叫我唔好chok...但我真係好難control呀, 而且己經忍唔住狂聞笑氣, 好鬼wing...
唔知係咪wing得滯, 最後呢個鐘雖然極痛, 但比想像中時間過得快, 2點半, 終於又有人check, 佢o地話我開晒喇, 可以用力生!!!
但...問題o黎喇, 等得老公子入產房同助產士setup好, 我開始feel唔到幾時宮縮幾時無宮縮, 無o左開9度時向下o個股力...總之助產士叫我用力我就出力疴, 但可能係我用力不當, 亦把握唔到宮縮時間, 我有時無宮縮都就去用力, 被助產士叫停, 叫我留番d力有宮縮先用力...但...我真係feel唔到呢...
用o左好多次好多次力, 成頭成身都係汗, 我硬係生唔到, 換氣又唔o岩, 成日一到換氣時就接唔住上一道力, 係個口到噴氣洩晒氣, 我亦開始覺得自己無力生喇, 心諗, 唔通我白捱呢10度陣痛, 到頭o黎無力生要開刀??
雖然我生到無力, 但助產士都好好, 講好多鼓勵說話, 成日話我知見到bb頭髮喇, d羊水好清好乾淨等等...終於唔知疴o左幾耐, 終於頭仔快出喇, 助產士幫我剪 (actually 我一直唔想剪, 但實際上都唔到我揀, 而且到o個刻你亦唔會介意佢剪唔剪, 因為當時只係想快d生到bb出o黎!!), 剪o既時候知道o架, 但唔痛, 剪完再出多幾下力bb頭仔終於出o左, 我成個人鬆晒, 助產士叫我用多一下力, 個身都出埋, o個下感覺暖暖咁, 好正...
就係咁, 乖豬出世喇!!!
3點21分 (原來我疴o左成個鐘, 佢o地話我算生得耐!!!...唉, 我自問都算好力o既女仔, 可能我真係用錯晒力生...), bb重3.165kg (~7磅), 助產士叫我望o下男仔女仔, 我當時望住佢臍帶, 係度諗, 點睇男定女...個腦好似function唔到咁, 但口就照答女仔...hahaha!!!
望多一陣乖豬...忽然好鬼感動, 忍唔住流眼淚, 呢個就係我陀住10個月, 陣痛o左咁耐咁辛苦生出o黎o既女喇...
p.s. 成個生仔過程我一聲都無哼過, 我老公子雖然有入產房陪產, 但佢原來由頭到尾都以為我 '唔係好痛', 因為我無出過聲...(!!!)...講真, 咁痛真係要好專心去抗痛嘛, 邊得閒出聲喎, 掉轉當時我o係產房內聽到外面另一個產婦正好同我相反, 不斷極有中氣咁大吵大鬧, 猛咁俾姑娘鬧, 我當時心諗佢係咪唔多痛就真, 仲咁好中氣呢...
再p.s. 老公子入到產房只係拍下我手以作安慰, 我覺得佢做得好好, 因為我當時根本完全無心情去理佢, 要專心抗痛同專心出力, 如果佢當時出聲嘈我同我講o野, 我一定會仲心煩, 所以真係要讚o下老公子!!!
=======================================================
bb抹乾淨o左, 助產士就抱o黎同我o地合照, 可惜我部相機連埋我d行李鎖住o左...所以咁珍貴o既相, 只能用我老公子部手機影, 好彩都有300萬像素, 唔太差o既...
之後老公子要離開產房, 助產士就問我想自己疴胎盤定佢o地幫我拉, 我當然叫佢o地幫我啦, 當刻真係咩力都無喇!!! 助產士邊檢查我胎盤邊教另一位助產士, 原來個胎盤都好大個o架! 同一時間, 另一個姑娘就同我講"好靚呀, 含氧量100%呀", 我無深究, 我估係講緊bb血液含氧量o卦, 總之佢話data靚就得喇!! 至於我, 由於無咩野做, 就望o下訓係不遠處箱中o既乖豬, 我見到佢喊都唔喊, 仲睜大對眼周圍望, 好得意!
終於聯針, 係男醫生, 佢話我傷口都算爆得勁...可能因為我生得太耐, 磨傷晒, 佢話我入面有一忽俾bb扯甩o左...由於要聯一段時間, 我就同醫生吹起水上o黎...極好傾咁, 聯針都唔痛, 聯好後醫生同助產士講我呢個產婦都幾得意幾好傾, 我就答佢話之前成晚陣痛o野都講唔到, 而家唔講幾時講...haha!!!
聯完針4點半, 我request姑娘抱乖豬俾我埋身餵, 餵得極成功, 一d都唔痛, 餵o左半個鐘我先連埋bb一齊送上產後房!!送上房其間聽到有人讚bb精靈得意, 可能因為佢一直眼仔碌碌, 唔似多數bb合埋眼啦, haha!!!出到lift大堂, 見到由十點幾一直係產房外等候o既爸媽同老公子, 我o地一齊坐lift去產後房, 我爸己經急不及待猛用手機影外孫, 仲不斷話佢眼仔碌碌呢!!
到產後房5點半, bb要沖涼被人拎走o左, 呢個時間剛好探病時間(d時間真係夾都無咁準!!!), 爸媽細佬妹老爺奶奶姑仔都有o黎, 但我剛生完, 心情仲好激動, 見人就講"生仔好恐怖", "下胎開刀算" 等等, 仲忍唔住眼濕濕...可能因為剛生完, 雖然好開心好多人探我, 但其實我覺得5點半到7點半呢2個鐘探病時間有d難捱, 因為我無得休息, 產後房冷氣又細, 我熱到成身汗媽咪又要迫我襯d飯熱時食, 真係熱到我人都癲呢...
anyway, 終於7點半完o左, 我終於可以躺係床休息o下, 雖然心情激動又熱都唔會訓到, 但都叫有少少時間養神!!
好似到8點幾9點吧, 乖豬終於推番俾我照顧, 我亦終於由懷胎10月o既女主角, 變為乖豬o既工人, 展開我無得訓o既生捱...
