鐵人媽媽1湊3: 2017

2017年12月31日星期日

回顧過去, 展望將來!

2017年算係鐵人媽媽過得唔太順意o既一年！負能量太多全家都受影響!

開心事：
去o左2次旅行(沙巴 & 花蓮); Koey入到間心儀o既津校, 細佬妹之後都唔使煩，阿妹亦順利入到上午班，可喜可賀; 屋企清理o左好多BB用品，掉o左High chair, Potty, BB床, BB圍欄等，搬o左書櫃出廳，新添置o左個大衣櫃, 換鞋櫈, 鞋櫃同魚缸(雖然仲未正式養魚), 年尾仲換左個蒸焗爐同二手Staub, 又添置o左d兒童玩意如室內千秋，總之，住o左五年，屋企有一番新景象，再加上12月老公成月唔使出差, 屋企多番d笑聲, 總算係開心o既!

唔開心事：6月同12月都係黑仔月！6月Koey獲派第一志願本來開心到上天，但估唔到10日後就跌o左落地獄！雖然最後雨過天清，但到今時今日我都仲未明白發生咩事，人性險惡，我要學識好好保護小朋友，保護自己！一波剛停，一波又起！6月尾小朋友輪住流感高燒，終於輪到阿妹中招，仲要燒到抽筋！第一次睇見自己小朋友反晒白眼面唇發黑手腳疆硬毫無反應, 真係嚇到我心都離埋, o個種驚恐真係前所未有, 而家都仲有唔敢諗番起o既感覺!!! 兩件事最最最徬徨仲要係事發時, 老公子都係出o左差!! 雖然老公已經最快速度趕回香港, 但o係咁緊張時刻只得我一個o係屋企面對, 有時真係覺得好無助好孤單!!!

9月Koey小一開學, 惡夢o既開始！全日制後要早起，放學後茶點沖涼做功課食飯訓覺日日如是，咩親子時間都無，母女之間只餘催促同跟時間競賽，身心勞累又破壞親子關係，好辛苦！雖然近來Koey搵到快點完成功課o既方法(邊上堂邊做功課)，但我仲未搵到可以提高Koey做事效率o既方法，慢活係佢性格，要改變唔容易亦辛苦大家！講到尾，都係諗唔明點解政府唔留番少少半日制俾好似我呢d FTM多個選擇，而家先小一，遲d高年班加埋細佬妹都升上小學，我一定死更多細胞！

12月破財又傷身! 先o黎整壞焗爐再整壞電話, 單單呢兩樣已經無o左半皮...再加上聖誕網購大出血, 真係跌錢咁跌!!! 以為破財擋災啦? 錯!! 聖誕假期間全家輪住病, 今次Koey燒o左4日, Kobe燒o左2日, 大人如我都又痾又嘔, 老公子都周身骨痛...估唔到呢個普世歡驣o既大節日就係日日困o係屋企咁過, 都算係近年過得最唔Happy o既Xmas呢!!

回顧到呢度，好似都係關於小朋友o既事，咁我自己同老公o既回顧呢？
Sorry, 好似真係無，彷彿我人生已經同自己無關...

其實今年係鐵人媽媽自信心較低落o既一年...特別係今年染上惡習~~食宵夜同夜訓(1am)後!!!

深深o既眼圈、無精打彩o既眼神、仲有肚腩越積越厚o既脂肪...自信心就係咁完全被打殘！所以今年fb 自拍照少o左，有時唔係無影，而係影極都搵唔到張望落精神見得o下人！

點解要自我放棄？我都唔明！阿妹比較夜訓，好多時到夜晚11點我先有自由時間，其實我都好想早D訓,但網購一陣甚至只係睇一陣fb upload o下相就12點幾，時間好唔見使!! 唔知幾時開始幾塊餅乾一支甜筒就好似仙丹咁，唯我獨享o既感覺令人留戀！老公長期出差，就算唔出差都好多時玩手機，拍拖時間嚴重不足 (全年可能不出5小時拍拖時間...而家要我諗可能只得結婚周年我發住燒食個lunch咁多時間...)少溝通加上老公貴人事忙，普通家事可以拖半年以上都未做到，日積月累多番催促破壞感情...宵夜一碗美味即食麵就成為我同老公o既溝通橋樑！年紀開始大加上長期唔夠訓(阿妹仲未戒半夜叫食奶!), 新陳代謝慢到阿媽都唔認得, 試問想fit想靚點可能? 自信滿滿點可能? 心情靚點可能? 心情唔靚就對小朋友越呵刻, 小朋友就越唔聽話, 結果惡性遁環我就心情更差...休息唔夠鎖事繁重溝通不足都係壓力來源, 有時都認唔住諗, 抑鬱症應該離我不遠了...

