第三周 (3/6 - 9/6): 拋低個女?

今個星期乖豬繼續醒訓兼大食...

第15日: 第一次無爸媽幫手下同老公子2個帶bb去健康院, 其實都係的士來回, 都handle到, 係bb一醒就扭食, 好彩健康院有哺乳房, 唔係bb實喊到好嘈!!!

乖豬磅重3.45kg, 進展好好, 之後見姑娘就問下bb呢排食奶pattern好怪, 可以連續30min又30min食足2-3hr, 姑娘話可能係bb猛長期大食o左, 亦可能係佢埋身食極唔太飽, 叫我留意bb要食到後奶, 多d脂肪飽肚d, 之後又問惡露問題, 姑娘都話可能係食得多補o野先會血量多!!

第16日: 第一次發現bb訓訓o下成個人打斜o左, 唔通係識反訓o既開始?另外, 我開始留意到乖豬勁扭食可能係佢訓唔著有關...

乖豬每日朝早沖完涼個樣就最精神!!

食飽剛訓著發夢時總係多多表情!!!

第17日: 聽日端午, 我親友提早一晚做節, 順道先上o黎我屋企探bb同我, 由於舅母1x年前都係o係威院生, 一講下先知原來我生bb o個間極可能係私家房, 唔怪得一大間房好靚仲要得我一個人生啦...原來正常下應該係一間房好多人一齊生, 只用布簾隔住, 所以會聽到好多人慘叫...咁諗落我幾好彩呢!!另外, 今日主角除o左我乖豬, 當然仲有我婆婆啦, 因為佢做太婆喇!! (事實上我呢邊親友一次過全部升le, 舅父們都變晒做舅公呢, haha!)

就訓著, 佢呢個側面好似好大人咁呢!!

太婆&外曾孫!!

第18日: 老公子最後一日假, 有d唔捨得老公子要番工添!!其實老公子都算幾叻, 至少第一個星期時佢真係好幫得手, 不斷洗衫洗奶樽開奶粉等等...不過自第二wk我餵人奶開始熟手後, 老公子開始懶散, 好多o野要叫先郁...anyway, 我都係好感謝我老公子放假呢段時間陪我困在家!!!

乖豬個面珠開始越o黎越大喇!!

第19日: 今日下午rebec o黎探我, 不過佢到前乖豬剛訓著, 所以rebec成程都只係見到熟睡中o既乖豬!!

老公子番工, 成個下午同個女單打獨鬥有時都幾吃力, 特別係bb唔訓我要連續餵奶2個hr或用半個鐘不斷tum佢訓...不過佢訓o左我都有時間上下網, 而且屋企靜靜咁, 都幾寫意!!!

夜晚, 老公子如常粗手粗腳同bb玩, 佢成日哄到好埋然後大叫嚇個女, 又狂搖張床, 抱又抱得衰, 我成日鬧佢個女食完奶乜都俾佢搖到嘔番晒o黎!!!今晚老公子仲衰, 話說老公子抱乖豬坐係佢大脾, 乖豬無啦啦放個大屁屁疴便便, 由於幾大聲同突如其來, 老公子嚇親, 隻手就咁放開, 個女成個頭就掉係佢膝頭度, 我即刻狂鬧佢, 整親個女點算?? 老公子仲要辯駁話bb條頸算有力, 無咁易傷, 我就話就算bb疴到你成身屎你都唔應該咁樣鬆開手拋低個女...唉...我希望佢真係正經d, 唔好當個女係玩具...

老公子就係咁樣抱住佢時一o野放手...乖豬就咁跌係老公膝頭, 好彩唔係太高o者!!

第20日: 朋友們紛紛o係facebook suggest方法改善bb睡眠, 於是呢幾日我試o下等乖豬食飽後唔即時放佢落床, 反而等佢係cushion上訓得好似好'林'先放低佢, 放低佢時用手按住佢心口等等, 佢好似無咁易醒, 咁就無咁快又扭食喇!!! (後補, 不過呢個方法都唔係成日有效!!)

呢個角度勁似我老公子!!

第21日: 奶奶上o黎, 佢唔發神經時都ok, 上o黎一個鐘就識做走人, 咁都好d, 事前我仲同老公子講, 佢番工後奶奶上o黎得番我同佢1on1, 可能會發生血案...