第十三周 (12/8 - 19/8): 做隻開籠雀

一踏入第13周, 乖豬就變o左開籠雀咁不斷同人傾計(後補: 只係開o左三日聲, 之後少番喇!!!)!!有時都覺得小朋友學o野真係快得神奇, 明明尋日都仲未識, 忽然第二日就識o左, 令大人好驚喜!!!

乖豬傾計時把聲好溫柔o架, 真係聽見都lum!!佢之前出聲多數係就喊之前, 而家變o左係心情靚先同你傾計!見到我好似特別多o野講, 我同佢玩手指數12345, 佢好似想跟住講咁, 我唱歌時佢又好似會跟住一齊唱咁, 真係好可愛!!!至於喊, 而家佢唔係一'不滿'就喊, 而係邊喊邊夾雜住'eeoo', 好似好想話你知佢喊乜o野咁, 有時'eeoo'好耐先真係'喊', 咁樣都幾好呢, 唔係一o黎就喊到拆天, 絕對係好事!!

老公子見乖豬識傾計都覺得好得意, 好似多o左interest去同乖豬玩咁, so good!!!

除傾計外,乖豬自上星期開始(上星期唔記得寫)就成日食手指, 訓之前一定要食, 仲要食到dap dap聲好大聲咁, 其實我都唔想佢食手o架, 但佢食住手訓又唔使喊又好快訓著, 所以唯有俾佢咁做, 最多其他時間見到佢食就阻止佢算...!! 講開手,乖豬應該無咩可能係左撇子, 因為佢好明顯識用右手多過左手, 呢排佢右手好似識識o地掂o野 (至少feel到佢似有呢個意圖), 但放o野係佢左手時, 佢咩反應都無, 同右手好唔同!!

另外, 有日我發現乖豬發惡時成個人打側晒, 好似想反身咁, 但我一出聲佢就打番平, 之後都無再試過見到佢打側喇!!

食奶方面, 佢呢排好似貪玩o左, 有時佢好清醒時,食10-15min就甩開唔肯再食, 我怕佢唔夠就擰佢埋身, 但佢就掙扎同喊, 迫佢唔o黎, 有時唯有等到佢眼訓先再埋身餵多5-10min算!!

訓方面, 佢而家除朝早o個覺訓到1-2hr外, 其他時間都訓好少, 好多時訓15-30min就叫人, 有人埋去玩佢就笑晒, 但可能訓得唔夠, 有時玩一陣會喊喊o地, 諗住唔理佢等佢自己訓啦, 但佢又會自己玩手望o野唔訓, 就算食食下手訓訓地, 一有人埋去逗佢佢又會笑, 真係好爛玩!!!

至於我方面, 自早兩三星期前疑似m o黎番後, 我就開始狂甩頭髮, 甩到成地都係, 我老公抹地時猛投訴, haha!!!另一方面, 今個星期左邊胸有d痛, 乖豬食完奶係鬆o左, 但按落去仲係痛, 好驚係乳腺發炎呀!!

==========================================================

12/8: 老公子上星期日生日無慶祝, 所以今日佢就放生日假補番慶祝!!我同老公子2點就抱乖豬番外家, 以為萬事俱備, 點知最重要o個兩支奶竟然仲放o係雪櫃無拎, 要老公子飛的番去拎, 而我就趕緊搵奶, 但乖豬好快訓著, 食左好短時間...好彩我都有預多o左少少奶俾媽咪做準備...

扮靚靚去grandma屋企!!

最後3點出門口, 好快等到巴士出到tst, 諗住搵7仔買o野飲入場, 點知附近竟然無(又話總有間係左近...), 最後都係要捱戲院貴d買, 入到戲院剛好做晒廣告開場, 真係夾都無咁準...

功夫熊貓好好睇, 無冷場, 反而有d情節太快聽唔清楚對白, 我仲記得有個笑位超好笑,但出到場諗極都諗唔番...

睇完戲行h&m睇童裝, 但睇唔o岩, 之後就行去鼎泰豐, 其實當時6點都未夠, 但又怕多人等位所以早去, 去到時無咩人, 於是同老公就去o左i.t. 望下先, 點知無o野o岩睇 (老公子形容行i.t.o既都係未發育o既男仔...), 於是又行番上鼎泰豐!!! 入座時剛6點, 好彩i.t.唔o岩行咋, 因為我o地一入座就見到後面好多人陸續入座, 2人位話咁快坐滿,之後門外開始要等位添呢!!!!

我o地叫o左唔少o野食, 300兩個人以呢個質素o黎講係幾抵, 老公子食得好滿意!!

難得o既二人世界!!

食完都係7點未夠, 之後就行o下zara, 我又係去睇童裝!!zara d衫靚過h&m好多呢, 但都好貴, 5百幾一件bb冬天褸我真係唔多捨得買(但真係好靚!), bb o野話咁快唔o岩...睇o黎都係淘寶買乖豬冬天衫算喇!!

回程喇, 可能老公子唔多覺, 但我今日真係覺得好free好自由...雖然同一時間都真係有d掛住個女, 好想知個女訓唔訓到, 用奶樽食奶又順唔順利, 4安半夠唔夠食等等...

