第五十四至五十五周 (25/5 - 7/6): 媽媽好忙!!

自乖豬而家只訓一覺午睡, 我呢個媽咪真係忙o左好多!!!

而家基本上佢一訓覺我就要忙住抹定洗碗煮lunch自己食同埋去toilet, 做完一輪好多時佢都醒, 想上下網都無時間,  連沖涼都好多時要等到夜晚老公子番到o黎我先沖到, 真係慘!!! 到乖豬訓醒, 佢而家又開始可以好自如咁上落sofa, 佢一見我用電腦就會衝過o黎搞電腦, 搞到我用都用唔到, 行得太開用佢又會猛嘈叫我番去陪佢...嗚...總之就係'無自由, 失自由'啦...所以我諗以後Dblog都係出雙周記算喇, 橫掂而家大左, 發展方面其實都唔使太密update...

訓方面, 而家只訓一覺, 但由於下午o個覺多數訓個半至兩個鏡, 仲要睇佢幾點起身, 如果2點前起身, 夜晚8點幾佢就開始眼訓, 有時見佢食奶時都差D訓著, 眼仔紅晒咁好陰公咁, 但佢自己傍晚TUM到7點幾都唔願訓, 所以我都唔肉痛得咁多, 係佢自己'攞'o黎, HAHA!!! 不過過左一星期左右, 乖豬都開始習慣, 夜晚好似無咁眼訓, 少左食住奶忍唔住訓咁慘, 有時仲要捱到10點先訓, 同之前一樣咁夜呢!!!

 
有日老公子餵粥餵到個女訓o左, 因為佢點半鐘起o左身就無訓過, 結果佢竟然由7:45pm訓到第二日7:45am (半夜3點幾喊醒扭o左半個鐘先訓番!)!!!

食方面, 之前食幾啖粥就成日唔肯mark口食, 近呢個星期開始有改善, 多數食到9九成, 唔知係咪真係越大越郁得多, 所以要食番多D o野補充體力呢!!!

 
我買o左麵包機, 乖豬都幾欣賞咁, 但其實我整得麻麻好味, 可能未掌握到點用, 要努力D整健康麵包先得!!!

活動能力方面, 行仲係無乜起色, 都係只敢放手行3-4小步, 太遠就會坐低爬!!! 雖然未識行, 但一個星期內無啦啦學識落SOFA同上SOFA, 自此之後就成日上SOFA跳下彈下咁, 好enjoy,可能佢成日見到爸媽坐SOFA, 佢覺得自己上到去就好似好神氣咁, 可以同大人平起平坐呢!!!

 
行得兩三步!!

 
有朝我行開一陣番出廳就見到咁o既情景...當時心入面暗叫o左句: '弊喇'!!!

講o野方面, 'Ma'字暫時仲係'萬能字', 乜都係'ma'就算, 教佢其他字一律都係'MA'字咁讀...就連叫爸爸都係好似'MA', 只係聽到得好小分別...

25/5: 禧禧同靖靖o黎賀乖豬生日呀!!! 我o地去左會所玩, 靖靖同乖豬繼續做貼身膏藥同大喊包...禧禧就依舊唔怕生保同好好笑容, 間中就嗲o下媽咪, 有時覺得小朋友真係咁樣先得人鍾意D呢, 希望乖豬大D會好D啦!!!

 

 
貼身膏藥

 
喊包

禧禧少有地喊!

喊包雙妹嘜!! (孖女裝!)

3/6: 6299難得星期日唔得閒, 我就心思思想出街, 結果夜晚去o左沙田打邊爐, 係就係貴D, 但都幾好味, 裝修仲好特別!!

 
呢日乖豬都幾合作, 無乜扭計, 陪我o地打邊爐坐足全程咁滯!!!

其他精選相:

賞碟

識坐上sofa, 勁鐘意坐呢個位, 因為爸媽平時就係o係呢度上網用電腦!!!