展望2018, 願望唔多, 希望暑假大旅行順利老公小朋友健健康康!!!! 亦希望老公飛少d, 對家人積極D, 鐵人媽媽有感力有不繼, 好多事要學識放手...希望Kobe今年有望轉上午班, 實現我期待7年之久可以重獲每天3小時自由時間o既願望, 等我有多點時間處理家人自身各樣大小事, 有時間做o下運動釋放多D多巴胺重拾自信同開心能量, 相信咁先有助屋企各人健康開心發展!

2017年11月8日星期三

Koey升小一後全家之改變

上篇講到Koey升小後小學雞與小學雞媽媽之苦, 雖然Koey做o野滋油的確係升小要面對o既後最大至命傷, 但其實Koey都有唔少值得我讚賞o既地方o既!!!

讚讚乖女

唔賴床: Koey似我一樣, 一叫就醒!! 雖然都時不時會喊咁口嗌"好眼訓"或訓o係梳化唔郁一陣, 但so far咁早起身算合作o架喇!!! 6:50鬧鐘響7:15落樓, 都算快手!!
會自理: 刷牙換衫著鞋番屋企沖涼等等Koey都係自己包辦, 我基本上只係預備早餐同預備佢番學用到o既毛巾餐盒水樽同幫佢紮頭髮!
自己功課自己做, 自己功課自己執: 雖然做功課速度真係慢o左d同有時唔專心, 但自從開學以o黎我基本上都無對過佢功課亦無續本幫佢執書包, 只係佢做到唔明問我先答同埋開學初期從旁協助下執書包!!!
享受小學生活: 雖然又要早起又要番全日, 放學番o黎仲要做功課無晒玩樂親子時間, 但每次問Koey番小學開唔開心佢都會俾我正面回應, 每次聽到佢話開心我都安樂d, 至少只係我主觀覺得現今小朋友生活好苦而當時人不自知, 咁都算係好事o黎呢!!!

總之, Koey其實除o左慢, 基本上都唔使媽咪我太操心 (其實要我操心我都無時間去操心...😓), 有時催到我忟o既時候諗下佢其實已經算好乖女, 我火氣都真係會少D!!!

鐵人媽媽一湊三生活之改變

Koey升小要早起, 要番全日班呢d改變當然大啦, 但原來Koey升小, 對鐵人媽媽我都有唔少影響!!!

接送困難1: 7點15分一拖三送家姐上校車

老公出差我要7點幾1拖3落樓送家姐校車, 呢個挑戰係我事前一直都好擔心o既!! 雖然為此老公子已經同老細表示要飛疏d, 但隔個星期飛幾日點都走唔甩!

結果呢, 開學幾日後我已經要一拖三7點15分落樓!!!!

妹妹剛訓醒look~

又估唔到, 呢個事前最擔心o既task無我想像中咁難呢!!!

其實Kobe 暑假尾有o左個電子鐘後就日日6點幾自動波起身, 好似越早起身越叻, 成日同家姐鬥早, 可能因為咁, 我完全唔使叫Kobe起身, 只要臨出門口抱起阿妹就搞掂呢!

因為上校車地點o係屋苑樓下, 呢個task要比想像中無咁難!!!

不過...好戲在後頭!!! 隨住近來Kobe再無6點幾自動起身, 加上就快冬天個天越o黎越遲天光, 天氣又慢慢會凍, 1拖3落樓應該難度會增加唔少, 又要叫醒小朋友又要同佢o地著外套, 諗起都驚驚, 希望入冬後繼續順利啦!!!

接送困難2: 分身接放學

由於細佬讀下午班, Koey平日有一日會上課外活動無校車, 結果1個5點o係火車站落校車, 1個5點15分o係巿區放學, 我一個人跟本分唔到身!!!

所以, 我每星期都要麻煩我媽咪(Grandma)幫手接細佬校車, 我就出去接Koey放學!!! 雖然我知媽咪絕對唔會托手掙, 但始終山長水遠出o黎只係為接一陣放學, 心理上我都會覺得唔好意思!!! 所以, 我真係超級希望Kobe可以轉到上午班, 咁我帶埋Kobe Kodi出去接Koey放學都可以, 唔使下下要麻煩到媽咪又無咩彈性呢!!

