沖涼洗頭: 因為要照顧乖豬, 洗手根本就避唔開, 仲要一日洗好多次, 開頭我都好聽話, 洗手液+生水洗完會再用薑水過一過手, 不過後尾都懶無咁做lu!!! 沖涼洗頭都忍到第7日先做, 洗頭就好似平時咁, 第一次沖涼就又好聽話咁用薑水抹身!!頭2星期內洗o左3次頭, 涼就第10日起都無再用薑水沖, 頭就隔日洗!! 其實個人覺得薑水只限剛煲好時抹手洗面最好, 香香o地仲同真係好似幾速進血液遁環, 但一凍o左就唔香, 至於驅唔驅風就真係唔知喇!!
飲食: 薑醋過o左12朝都只係食o左3次, 有日飲得多醋, 第二日就見到bb眼屎多o左, 應該係熱氣, 所以真係唔敢食太多!!另外, 媽咪同奶奶都差唔多日日煲日湯同好大碗薑飯, 湯就一係魚湯一係烏雞湯補氣, 好味, 不過生完唔知點解每次食飯飲湯都會出到成身汗, 食飯又會食到要透晒大氣咁, 直到而家都係咁, 唔知係咪仲係氣虛???另外, 唔知係咪餵人奶關係, 我成日都好口渴, 想飲果汁凍飲有味飲品之類, 可惜凍飲我媽唔俾我飲...
會陰傷口痛: 由生完到第5至6日先開始唔多痛, 唔使再就住行gut gut o下, 不過坦白講, 我都係第5-6日先敢去大大, 因為之前一直唔敢用力, 覺得用力o個下好似生咁有股力向下, 好怕子宮下垂!!另外, 生完頭幾日我咳時都會feel到下面有股力向下, 搞到我咳時唔敢用力!!
惡露: 之前都提過, 可能係我奶奶或媽咪d湯水太補 (特別係木耳湯), 我惡露一直都幾多, 頭5-6日真係要用床墊墊住自己先敢訓!!木耳湯無飲後d量先變番好似m咁, 一直到第三星期先埋尾, 似m最後一日咁少, 不過到而家都未完全無晒!!
水腫/肥: 媽咪同奶奶都差唔多日日煲湯同好大碗薑飯, 日日都食好多o野, 希望奶水多又希望自己補身, 十一點一大碗飯, 3-4點又一大碗飯, 夜晚9點幾又一大碗飯, 我生完第3-4日照鏡先發覺自己塊面脹卜卜, 仲肥過生o個陣時, 好醜樣!!水腫而家應該退o左, 但肥就肯定o架喇, 日日食咁多o野呢, 不過朋友o黎探我都話我同生前差唔多肥, 希望唔係tum我啦...
腰圍: 生完頭幾日太鬆pao pao, 所以有用束腹帶, 但之後都無乜用, 因為天氣實在太熱!!而家明明覺得個肚扁o左好多, 但一度仲係34寸呀, 嗚...點先去得番30留下腰圍呢??
肚紋: 大肚時一直都幾滿意自己個肚白滑無紋, 生完都係覺得個肚黑o左皺o左, 點知唔知第幾日照鏡時先見到原來都係出o左4-5條寸幾長o既紋仔喎...嗚...
體重: 之前多數去我媽或健康院先磅重, 但生完一直留係屋企, 得個唔多準o既磅, 一磅大約128磅, 比生時輕o左12磅左右, 比未有b時就重o左12-13磅...um...點先減到呢10磅呢?
谷奶: 由於湯水(每日2大碗)同飯都好足, 奶水第3至4日開始上, 谷到好硬好痛, 我仲怕下垂戴bra, 點知去健康院先知唔可以戴, 否則好易塞...而家無戴bra, 係無谷到咁硬咁痛, 但到時到後就出現滴奶問題, 滴到件衫濕晒, 好麻煩!! 開頭用朋友俾我o既即棄乳墊, 吸力ok, 但濕o左有時會重, 貼係衫郁兩郁就貼唔穩會甩!!之後又試自己買o既可洗乳墊, 用膠紙貼係衫, 但可能係布質地, 有d'扇'水, 唔係吸得好好, 最後記得之前聽人奶講座d講者分享過剪開m巾當乳墊, 於是我又試, 但今次唔貼係衫, 因為貼衫始終唔貼身, 有時都係會滴晒落腰, 所以而家用膠紙貼係身, m巾真係吸力好, 又簿又乾爽幾舒服, 唯一唔好係膠紙貼得太緊會唔舒服, 餵奶mit甩膠紙無癡力要再換過!!
