人少少先寫...
其實我唔多鍾意男家相信好多朋友都知...雖然我真係好明白係文化唔同溝通唔o黎, 但面對佢o地時真係好難做到完全放開懷抱, open自己接受佢地所講o既所有野...
雖然有d o野只係雞毛蒜皮o既事, 但唔順耳就真係唔順耳, 我都好想自己放鬆d let it go...
乖豬100日o個日...
小事1:
62: 你知唔知邊度望夫石?不過睇你都唔知架喇...
99: 唔知咩呀？
62: 望夫石呀, 沙田隧道一出o個度呢...
99: 望夫石?咩o黎o架?新起o架??
(令我諗番起99唔知特首係邊個, 香港有條大老山隧道等等...)
小事2:
當正自己主角抱住乖豬猛影相, 姑仔都忍唔住出聲 '影左好多喇!!'
我唔出聲話想一家3口影相相信佢唔會俾番個女我抱囉...
小事3:
99拎o左老公子細個d相出o黎,話'簡直一模一樣', 其實姑仔都話過'只係髮型似之嘛',但6299繼續自我陶醉, 俾我睇時猛咁問我係咪好似, 係咪'一模一樣'...
OK,事實勝於雄辯, 乖豬係老公子個女, 總會似老公子, 但我一向唔識講奉承說話 (呢樣都係我俾佢地話我唔識'做人處事'其中一樣), 避重就輕答'個髮型真係一樣', 點知連我一向無乜反感o既老爺好大反應咁話'咩呀,直頭成個樣一樣啦'...
小事4:
我: 10點要餵奶喇...（心入面係想佢地醒目快D走）
99: 好, 咁玩到10點先算啦 (當時9點55分)
10點05分
我: 要餵奶喇...
99: 做乜佢唔喊o既...
我: 咁唔係真係準時到咁o既...
99: 咁你入去餵奶啦, 唔使理我地...
我心入面真係忍唔住想鬧人, 玩野呀, 仲唔走, 你唔使休息我要休息呀!!!!
好彩62無啦啦講句'佢係廳餵呀?走啦'...咁我先甩難...
==========================================================
小事4係最常發生o既衝突之一...
因為我屋企係:
我媽通常就好時間, 最後一個一入門口就開得飯, 食完有時8點半都未夠...
9點我媽就會'趕'我地走: 夜喇, 番去沖涼休息訓喇
而男家就係(不論去男家晚飯, 男家上o黎食飯定係出街食飯...):
未番到時打N次電話問幾點番到, 要預時間煮飯, 結果次次都係最後一位入屋先'開始'煮, 多數8點幾9點先開到飯...
晚上10點
我: 夜喇, 差唔多走喇
99/62: 咁早?
我: 唔早喇, 番去仲要沖涼吹頭...
99: 沖涼好快之嘛...
如果第二日係星期六／日...
99: 第二日又唔使番工...
如果係過節第二日係假期...
99: 一次半次之嘛...
..................
其實你估只有6299先掛住我地咩??我爸媽一樣掛, 但表達方法好唔同, 因為我媽會企係我地方面諗, 怕我地攰, 所以先會趕我地走...佢咁樣大家都舒服, 有時我話留耐d大家又開心??
但6299就一直只係自己角度出發, 為見個仔就只識keep住個仔係自己度,無諗過個仔其實想點...佢地咁樣搞到次次我話走都好似我衰咁,佢地唔高興時黑面我都唔好受,有乜謂??
6299成日話我唔識待人處事, 但事實上佢地都係自我中心得緊要...
你地點待我, 我就自然點對待番你地...而家我都做人父母, 我更加覺得我會學我爸媽咁對待乖豬,而唔會學6299咁囉...
唉，不過講乜都無用, 佢地真係唔覺10點夜, 咁我講乜都係錯...無得改變...
講完!!!
2011年8月28日 星期日
第十四周 (20/8 - 26/8): 乖豬會唱歌
19/8: 今日終於抱o左乖豬出巿區探佢太婆喇!!!其實都講o左好多日話要去探佢, 但我媽頭痛, 所以遲遲未行動!!