接送困難3: 浪費Koey做功課時間

無課外活動o既話, Koey 4點半o係屋苑落校車, Kobe就5點o係火車站落校車!!! 計埋行出火車站o既時間, Koey番到屋企基本上得5-10分鐘, 如果我帶埋佢出去接Kobe, 一個來回番o黎平均5點10-15分!! 計一計數, 即Koey每日會無o左40-45分鐘做功課時間!!!!!!

要知道而家d小朋友繁忙到不得了, 呢40-45分鐘真係唔可以白白浪費去接送細佬身上!!! 好好彩, 我搵到個好鄰居佢肯俾我留Koey去佢屋企做功課, 直至我接埋細佬番屋企, 咁Koey d時間先得以更好地利用!!

不過, 都係同上面一樣, 要日日麻煩鄰居都真係會唔好意思, 如果Kobe轉到上午班就咩問題都無呢!!

缺乏睡眠, 鐵人媽媽變身"無記性"媽媽

坦白講, 鐵人媽媽每日'放工'後o既私人時間真係超級琴貴, 為o左享受更長"私人空間", 鐵人媽媽絕對唔係早睡之輩, 而家因為要照顧Koey番學, 本來睡眠時間已經唔長o既我就訓得更加少!

可能因為唔夠訓, 鐵人媽媽由原本"記性唔錯"變為"極之無記性"...開學後, 因為我無細心幫Koey執書包或無記性而先後欠帶過幾次書/回條/視藝袋/功課, 最嚴重係明明Kobe可以著便服回校慶祝中秋節我都竟然搞錯, 完全無o左年事...搞到我都有d自責同急急諗方法改善自己記性!!!

Anyway, 阿Q d諗, 每次欠完我同Koey都有因此小心o左, 所以欠交唔太密o既話其實應該唔係咩壞事呢!!!😜

煩燥媽媽

1湊3少d精力都唔掂, 鐵人媽媽本身EQ唔算高, 小朋友唔聽我講我就好易"燥", 而家...我o既"燥火"簡直就同Koey o既速度成反比!!!! Koey動作越慢, 我就越"催", 越"催"我就越"火"!!! 基本上, 我發火鬧人o既次數比之前真係多好多...

其實鬧完後我自己都好後悔, 但我發覺好多時自己都控制唔到自己...唉...真係苦了小朋友苦了自己!!!!

所以, 為免更進一步破壞大家感情, 我已經將同Koey 溫書o既責任交o左俾牌氣較好o既老公子身上, 相信咁樣對Koey對我都比較好, 亦係好好o既機會俾老公子同Koey更多時間相處!!!

Kobe Kodi生活之改變

唔好以為Koey升小唔關Kobe Kodi事呀!!

Kobe Kodi 變睡寶寶

一早叫醒小朋友落樓...番上樓後仲未夠8點, 小朋友眼訓嗎??? 佢o地用行動話晒我知!!!

Kodi 9點幾10點開始扭計, 試過幾次攬住我訓番...

哥哥襯阿妹唔反抗抱佢, 冧到呢~~

Kobe其實一向早眼訓, 而家就更加唔使講...

食食o下飯唔願食走去sofa訓o左, 食完訓係sofa睇睇o下電視訓o左, 甚至未食飯就訓o左都試過...雖然有d陰公, 但睇見佢咁訓得我其實好安慰...HAHAHA!!!

時間多到唔知點用

如果呢句o野apply 落家姐度就好喇...家姐而家同我傾句閒計都無時間, 但Kobe Kodi就時間多到唔知用o黎做咩好!!!

由於太早起身, 朝早同Kobe Kodi睇完故事, 玩完積木, 甚至睇完一陣卡通落埋街玩後都仲有好充裕o既時間先到Kobe番學, 開學初期同我真係覺得有d浪費o左Kobe o既時間, 好想好想襯佢未升小做大忙人時幫佢報多d興趣班消磨朝早o既時間!!!

可惜...不論跆拳單車游水定足球都無平日上午班!! 好彩...近來終於湊到幾位Kobe同班同學又夾到Roller教練自定平日朝早上堂, 可以好好利用下d時間, 心理上覺得好d咁呢!!!

3姐弟妹感情更進一步

無錯, Koey番o左全日後佢真係連同細佬妹玩o既時間都無, 但以我所見, 每到weekend Kobe同Koey又會一早起身不停吱吱喳喳一齊玩, 感覺就好似兩姊弟o係度把握時間相處玩樂, 補番平日玩少o左o既時間一樣!!!