睡眠: 乖豬出世頭一個星期我都處於緊張狀態, 訓得麻麻, 乖豬出少少聲都唔放心要望下佢, 所以我個頭訓係床尾, 方便擰轉頭就望到床尾o既bb床!!不過一o黎開始習慣bb d聲, 二o黎調轉訓上落床極不便, 所以第二星期開始同老公子訓番正常住置, 睡眠質素都好o左, 當然幾個鐘醒一醒無可避免, 同埋唔知係咪本能反應, 有時係乖豬嘈要食奶前半個鐘左右我會自動醒...
悶: 老公子問過我坐月無街出悶唔悶, 我竟然唔覺悶, haha, 其實我就算未生前都一直幾ok困自己係屋企成日唔出街o架喇, 坐月一方面照顧bb己經好支力, 我自己都無精力出街, 所以一d都唔悶, 我估除o左去健康院或我爸爸放假有車車我出街, 否則我第二個月都應該唔會點出街住喇!!
情緒: 除o左第一次bb嘔奶太驚嚇喊, 同因為奶奶姑仔而激心心情低落兼狂哭o左一朝外, 基本上其他時間心情都幾穩定, 我亦無好似其他大肚媽咪咁生完無o左bb係肚入面郁而有失落感, 反而每到夜晚難得bb訓o左, 我同老公子終於可以靜靜睇電視傾計時會有好掛住以前二人世界o既感覺, 有時諗起二人世界o既日子, 都會忍唔住眼濕濕...haha!!
你寫得好詳細呀!! 乖豬就快滿月, 祝佢身體健康! 快高長大!! 精靈活潑!!
回覆刪除估唔到你會因為掛住二人世界而眼濕濕喎...哈哈!!
[SkyBlue回覆06/18/2011 13:18:00]多謝你祝福, 佢越o黎越重呢, 連我日日對住佢都覺...haha!!! 係呀, 都幾掛住以前二人世界o既日子, free d嘛, 而家真係一d都唔free, o黎緊結婚周年都唔知可以做得乜...
好詳盡呀.我諗呢個難忘坐月經驗一定係令你好深體會. 生完0個排真係會肥過臨生架, 坐月又會食好多野, 瘦唔到. 我都宜家, 雖然外表都似似地以前未生0個時, 但內裡都係肥.
回覆刪除一諂努力湊女+減肥啦!
[SkyBlue回覆06/18/2011 13:21:00]坐月真係食好多野, 到時到候真係會餓, haha!!! 希望我都可以快d修身啦!!
生完真係成日出汗，行步路都浮浮地，唔知算唔算虛。但我就食薑醋食到40朝。我果十幾磅都唔知點算，乜衫褲都唔o岩，好想游水！
回覆刪除[SkyBlue回覆06/18/2011 13:25:00]食咁耐薑醋?bb無熱氣咩??不過我雖然食得少薑醋, 但我食好多薑飯, 希望一樣功效...hahaha!!
有次留低阿b同老公出去買野，先發現好耐無拖手！
回覆刪除[SkyBlue回覆06/18/2011 13:34:00]我暫時無乜機會放低個女, 過幾日結婚周年+佢滿月, 都唔知做得d乜...
唔覺佢熱氣呀，你有無食花膠？
回覆刪除[SkyBlue回覆06/18/2011 13:35:00]我媽煲過幾次烏雞湯, 入面有幾舊花膠咁囉!!
岩岩生完....好好坐月啦 真係要乖乖做足....唔係就等生下一個先調理到架喇!
回覆刪除[SkyBlue回覆06/18/2011 15:53:00]其實都有好聽話o架喇, 唯一難以避免係開冷氣, 唔開就出到成身汗, 開o左有時頭頸又會覺得有風...