我婆婆一年前開始無記性喇, 應該係老人癡呆, 聽我媽講, 近排佢連剛剛o個餐食o左咩, 甚至有無食都開始唔記得...聽到都真係好擔心!!所以我都好想抱乖豬去探佢, 我諗見到bb老人家點都會開心d嘛!!!
其實身體上我婆仲未有咩大問題o既, 只係血壓高同埋唔多食o野, 呢日我媽買o左婆婆最愛o既魚柳包同蛋榚上去, 婆婆只係飲熱奶茶唔食包, 話佢食完早餐好飽唔食住...點知講下講下, 原來佢所謂o既'早餐',只係熱奶一杯!!!唔怪得我媽成日話婆婆唔食o野啦...我媽講番, 原來平時佢去探婆婆時都係咁, 叫一個飯2份食, 我婆只係食一啖就好快放低食具話飽, 掉轉有時食布甸呢d凍甜食佢就大大杯都食晒, 真係越老越似番個小朋友呢!!!
婆婆見到佢個'膝'都好開心, 猛話我咁遠就唔好帶bb出o黎咁辛苦, 又讚下乖豬靚女, 不過無我細個時咁大對眼...但佢好似唔多記得佢曾經去過我屋企探我同bb喇, 因為佢係都話未封過利是俾bb喎...似乎我婆真係對好耐之前o既事記得好清楚, 近o既先唔記得!!
最後要記低一件趣事, 就係我婆抱住乖豬影o左幾張相後, 乖豬忽然望到有d唔妥, 佢斜眼望住我婆定晒神, 然後...扁嘴, 扁o左一陣仲忍唔住索鼻, 再一陣就真係喊出o黎呢!!!下午, 好友rebec o黎探我, 乖豬都肯俾佢抱, 仲有玩有笑, 似乎乖豬少見老太婆, 覺得白頭髮縐皮o既老婆婆好怪相覺得驚呢!!!
乖豬仲未望到太婆抱緊佢, 所以仲未喊~
珍貴o既合照：我婆,我媽,我同埋乖豬都係家中大女呢!
乖豬仲未望到太婆抱緊佢, 所以仲未喊~
珍貴o既合照：我婆,我媽,我同埋乖豬都係家中大女呢!
20/8: 今日乖豬3個月大喇!!朝早抱埋乖豬同我爸媽lunch, 撞到爸爸同事, 咁當然要抱乖豬打個招呼啦, 之後我爸話佢呢個同事好羡慕佢, 因為佢可以抱孫, haha!!!
下午, 我o地一家三口去o左中學同學新居玩, 初初都可以放低乖豬訓o左一陣, 我同老公子就玩wii, 但可能太嘈喇, 都係嘈醒左, 之後我同老公子就輪住抱, 不過都玩得好開心, n咁耐無玩過wii呢!!!
因為趕住7點前番屋企餵奶, 所以夜晚我同老公子自己食, 登登...公仔麵+sushi!!!我諗我都有近1年無食過sushi喇, 雖然我唔算特別恨食, 但咁耐無食過真係覺得特別好味, hehe!!
是晚, 乖豬仲送o左個surprise俾我同老公子慶祝佢3個月大, 就係第一次笑出聲呀(乖豬3個月大, 送俾爸媽厚禮一份: 第一次笑出聲!!), 仲要好彩拍低到, 真係開心!!!
21/8: 今日第一次抱乖豬同6299飲茶, 乖豬其實好眼訓, 但去到陌生地方又猛望燈唔訓, 望到好支力好攰先訓呢!!
呢晚我會出街wet, 所以第一次放低個女俾佢同老公子獨處3小時, 由於呢日到下午乖豬都未便便, 所以老公子好擔心 (因為佢一直未幫過乖豬換有便便o既片), 結果, 乖豬真係鍚晒佢爸爸, o係餵7點幾餐奶時邊食邊去, 仲要又漏污漕衫...當然, 又係要我呢位媽咪處理啦, 老公子就鬆一口氣喇!!