其實見少o左爭執都少o左, 感覺上都唔係太壞!!!

相反, Kobe而家無o左家姐帶住, 佢就多o左追住個妹一齊玩, 兩兄妹相處多o左感情都有進步, 亦係好好機會叫Kobe學o下做大哥哥!!!

上面條片係咪好sweet呢~~~~

當然, 現實呢D場面出現並唔多, 兩兄妹大部份時間都係爭吵尖叫中...但可能呢個就係佢o地兩兄妹之間o既相處模式!!!

總結

總之, Koey升小後, 除o左爸爸繼續努力工作出差外 (其實仲變o左"補習老師", 不過老公子o既改變比起家中其他人都算少了!!), 基本上家中各人都面對緊天翻地覆o既變化!!!

雖然而家已經開o左學2個幾月, 但坦白講, 大家都仲係處於適應階段, 每日都身心俱疲呢!!! 希望全家人都快快適應, 盡快搵到一個比較舒服, 唔使成日"催促"o既方式渡過只會越o黎越忙碌o既學習生涯!!!

最後, 再次多謝開學後每星期特地出o黎幫手接細佬放學o既Grandma同俾我放低個女大半個鐘做功課o既好鄰居, 唔係你o地, 鐵人媽媽o既1湊3生涯一定更加辛苦, 多謝你o地呢!!!

2017年10月9日星期一

小學雞與小學雞媽媽之苦

小朋友升小後家長及小朋友面對o既苦況其實唔止一次聽過, 但到真正殺到埋身時, 還是忍唔住覺得好辛苦...

小學雞生活

Koey番o左全日制小一3個星期, 佢o既生活只係得番...

...做功課、沖涼、食飯、練琴、訓覺...

鐵人媽媽o既生活就只係得番...

...催、催、催...

功課以外, 還有甚麼?

想像o下都覺得生活了無生趣呢!!! 基本上, 每當Koey...

想分享o下學校趣事咩? ......講唔夠兩句就被我打斷: 好喇唔講喇, 專心d做埋去先講!
想同細佬妹玩咩? ......玩唔夠一陣就被我阻止: 又落地? 你做好晒功課喇?
想慢慢嘆下午茶/晚飯? ......20分鐘內仲有半碗飯就被我鬧: 個個都食晒喇, 你仲有咁多飯, 食快D!
想同爸爸傾計講笑? ......講唔夠兩句就被我打斷: 唔好再講喇, 做完功課未? 老公, 有時間不如你同你囡默書溫書好過啦!
想聽媽咪講故仔? ......得, 完成晒"要完成o既"而又未過夜晚9點先啦!
想睇一陣youtube卡通? ......得, 完成晒"要完成o既"而又未過夜晚9點先啦!...學校網上教材或者可以o既, 但都唔好睇超過10min喇~

唔通...Koey o既童年就只餘做功課溫書? 運動時間、培養興趣o既時間、親子時間、同兄弟姊妹相處o既時間呢? 通通都無!!! (開學只係個幾月, Koey就連星期六學緊o既Roller堂都真係無時間再handle, 唯有暫停o左先...)

睇見自己o既小朋友童年生活得番做功課, 作為媽媽真係忍唔住替小朋友難過, 覺得肉赤!!!

唔催可以嗎?

其實我都知催得多...

小朋友會對催促感到麻木
影響大人小朋友心情
破壞感情

其實我每日催催催, 真係催到自己都頭痛, 無奈係睇見Koey開始當我耳邊風, 繼續佢嘆慢版o既節奏, 真係名副其實o既皇帝唔急太監急呢!!!

我問過Koey, 自從佢番小學後有無發覺每日放學都好趕時間, 完全無時間同媽咪睇故事書, 無時間同細佬妹玩...咁樣有問題嗎?

佢竟然答: 無!

聽到佢咁答, 真係有d"吹脹"o既感覺...

換言之, 唔通暫時無o野可以令Koey有動力做快d專心d? 如果我唔催, Koey就會晚晚嘆慢版食飯沖涼做功課到10點先訓, 仲要係無時間去練琴o個隻嗎?????!!!!!

反過o黎諗, 其實佢都唔介意過d咁o既生活, 我做咩要替佢緊張替佢急呢? 或者我唔催唔理, 佢反而可以自己調節番自己應有o既節奏??

唉...

暫時, 我都仲未搵到一個比較理想o既方案, 或者, 我同Koey都真係再需要多d時間去適應小學雞生活呢! 如果各位有代替催促, 又或者有效令小朋友做事快手腳d專心d o既好方法, 歡迎留言提供, 鐵人媽媽一定感激不盡!!