聽落真係有d驚驚！
回覆刪除睇黎坐月一定肥，而且好多嘢做，淨係滴奶已經夠煩！
你真係要分享多些，我咩頭緒都冇＞＜
[SkyBlue回覆06/19/2011 10:47:00]係呀, 坐月寧願肥d好過身體弱呢, 無法子啦!!!滴奶呢樣都幾煩, 好彩暫時都叫解決o左!!希望上面d分享令你有多d idea啦!!
好詳盡既分享 ^^
回覆刪除我開始期待坐月既日子 ^^ 希望到時順利啦~
[SkyBlue回覆06/19/2011 10:48:00]加油,你有媽咪幫手一定可以好好坐月呢, 放心!!
你好厲害呀 , 仲有時間可以作出咁詳細的分享 , 睇完令我好多幻想空間呀!!!
回覆刪除[SkyBlue回覆06/20/2011 10:45:00]haha, 加油, 最緊要真係有人照顧同幫你手, 特別係頭兩星期!!
睇完你個坐月日記搞到我有少少驚添~~ 我99仲同我講叫我3個月內唔好同bb周圍去....我諗佢係咪傻左呀?? 我咪3個月冇街去??
回覆刪除不過睇你坐左一個月都好似未recover返晒，好彩係你唔駛再返工姐，要返工果d點算呀??
[SkyBlue回覆06/21/2011 14:47:00]我奶奶都係咁叫我, 叫我2個月後先出, 就算出都唔好出咁多!! 掉轉我就諗, 我想出,但要研究o下點先出到囉... 食飯透晒大氣呢樣真係差過以前, 我都有d擔心係咪補得唔好定只係未recover晒...
我都肥左10磅唔知點減,我相信努力點湊應該減到小小既!
回覆刪除[SkyBlue回覆06/21/2011 16:52:00]暫時佢仲細, 真係顧住湊佢唔得閒理自己肥唔肥...
有關食完飯要透晒大氣，我立即幫你問下我媽咪先~~
回覆刪除咁你係咪會擺100日宴呀?? 我問媽咪,媽咪話滿月就得喎~~ 但睇我99叫我3個月後先好帶BB出街，咁佢可能係100日宴!!
[SkyBlue回覆06/21/2011 20:19:00]我o黎緊26會出去同兩家人去酒樓食dinner當celebrate滿月囉, 所以都要pump定人奶帶出街, 希望應付到啦!!
幫你問左啦~ 媽咪話你可能係燥熱/燥火，食野要食返清淡d!!
回覆刪除同埋如果你食飯出汗同透大氣呢~你要先睇下你出既汗係"鹹汗"定係"淡汗"，如果係"淡"就要去睇中醫調理下。
最後呢，媽咪話你咁燥就唔好再食薑飯喎~~ 你都滿左月可以唔再食架啦!!
其實媽咪仲問你小便顏色同埋惡露仲有冇~~但我問唔到你,所以都答佢唔到。 我媽咪又讀過陪月(有証書)又做過中藥舖，所以識好多呢d野架!! 所以你有問題真係可以打俾我問我/留言都ok，幫到你一定幫。
希望你快d recover啦!!
[SkyBlue回覆06/21/2011 20:33:00]竟然係太燥所以要透大氣...我以為相反呢!! 小便我無留意呀, 應該好淡色o架喇, 因為飲得多水, 惡露而家得番好少好少, 仲少過m最後一日, 好淡啡咁囉!! 有你媽睇住你, 第二時你坐月就乜都唔使worry!!so good!!
薑水沖完涼個人真係慶到呢…冬天應該唔錯…
回覆刪除[SkyBlue回覆06/27/2011 16:25:00]yes, 夏天真係麻麻...
好多謝你咁詳盡的分享呀!!!! 真係啱哂我呢個係外國生活, 要當自己係半個西人的人....
回覆刪除坐月 .... 中國人的民間智慧.... 到時會參考....
惡露好似好恐怖.... 係咪好多血架???? 我好驚血呀....
真羨慕你已經捱過了最最最辛苦的時候, 現在 enjoy 乖豬的成長!!!
[SkyBlue回覆06/28/2011 11:58:00]惡露開頭都真係幾多血o架, 頭幾日訓覺都要用床墊, 怕多得滯整污漕床呢!! 多謝你呀, 湊bb真係唔易, 我會努力o架!!
好詳細, 得我又知多d野~~
回覆刪除[SkyBlue回覆07/10/2011 18:08:00]希望對你有用啦!!