我7點幾近8點出街, 10點半番到屋企,一番到屋企老公子好似遇到救星咁, 仲即刻話要再沖涼...haha, 原來個女狂喊扭眼訓, 抱住訓左一放低落床就喊,結果先後三次放低再抱起, 搞到老公子好忙, 忙到出晒汗猛話辛苦...haha!!!!!我聽見覺得好搞笑呀, 老公子, 你而家明白我呢個全職媽咪都唔易做吧???
22/8: 今日一朝同乖豬唱歌仔, 好叻女呀, 佢竟然跟住我唱!!!開頭都唔肯定o架, 但唱多幾首, 佢真係我唱歌時先出聲, 我唔唱講o野佢係唔會出聲o架, 好得意呀!!!
22/8: 今日一朝同乖豬唱歌仔, 好叻女呀, 佢竟然跟住我唱!!!開頭都唔肯定o架, 但唱多幾首, 佢真係我唱歌時先出聲, 我唔唱講o野佢係唔會出聲o架, 好得意呀!!!
2011年8月20日 星期六
第十三周 (12/8 - 19/8): 做隻開籠雀
一踏入第13周, 乖豬就變o左開籠雀咁不斷同人傾計(後補: 只係開o左三日聲, 之後少番喇!!!)!!有時都覺得小朋友學o野真係快得神奇, 明明尋日都仲未識, 忽然第二日就識o左, 令大人好驚喜!!!
2011年8月10日 星期三
第十二周 (5/8 - 11/8): 繼續識朋友仔 & fall in love with mama
今個星期乖豬開始'愛上'我呢個媽咪喇!!無錯呀, 唔止'認得',簡直就係'愛上'我!!
無論食奶, 抱定係同佢玩, 佢都多o左眼甘甘咁望實我!! 同佢玩時o既笑變得好甜, 玩玩下我走開會即刻叫或喊幾下, 好似搵媽咪咁!! 扭眼訓喊緊見我走埋去拍佢, 佢又會無啦啦唔喊望實我, 嘴角仲好似有少少笑, 似乎見到我覺得好心安咁...總之佢無時無刻都望到我實一實, 有時望到我都唔知點回應佢好咁, 但又覺得好心甜喎, hehe!!!
7/8:
今日第一次o係無我爸媽幫助下帶乖豬出城探只得半個月大o既bb...因為朋友有車, 所以今次出城無咩難度, hehe, 真係麻煩晒朋友呢!!!
我o地11點幾去到, 雖然我一早預計自己見到朋友o既半個月大仔仔會覺得好細粒, 但見到真b時真係忍唔住覺得好細粒...最最最大感慨係, 其實2個半月前乖豬都係咁細粒o架, 但原來我己經對咁細粒o既乖豬無乜印象喇...bb真係大得好快, 真係要幫乖豬影多d相留住每一刻先得!!
只有半個月大o既bb仔!!抱慣乖豬覺得bb仔好輕呀!!
bb仔好似佢爸爸, 一樣樣咁!!!
大中小bb眼神一至咁望住我老公子!!
大合照!
幾位媽媽相遇, 當然係講生仔同湊仔經...雖然大家中學時未必係好close o既朋友, 但因為結婚生仔, 差唔多時候踏進人生另一階段而增多話題, 變得更close, 有時都覺得咁樣幾開心, 幾神奇!!
希望小bb快高長大, 聽教易湊啦!! (bb真係大得好快, 好快bb識笑識同你交流你就唔會覺得咁辛苦o架喇, 加油!!)
下午奶奶上o黎, 到下午5點幾一齊落o左樓下公園仔行o左陣等乖豬吸下新鮮空氣 (因為奶奶成日話我開冷氣, 怕bb無新鮮空氣!!), 咁o岩撞到另一個bb, 一傾之下真係有緣, 原來人o地個bb都係5月20號出世, 都係女仔, 只不過人o地係孖女o既其中一個, 所以望落輕磅d細粒d!! 由於今日忙於'應酬', 乖豬超級支力, 結果奶奶走後唔使5分鐘, 乖豬叫都無叫就自己係床訓o左...陰公...一定好支力喇!!
