雖然乖豬滿月, 我都開始上手, 但隨住佢越大, 開始識扭訓覺扭抱, 呢兩個星期都出現o左唔少挑戰!!
第4周:
食方面, 今個星期繼續出現3hr內每hr食我30-45min o既情況, 雖然佢咁食法我真係好支力, 但有時好彩o既, 乖豬最夜一餐1點食完可以到第二朝6點幾先醒, 等我可以訓番夠本, 都算待我不簿!!
除上面情形, 乖豬呢排食奶間中會出現邊喊邊推開我o既情況,但我見我再餵佢又食埋o黎, 咁我咪以為佢未夠飽, 但佢食兩啖就喊又推開我, 我再埋去佢就好似發禽青咁又食埋o黎, 如是者邊食邊喊邊推開我, 我都好煩, 都唔知佢喊乜, 最後乖豬唔知係咪喊得太支力就會訓, 結束連場打鬥, 發生咁o既情況時, 最長一餐可以食足個半鐘!!後來問朋友, 話bb可能嫌食到後尾出奶少同慢, 的確佢次次邊喊邊推開我多數係發生係食奶尾段, 但我試過換另一邊俾佢食, 佢都係一樣推開我, 似乎又唔似係嫌我出奶慢...
煩o既一方面講完, 乖豬呢排笑得多o左好多, 雖然都只限食飽訓覺作發夢時, 但佢d笑容明顯hold得耐過剛出世時, 睇見佢笑真係覺得好得意!
另外, 今個星期老公子出trip4日3夜, 聽落好似好耐, 但其實同乖豬單打獨鬥o既日子都唔係想像中咁難過, 因為本來夜晚我都係埋身餵奶同換片, 老公子本來就無起幫手, 所以分別唔大, 反而無老公子阻住我抱bb上落床我又可以大字形霸晒張床, 都幾爽!!
今個星期中學同學上o黎探我同乖豬!!eva送o左個好好味o既蛋榚, yummy!!
乖豬打完喊露會'o'咀!! 間中去大大時都會出現呢個樣!!
乖豬識跟住爸爸轉頭呢, 老公子好興奮!!
freda姐姐探koey
多謝jenny送o既尿片'蛋榚'
乖豬只識訓右邊, 個頭開始扁, 試用呢個頂住, 但唔成功, 最後要用圓形中間窩入去o既枕頭仔先成功!!
乖豬滿月喇, 伸直晒同蟲蟲一樣長lu!!
乖豬公公婆婆(我媽話叫gradma後生d, 我爸就叫'大聲公', 因為佢超大聲!)送俾乖豬o既金兔!
乖豬姨姨送o既風褸同背心, 好靚, 但要大個d先著到!!
第五周:
乖豬滿月喇!!
經過上星期o既觀察, 我o地本來以為乖豬食奶邊喊邊食邊推開我係因為攪肚痛, 因為有幾日佢d便便好水, 同埋成日抱佢時摸到佢肚咕咕聲, 但後尾先知便便好水但其實d色仲係正常, 應該唔係肚痛!!
至於真正原因, 竟然係佢扭眼訓!! 佢根本就己經飽飽唔想食, 所以就推開我, 但唔知係咪之前慣o左食住訓, 所以佢就飽都照食埋o黎!總之, 之前3hr內每hr食30-45min情況同邊食邊推開我o既原因都係因為乖豬扭眼訓, 而唔係扭食呢!!
雖然知邊乖豬發惡原因, 但扭眼訓呢樣o野真係好難搞!!首先, 呢兩星期開始, 乖豬睡眠質素比以前差, 朝早訓覺唔再好似初頭2星期咁乖乖食完就連訓3hr, 而係最多訓到半個鐘至一個鐘淺睡, 中間唔係俾自己伸懶腰伸醒或嚇醒,就係俾d好細微, 估都估唔到會嚇親佢o既聲音(mit開膠袋/魔微貼o既聲, 冷氣開關o既聲, 反而電銑聲電視聲呢d嘈唔到佢!!)嚇醒!!
頭兩星期bb食奶食到尾就會自動入睡,而家食完奶就算佢好似訓o左, 但掃完風放落床就會醒晒, 開頭為o左止佢喊, 我都有抱佢邊行邊暗佢訓, 我媽或奶奶係度就更加狂抱佢, 開頭都ok, 但後來佢訓o左一放佢落床變得越o黎越難, 佢一發現就狂喊, 仲好惡好大聲, 我試過因為成個下午由3點至8點都係咁又抱又放又喊又抱咁搞到我都忟到喊, 因為連續5個鐘所有精力都望住佢, 仲要好似舉重咁又抱, 好似偷o野咁又放, 真係人都癲!!
扭訓呢樣o野真係暫時都解決唔到, 所以朝早我連佢訓o既時間我都無得休息, 因為佢訓得半個hr至1個hr, 我分分鐘連筧都未訓得著又要服侍呢位大小姐, 唉...
今個星期好友percy帶埋佢5個月大o既仔仔上o黎探我!!聽到佢話佢個仔埋身食10min, 其實乖豬夜晚食奶呢排都係10-15min, 朝早就30-45min不等, 但唔知係咪乖豬都聽到一哥哥食得快, 佢之後好似真係食得無咁耐, 感覺上佢15-20min就夠,之後唔放口係佢想食住訓...
最後, 乖豬滿月, 22號去o左健康院打針, 當日3號風落大雨好麻煩, 要包到bb實一實!!今日亦係我第一次用揹帶, 真係輕好多, 幾好用!! 乖豬今日磅重有9磅喇, 一個月重o左1kg, very good!!
檢查肚臍見到肚臍內有粒肉牙,要點藥水等肉牙楛死, 下星期又要再去健康院檢查肚臍, 噢...好麻煩呢!!
最後係個女打針, 支針拮入肉o個下bb都無乜o野, 點知一抽支針o個下佢直頭好大聲喊, 塊面谷到好紅好紅, 係出世以o黎都未見過, 睇見佢喊得咁慘(雖然5min後佢就訓o左), 我都好肉赤, 忍唔住眼濕濕...其實我本人唔怕打針, 所以完全無諗過睇住個女打針喊到咁慘我自己會想喊...可能呢d就係母親自然o既反應吧...
好友percy同佢5個月大仔仔一一!!
一朝訓醒o既乖豬
乖豬麻麻成日買衫俾乖豬, 本來係好事, 但佢成日規定人幾時著(又話滿月著, 又話百日著...大佬, 我都想個女著我買d衫o架嘛, 真煩!!), 本來之前有件話要滿月著, 但size好大, 結果佢唔心息再買, 結果都係太大, 為令奶奶心息, 就著俾佢睇, 搞到乖豬好似bb扮大人咁...
