第十四周 (20/8 - 26/8): 乖豬會唱歌

19/8: 今日終於抱o左乖豬出巿區探佢太婆喇!!!其實都講o左好多日話要去探佢, 但我媽頭痛, 所以遲遲未行動!!

我婆婆一年前開始無記性喇, 應該係老人癡呆, 聽我媽講, 近排佢連剛剛o個餐食o左咩, 甚至有無食都開始唔記得...聽到都真係好擔心!!所以我都好想抱乖豬去探佢, 我諗見到bb老人家點都會開心d嘛!!!

其實身體上我婆仲未有咩大問題o既, 只係血壓高同埋唔多食o野, 呢日我媽買o左婆婆最愛o既魚柳包同蛋榚上去, 婆婆只係飲熱奶茶唔食包, 話佢食完早餐好飽唔食住...點知講下講下, 原來佢所謂o既'早餐',只係熱奶一杯!!!唔怪得我媽成日話婆婆唔食o野啦...我媽講番, 原來平時佢去探婆婆時都係咁, 叫一個飯2份食, 我婆只係食一啖就好快放低食具話飽, 掉轉有時食布甸呢d凍甜食佢就大大杯都食晒, 真係越老越似番個小朋友呢!!!

婆婆見到佢個'膝'都好開心, 猛話我咁遠就唔好帶bb出o黎咁辛苦, 又讚下乖豬靚女, 不過無我細個時咁大對眼...但佢好似唔多記得佢曾經去過我屋企探我同bb喇, 因為佢係都話未封過利是俾bb喎...似乎我婆真係對好耐之前o既事記得好清楚, 近o既先唔記得!!

最後要記低一件趣事, 就係我婆抱住乖豬影o左幾張相後, 乖豬忽然望到有d唔妥, 佢斜眼望住我婆定晒神, 然後...扁嘴, 扁o左一陣仲忍唔住索鼻, 再一陣就真係喊出o黎呢!!!下午, 好友rebec o黎探我, 乖豬都肯俾佢抱, 仲有玩有笑, 似乎乖豬少見老太婆, 覺得白頭髮縐皮o既老婆婆好怪相覺得驚呢!!!

乖豬仲未望到太婆抱緊佢, 所以仲未喊~

珍貴o既合照：我婆,我媽,我同埋乖豬都係家中大女呢!

20/8: 今日乖豬3個月大喇!!朝早抱埋乖豬同我爸媽lunch, 撞到爸爸同事, 咁當然要抱乖豬打個招呼啦, 之後我爸話佢呢個同事好羡慕佢, 因為佢可以抱孫, haha!!!

下午, 我o地一家三口去o左中學同學新居玩, 初初都可以放低乖豬訓o左一陣, 我同老公子就玩wii, 但可能太嘈喇, 都係嘈醒左, 之後我同老公子就輪住抱, 不過都玩得好開心, n咁耐無玩過wii呢!!!

因為趕住7點前番屋企餵奶, 所以夜晚我同老公子自己食, 登登...公仔麵+sushi!!!我諗我都有近1年無食過sushi喇, 雖然我唔算特別恨食, 但咁耐無食過真係覺得特別好味, hehe!!

是晚, 乖豬仲送o左個surprise俾我同老公子慶祝佢3個月大, 就係第一次笑出聲呀(乖豬3個月大, 送俾爸媽厚禮一份: 第一次笑出聲!!), 仲要好彩拍低到, 真係開心!!!

21/8: 今日第一次抱乖豬同6299飲茶, 乖豬其實好眼訓, 但去到陌生地方又猛望燈唔訓, 望到好支力好攰先訓呢!!

呢晚我會出街wet, 所以第一次放低個女俾佢同老公子獨處3小時, 由於呢日到下午乖豬都未便便, 所以老公子好擔心 (因為佢一直未幫過乖豬換有便便o既片), 結果, 乖豬真係鍚晒佢爸爸, o係餵7點幾餐奶時邊食邊去, 仲要又漏污漕衫...當然, 又係要我呢位媽咪處理啦, 老公子就鬆一口氣喇!!

我7點幾近8點出街, 10點半番到屋企,一番到屋企老公子好似遇到救星咁, 仲即刻話要再沖涼...haha, 原來個女狂喊扭眼訓, 抱住訓左一放低落床就喊,結果先後三次放低再抱起, 搞到老公子好忙, 忙到出晒汗猛話辛苦...haha!!!!!我聽見覺得好搞笑呀, 老公子, 你而家明白我呢個全職媽咪都唔易做吧??? 

22/8: 今日一朝同乖豬唱歌仔, 好叻女呀, 佢竟然跟住我唱!!!開頭都唔肯定o架, 但唱多幾首, 佢真係我唱歌時先出聲, 我唔唱講o野佢係唔會出聲o架, 好得意呀!!!

(後補: 同上次做開籠雀同人傾計一樣, 佢今次唱歌又係唱o左兩日多d就無再跟住唱喇, 唔通佢貪新鮮??以為自己識o左就唔再玩???)

另，呢日諗住開新玩具俾Koey玩，點知原來未玩到住，又收番埋!

24/8: 今日又帶乖豬行公園, 但超熱, 行o左15分鐘放棄o左!!!

25/8: 今日我爸放假, 帶o左乖豬出沙田食lunch同埋行街, 可能係去o左陌生環境, 佢明明超眼訓但又唔訓, 周圍睇, 後來訓著o左, 點知15-20分鐘後又醒, 真係陰公, 似乎BB出街真係訓唔到覺, 因為呢個世界太吸引喇, haha!!!

另外, 爸媽話乖豬呢排好似無乜肥, 'un chi chi'咁...um...我都有少少覺, 但抱佢上磅都13磅,其實都適中呀, 應該仲係中碼重量, 不過有時我都會覺得乖豬面長長唔夠圓...bb當然肥d會可愛d...