另外, 今日其實係老公子牛一, 但我又係乜都無預備, 晚飯都係求其煮...希望老公子唔好介意啦!!期待老公子請生日假之後放低乖豬兩個人出去拍拖再補番數!!
爸爸生日快樂!!
8/8:
今日我又出動去探bb, 本來今次係我真正第一次一個人帶乖豬出街街, 但因為天雨關係, 我媽怕我唔掂, 都係忍唔住陪我一齊坐火車到沙田, 而我只需要一個人坐巴士到朋友屋企, 走時我爸又話放工車埋我, 結果...今日都唔多算'自己帶乖豬出街'...hehe!!!
我同朋友差唔多時間到達,一去到就放低三個b排排訓係床仔影相, 好得意呀, 三個b雖然不同月份出世, 但size差唔多...不過,只得個半月大o既bb仔始終係最細個, 佢o既喊聲明顥同兩個bb女好唔同, 仲係好'初生'喊聲咁, 好得意!!
三個b齊齊望床鈴!!我乖豬最鍾意兩手張開, 最'ar jar', haha!!
大家估到邊個最大邊個最細嗎?
交換抱b!
hi, 我o地又見面喇!!
time flies, 大肚張相只係半年前影, 估唔到眨下眼變化咁大!!
我o地三個'奶媽'輪住餵奶抱b tum bb訓, 好忙, 而我呢隻乖豬又試邊食邊去...搞到我個身都污漕埋, 好彩唔算太大撻咋...真係搞著我呢個媽媽...要打乖豬pat pat!!!
9/8:
今日我又帶乖豬番娘家, 而家我媽咪己經無再日日上o黎我屋企幫乖豬沖涼喇, 其實我知我媽日日上o黎好支力好辛苦o架(我媽身體其實麻麻地...), 所以而家乖豬大o左易湊o左, 我又一早坐完月, 同乖豬沖涼同埋我自己餐lunch開始俾番我自己搞掂, 我媽就可以間中休息下同抽番時間去探我開始有老人病o既婆婆!!!
雖然媽咪上少o左o黎, 但我知佢其實好掛住乖豬, 而我日日係屋企都悶, 所以掉番轉, 而家我希望可以個個星期抱乖豬番我媽度, 等佢可以舒舒服服湊外孫, 而我又可以乘機癡下媽咪, 同媽咪傾計, 一舉兩得, hehe!!
10/8:
婚後, 我同老公子一向只係afford到一星期先抹一次地, 其實我o地都覺得咁樣唔多乾淨, 只係大家平日都要番工, 時間唔許可, 所以先唯有咁'污漕'...而家, 乖豬出o左世, 屋企真係要keep番乾淨d,唔可以再咁懶, 所以我呢個ftm開始唔懶得喇, 要勤力d做番d'粗重'o野, 好似抹地抹櫃同燙衫咁, 基本上都唔太難handle, 最大挑戰只係要襯乖豬清醒時先做得咁解, 唔係怕ping ping pang pang太嘈嘈醒乖豬就麻煩!!
本周精選相:
望住鏡頭都笑得咁甜!!
疑似雙手互握!!
引乖豬大笑o既係grandpa...其實呢個圓面笑樣, 同grandpa都幾似!!!
著靚衫去grandma屋企, 但呢個髮型太punk, 唔襯件衫添, haha!!!
2011年8月4日 星期四
第十一周 (29/7 - 4/8): 識朋友仔 & fashion show
30/7: 今日好開心呀, 因為我同我好朋友同佢個大我乖豬5星期o既b女終於見面喇!!因為好友bb大我b少少, 所以我生o左後己經成日打俾佢請教, 加上大家都係ftm, 平日湊b都會成日msn交流同一解無人傾計之悶, 所以大家真係幾close, 只係大家bb仲細, 佢生b後一直都無見面, 今日佢就一個人帶住3個多月b女由新界西走入新界東探我,真係好開心!!
