報幼稚園有感

報學校季節又開始了, 今年我唔再係旁觀者, 而係'怪獸父母'中o既一員喇!!

對於自己小朋友o既將來, 我同老公子一直抱住'順其自然'o既心態, 只要唔係表現差到出現學習問題就OK!! 所以唔好話報N班, 上年因為又大肚又搬屋, 我連幫Koey報playgroup都無時間, 放棄o左...可想而知我同老公子o係呢方面o既態度係幾咁'開放', '開通'!!!

所以老實講, 開頭睇到fb 其他媽咪o既幼稚園list真係有D心驚, 當時心諗: o下? 乜咁大陣仗? 我連research都無時間喎~~~就係咁, 我由原本'0壓力', 變成'我有壓力', 用o左幾日時間參考blog友分享o既list, 砌o左個15間o既list 出o黎...

好多喱...

...無計!! 剛搬o黎呢區真係唔多熟有咩幼稚園, 網上討論又唔太多!!! 至於九龍塘D名校呢...見自己離該區又唔算遠, 網上又見個個都報, 我當然又唔執輸...搏抽中都好嘛...

不過呢...我又真係無咁多時間research邊間課程深/淺, 邊間老師有熱誠/愛心, 邊間活動教學...於是就大包圍...

近屋企, 揀!
近火車站, 揀!
唔使排隊拎表, 揀!

結果咪咁多間囉!!!

上星期某日, 原來有間要親自交表, 於是就叫媽咪幫手湊住Koey & Kobe, 自己一個出去!!!


嘩, 龍尾轉晒彎, 真係嚇到我眼都突埋, 排咁耐, 會唔會趕唔切番去餵Kobe...

不過我好彩, 近龍尾左右撞到中學同學, 可以排少一陣, 最後花o左一個小時左右完成手續!!

雖然時間唔係想像中咁耐, 但為o左報幼稚園而要咁辛苦, 辛苦完又唔擔保人o地一定收你, 就算收o左亦唔擔保仔女前途一片光明...而同一時間, 我又有其他差唔多名聲o既幼稚園選擇, 咁我真係諗唔到有咩理由要咁辛苦報你...

所以, 我決定將我list上面, 要親自交表o既, delete! (除o左屋企樓下o個間外!)

經過一論填表...

貼郵票...

寄信...

呢個星期尾, 我終於差唔多完成手上11間幼稚園o既報名手續喇, 總算o係忙錄之中, 完成呢件大事!! 但同一時間, 近日新聞不斷報道北區幼稚園俾雙非攻陷, 情況誇張到派表前6日已經排隊...

雙非搶幼園位 持8申請表照排
索價二千人仔 表格淘寶有售
幼稚園排隊黨800元賣籌
港爸媽明遊行 爭優先入學
不滿面試須懂廣東話 雙非家長：早知不來排隊

雖然, 引伸o既雙非問題已經同'怪獸家長'o既問題有所唔同, 但作為今年要報學校o既'怪獸家長'之一, 我又覺得單純D睇, 唔理大家係咩身份, 其實都同樣係想俾最'好'o既子女...同為當局者, 就算我同老公子幾咁'開通', 我又何嘗唔係人報我報, 最後報o左11間咁多!!!! 唉, 有時真係不免感嘆, 報幼稚園o者, 本來只係好簡單o既事, 但o係香港呢個逐漸畸型o既社會竟然都可以咁複雜, 真係好無奈...

Anyway, 唔報都報o左喇, o黎緊o既Interview, 我可以做o既, 就只有俾定心理準備Koey, 其餘o既, 就要靠佢自己喇, 希望怕人o既佢可以大膽D, 唔好喊到嚇怕晒D interviewer已經好好!!!

加油呀, Koey!!! 為你自己o既將來努力呀, 媽咪同爸爸, 仲有細佬, 都會為你加油o架!!!