番到外家9點, 乖豬剛訓著, 我抱住佢走時唔知點解覺得好開心...估唔到離開幾個鐘都會有呢個感覺, haha, 睇怕我都唔會捨得放低佢再長d時間...

13/8: 又抱乖豬出沙田jusco掃貨, 由於而家都handle到自己煮飯, 所以一次過買o左400蚊o野, 爽!!

今日幫乖豬著呢件我之前淘寶買錯o左o既'開檔衫'...好似耍緊太極!!!

14/8: 今日lunch終於終於抱乖豬番男家喇!!原來第一次番男家都有利是收!!我同老公食完奶奶煮o既粥同麵到差唔多3點就走, 因為要番去餵奶!!(其實o係男家餵奶唔係唔得, 但我唔多想...既竟暫時奶奶佢接受我用呢個excuse早走咁當然都係早走好d...)

朝早我屋企人上o黎先, 乖豬今日好精神, 笑晒!!!

沖涼時grandpa引到佢大笑, 謀殺唔少相!!

下午番99度, 因為朝早玩得太耐, 乖豬超級支力, 係99屋企好忟憎!!!

做o左隻扭計豬!!!

15/8: 今日3點幾餵完奶, 見乖豬心情好似ok, 天氣又好, 終於第一次抱佢落屋企會所個公園仔行下!!其實99己經叫過我好多次抱佢落去, 等佢可以吸下新鮮空氣曬下太陽 ,唔好有冷氣病!!

4點落去, 公園只得兩個剷緊雜草o既工作人員, 不過正因為咁, 一去到就聞到好清新o既草味, 唔知乖豬鍾唔鍾意呢d味呢? 行唔夠幾步, 乖豬就...開大...其實都知大包o架喇, 但剛剛先行, 無理由咁快打道回府咁掃興嘛...於是我就冒住'漏便便' o既危險繼續抱住佢行公園!!

呢張應該係大大中...

好熱呀...

由於無人, 所以我就自言自語同乖豬傾計, 叫佢睇下花花草草, 聽下雀仔唱歌, 不過佢全程au au豆豆, 唔知係咪熱得滯無心機!!! 至於曬太陽, 4點呢個時間都幾好, 因為半個公園被太陽曬到, 再晏d就無太陽曬, 抱佢行公園都係想佢曬太陽嘛!!! 

陽光好好呀, 乖豬你要吸收多d vit d呀!!

熱到嘔白泡喇...

最後我行o左4個圈, 大約20min啦, 見到乖豬無厘反應, 額頭仔又出晒汗, 似乎都真係熱夠喇, 於是就抱佢番屋企, haha, 原來真係漏便便, 好彩抱住佢都無整污漕我件衫!!

曬完太陽出o左汗, 去埋便便再沖個靚涼, 我一心以為佢會訓得好甜...點知, 甜就甜, 一陣咁多咋...之後佢6點幾開始就喊得好惡好大聲, 我又要煮飯, 都理唔到佢, 只係嚇得我不斷諗係咪落公園俾o野咬, 身痕唔舒服所以喊得咁大聲...結果, 8點幾老公要抱住佢先食到飯, 但抱完一輪到9點幾, 佢又正常番, 真係虛驚一場...可能佢咁惡只係大個o左扭抱o卦...真係唔知發生咩事...

16/8: 99帶親友o黎探乖豬, 一入門口就問親友乖豬似邊個, 兩位親友都答似媽媽, 及後再補多句, 眼以上又好似似爸爸, 之後99就自我淘醉對住乖豬 '係呀, 似晒爸爸呀'...

我同老公子講, 佢都覺得好好笑...haha!!!

其實聽到多數人話乖豬似我, 我都好開心, 所以我都好明呢個心態, 就係想乖豬似自己!!! 其實我爸媽都係咁, 成日話乖豬似足我, 特別係沖涼時, 而奶奶又會成日話乖豬似足我老公子, haha, 真係各有各睇法呢!!

正面無咁似 (始終覺得眼以上似老公子多d, 但乖豬對眼有時又的確係圓圓大大, 又好似似我...)

呢個側面真係好似!!!

17/8: 老公子出trip, 我又心野, 所以今日抱o左乖豬番娘家!!!其實我媽頭痛得好勁呀, 但佢又好想見乖豬喎, 抱佢番娘家都唔知係tum我媽開心定令佢更加頭痛 (因為要煮飯俾我食, 佢又肉緊bb掛住抱b自己無訓覺休息!!)...

又扮靚!!!

18/8: 尋日番娘家搞到我細佬妹好開心, 話要約埋拖友番o黎食飯見bb, 所以今日又抱o左乖豬番娘家喇!!!細佬妹拖友都有成個月無見乖豬喇, 佢o地雖然有睇相, 但見到真b都忍唔住覺得bb大得好快, 話乖豬大件o左好多!!

我同我妹好努力引乖豬笑, 乖豬亦交足功課, 多多表情!!!

著到咁靚都係要狼吞拳頭, 失禮晒, haha!!