兩位b女見面, 排排訓, 好得意!!
眼神動作一至
一齊玩手手
兩個bb都好眼訓, 輪住喊, 我個女高音d, 好友b女就低音d, 大合奏好嘈, 但又好熱鬧!!
兩個b都有淚光!!
多謝一班大學同學o黎探我同koey呀!!
另外, 同日上午乖豬忽然好多o野講, 平時佢係就喊之前有投訴先會出聲講野, 點知呢朝佢做左開籠雀, 同我傾左至少10min計先喊, 我一'呀'佢就答, 好得意, 不過之後無再試過喇, 我又無拍低, 可惜, 唔知佢幾時又心情靚同我傾計呢??
31/7: 之前上o黎探我同乖豬o既都係我d朋友, 老公子一直遲遲未請佢d朋友o黎, 呢日佢終於開齋喇, 請o左'kfc'上o黎, 'kfc'係佢同中學同學一齊踼波隊波個名, 咁o岩乖豬+我+老公子 o既英文initial都係'kfc' (多謝好友may ho留意到!), haha!!!不過可能男士都係怕醜d, 無人敢抱bb, 甚至無乜人'了'bb笑...(怕醜?), 佢o地上o黎都係傾下天南地北, 唔似之前朋友o黎多數傾生仔...都算係特別o既一次探訪...hehe!!!
2/8: 今日我要去健康院做產後檢查, 所以我呢日點幾就打的抱乖豬番我媽咪度, 餵埋餐奶3點就一個人出門口!!!生o左b後今日叫真正第一次放低乖豬自己出街呢, 一個人出街真係free, 行路去健康院段路雖然熱, 但令我諗起好多o野, 好似"對上一次行去健康院, 應該仲係大緊肚", "我好耐無曬太陽喇", "我行路好似怪怪咁o既, 係咪餵奶成日luen埋條腰, 定係大肚時行路方法同而家唔同, 條腰好似伸唔直咁o既"...等等!!!
去到健康院無乜人, 但都等左好耐, 順道做埋抹片, 原來健康院$100有得做,都幾平, 姑娘話我上年年頭做過, 今次都無問題就三年後先再做都ok!!4點幾先離開健康院, 之後一個人行去曬相, 再番火車站搞八達通 (換左新卡), 行埋上商場買個新地筒就收到約o左交收奶粉o既電話(因為我剛生b時唔夠奶水, 老公子好心急就買o左2大罐奶粉, 而家無用唯有平放番出去!), 時間剛剛好, 之後邊食新地筒邊行番屋企, 真係好耐無試過一個人自由自在咁處理私事咁, 感覺好爽呢!! (是晚訓覺我對腳真係有d支力, 可能太耐無行路喇!!)
又番我媽度 (外家番過n次, 男家都仲未番過...俾男家知實呷醋, 但番男家實在太難, 男家太夜食飯...或者搵個weekend 下午番去坐下就ok...)
4/8: 早兩日收到我係淘寶買o既7件衫仔, 全部都買到好細size, 想乖豬暑假前可以著到出街街, hehe!!!於是今日洗好d衫仔就貪玩同乖豬玩換衫扮靚!!!
左上毛巾同2件t +裙仔係大學同學送, 好靚, 最右兩件外套係我媽買 (襯衫最good又保暖), 其餘就係我o既戰利品, 件件唔錯, 好滿意!!
我靚唔靚呀??
um...頂帽好似太大喎...
我呢個星期終於出現雙眼皮喇!!!!
um...呢條裙好fit, 俾塊鏡我照照...
好清爽呀!!!
我要著到靚靚出街!!!yeah!!!
========================================================
本周其他相:
乖豬好嗲...其實係勁眼訓!!!
好精神
訂閱：
文章 (Atom)