個肚開始識變型喇!!! (25W)

8/2/2011 (25W)

肚圍: 35.5寸 (咦, 2星期無再大到喇!!不過個人覺得個肚重左好多!!) 體重: 126磅

==========================================================

今日初六開工大吉, 放o左6日假真係習慣晒, 今朝極唔願意起身, 仲係度諗自己仲要番多幾耐先放產假...

今日lunch 約o左blog友Lunch, 好開心呀, 其實add埋add埋咁多blog友仔, 今日先係第一次同blog友見面咋!!! 佢仲好客氣, 派o左2封利是俾我乖豬, 而我就咩都無預備送番俾佢,都有少少唔好意思!!!

不過呢, 原來呢個世界真係好細o架, 原來呢位blog友係識得我妹o架, 真係好橋呢!!!

==========================================================

9/2/2011 (25W1D)

其實自上星期開始我就間中覺得自己面腫同手指腫, 情況應該唔算嚴重吧...只係覺得自己多o左少少雙下巴同手指間中覺得戒子有d 緊...

唔通係過年食得太多肥o左???? 但又唔多似, 因為好似有時又會無咁腫咁o架...至於訓覺, 抽筋仲未出現, 不過好似覺得自己d血氣運行無咁好咁...

睇o黎我要注意多d飲食先得喇...仲有, 就係襯而家嘔少左精神好d, 放工要多d行斜路上山番屋企當做下運動先得!!!

下星期四要去威院做糖水測試, 自問過年真係食得太多糖/朱古力, 希望過到關啦...有d擔心!!

==========================================================

10/2/2011 (25W2D)

尋晚我自己煮煲仔飯俾老公子食, 好o地o地訓到半夜, 我竟然攪肚痛醒o左, 諗住唔理再訓, 但都係痛醒, 唯有去toilet...

唔知係咪有o左之後第一次攪肚痛, 我竟然有d驚, 諗起之前睇o既生仔blog好多因為陣痛半夜痛醒, 又係度諗, 陣痛o既痛同攪肚痛o既痛相差有幾遠??...因為攪肚痛有時都會痛到我彎晒腰呢...

去完2次toilet我都總算訓得番亦無再肚痛喇, 但今次肚痛真係引起我唔少聯想...距離預產期仲有3個半月左右, 唔知我會唔會越o黎越緊張... 

胎動@25W2D (原來我今日著呢件衫可以令胎動好易睇到呢!!)
留意我左腰...乖豬今次踼得比上次我post段片'狠'好多...
留意4-10s(左腰), ~15s(肚中間)~30s(左腰), ~45s(左腰), 我按落左腰好明顯模到硬o架, 我估係乖豬對腳...之後尾段乖豬終於縮低隻腳...haha!!!
其實除以上時間外, 乖豬係中間同右邊都有郁, 不過相對溫柔D, 我feel到但未必影到!!

==========================================================

14/2/2011 (25W6D)

情人節快樂呀!!!睇睇Johnsonsbaby, 原來26周係倒數98日, 咁即係今日係我乖豬出世倒數99日呢!!!好應節呀, 祝大家有情人長長久久!!!

http://www.johnsonsbaby.com.hk/pregnancy/pregnancy_week_26.aspx

至於情人節節目呢...首先係我一朝4點幾5點去完toilet後眼光光等天光, 之後就係今晚要等老公子開完每個星期一o既會, 最快9點幾先有得二人世界食飯盒!!!(所以平時Monday我多數自己食個麵搞掂, 今個情人節咁o岩係monday,我又唔想一個人食麵咁慘, 唯有餓o下等老公子買飯盒手牚台腳啦...