P.S. 講完小學雞之苦, 下一篇要記錄番d正面d o既!!! 下次要講講家姐升小一後值得讚賞o既地方, 同埋三位小朋友以及鐵人媽媽一湊三生活o既改變!!!

(補充: 功課真係好多好深嗎? 我問過其他同學仔, 有d快手腳o既番到屋企做1個鐘完成, 而Koey平均就要個半鐘!!!! o係鄰居屋企做功課似乎係專心d, 一番到屋企只係食個下午茶就45min, 晚飯再 >1hr...d時間就係咁無o左...但要我恨心連休息一下食個tea o既時間都取消我又未做得出...

其實要埋怨o既都係o個句: 點解要番全日制? )

2017年4月25日星期二

花蓮親子遊Day1_20170410: 到達花蓮~~

沙巴遊記只係寫o左2日暫時要停一停, 因為另一個旅程又要展開喇!!! (無錯, 由於忙住plan行程同處理不同家中大小事務, 沙巴遊記的確大受影響, 寫得比預期中慢!!!)

Anyway, 橫掂沙巴遊都過晒氣咁耐, 當然寫o左比較新鮮o既遊記先啦!!!

4月10日花蓮遊正式展開!!!! 因為航機班次改動, 我o地比原先遲o左2個鐘頭起飛 (好彩仲有足夠時間改酒店改行程!!), 所以呢日我o地朝早仲有大把時間o係屋企執拾同同Koey一齊扮靚靚!!!

唔使煮飯o既日子, 靚靚指甲又可以出動喇!!!

執拾好行裝, 2點鐘多少少抵達機場喇, 靖靖一家已經到o左喇!!!

Check-in 先知, 原來一行9人只包得一架BB車可以免運費, 另一架BB車要加錢先可以托運...結果靖靖佢o地決定即場買行李, 順便寄埋D行李...

下次再同朋友一大班人旅遊, 似乎都係分開買機票著數呢!!

Check-in完出發去閘口喇~~ 因為唔使食o野, 時間都幾充裕!!

5位小朋友~~

兩位夾都無咁襯o既小妮子!!!! (連身裙, 背包都差唔多款式呢!!)

坐完無人駕駛, 去到閘口仲未入得閘, 似乎都要DELAY呢~~

兩位小姐仔自得其樂, 唔係貼貼紙就畫公仔, 兩個細BB又未夠大一齊玩, 夾o係中間o既Kobe被冷落一旁好無聊!!!

我影相佢唯有搞搞震!!!

妹妹唔使坐BB車或BB椅, 可以同大人們一齊坐, 好快好Hyper!!!

等呀等, 等呀等, 老公3點幾用app 睇先見到架機仲o係澳門上空飛緊, 仲未到香港機場..睇o黎要delay呢!!

終於, 4點鐘可以check-in喇!!!

閘口相, YEAH!!! 第一次咁多人一齊影呢!!!

上機, 小朋友要自己坐一行~~~

我o地就坐隔離

爸爸們同佑佑就坐Koey Kobe 靖靖前面~

起飛無耐, 妹妹就訓o左喇!!! 呢程機佢都無咩大叫或扭計, 算係咁~~

小姐們自顧自畫畫畫, Kobe可能太悶, 最後訓o左大半個鐘!!!

小朋友們唔係訓覺就係自娛, 我同Agnes可以好free 咁傾o下計, 眨o下眼個半機程好易過, 妹妹仲訓到落機前先醒呢!!!

落機已經6點半, 小朋友們落機後都好似好餓咁...本來我只係用暖壼預備o左下午茶~~~4條小蕃薯~~俾妹妹, 但見大家都咁餓, 連一向唔多食番薯o既Kobe都主動問我想食番薯, 原本以為有多o既4條小蕃薯竟然發揮到極重要作用, Koey Kobe Kodi同靖靖每人一條 (佑佑另有下午茶)醫醫肚餓, 真係估唔到咁有用呢!!!

媽媽們同小朋友們開餐, 爸爸們就負責排隊入境!! 過o左關後call 有折的士入巿區, 本來等o左唔太耐已經有車, 但爸爸們又咁o岩去o左搵櫃員機提款, 所以我o地先後錯過o左2次車呢 (的士有客唔等我o地去o左接其他生意, 好彩佢o地又會繼續幫我o地叫其他車o黎!)!!